Per Motrat Muslimane

[abdurrahman_tir]

Hutbe xhumaje në mesxhid-ul-haram nga Muhamed es-Subejl




Lavdi Allahut, Zotit të botëve. Paqja dhe mëshira qofshin mbi të dërguarin, mbi familjen e tij dhe mbi shoqëruesit e tij.



Vëllezër muslimanë, kini frikë Allahun ashtu siç duhet pasur frikë Atë dhe mos vdisni, përveç si muslimanë. Allahu i lartësuar ka thënë:



» Kini frikë Allahun, nëpërmjet të cilit kërkoni [të drejtat tuaja], dhe mos ndërprisni lidhjet familjare. Vërtet, Allahu është mbikëqyrësi juaj i përhershëm « [en-Nisa, 1]



Vëllezër në fe, Allahu na rikujton për bekimet e Tij dhe na i shpjegon shenjat e Tij, të cilat tregojnë favoret dhe mirësinë e Tij. Ai ka thënë:



» Ndër shenjat e Tij është edhe fakti që ai ka krijuar për ju gra nga veta juaj, që të preheni tek ato, dhe mes jush vendosi dhembshuri dhe mëshirë. Vërtet, në këtë ka shenja për njerëzit që mendojnë « [er-Rum, 21]



Në këtë ajet, Allahu na e tërheq vëmendjen për një bekim të madh, të cilin na e ka dhuruar. Ky bekim është marrëdhënia mes burrit dhe gruas, me anë të cilit është larguar izolimi, është arritur lumturia dhe rehatia në jetën e kësaj bote. Prandaj, njeriu duhet ta ruaj këtë bekim e të mos bëhet kjo shkak për shkatërrimin e tij.



Muslimanë të dashur, Allahu i ka krijuar robërit e vet me aftësi të ndryshme për të zotëruar me çështjet e jetës së tyre, që të arrijnë lumturinë në këtë jetë dhe në jetën e përtejme. Për shkak të këtij ndryshimi, Ai i bëri disa robër udhëheqës ndërsa të tjerët të nënshtruar.



Ai ka zgjedhur për ta udhëheqës që drejtojnë punët e tyre. Ai e ka bërë burrin drejtues të shtëpisë, kurse gruan kujdestare të shtëpisë së burrit. Sepse shtëpia është shtylla e jetës, baza e lumturisë, rehatia e stabiliteti i saj. Shtëpia s'mund të qëndrojë, përveç nëse burri kryen detyrat e tij, përkujdeset për familjen dhe i trajton ata butësisht. E njëjta gjë vlen dhe për gruan.



Gruaja muslimane duhet t'i kryejë detyrat e saj ndaj burrit dhe fëmijëve, sepse shtëpia është shkolla e parë e jetës dhe baza e mirësjelljes për fëmijët. Ajo duhet t'u sigurojë atyre një edukim të shëndoshë islamik, i cili do të çojë në një jetë të mirë në këtë botë dhe në jetën e përtejme.



Vëllezër në Islam, një fatkeqësi e madhe që ka goditur shumë njerëz këtyre ditëve, është mospërfillja e çështjes së shkurorëzimit. Disa burra prishin martesën me nguti për arsyen më të vogël dhe harrojnë çdo të mirë që ajo i ka bërë atij, duke u sjell padrejtësisht me të dhe me fëmijët e saj. Në fund, ai pendohet dhe vuan për shkak të këtij veprimi. Shkaku i këtij akti të paarsyeshëm është hidhërimi i shpejtë, tundimi dhe sjellja e keqe. Ky veprim e shkatërron shtëpinë dhe bën rrëmujë në familje.



Burri duhet ta kontrollojë vetveten dhe të mos e lë bashkëshorten ta tërbojë. Kurdo që ai të ndjehet i irrituar, duhet ta ndërrojë pozitën, siç ka instruktuar i dërguari i Allahut [salallahu alejhi ue selam], si ndryshimi i pozitës nga qëndrimi në këmbë në ulje, apo nga ulja në shtrirje, apo ta dalë nga shtëpia, derisa t'i largohet hidhërimi dhe të vijë në vete. Ai, po ashtu, duhet ta kujtojë instruksionin e pejgamberit:



"Ju këshilloj ta ruani gruan, se ato janë krijuar nga brinja, dhe pjesa më e përdredhur e brinjës është pjesa e epërme. Nëse përpiqesh ta drejtosh atë, do të thyhet; nëse e lë, do të mbetet e përdredhur. Pra, ruajeni gruan".



