Luan Bexheti

[dodoni]

Rrëfimi i aktorit shqiptar në Nju Jork. Oferta e regjisorit Kujtim Çashku në filmin ”Syri Magjik”. Së fundi suksesi i filmit ”Maree” i James Pelleritos, në rrethin e të nominuarve për ”Oscar”, ku aktori Luan Bexheti interpreton rolin e shqiptarit emigrant

Luan Bexheti, një shqiptar nëpër batica


Elsa Demo

Luan Bexheti po e ndien veten më afër Shqipërisë, sipas mënyrës që ai donte të ndodhte, me kinemanë. I larguar nga Tetova në Novergji me familjen, në moshën 4 vjeç, ndoqi rrugën e aktrimit fillimisht në Oslo e më pas duke ndjekur studimet në Institutin e njohur të teatrit në Nju Jork ”Lee Strasberg”. Endrra për të interpretuar një ditë në një film shqiptar realizohet me ofertën e regjisorit Kujtim Çashku, për filmin “Syri Magjik” që ka përfunduar xhirimet disa muaj më parë.
Ndërkaq Luan Bexheti duket i lumtur që një tjetër film, ”Maree” (Baticat) ku interpreton rolin kryesor ka marrë vlerësimet maksimale gjatë vitit 2003-2004 duke fituar çmime në Festivalin e Nju Orleansit, në Festivalin e Tiburonit me çmimin ”Federico Fellini”, në Festivalin në Los Anxhelos, ndërsa në Festivalin e Filmit Amerikan është shpallur filmi më i mirë me metrazh të shkurtër.
Në filmin ”Maree” të regjisorit italian James Pellerito, Bexheti interpreton rolin e një shqiptari që shkon në Venecia për t’i gjetur një strehë të birit. Maqedonia prej nga ata vinin babai me të birin po kalon ditë të vështira për shkak të luftës. Djaloshi i vogël italian, Davide Murtas në rolin e Arbenit, djalit të Luan Bexhetit, në këtë film interpreton në gjuhën shqipe.
Ky film tashmë është në rrethin e filmave për nominimin e Çmimit ”Oscar” në kategorinë ”Best short film” (Filmi më i mirë i shkurtër). Ky shans i është dhënë me të fituar Çminin “Grand Prize” në USA Film Festival në Teksas.

Intervistë
Kush është Luan Bexheti ?
Luan Bexheti është Luan Bexheti. Atëherë, kam lindur në Tetovë, Maqedoni, në vitin 1972. Në moshën katërvjeçare familje ime dhe unë largohemi drejt Norvegjisë. Ata vazhdojnë të jetonë aty sot e kësaj dite. Para se të nisja studimet për aktrim vazhdoja të punoja në Oslo ku deri në vitin 1992 drejtoja një rrjet videotekash. E mbylla këtë biznes, pas një fatkeqësie familjare. Dhe fillova të merrem me art.
Fillimi ishte i rastësishëm. Ndodhi që bashkë me një fotograf italian realizuam një servis fotografik (që në fakt i doja si kujtim për të dashurën). Fotografitë janë në duart e disa agjencive që kërkonin modelë dhe më njoftuan për të bërë një audicion për reklama të ndryshme si Levi’s, Trenat e Norvegjisë, për Bashkimin Evropian, e cila ka qenë dhe më e rëndësishmja për mua.
Para vendimit për t’u bërë aktor, doja të isha një gangster. Kur një ditë të bukur policia norvegjeze më arrestoi e më futi në burg për disa ditë, atëherë ndërrova mendje dhe vendosa që herë tjetër rolin e gangsterit ta luaj vetëm në kinema, sepse pashë që me burgun nuk bëhet shaka. Aktrimi më lejon të luaj kriminelin dhe të mos futem në burg.

