Dollari

[ganoid]

Financat
Këmbimet valutore, dollari amerikan vazhdon të “fundoset”

Sipas ekspertëve, zhvlerësimi i dollarit nuk mund të përkthehet si një vlerësim i lekut shqiptar, por si një ndikim i lëvizjeve në tregjet ndërkombëtare të këmbimit të valutave






Autori / Data (05-12-2003)


Me sa duket dollari amerikan nuk po njeh fund në rënien e tij. Edhe gjatë seancës së djeshme në tregjet ndërkombëtare të këmbimit valutor monedha e gjelbër ka shënuar një nivel rekord rënieje kundrejt euros, më i ulëti i arritur nga dollari që nga momenti i hedhjes në treg të monedhës së përbashkët europiane. Dje një dollar është këmbyer me 0.83 euro, ndërkohë që niveli më i ulët ka qenë ai i dy ditëve më parë, 0.84 euro. Edhe kësaj here ndikimi i lëvizjeve në raportin midis dy monedhave kryesore në tregjet e huaja, ka qenë i menjëhershëm edhe në tregun e këmbimit valutor të vendit tonë. Dje dollari amerikan ka pësuar një zhvlerësim të konsiderueshëm kundrejt lekut, duke u blerë me 111.1 lekë, ndërkohë që një ditë më parë ishte blerë me 112.5 lekë. Sipas një specialisti në një agjenci të këmbimit valutor në kryeqytet, kjo rënie prej 1.4 lekësh nuk tregon për një vlerësim të monedhës sonë, por thjesht për një reflektim të lëvizjeve në tregjet ndërkombëtare. “Ky zhvlerësim i dollarit kundrejt monedhës shqiptare është thjesht një ndikim i ardhur nga dobësimi i theksuar i dollarit në tregjet ndërkombëtare të këmbimit valutor. Kjo do të thotë që në këtë rënie nuk ka ndikuar asnjë faktor i brendshëm”, shprehet ai.

Analistët
Një dobësim i tillë i monedhës amerikane dhe, si rezultat, vlerësimi i mëtejshëm i euros ka ndodhur në momentin që Banka Qendrore Europiane (BQE) nuk ndryshoi normat e saj të interesit. Një gjë e tillë, me sa duket, ka rritur shqetësimet rreth ndikimit të forcimit të monedhës europiane në rigjenerimin ekonomik të Eurozonës në të ardhmen. Ky vendim i BQE-së pritej nga tregjet, pavarësisht rritjes së euros kohët e fundit, pasi bankierët europianë sugjeruan se një ndryshim në politikën aktuale të normave të interesit ishte pak e mundshme të ndodhte. Duke ndjekur këtë vendim, monedha europiane arriti nivelin e saj më të lartë në këto ditë, 1.2150 dollarë. Shumë ekonomistë dhe studiues tregu kanë parashikuar një vlerësim të mëtejshëm të kësaj monedhe. Këtë vit monedha e përbashkët europiane ka pësuar një rritje rreth 13 për qind kundrejt dollarit dhe është më lart se 27 për qind që nga hyrja e saj në treg në prill të vitit 2002. Megjithatë, ekonomistët kanë frikë se, në qoftë se forcimi i monedhës do të dëmtojë eksportet dhe në qoftë se nuk rritet konsumi i brendshëm, atëherë rigjenerimi i Eurozonës do të ndrydhet. Të dhënat e publikuara këtë javë kanë treguar se rritja ekonomike e Eurozonës në tremujorin e tretë të këtij viti i detyrohet kryesisht rritjes së eksporteve. Kompanitë e mëdha kanë paralajmëruar me kohë që eksportet e tyre që janë konkurruese në tregje, janë të kërcënuara nga vlerësimi i euros.