Ai [salallahu alejhi ue selam], po ashtu, ka thënë:



"Asnjë besimtar të mos e urrejë një besimtare. Nëse sheh në të diçka që nuk e pëlqen, do të gjejë diçka tjetër që i pëlqen".



Direktiva pejgamberike është bazë për marrëdhënie të mira mes burrit dhe gruas. Burri duhet të vërejë sjelljet/cilësitë e lavdërueshme të bashkëshortes dhe t'i krahasojë ato me sjelljet e saja që nuk i pëlqen. Sepse, kur burri ta bëjë këtë, nuk do t'i vejë re gabimet e saj, për shkak të mirësjelljes mbizotëruese tek ajo.



Njeriu i urtë duhet të dijë se arritja e përsosurisë është pamundshme. Nëse ai shikon në vetveten, do të gjejë më shumë mangësi sesa që sheh në bashkëshorten e vet. S'ka mundësi t'u bëhet shmangje mospajtimeve me bashkëshorten, me ndonjë të afërm apo më shokët. Le t'i kujtojë fjalët e Allahut të madhëruar:



» Jetoni me to një jetë të ndershme. Nëse nuk pëlqeni diçka tek ato, mund të ndodhë që të mos e pëlqeni një gjë, por Allahu, nëpërmjet saj, mund të sjell mjaft të mira « [en-Nisa, 19]



Vëllezër muslimanë, një person me mendje të shëndoshë, me natyrë të pastër dhe me vetëdije të paanshme nuk do t'ia mohojë një gruaje të drejtat e saja apo të tregohet i padrejtë ndaj një gruaje e cila është sjellë nga larg për të dhe i është bashkuar me një lidhje martesore, ku secili prej tyre ka gjetur prehje në tjetrin, siç ka thënë Allahu:



» Ndër shenjat e Tij është edhe fakti që ai ka krijuar për ju gra nga veta juaj, që të preheni tek ato, dhe mes jush vendosi dhembshuri dhe mëshirë «



Pavarësisht nga kjo dashuri dhe mëshirë që burri dhe gruaja gjejnë tek njëri-tjetri, gruaja ende duhet të jetë e dëgjueshme ndaj burrit, të kujdeset për shtëpinë e tij dhe ta bëjë atë të gëzuar. Pas tërë kësaj, a mundet një njeri i arsyeshëm ta lëndojë këtë grua, ta bezdisë, ta poshtërojë, t'i bëjë padrejtësi, ta rrahë e ta shkurorëzojë?



O grua që Allahu të ka bekuar me nder, me respekt dhe me dëlirësi, dhe të ka bërë edukatore dhe kujdestare të familjes, mbahu fort për këtë bekim duke përmirësuar mirësjelljen tënde dhe duke bashkëvepruar me bashkëshortin tënd në mënyrën më të mirë, se të drejtat e bashkëshortit janë të mëdha. Prit shpërblim nga Allahu për dëgjueshmërinë tënde ndaj bashkëshortit, për shërbimin tënd ndaj tij, për qëndrueshmërinë tënde dhe për mosvënien re të gjërave që nuk bien ndesh me fenë apo me standardin e mirësjelljes. Zmbrapsi dyshimet e liga, akuzimet e çmendura dhe shprehjet lënduese. Mëso nga problemet bashkëshortore të të tjerëve, nga ndarjet dhe nga rrëmujat që kanë shkaktuar këto probleme.