Kur u ndodhët për herë të parë në sheshxhirimin e një filmi?
Ka ndodhur me “Endrrën”, film i një regjisori norvegjez. Kjo ishte përvoja ime e parë në kinema, menjëherë pas saj mora vendimin të marr formimin e duhur, të shkollohem. Nisa studimet dyvjeçare, ‘95-97 në një prej shkollave shumë të rëndësishme të artit të aktrimit, “The Lee Strasberg Theatre Institute”, në New York.
Ikët përfundimisht nga Oslo? Besoj nuk ka qenë e lehtë për ju të çani në rrugën e artit në Amerikë. Cila ka qenë periudha më vështirë?
Të them të drejtën, periudha më e vështirë ka qenë fillimi, vendimi për të ikur nga familja dhe për të nisur studimet. Norvegjia nuk ishte vendi i përshtatshëm për t’u bërë aktor. Im at ka bërë të pamundurën të më kthente nga rruga ku isha nisur, po kisha vendosur dhe askush nuk mund të më ndërronte mendjen. Më tha të studioja për avokat ose mësues, punë që ai e kishte bërë gjithë jetën, sepse sipas tij, aktorët nuk kanë jetë të qëndrueshme (kjo është pak e vërtetë) dhe e kanë të vështirë të bëjnë jetë familjare. I thashë se tashmë e kisha vendosur dhe pikë.

Prej disa kohësh ju keni ardhur në Shqipëri për xhirime në filmin “Syri Magjik” i regjisorit Kujtim Çashku. Cili është roli juaj aty dhe përse e pranuat?
Kontakti im i parë me regjisorin Kujtim Çashku ishte në vitin 1996, por nuk na u dha mundësia të bashkëpunonim, deri në vitin 2003, kur më ofroi rolin e Benit, një gjirokastrit që mundohet ta fitojë paranë me çdo kusht. Rolin e pranova, sepse dëshira për të interpretuar në një film shqiptar ishte dhe mbetet e madhe. Nga ana tjetër, ishte rekomandimi i aktorit Timo Flloko, që gjithashtu interpreton tek ”Syri magjik”.
Sa për Timo Fllokon, ai më është gjendur me punën që kemi bërë për 5 javë në teater, dhe kam mësuar prej tij aq sa nuk kisha marrë për 2 vjet në shkollën që përfundova në Nju Jork.

Ky ishte bashkëpunimi i parë me një regjisor shqiptar?
Kam marrë pjesë në filmat që kanë realizuar 4 regjisorë shqiptarë këtu në Amerikë. Janë Urim Leka, Rock Markolovich, Dimitër Ismailaj dhe Agim Gërbeshi. Ndërkohë jam në pritje për të nisur nga puna me regjisorin Fatmir Koçi në filmin e tij të ardhshëm, i cili do të nisë xhirimet këtë vit. Eshtë fjala për filmin ”Një mbret për synetllëk”.

Filmi me metrazh të shkurtër ”Maree”, ku keni rolin kryesor ka pasur sukses. Si ndodhi që ju interpretoni pikërisht rolin e një shqiptari të Maqedonisë?
Ishte regjisori James Pellerito i cili më foli për filmin e tij të ardhshëm ”Maree” (Baticat), që do të xhirohej në Venecia. Aktorja Elza Zagreda e kishte sugjeruar se Bexheti ndoshta do të ishte aktori i duhur për këtë rol. Me këtë film që më pëlqen shumë pata mundësi të tregoj se ç’di të bëj duke përdorur anën e fortë dhe serioze të Luan Bexhetit, sepse deri tani kam dhënë më shumë në komedi. Kam punuar shumë për të realizuar rolin dramatik të shqiptarit tek ”Maree”. James Pellerito është nga ata regjisorë që me artin e tyre mbajnë qëndrim ndaj fenomeneve sociale, siç është rasti i emigrantit shqiptar në Itali. Pelleritos ka shfaqur mospëlqimin e tij për mënyrën se si italianët i trajtojnë emigrantët dhe për këtë arsye ai realizoi filmin ku unë luaj, ”Maree”.
Filmi është kualifikuar në listën e atyre që do të nominohen për ”Oskar”. Kjo për arsye se filmi i regjisorit Pellerito është me metrazh të shkurtër e në këto raste duhet të kalojë provën e disa festivaleve të filmit që zhvillohen në Amerikë, e pas kësaj të shqyrtohet nominimi. ”Maree”, tashmë ka fituar USA Film Festival në Texas dhe automatikisht ai do merret në konsideratë nga Akademia në Los Angeles.



