VMRO-DPMNE mohon deklaratat e Ahmetit

[RaPSouL]

VMRO-DPMNE përgënjeshtron deklaratat e liderit të BDI-së Ali Ahmeti se ekziston një marrëveshje mes tyre që në vitin 2014 presidenti të jetë shqiptar.
Sipas burimeve të partisë së Gruevskit nuk është e mundur që prej tani të bëhen marrëveshje të tilla për të ardhmen e largët. Në një bisedë telefonike Ahmeti i ka thënë VMRO-DPMNE se deklarata e tij është nxjerrë nga konteksti.
"Dhe ideja kryesore është që, që tani ne si shqiptarë të Maqedonisë të hedhim idenë dhe të bëjmë hapin e parë që në zgjedhjet e ardhshme të arrihet një marrëveshje, një konsensus mes partive më të mëdha politike shqiptare dhe maqedonase dhe të garohet për një kandidat të përbashkët shqiptar", ka deklaruar lideri i BDI-së Ali Ahmeti për Alsat në Tiranë.
Por pavarësisht kësaj, nënkryetarja e BDI Teuta Arifi ka deklaruar se partia qëndron pas deklaratës së dhënë nga lideri i tyre.
"Gjithsesi ne si parti politike do të mbetemi në deklaratën e cila është dhënë nga lideri ynë e cila shkon pikërisht në favor të asaj që thatë më parë të mësimeve nga politika amerikane sipas të cilës absolutisht është mirë që të pritet që në një të ardhmen të afërt presidenti I vendit të jetë shqiptar", deklaron nënkryetare e BDI-së, Teuta Arifi.
Partitë opozitare shqiptare e cilësojnë deklaratën e Ahmetit si një bllof dhe të shpejtuar.
"Maqedonasit nuk kanë gatishmëri që të votojnë shqiptar për kryetar e shtetit andaj mendoj që është edhe një bllof i radhës I BDI që mossukseset e saj në shumë sfera sidomos në sferën e marrëdhënieve ndëretnike apo avancimit të të drejtave të shqiptareve të mbulojë me deklarata boshe me deklarata të kota", thotë deputeti i PDSH, Besim Dogani.
Për deputetin e DR Sulejman Rushiti deklarata e Ahmeti është e përshpejtuar dhe e pa menduar mirë. "Marrëveshje të tilla nuk mund të bëhen është e pamundur që të ketë një marrëveshje të tillë për shkak se subjektet të cilat do të nënshkruhen pas 4 viteve ndoshta nuk do të kenë edhe pozicionin e njëjtë që e kanë tani", shtoi Rushiti.
Burime nga BDI-ja për Alsat kanë konfirmuar se bisedimet me VMRO-DPMNE po zhvillohen rreth dy temave, për zgjedhjet presidenciale dhe atyre lokale. Sa i përket zgjedhjeve presidenciale BDI ka theksuar se do të përkrahë kandidatin e VMRO-DPMNE nëse ai i plotëson disa kritere për të qenë i kapshëm edhe për shqiptarët. Ndërkaq sa i përket zgjedhjeve lokale bisedohet që në komunat ku VMRO-DPMNE nuk mund të ketë kandidat të saj të mbështesë kandidatin e BDI dhe anasjelltas.

Alsat

Me gënjeshtra nuk mbahet gjithmon pushteti o Ahmetovski!