O ju bashkëshortë e bashkëshorte, të gjithë ju duhet të silleni mirë ndaj njëri-tjetrit. Le të mbartë me durim secili prej jush atë çfarë bën shoqëruesi/ja. Kujtoni që secili prej jush ka borxh obligime ndaj bashkëshortit/es, siç ka thënë Allahu:



» Dhe ato [gratë] kanë të drejta [sa i përket harxhimeve për jetesë nga ana e burrit] të ngjashme me ato të burrave aq sa është e arsyeshme. Por, burrat kanë një shkallë [përgjegjësie] më shumë se ato « [el-Bekare, 228]



Muslimanë të dashur, kini frikë Allahun dhe kryeni detyrat ndaj Tij. Mbrojeni veten me durim dhe me përmbajtje. Kaloni disa gjëra që bëni, sepse përsosuria është e paarritshme, kurse falja e gabimeve të të tjerëve është ndër cilësitë më bujare. Ta dini se Allahu u jep epërsi disa periudhave kohore ndaj të tjerave dhe i nderon disa muaj, ditë e net më shumë sesa të tjerët, me qëllim që robërit e Tij besimtarë të bëjnë punë të mira në to. Ndër këto kohëra është muaji ramazan, të cilin Allahu e ka bekuar dhe e ka bërë një periudhë madhështore të bekimeve dhe faljes, dhe ngritjes së gradave të robërve besnikë të Tij. Ky muaj tash ka mbërritur, prandaj duhet ta pranoni atë gëzueshëm.



» Le të gëzohen në të. Kjo është më mirë sesa ajo [pasuria] çfarë kanë grumbulluar ata « [Junus, 58]



Muaji ramazan ka një natë që është më e mirë se njëmijë muaj. Allahu e ka bërë obligim agjërimin e këtij muaji dhe e ka bërë namazin në netët e tij detyrë të dorës së dytë. Kushdo që ofron ushqim për një agjërues musliman, do të ketë falje mëkatesh, do të lirohet nga zjarri dhe do të ketë shpërblimin e njëjtë si të agjëruesit musliman, pa shkaktuar ndonjë zbritje në shpërblimin e këtij të fundit. Ai që e ushqen një agjërues musliman gjatë ramazanit, do të pijë nga Pellgu i pejgamberit dhe s'do ta ndjejë më etjen, derisa të hyjë në xhenet. Allahu ka thënë:



» Muaji ramazan në të cilin u zbrit Kur'ani, udhëzim për njerëzimin, dëshmi e qartë dhe kriter [mes të gabuarës dhe të saktës]. Pra, kushdo prej jush që sheh [hënën e re në natën e parë] muajin, duhet ta agjërojë atë; kushdo që është i sëmurë apo në udhëtim, numër të njëjtë ditësh [që nuk i ka agjëruar] nga ditët tjera. Allahu dëshiron t'jua lehtësojë, nuk dëshiron t'jua vështirësojë. [Ai do që] të plotësoni numrin e ditëve. Madhëroni Allahun që ju ka udhëzuar, me qëllim që të jeni falënderues ndaj Tij « [el-Bekare, 185]

[abdurrahman_tir]

Shejh Dr. Muhamed Musa Aal Nasr
Marrë nga “Pejgamberi në shtëpi”, faqe 28-31




- Durimi ndaj dëmit që vjen nga gratë



Pejgamberi [salallahu alejhi ue selam] mbartte me durim lëndimet nga gratë e tij. Nganjëherë, gratë e tij e bënin atë të zmbrapsej nga ndonjë çështje, siç e kanë përmendur dijetarët. Dhe në hadith:



"Gruaja është krijuar nga brinja dhe pjesa më e kthyer e brinjës është pjesa e epërme e saj. Nëse mundohesh ta drejtosh, do ta thyesh, kështu që ju urdhëroj të keni kujdes ndaj gruas".1



Pra, gruaja është e krijuar e tillë – ka shtrembërime, të mira e të këqija. Ty, o musliman, o rob i Allahut, të takon të jetosh dhe të jesh i mirë ndaj saj. Nëse do një grua me cilësi të përsosura, kurrë s'do ta gjesh. Dhe sa e paarritshme është kjo! I Dërguari i Allahut [salallahu alejhi ue selam] ka thënë:



"Asnjë besimtar të mos e urrejë një besimtare. Nëse urren ndonjë cilësi të saj, do të gjejë kënaqësi në një tjetër cilësi".2



Ai [salallahu alejhi ue selam], madje, ishte i duruar me gratë e tij, kur ato erdhën të kërkonin para prej tij për të harxhuar ndërsa ai kishte hequr dorë prej tyre për një muaj, pra, ai nuk flinte me to. Allahu pastaj shpalli:



« O pejgamber, thuaju grave tua:'Nëse e doni jetën e kësaj bote dhe zbukurimet e saj, ejani, unë do t'ju furnizojë dhe do t'ju lëshojë me zemërbardhësi. Por, nëse e doni Allahun dhe të Dërguarin e Tij si edhe shtëpinë e jetës së përtejme, atëherë, vërtet, Allah ka përgatitur për bamirësit mes jush një shpërblim të madh »3



Kjo u qe drejtuar grave të pejgamberit [salallahu alejhi ue selam].



