Rinia islame shqiptare e Wisconsinit me iniciativa të reja

[Drini_i_Zi]

Në këtë mbrëmje, para një numri të konsiderueshëm të të rinjve u prezantuan me fjalimet e veta Mr. Bashkim Aliu dhe imam Ilaz Fetahi.

E hënë, 26 Janar 2009 22:55

Qendra Islame Shqiptaro-Amerikane e Wisconsinit është duke përjetuar një gjallërim të vërtetë. Kohë pas kohë janë duke u mbajtur organizime të ndryshme për të mirën e rinisë dhe të komunitetit në përgjithësi. Në kuadër të aktiviteteve të shumta, më 24 Janar 2009 u organizua "Mbrëmje islame me të rinjtë".

Në këtë mbrëmje, para një numri të konsiderueshëm të të rinjve u prezantuan me fjalimet e veta Mr. Bashkim Aliu dhe imam Ilaz Fetahi.

Mr. Bashkim Aliu ligjëroi në temën "Rinia, shpresa e se ardhmes", ku kryesisht foli për problemet me të cilat ballafaqohet rinia islame në Amerikë dhe puna që e prêt rininë islame për ta kryer rolin dhe funksionin e saj me të cilin e ka ngarkuar Islami.

Pas ligjëratës të pranishmit patën rastin që të parashtrojnë pyetje të shumta për dy ligjëruesit Mr.Bashkim Aliun dhe imam Ilaz Fetahin.

Takimi i këtillë me të rinjtë ishte gëzim i vërtetë për rininë Islame shqiptare në këtë qendër të Amerikës, ngase pos asaj se mësojnë për Islamin, kanë rastin të dëgjojnë ligjëratë në gjuhën shqipe dhe ta kultivojnë të njëjtën. Ligjëratat e këtilla janë edhe mundësi që të takohen dhe të afrohen me njeri-tjetrin, marrë parasysh se jeta e stër ngarkuar me materializëm në Amerikë i ka larguar mjaft njerëzit dhe i bën të lëvizin në rrugën e shikimit vetëm të interesit personal.

Është me rëndësi të ceket se në këtë takim u hodh ideja për formimin e Forumit Rinor Islam të Wiskonsinit, që do të kishte prioritet punën me të rinjtë, kontaktin me organizatat tjera dhe zhvillimin e aktiviteteve të rëndësishme për komunitetin.

Po ashtu, të pranishmit kërkuan të organizohen klasa me të rritur në kuadër të Qendrës Islame për ta mësuar Islamin dhe gjuhën e historinë e popullit shqiptar.

Pas ligjëratës të rinjve iu shpërnda një broshurë me titull "Dije rini" të përgatitur nga Mr. Bashkim Aliu. Broshura u përgatit në dy gjuhë; shqip dhe anglisht.

Kërkesa e të gjithëve ishte që organizimet e këtilla të jenë sa më të shpeshta.

[Drini_i_Zi]

Rinia islame shqiptare e Wisconsinit me iniciativa të reja