Parashikimet
Por mbeten akoma “shpresa” për dollarin. Në fund të seancës së djeshme të tregut valutor të Nju-Jorkut, dollari amerikan pësoi një rritje të konsiderueshme, duke marrë parasysh nivelet akoma të ulëta në të cilat ndodhet. Kjo erdhi si rezultat i lajmit që presidenti amerikan Xhorxh Bush mund të ngrejë taksat e hekurit. Mendohet që kjo të ketë pasur një ndikim shumë të madh. Ka pasur edhe një ulje në shitjen e euros”, shprehet Philip Capone, një tregtar në Fortis Bank në Nju-Jork. Në bursën e Nju-Jorkut euro pati një rënie prej rreth 0.4 për qind, në nivelin e 1.2062 dollarëve, shumë më i ulët se niveli i 1.2155 dollarëve, sipas të dhënave të Rojters.

Rënia e dollarit, presion për uljen e çmimeve

Sipas ekspertëve shqiptarë, zhvlerësimi i dollarit mund të ketë vetëm efekte pozitive duke bërë presion në rënien e çmimeve, të paktën për atë pjesë të mallrave të importuara nëpërmjet kësaj monedhe

Zhvlerësimi i dollarit nuk pritet të japë ndonjë ndikim të ndjeshëm në importet shqiptare. “Duke patur parasysh se monedha amerikane ka disa muaj që po ndjek një trend rënieje, mund të themi se tregu ka njëfarë mbingopjeje me ato produkte specifike të importuara nëpërmjet monedhës amerikane”, shprehet Adriatik Kotorri, pedagog në Fakultetin Ekonomik të Tiranës. Javën e fundit në tregjet ndërkombëtare valutore kryesore të botës po bie në sy një rënie e dukshme e dollarit amerikan, më e theksuar sesa rënia e qëndrueshme që ka pasur kjo monedhë gjatë muajve të fundit. Sipas Kotorrit, për vetë mënyrën e funksionimit të tregut valutor në Shqipëri, kjo rënie e dollarit është reflektuar shpejt dhe në një masë afërsisht të njëjtë. “Për sa i përket impaktit që mund të ketë një gjë e tillë në ekonominë shqiptare, është disi e vështirë për ta matur në mënyrë të ndarë këtë ndikim. Kjo pasi në këtë periudhë të vitit ka shumë fenomene të ndërthurura që veprojnë njëkohësisht në ekonominë shqiptare”, shprehet ai. Konkretisht, kur flitet për luhatjet e vlerës së një monedhe të huaj pasoja e parë që mund të ketë është luhatja e eksport-importeve dhe nëpërmjet tyre edhe e çmimeve në treg, pra inflacionit. Për sa u përket importeve, pavarësisht se pjesa më e madhe e tyre bëhet me vendet e Eurozonës, përsëri importet në dollarë kanë një peshë të konsiderueshme në totalin e importeve. Teorikisht me rënien e vlerës së dollarit do të duhej të pritej që këto importe të rriteshin për shkak të çmimeve më të favorshme që do të rezultonin në tregun shqiptar. Por, duke pasur parasysh rënien e vazhdueshme të dollarit amerikan, një gjë e tillë ka pak mundësi të ndodhë. Pra, rritja e importeve ka ndodhur gradualisht gjatë këtyre muajve dhe ky zhvlerësim i fundit i dollarit nuk pritet që të japë një ndryshim të ndjeshëm të tyre.

Çmimet
Për sa i përket nivelit të çmimeve në ekonominë shqiptare, zhvlerësimi i dollarit mund të ketë vetëm efekte pozitive duke bërë presion në rënien e çmimeve, të paktën për atë pjesë të mallrave të importuara nëpërmjet kësaj monedhe. Por, ashtu si ka ndodhur dhe në fund të viteve të tjera, edhe këtë fundviti pritet që çmimet e një kategorie të caktuar mallrash të rriten ndjeshëm. “Kjo nuk ka se si të lidhet me zhvlerësimin e dollarit, por ndikohet nga spekulimet e tregtarëve, si ata me shumicë dhe ata me pakicë, si dhe nga faktorë të tjerë që do të ndikojë gjatë kësaj kohe”, shprehet Kotorri. Sipas tij, konkretisht bëhet fjalë për rritjen e hyrjes së monedhës europiane që pritet të ndodhë në prag të festave të fundvitit, për shkak të një fluksi më të madh emigrantësh. Kjo rritje pritet të sjellë rënien e lehtë të vlerës së euros kundrejt lekut, por jo të shoqëruar me një rënie respektive në çmimet e mallrave të importuara me këtë monedhë. Por për këtë tashmë dihet që ndikojnë një varg faktorësh ekonomikë, politikë, psikologjikë etj.
I vetmi ndikim i rëndësishëm që i përket vendit tonë është ai që ka të bëjë me rezervat valutore të institucioneve financiare. Interesat që ato do të përfitojnë nga depozitat në dollarë në bankat e huaja do të ulen ndjeshëm.