Një ditë prej ditësh, Usama bin Zejd – të cilin e donte pejgamberi – u gremis te dera dhe e lëndoi fytyrën. Pejgamberi [salallahu alejhi ue selam] i tha Ajshes:"Largoje dëmin prej tij [dmth gjakun]". Mirëpo, ajo ndjeu neveri dhe nuk e pëlqeu të lante fytyrën e tij apo t'ia fshinte atë prej fytyre. "Kështu, ai [salallahu alejhi ue selam] nisi të thithte gjakun prej tij dhe t'ia hiqte prej fytyrës" – dmth ai u përkujdes vetë për këtë. Ai nuk e goditi Ajshen, nuk e mallkoi e as nuk e qortoi, por u përkujdes vetë për këtë punë dhe tha:"Po të ishte Usama vajzë, do ta zbukuroja e do ta vishja dhe do ta martoja".4



Ky ka qenë karakteri i pejgamberit [salallahu alejhi ue selam]. Sot, nëse një burrë kërkon një gotë ujë dhe ajo ia vonon atë, ai e përmbys tërë shtëpinë. Person i tillë nuk dëshiron të bezdiset me asnjë punë shtëpie.



--------------------------------------------------------------------------------
1. el-Buhari [4787, 4786].
2. Muslim [2/1091, 1469], Ahmed [2/329] dhe të tjerët.
3. el-Ahzab, 28-29. Dhe hadithi gjendet në el-Buhari [4/1796, 4507-8, Muslim [2/1103, 1475].
4. Ibn Maxheh [1/635, 1976]. El-Busijrij ka thënë se isnadi i tij është sahi, nëse el-Behij e ka dëgjuar atë nga Ajsha. Ahmed [6/139, 22] dhe të tjerët.

--------------------------------------------------------------------------------


- Përulësia e pejgamberit [salallahu alejhi ue selam] në shtëpinë e tij me familjen e tij



Pejgamberi [salallahu alejhi ue selam] hante atë që mund të gjendej në shtëpinë e tij. A nuk shohim sot shumë burra të rrahin e mallkojnë gratë e tyre për shkak se gatimi i tyre s'është i cilësisë së duhur apo se e vonojnë atë? Madje, më ka mbërri që disa burra nganjëherë marrin tenxheren e valë dhe e zbrazin mbi kokën e gruas!! Sa të shtypura janë gratë që jetojnë me burra të këtillë! Dhe, nganjëherë, ndodh që ai të shpërndajë ushqimin gjithandej shtëpisë vetëm sepse nuk i pëlqen. A është kjo një sjellje muslimani?! Pasha Allahu, jo!



Pejgamberi [salallahu alejhi ue selam] hynte në shtëpi dhe thoshte:"A kemi ushqim?", dhe merrte përgjigjen:"Jo, nuk kemi", pas çka ai thoshte:"O Allah, po agjëroj".5 Dhe "Ai, madje, nuk gjente as hurme të cilësisë së ulët për ta kënaqur barkun e tij".6



Dhe Ajsha ka thënë:"Një hënë e re, pastaj një hënë e re dhe pastaj një hënë e re kalonte dhe zjarri nuk ndizej [për zierje] në shtëpinë e të Dërguarit të Allahut". U tha:"Me çka ushqeheshit, oj teze?" Ajo tha:"Me dy gjërat e zeza: hurma dhe ujë".7



Ai hante nga ajo çfarë kishte dhe nuk bezdisej për atë që s'kishte, dhe ai kënaqej me atë çfarë kishte në dispozicion.



