Myslimanët, qeveria: Reagim per veprimet ekstremiste

[alproud]

• Komisioni parlamentar i Ligjeve miratoi dje me konsensusin marrëveshjen për rregullimin e marrëdhënieve të ndërsjellta mes qeverisë shqiptare dhe komuniteteve fetare në Shqipëri. Ne marrëveshjen me myslimanët i kërkohet të garantojë reagim ndaj çdo shfaqjeje apo prirjeje ekstremizuese në mjediset e besimtarëve të vet, si dhe që për të gjitha rastet e kësaj natyre të njoftojë organet përkatëse.

TIRANE- Komisioni parlamentar i Ligjeve miratoi dje me konsensusin e maxhorancës dhe opozitës marrëveshjen për rregullimin e marrëdhënieve të ndërsjellta mes qeverisë shqiptare dhe komuniteteve fetare në Shqipëri, përkatësisht me Komunitetin Mysliman, Kishën Ortodokse Autoqefale dhe Kryegjyshatën Botërore Bektashiane. Mbledhja ka zgjatur vetëm për pak minuta dhe asnjë prej deputetëve nuk ka preferuar të diskutojë mbi nene të veçanta të tyre, përveçse të ngrenë kartonët jeshilë. I vetmi që ka folur në mbledhje ka qenë kreu demokrat i komisionit, Ilir Rusmali që në fjalën e tij të shkurtër e cilësoi rëndësinë e këtyre dokumenteve si “historik”. “Këto marrëveshje duhet të miratohen menjëherë, pasi nuk ka më kohë për të humbur. Ato duhet t’i paraqiten sa më shpejt për ratifikim Kuvendit”, - u shpreh ai. Marrëveshjet e veçanta me secilin komunitet parashikojnë rregullimin e marrëdhënieve të bashkëpunimit ndërmjet shtetit shqiptar dhe secilit prej tyre, garantimin dhe respektimin e të drejtave të sanksionuara në Kushtetutë dhe ligjeve në fuqi për lirinë e ndërgjegjes dhe ushtrimit të fesë. Synim tjetër i tyre, sipas relacionit shoqërues, është njohja dhe garantimi i paprekshmërisë së institucionit të kultit, për aq sa veprimtaria e tij nuk bie në kundërshtim me legjislacionin në fuqi; garantimi i lirisë së individit për t’u zgjedhur në institucionet fetare ose jashtë tyre, si dhe mbrojtja e bashkëjetesës fetare nga shteti.
Myslimanet
Marrëveshja e nënshkruar mes qeverisë dhe Komunitetit Mysliman nuk iu garanton besimtarëve të Islamit, lirinë për të ndryshuar fenë. Ndërkohë që kjo liri u garantohet besimtarëve ortodoksë dhe bektashinj, në marrëveshjet respektive që ekzekutivi ka nënshkruar me Kishën Ortodokse Autoqefale dhe Kryegjyshatën Botërore Bektashiane. Referuar pikës (d) të nenit 3 të marrëveshjes së arritur mes qeverisë dhe këtyre dy komuniteteve, citojmë se qëllimi i saj është “të garantojë lirinë e individit për të zgjedhur ose ndryshuar fenë, për ta shfaqur atë individualisht ose kolektivisht në institucionet fetare, ose jashtë tyre, nëpërmjet kultit, arsimimit, praktikave ose kryerjes së riteve fetare”. Pikërisht kjo dispozitë mungon në dokumentin për “Rregullimin e marrëdhënieve të ndërsjellta” të firmosur mes ekzekutivit dhe Komunitetit Mysliman, ku garantohet vetëm liria për të ushtruar e shfaqur fenë islame. Më konkretisht, pika (d) e nenit 3 të këtij dokumenti thotë shprehimisht: “të garantojë lirinë e individit për të ushtruar fenë Islame, për ta shfaqur atë individualisht ose kolektivisht në institucionet fetare myslimane ose jashtë tyre, nëpërmjet kultit, arsimimit, praktikave ose kryerjes së riteve përkatëse fetare”.
Ekstremistët
Një tjetër pikë që i bën të ndryshme nga njëra-tjetra këto tri marrëveshje lidhet edhe me çështjen e ekstremizmave fetare. Vetëm Komunitetit Mysliman i kërkohet të garantojë reagim ndaj çdo shfaqjeje apo prirjeje ekstremizuese në mjediset e besimtarëve të vet, si dhe që për të gjitha rastet e kësaj natyre të njoftojë organet përkatëse. Në pikën (f) të nenit 3 të marrëveshjes mes qeverisë dhe Komunitetit Mysliman, citojmë shprehimisht se një nga qëllimet e saj është “të njohë dhe të garantojë reagimet dhe veprimet e vetë Komunitetit Mysliman të Shqipërisë, ndaj deformimeve, prirjeve ekstremizuese apo çdo shfaqjeje tjetër ashpërsie në mjediset e besimtarëve të vet. Për të gjitha rastet e kësaj natyre, Komuniteti Mysliman i Shqipërisë njofton organet përkatëse”. Ndërkohë që një dispozitë e ngjashme nuk gjendet në asnjë paragraf të marrëveshjes që qeveria ka nënshkruar si me Kishën Ortodokse Autoqefale, ashtu edhe me Kryegjyshatën Botërore Bektashiane.
Kushtetuta
Nënshkrimi i këtyre marrëveshjeve mes qeverisë dhe komuniteteve fetare parashikohet në pikën 5, neni 10 i Kushtetutës, që rregullon lidhjet e ndërsjellta. Në të thuhet se “Marrëdhëniet ndërmjet shtetit dhe bashkësive fetare rregullohen mbi bazën e marrëveshjeve të lidhura ndërmjet përfaqësuesve të tyre dhe Këshillit të Ministrave. Këto marrëveshje ratifikohen në Kuvend”. Referuar marrëveshjeve që qeveria ka nënshkruar me Komunitetin Mysliman, Kishën Ortodokse Autoqefale dhe Kryegjyshatën Botërore Bektashiane, institucioni përgjegjës për zbatimin e tyre është vendosur të jetë Ministria e Kulturës.
(s.g/GazetaShqiptare/BalkanWeb)