[ganoid]

Këmbimet: Të dhënat e ekonomisë amerikane “gremisin” dollarin

Deficiti mjaft i madh dhe të dhënat jo shumë pozitive nga tregu amerikan i punës e kanë çuar monedhën e gjelbër në nivele të reja rekord kundrejt euros






Data (08-12-2003)


Dollari vazhdon rënien e tij për të gjashtën seancë (ditë) me radhë në tregjet ndërkombëtare valutore. Një zhvlerësim i tillë i vazhdueshëm i dollarit ka ardhur si rezultat i publikimit të raportit të fundit mbi tregun e punës në Shtetet e Bashkuara të Amerikës. Ky raport ka treguar një rritje më të vogël sesa pritej nga tregu në hapjen e vendeve të reja të punës. Monedha jeshile ka rënë në nivelet më të ulta prej 1.2169 dollarësh kundrejt monedhës europiane menjëherë pas publikimit të këtij raporti. Ndikimi i këtyre të dhënave zhgënjyese, si edhe i deficitit të SHBA-së kanë dhënë ndikimin e tyre edhe në tregjet valutore europiane, dhe si rezultat edhe në Shqipëri. Tregu i këmbimit valutor të vendit ka pasqyruar menjëherë lëvizjet në tregjet ndërkombëtare valutore, duke reflektuar një zhvlerësim të mëtejshëm të monedhës amerikane kundrejt lekut shqiptar.
Kështu, dje në tregun e këmbimit valutor të kryeqytetit një dollar është blerë me 110.2 lekë dhe është shitur me 111.3 lekë. Në krahasim me një ditë më parë kjo monedhë ka shënuar një zhvlerësim prej rreth 0.2 lekësh, zhvlerësim që është ruajtur pothuajse gjatë gjithë këtyre ditëve të fundit. Një zhvlerësim të lehtë ka pësuar edhe monedha e përbashkët europiane, duke u blerë dje me 133.4 lekë dhe duke u shitur me 134.3 lekë. Edhe pse në tregjet ndërkombëtare raporti midis euros dhe dollarit amerikan vazhdon të rritet pa ndërprerje, në këmbimet valutore kundrejt lekut vihet re edhe një zhvlerësim i euros kundrejt monedhës shqiptare. Kështu, në krahasim me një ditë më parë euro ka pësuar një zhvlerësim prej rreth 0.3 lekësh.
Por, sipas analistëve dhe tregtarëve, edhe në qoftë se numri i vendeve të reja të punës do të kishte arritur nivelin në të cilin vetë ekonomistët kishin rënë dakord, 150 mijë vende (ndërkohë vendet e reja kanë qenë vetëm 57 mijë gjatë nëntorit), përsëri një shifër e tillë do të ishte pak për të ndaluar zhvlerësimin e dollarit. “Sigurisht që numri i vendeve të reja të punës nuk kanë qenë tamam një mbështetje për dollarin, por të paktën është një numër pozitiv”, shprehet një ri nga analistët e Mellon Bank në Pitsburg. Për tani mesazhi vazhdon të mbetet po ai: “Blini euro!”

[ganoid]

Dilema: Çmimi ndërkombëtar i naftës në euro apo në dollarë?