Dhe nuk dihet për të [salallahu alejhi ue selam] t'i ketë "bërë naze ushqimit ndonjëherë. Nëse i pëlqente, e hante; nëse s'i pëlqente, nuk e hante".8 Ai pa një grup teksa hanin një hardhucë, u ul me ta dhe e hëngri. Dhe, në një rast tjetër, ai pa një grup njerëzish teksa hanin hardhucë, u ul me ta dhe ajo iu ofrua, por ai nuk e hëngri e as nuk e ndaloi ngrënien e saj.9



--------------------------------------------------------------------------------
5. Muslim [1950-1]. En-Nisai [2289] dhe të tjerët.
6. Muslim [4/2284-5, 2977-8]. Et-Tirmidhi [4/506, 2372] dhe të tjerët.
7. el-Buhari [2379].
8. el-Buhari [3/1306, 3370]. Muslim [3/1632, 2064].
9. el-Buhari [5/2105, 1944].

--------------------------------------------------------------------------------

[abdurrahman_tir]

Autor: Shejkh Mukbil bin Hadi el-Uadi’i (Allahu e mëshiroftë)
Burimi original: “Fetva rreth Gruas Muslimane” fq. 20



Pyetje: Kush janë cilësitë dalluese të gruas Selefije?

Përgjigje: Kjo kërkon një përgjigje të gjerë e të gjatë. Ne do të cekim atë që do na i bëjë të lehtë Allahu Subhanehu ue Te’ala.

Është cilësia themelore e gruas Muslimane të kapurit fort pas Librit të Allahut Subhanehu ue Te’ala dhe pas Sunetit të të Dërguarit të Allahut (sal-lAllahu ‘alejhi ue alihi ue sel-lem) aq sa të ketë mundësi, sipas kuptimit të Selefus-Salih (të Parët tanë të Mirë). Gjithashtu, është mirë që ajo të bashkëveprojë me Muslimanët në një mënyrë të mirë... e poashtu edhe me mosbesimtarët. Allahu Subhanehu ue Te’ala thotë në Librin e Tij:

وَقُولُوا لِلنَّاسِ حُسْنًا

“...t’u thoni fjalë të mira njerëzve (duke i urdhëruar për mirë dhe duke i ndaluar nga e keqja, si dhe duke u thënë të vërtetën për Muhamedin).” [el-Bekare, 83]

إِنَّ اللَّهَ يَأْمُرُكُمْ أَنْ تُؤَدُّوا الأمَانَاتِ إِلَى أَهْلِهَا

“Allahu ju urdhëron që amanetet t’jua ktheni atyre që u përkasin.” [en-Nisa, 58]

وَإِذَا قُلْتُمْ فَاعْدِلُوا

“Dhe kur të flisni, thoni të vërtetën.” [el-En’am, 152]

Dhe Allahu Subhanehu ue Te’ala thotë:

يَا أَيُّهَا الَّذِينَ آمَنُوا كُونُوا قَوَّامِينَ بِالْقِسْطِ شُهَدَاءَ لِلَّهِ وَلَوْ عَلَى أَنْفُسِكُمْ

“O besimtarë! Bëhuni zbatues të palëkundur të drejtësisë, duke dëshmuar në emër të Allahut, qoftë edhe kundër jush...” [en-Nisa, 135]

Ajo e ka obligim që t’i përmbahet veshjes Islame dhe të qëndrojë larg atyre veshjeve që e përngjasojnë me armiqtë e Islamit.

Imam Ahmedi ka transmetuar në Musnedin e tij nën autoritetin e ‘Abdullah Ibn ‘Umerit (radij-Allahu ‘anhu) se ai ka thënë: I Dërguari i Allahut (sal-lAllahu ‘alejhi ue sel-lem) ka thënë: “Ai që i përngjason një populli është prej tyre.”

Dhe Zoti i Lartësuar ka thënë në lidhje me çështjen e veshjes dhe rrobave:

يَا أَيُّهَا النَّبِيُّ قُلْ لأزْوَاجِكَ وَبَنَاتِكَ وَنِسَاءِ الْمُؤْمِنِينَ يُدْنِينَ عَلَيْهِنَّ مِنْ جَلابِيبِهِنَّ ذَلِكَ أَدْنَى أَنْ يُعْرَفْنَ فَلا يُؤْذَيْنَ وَكَانَ اللَّهُ غَفُورًا رَحِيمًا (٥٩)