Një propozim i tillë i papritur është bërë nga sekretari i përgjithshëm i OPEC-ut, Alvaro Silva, duke lënë të kuptohej fakti që organizata po konsideronte mundësinë e futjes së monedhës europiane në tregun e naftës


Nafta në të ardhmen mund të blihet dhe me euro. Duke parë dobësimin e vazhdueshëm të dollarit amerikan në tregjet ndërkombëtare dhe paqëndrueshmërinë e monedhave të tjera kryesore, nga specialistët e OPEC-ut ndoshta po studiohet mundësia e futjes së monedhës së përbashkët europiane në tregun e naftës. Përpara takimit të fundit të OPEC-ut, sekretari i përgjithshëm i kësaj organizate Alvaro Silva bëri një deklaratë të papritur, duke thënë se Organizata e Vendeve Eksportuese të Naftës (OPEC) po merrte në konsideratë faktin e futjes së euros në tregtinë botërore të naftës. Lëkundjet dhe dobësimi i vazhdueshëm i dollarit amerikan kohët e fundit i kanë çuar disa vende, anëtare të OPEC-ut, të përkrahin një iniciativë të tillë. Sipas ministrit indonezian të Energjetikës dhe presidentit të ardhshëm të OPEC-ut Purnomo Yusgiantoro, përveç diskutimit të një uljeje të mëtejshme të prodhimit të naftës, diskutimi për futjen ose jo të euros në tregun e naftës do të jetë një tjetër çështje që do të diskutohet. Nga ana e tij, presidenti i Rusisë Putin ka theksuar tashmë faktin se, për sa i përket vendit të tij, ata po diskutojnë tashmë për një eksport të naftës të prodhuar në Rusi në euro.
Kështu, dilema vazhdon. Asnjë nga vendet më të fuqishme për prodhimin e naftës nuk ndihet më i sigurt me një dollar kaq të dobët. Nga ana tjetër, paqëndrueshmëria e raporteve mes dollarit dhe monedhave të tjera kryesore të tregjeve ndërkombëtare (sidomos me euron) është një arsye më shumë për pjesën më të madhe të këtyre vendeve të ndihen jo shumë të sigurta në lidhje me vendimet e tyre.
Me sa duket, nga raportet asnjë nga analistët nuk është në gjendje të parashikojë se kush të do dalë fitues i betejës për vlerësimin e euros apo dollarit. Vlerësimi i vazhdueshëm i euros këto kohët e fundit i çoi vendet e prodhimit të naftës të merrnin në konsideratë eksportin e “arit të zi” me euro. Por monedha e përbashkët europiane pësoi rënie dje kundrejt dollarit, duke rikthyer paqartësinë.

Diskutimet
Nëse raporti euro/dollar është faktori vendimtar për të vendosur nëse nafta në të ardhmen do të tregtohet me euro, atëherë duhet të pritet akoma më shumë për të marrë një vendim të tillë. Sipas specialistëve të OPEC-ut, “krahu i hekurt” që po zhvillohet midis Shteteve të Bashkuara të Amerikës dhe Europës për vlerësimin e euros apo dollarit, akoma nuk po tregon se kush do të dalë fitues. Europa kërkon një euro të zhlerësuar për të mbështetur rritjen ekonomike nëpërmjet nxitjes së eksporteve. Por nga ana tjetër qëndrojnë Shtetet e Bashkuara të Amerikës, të cilat kërkojnë një dollar të zhvlerësuar, pasi në këtë mënyrë mund të financojë deficitin e vet tregtar, që këtë vit është rritur shumë.

OPEC (Organizata e Vendeve Eksportuese të Naftës) është një organizatë ndërkombëtare me 11 vende në zhvillim anëtare, të cilat mbështeten në të ardhurat nga nafta si burimi kryesor i të ardhurave të tyre. Anëtarët e tanishëm janë: Algjeria, Indonezia, Irani, Iraku, Kuvajti, Libia, Nigeria, Katari, Arabia Saudite, Emiratet e Bashkuara Arabe dhe Venezuela.

Parashikimet: 2004-a do të karakterizohet nga çmime të larta të naftës

Analistët e tregjeve të naftës në Raiffeisen Zentral Bank prononcohen lidhur me ndryshimet që mund të vihen re në tregjet e naftës për vitin 2004

Viti 2004 do të karakterizohet nga çmime të naftës relativisht të larta. Por me kalimin e kohës ky çmim mund të ulet deri në 25 dollar për fuçi si rezultat i rritjes së ofertës nga ana e vendeve joanëtare të OPEC-ut, kryesisht nga Rusia dhe Iraku. Risku i një rënieje të çmimit nën kufirin e vendosur nga OPEC-u 22 dollar për fuçi për mendimin tonë është shumë i vogël, duke i dhënë nxitje rritjes ekonomike, lidhur me rritjen e kërkesës për naftën e papërpunuar dhe për nënproduktet e saj. Për më tepër, politika e jashtëzakonshme e kohëve të fundit e OPEC-ut tregon se kjo organizatë ka shumë mundësi të ndërhyjë pas rënies së çmimit të naftës nën nivelin e 25 dollarëve për fuçi dhe të mos presë për këtë nivel të bjerë në nivelin e 22 dollarëve. Kështu, nuk ishte aspak e papritur ulja e sasisë së prodhimit nga ana e OPEC-ut në takimin e tij të fundit. Nëse euro do të vazhdojë të vlerësohet shumë kundrejt dollarit, rënia në çmimin e naftës do të jetë pak më modeste. Parashikimi ynë për çmimin mesatar të naftës për vitin 2004 është 26 dollar për fuçi Brent.

[ganoid]

"Biznesi" - 24/11/2004

Euroja arrin nivelin më të lartë prej 1.3092 kundrejt dollarit




Kryetari i Rezervës Federale, Greenspan, ka njoftuar për një zhvlerësim të mëtejshëm të monedhës amerikane për të ulur deficitin e llogarisë korrente të SHBA-së
Euro ka kapur një nivel të ri rekord prej 1.3092 kundrejt dollarit ndërsa monedha e gjelbër amerikane ka vazhduar rënien e saj duke rritur shqetësimin e deficitit tregtar në ekonominë amerikane.
Euroja ka arritur vlerën e saj më të lartë të të gjitha kohërave prej 1.3074 dollarë gjatë javës së kaluar. Dollari ka shënuar vlera më të ulëta edhe kundrejt jenit duke u këmbyer me 102.91 jen.
Steve Pearson, analist i monedhave në bankën HBOS, ka thënë se dobësimi i dollarit ka ardhur nga tendenca rënëse e planifikuar mirë për monedhën amerikane.
“Dollari vazhdon të bjerë në nivele të reja kundrejt monedhave të tjera”, - ka vërejtur ai.
Në bazë të komenteve të bëra nga kryetari i Rezervës Federale Alan Greenspan, theksohet se një zhvlerësim i mëtejshëm i monedhës amerikane mund të jetë i nevojshëm për shkak të uljes së deficitit të llogarisë korrente të Shteteve të Bashkuara.
Rëniet e menjëhershme të dollarit i kanë shqetësuar tregtarët rreth mundësisë së ndërhyrjes së Bankës Qendrore Europiane ose Bankës së Japonisë për të rritur dollarin ndërsa ekonomitë e tyre vuajnë nga eksportet më të dobëta.
Por forumi i ministrave të Financës të grupit G20 në Berlin ka mbaruar pa asnjë shenjë veprimi për të ndaluar rënien e dollarit, as nga banka qendrore dhe as nga zyrtarët për të biseduar për këtë çështje.

[ganoid]

Nderkohe rritja e djeshme e EUROs ka pas si shkak kryesor deklaraten e bere nga zdhenesi i Bankes Qendrore Ruse se ne mbledhjen e ardhshme do te diskutojne per uljen e rezervave e dollarit ne kete banke, shembullin e te ciles mund ta ndjeki dhe Kina e cila sipas agjensise Bloomering ka nje rezerve dollari prej 514,5miliarde dollare .

Pervec kesaj nje sere kompanishe Evropiane kane forcuar pozicionin e tyre ne burze pas 3 dite uljeje. Megjithe vleresimin e EUROS dhe shtrenjtesimin e naftes ato jane paraqitur optimiste per rritje fitimi. Indeksi Evropjan i marre sebashku Dow Jones Stoxx 600 eshte rritur me 0,6% ose 247,8 pike dhe EuroStox50 eshte forcuar me 0,5%.
Ndersa ne krahun tjeter kompanite amerikane kane humbur si rrjedhoje e rritjes se cmimit te naftes.