“O Pejgamber, thuaju grave dhe vajzave të tua, si dhe grave të besimtarëve, që të lëshojnë mbulesën e tyre (të kokës) përreth trupit. Kjo është mënyra më e përshtatshme që ato të njihen (si gra të ndershme) e të mos ngacmohen nga të tjerët. Me të vërtetë, Allahu është Falës dhe Mëshirëplotë.” [el-Ahzab, 59]

Imam Tirmidhiu ka transmetuar në Xhamiun e tij hadithin e ‘Abdullah Ibn Mes’udit (radij-Allahu ‘anhu) në të cilin ai ka thënë: I Dërguari i Allahut (sal-lAllahu ‘alejhi ue alihi ue sel-lem) ka thënë: “Gruaja është diçka e cila duhet të mbulohet, sepse nëse ajo del nga shtëpia e saj Shejtani e ngre atë (që ta shohin njerëzit).”

Ne e këshillojmë atë që të sillet mirë me burrin e saj nëse ajo kërkon një jetë të lumtur, sepse me të vërtetë Pejgamberi (sal-lAllahu ‘alejhi ue alihi ue sel-lem) ka thënë: “Nëse një burrë e thërret gruan e tij në shtrat dhe ajo refuzon, melaiket e mallkojnë atë.” [2]

Kurse në Sahihun e Muslimit qëndron: “...dhe ata që janë në qiej janë të zemëruar me të.” [3]

Gjithashtu, ajo duhet të kujdeset për fëmijët e saj sipas normave Islame, pasi është transmetuar nga Bukhari dhe Muslimi në Sahihët e tyre nga hadithi i Ibn ‘Umerit (radij-Allahu ‘anhu) ku ai ka thënë: I Dërguari i Allahut (sal-lAllahu ‘alejhi ue alihi ue sel-lem) ka thënë: “Të gjithë ju jeni barinj dhe secili prej jush është përgjegjës për kopenë e tij, kurse gruaja është bareshë në shtëpinë e burrit të saj dhe është përgjegjëse për kopenë e saj.” [4]

Gjithashtu, ka ardhur në dy Sahihët nga hadithi i Mu’kal Ibn Jasir (radij-Allahu ‘anhu) i cili ka thënë: I Dërguari i Allahut (sal-lAllahu ‘alejhi ue alihi ue sel-lem) ka thënë: “Çdo burrë të cilit Allahu i ka dhënë sundim mbi disa njerëz dhe ai nuk kujdeset për ata me ndershmëri, ai kurrë nuk ka për të nuhatur aromën e Xhenetit.” [5]

Ajo nuk duhet të merret me da’uet përpara edukimit të fëmijëve të saj, sepse është e domosdoshme që ajo të jetë e kënaqur me gjykimin e Allahut për dallueshmërinë e burrit mbi gruan. Allahu Subhanehu ue Te’ala thotë:

وَلا تَتَمَنَّوْا مَا فَضَّلَ اللَّهُ بِهِ بَعْضَكُمْ عَلَى بَعْضٍ لِلرِّجَالِ نَصِيبٌ مِمَّا اكْتَسَبُوا وَلِلنِّسَاءِ نَصِيبٌ مِمَّا اكْتَسَبْنَ وَاسْأَلُوا اللَّهَ مِنْ فَضْلِهِ إِنَّ اللَّهَ كَانَ بِكُلِّ شَيْءٍ عَلِيمًا (٣٢)

“Mos i lakmoni ato gjëra, me anë të të cilave Allahu i ka bërë disa nga ju të dallohen mbi të tjerët: meshkujt do të kenë pjesë prej asaj që kanë punuar e po ashtu edhe femrat do të kenë pjesë prej asaj që kanë punuar. Kërkoni prej Allahut nga mirësitë e Tij. Vërtet, Allahu është i Dijshëm për çdo gjë.” [en-Nisa, 32]

Dhe Ai thotë:

الرِّجَالُ قَوَّامُونَ عَلَى النِّسَاءِ بِمَا فَضَّلَ اللَّهُ بَعْضَهُمْ عَلَى بَعْضٍ وَبِمَا أَنْفَقُوا مِنْ أَمْوَالِهِمْ

“Meshkujt kanë autoritet mbi gratë, meqë Allahu u ka dhënë disa cilësi mbi ato dhe, meqë ata shpenzojnë për mbajtjen e tyre.” [en-Nisa, 34]