Per mendimin tim ekonomia amerikane po mundohet te mbylli vrymat e shkaktuara nga vitet e kaluara si rrjedhoje e futjes ne borxh te shtetit vete, kompanive si dhe qytetareve. Pra aty ka pas nje optimizem te pabaza i cili ka per te perfunduar me nje krize si ajo e vitit 1929 kur amerikanet blenin aksione jo duke paguar leke, por me borxhe.
Kjo pak a shume eshte njesoj me firmat piramidale.

[ganoid]

Sistemi Bankar

Artiola Alimadhi - 25/11/2004

Artan Santo këshillon dollarin për të investuar kursimet

Sipas drejtorit të bankës Credins, Artan Santo, investimet në monedhat e huaja duhet të bëhen në dollarë. Megjithatë, individët nuk duhet të ndryshojnë kursimet apo depozitat e tyre nga njëra valutë në tjetrën në këtë periudhë paqëndrueshmërie të kurseve të këmbimit


Drejtori i bankës Credins, Artan Santo, këshillon shqiptarët të investojnë kursimet e tepërta të tyre në dollarë amerikanë. Kështu, për ata individë të cilët kanë një shumë të caktuar parash mënjanë dhe nuk kanë ndonjë alternativë tjetër investimi (si për shembull investimi në një biznes apo investime të tjera fitimprurëse), këshillohet investimi i këtyre kursimeve në monedhën e gjelbër duke u nisur nga fakti se parashikohet që në të ardhmen kjo monedhë do të vlerësohet. Megjithëse nuk dihet me siguri koha se kur do të fillojë rivlerësimi, fakti se kjo monedhë do të vlerësohet është i sigurtë. Vlerësimi do t’i bëjë dollarët e individëve në të ardhmen më të “vlefshëm” duke siguruar kështu përfitime për ta.
Megjithatë, Santo nuk rekomandon këmbimin e kursimeve apo depozitave në valuta të tjera, të cilat për momentin janë të vlerësuara kundrejt dollarit. Në këtë periudhë paqëndrueshmërie të kurseve të këmbimit për dollarin nuk dihet me siguri se kur do të jetë momenti “optimal” në të cilin kjo valutë do të ketë vlerën “minimale” dhe kur do të fillojë ringritjen. Një mënyrë shumë fitimprurëse për një investitor apo individ të thjeshtë, është këmbimi i valutave të tjera në dollarë “tani” që dollari është i dobët dhe rikëmbimi i tij në një kohë të ardhshme kur ai të jetë vlerësuar. Nga kjo formë, individi do të sigurojë një kthim “të sigurtë” dhe mbi të gjitha pa risk. Por, pavarësisht faktit kurset e këmbimit janë relativisht të parashikueshme, për to nuk dihet me saktësi momenti se kur kurset do të ndryshojnë dhe aq më pak vlerat e tyre. Në këtë aspekt, risku në lidhje me “kapjen” e momentit optimal të investimit është i pranishëm për çdo investitor që kërkon të hyjë në këtë fushë.

Gazeta Biznesi

[ganoid]

"Biznesi" - 15/12/2004

Deficiti tregtar i SHBA-së arrin nivele rekord

Deficiti tregtar i Shteteve të Bashkuara ka arritur në mënyrë të paparashikuar nivelin rekord prej 55,5 miliardë dollarësh


Rritja e deficitit të SHBA-së ka ardhur kryesisht si rezultat i rritjes së importeve, veçanërisht nga Kina dhe rritja e çmimit të naftës. Hendeku është rritur në krahasim me deficitin prej 50,9 miliardë dollarë në muajin shtator. Analistët e Wall Street-it kishin parashikuar që deficiti për muajin tetor do të ishte 53 miliardë dollarë. Gjatë 10 muajve të parë të vitit 2004 deficiti tregtar i SHBA-së është rritur në 500,5 miliardë dollarë, duke ia kaluar që tani deficitit të plotë vjetor të vitit të mëparshëm, ka njoftuar Departamenti i Tregtisë. Vetëm në muajin tetor importet e mallrave dhe shërbimeve janë rritur me 3,4 për qind në një nivel rekord prej 153,5 miliardë dollarësh, ndërsa konsumatorët i kanë përvetësuar mallrat e huaja me përfitimin e normave të interesit jashtëzakonisht të ulët. Importet janë rritur në një nivel rekord prej 98,1 miliardë dollarësh kundrejt një rritjeje 0,6 për qind të eksporteve. Hendeku është thelluar pavarësisht rënies dyvjeçare të dollarit, që duhet t’i bëjë eksportet amerikane relativisht më të lira në tregjet e huaja dhe importet më të shtrenjta në Shtetet e Bashkuara. “Problemi është se normat e interesit kanë mbetur akoma mjaft të ulëta në SHBA dhe vendi vazhdon të importojë me një ritëm rekord, duke ndikuar në rritjen e deficitit tregtar dhe ngadalësimin e ekonomisë”, - ka thënë një ekonomist.

......................

Me keto ritme te deficitit mendoj se dollari do ta kete te veshtire ta marri veten. Prandaj askujt nuk do ti keshilloja te blente dollare!

[FIERI1]

Mos dilni nga tema ju lutem!

[ganoid]

Dollari i largohet 6 cent rekordit historik


Gj.Erebara

TIRANË-Euro u dobësua gjatë fundjavës në tregjet ndërkombëtare kur u kuotua në 1.30 dollarë, shumë më poshtë se rrekordi historik i 28 dhjetorit të kaluar, kur u kuotua me 1.363 dollarë. Dollari vazhdoi të forcohej edhe pas të dhënave jo shumë pozitive nga tregu amerikan i punës. Kjo gjë bëri që euro të bjerë ndjeshëm, në kuotën më të ulët në gjashtë javët e fundit. Ekspertët thonë se rënia nën nivelin psikologjik të 1.314 dollarë tregon për dobësim të mëtejshëm të euros në terma afatshkurtra. Dollari u forcua edhe kundrejt frangës zvicerane dhe stërlinës, por humbi kundrejt jenit japonez. Euro-ja u dobësua më shumë se 1 për qind kundrejt jenit. “Po përballemi me një rikthim të besimit tek monedha amerikane”, - thotë Sophia Drossos, eksperte tek Morgan Stanley. “Deri pak kohë më parë ishte krijuar ideja se dollari do të vazhdonte të dobësohej, pavarësisht nëse statistikat sillnin lajme të mira apo të këqija, por tani tregu po reagon më mirë”. Në ndihmë të dollarit erdhi edhe deklarata e Sekretarit të Thesarit të SHBA-ve John Snow, i cili deklaroi: “Politika jonë është në mbështetje të një dollari të fortë. Ky është interesi ynë kombëtar dhe ne do të punojmë për uljen e deficitit në mbështetje të monedhës kombëtare”.
Ekspertët
Agjencia Bloomberg pyeti 91 ekspertë nga Tokio në Nju Jork dhe 40 për qind e tyre këshilluan se është koha për të këmbyer euron me dollarin, në pritje të rritjes së monedhës amerikane. Vetëm 34 për qind e panë euron si me perspektivë më të mirë. Megjithatë, këto janë vetëm pritshmëritë afatshkurtra, pra deri muajin e ardhshëm. Për në fund të këtij viti, ekspertët presin që euro të kuotohet në minimalisht 1.34 dollarë. Por ka edhe të tjerë, të cilët mendojnë se euro do të bjerë deri në 1.27 dollarë gjatë muajve të ardhshëm, në rast se SHBA-të ndërmarrin hapa konkrete për reduktimin e deficitit të vet buxhetor dhe atij tregtar. Gjithsesi, dollari ka fituar 3.8 për qind kundrejt euros vetëm gjatë javës së fundit.
Tregu i brendshëm
Treguesit e Bankës së Shqipërisë dhe bankave të nivelit të dytë, ka bërë që gjatë tre viteve të fundit leku të reflektojë kryesisht tregun ndërkombëtar. Dhe duke qenë se gjatë këtyre tre viteve dollari ka rënë në tregun ndërkombëtar, ai ka rënë edhe kundrejt lekut. Që nga rrekordi negativ i datës 28 dhjetor, kur dollari ra në 91.5 lekë, tani dollari kushton 96 lekë dhe tendenca është në nënçmimin e mëtejshëm të monedhës kombëtare. Duke qenë se në të dyja rastet, leku ka respektuar tregun ndërkombëtar, edhe në muajt në vazhdim pritet që leku të vazhdojë të bjerë si kundrejt dollarit, ashtu edhe kundrejt euros.