Dhe në dy Sahihët është transmetuar se Pejgamberi (sal-lAllahu ‘alejhi ue alihi ue sel-lem) ka thënë: “Unë ju urdhëroj që të silleni mirë me gratë tuaja, ngase ato janë krijuar nga brinja dhe pjesa më e lakuar e brinjës është pjesa e sipërme e saj; nëse do përpiqeni ta drejtoni atë keni për ta thyer dhe nëse e lini, ajo do të mbetet e lakuar.” [6]

Duhet që gruaja të tregohet e duruar me caktimin e Allahut që i ka dhënë burrit epërsi mbi atë dhe se kjo nuk do të thotë që ai e ka të nënshtruar atë. I Dërguari (sal-lAllahu ‘alejhi ue alihi ue sel-lem) ka thënë, siç gjendet në përmbledhjen e Imam Tirmidhiut: “Unë ju urdhëroj që të silleni mirë me gratë tuaja, sepse ato janë robëresha për të cilat ju keni përgjegjësi. Ju nuk keni pushtet tjetër mbi to përveç se në këtë aspekt. Ju keni një të drejtë mbi gratë tuaja dhe gratë tuaja kanë një të drejtë mbi ju. E drejta juaj mbi gratë është që ato të mos lejojnë askënd që të afrohet në shtratet tuaja duke ju hidhëruar juve dhe që të mos lejojnë askënd që ju e urreni të hyjë në shtëpitë tuaj. Dhe e drejta e tyre mbi ju është që ju të silleni mirë me to duke i furnizuar me veshmbathje dhe ushqim.” [7]

Në Sunene dhe në Musnedin e Imam Ahmedit, nga hadithi i Mu’auije Ibn Hejde, (transmetohet) se një burrë tha: “O i Dërguari i Allahut! Çfarë të drejte ka gruaja mbi burrin e saj?” Ai (sal-lAllahu ‘alejhi ue alihi ue sel-lem) tha: “Që ai ta ushqejë atë kur ushqehet vetë, ta veshë kur vishet vetë, të mos e godasë në fytyrë dhe të mos e shajë atë si e shpifur dhe as të mos e ofendojë, përveç kur është në shtëpi.”

E si kuptohet kjo, Allahu ju bekoftë?

Është e domosdoshme që të bashkëpunohet me njëri-tjetrin në mirësi. Burri punon me gruan e tij në një mënyrë Islamike, e ndihmon atë në kërkimin e dijes dhe e mbështet në da’uen e saj për tek Allahu. Edhe gruaja punon me burrin e saj në një mënyrë Islamike, e ndihmon atë në kërkimin e dijes, e mbështet në da’uen e tij për tek Allahu dhe në mirëmbajtjen e shtëpisë.

Vërtet, Allahu Subhanehu ue Te’ala thotë:

وَتَعَاوَنُوا عَلَى الْبِرِّ وَالتَّقْوَى وَلا تَعَاوَنُوا عَلَى الإثْمِ وَالْعُدْوَانِ

“Ndihmojeni njëri-tjetrin në punë të mira dhe në të ruajturit nga të këqijat dhe jo në gjynahe dhe shkelje të kufijve!” [el-Ma’ide, 2]

Dhe Allahu e di më së miri.



Fundnota:
[1] Ky hadith është transmetuar nga Tirmidhiu dhe gjendet në el-Xhami’us-Sahih të Shejkh Mukbilit. Shejkhul-Albani ka deklaruar se ai është sahih në Sahih et-Tirmidhi.
[2] Transmetuar nga Bukhari (n. 5193) dhe Muslimi (n. 122/1436).
[3] Transmetuar nga Muslimi (121/1436).
[4] Transmetuar nga Bukhari (n. 5200) dhe Muslimi (n. 2829).
[5] Transmetuar nga Bukhari (n. 7152) dhe Muslimi (n. 146)
[6] Transmetuar nga Bukhari (n. 5182, 3331) dhe Muslimi (n. 1468)
[7] Transmetuar nga Tirmidhiu (n. 1423), Ibn Maxheh (n. 1101) dhe Shejkhul-Albani, Allahu e mëshiroftë, e ka deklaruar hasen.





Përktheu Alban Malaj