10/01/2005

[ganoid]

Financat

"Biznesi" - 24/01/2005

Dollari, i vetmi që vlerësohet kundrejt lekut

Ndërkohë, monedhat e tjera kryesore janë zhvlerësuar në krahasim me nivelet që shënonin në fillim të javës. Edhe kësaj radhe në tregjet ndërkombëtare nuk kanë munguar lëkundjet në raportet midis monedhave kryesore


Gjatë fundjavës së kaluar monedha amerikane ka qenë e vetmja që është vlerësuar kundrejt lekut shqiptar. Dollari është rritur me 0,32 lekë, duke lëvizur në 97,33 lekë. Ndërkohë, monedhat e tjera kryesore janë zhvlerësuar në krahasim me nivelet që shënonin në fillim të javës. Edhe kësaj radhe në tregjet ndërkombëtare nuk kanë munguar lëkundjet në raportet midis monedhave kryesore. Në seancat e fundit të tregjeve, në raportin e dollarit me euron ka ndikuar treguesi i fundit i besimit të konsumatorit amerikan. Megjithatë, pritjet e vazhdueshme për një rritje të normave të interesit e kanë ngadalësuar zhvlerësimin e dollarit dhe e kanë lënë atë në nivele, pak a shumë, të njëjta kundrejt euros. Sipas eksperëtëve, eksizton “një pikë teknike”: 1,2930 dollarë dhe çdokush tani po mendon të përfitojë nga situata e krijuar, pasi rezulton të jetë në mënyrë rigoroze me fitim. Në seancën e fundit të fundjavës euro u vlerësua me 0,6 për qind dhe arriti në 1,3042 dollarë në Nju-Jork, vlerësimi i parë kundrejt dollarit në shtatë ditë tregti. Gjatë seancës euro arriti në 1,3067 dollarë. Gjithashtu, monedha amerikane është zhvlerësuar edhe kundrejt jenit japonez. Në të njëjtën seancë, atë të Nju-Jorkut, dollari arriti në një nga nivelet e tij më të ulëta, në 102,66 jen.
Megjithatë, vëmendja e investitorëve është drejtuar nga niveli i normave të interesit. Për ata një nivel më i lartë i normave të interesit mbështet një monedhë, duke i bërë depozitat në atë monedhë më tërheqëse për të gjithë investitorët. Por, një raport i BusinessWeek, që fliste mbi faktin që presidenti i Bankës Qendrore Amerikane, Alan Greenspan, është kundër rrugës së ndjekur deri tani për një ulje të vazhdueshme të normave të interesit, që e forcon akoma më tepër euron, por njëkohësisht punon kundër dollarit. "Artikulli është një nga arsyet se pse euro arriti të vlerësohej në seancën e Nju-Jorkut. Këto komente i japin gjithmonë monedhës së përbashkët europane përparësi kundrejt dollarit; megjithatë, ato nuk arrijnë të ndryshojnë klimën e përgjithshme”. Një nga zyrtarët e Fed-it tha se politika monetare që po ndiqet mund të arrijë ta mbajë inflacionin e Shteteve të Bashkuara të Amerikës të qendrueshëm, edhe pse me një dollar, që për momentin është duke u zhvlerësuar. Tregjet i interpretuan komentet e zyrtarëve si një paralajmërim se Fed-i do të vazhdojë të ndjekë rrugën e tanishme të rritjes së normës së interesave, kur tregtarët vazhdojnë ta shtyjnë euron drejt vlerësimit.