31/05/2004

[StormAngel]

Ja edhe ca lajme per nje shqiptar tjeter ne Hollywood:

Risi nga veprimtaria e aktorit shqiptar në SHBA, Luan Bexheti

Shembëlltyra e Luanit në libër antologjik

-Luan Bexheti është i vetmi shqiptar ndër 1.000 emra që përmenden në doracakun për aktorë, këngëtarë dhe valltarë “Actor’s Handbook” (“Doracak për aktorë”), shkruar nga shkrimtarja Sherry Eaker. - Luan Bexheti dëshiron të jetë sa më afër publikut shqiptar dhe me këtë rast e ofron web faqen e tij në internet, e cila është www.luanbegetti.com

Aktori shqiptar nga Odri i Tetovës, i cili është duke bërë karrierë të bujshme në SHBA, kryesisht në Nju Jork dhe Kaliforni, tash më ka realizuar më shumë se 40 filma të zhanreve të ndryshme, ndërsa çdo moment të lirë e kalon në vendlindje.

Ai këto ditë qëndron në pushim në Tetovë, por kjo nuk do të thotë se nuk përgatitet për projektet e reja që e presin në SHBA, ku do të luaj në një dramë në gjuhën shqipe me Bleona Qeretin, në regji të regjisorit nga Shqipëria Nikolin Frani.

Projekti tjetër ka të bëjë me filmin e komedisë që titullohet “Interkorse”, i cili është në xhirim e sipër, ku ka bërë disa skena dhe i kanë ngelur edhe disa deri në shtator, kur edhe përfundon xhirimi. Ka bërë spotin e reklamimit të veturave të “NISSAN”, ka marrë pjesë në një TV-shou njëorësh “Dashuri rreth e rrotull botës”, që është mirëpritur nga shikuesit.

Luan Bexheti e veçon pjesëmarrjen e tij në shoun televiziv të regjisorit Majkëll Moor me titull, “Majkëll Moor live”, i cili është fitues i çmimit të parë në festivalin e Kanit në Francë me filmin dokumentar, “Farenhajt 9/11”, si dhe është fitues i Oskarit për vitin e kaluar me filmin dokumentar “Bowling for colombine”.

Luani ka dhe plane të tjera. Ky djalosh 31 - vjeç, gjatë qëndrimit në Tetovë, pos tjerash na njoftoi me një sihariq, sa i përket angazhimit profesional. Bëhët fjalë për botimin e një libri më të ri në SHBA që titullohet “Actor's Handbook” (“Doracak për aktorë”), i cili mund të blehet edhe në Internet në adresën www.amazon.com. Libri me tirazh disamilionësh është njëfarë udhëzimi për të gjithë ata që duan të bëhen aktorë, profesion shumë i preferuar në SHBA, ndërsa Luan Bexheti jep opinion për medotën e Stanisllavskit, aktor dhe regjisor rus, i cili që në kohën e Stalinit, i pari theu kufirin fizik në sferën e artit mes lindjes dhe perëndimit, ndërsa me metodat e tij të qasjes së aktrimit, ka sjellë revolucion në këtë profesion, duke shërbyer si shembull për gjithë botën. Nën influencën e Stanisllavskit, punojnë ose kanë punuar aktorët e njohur siç janë: Al Paçino, Rober De Niro, Marllon Brando i ndjerë, Poll Njumën, Xhek Nikollson si dhe Xhems Din, Merlin Monro e shumë të tjerë më herët.

Luan Bexheti jep mendimin e tij për temën e shtruar që ka të bëjë me librin e parë që duhet ta ketë në dorë çdo artist. Në faqen 321 të këtij libri të shkruar vetëm në anglisht, i parashtrohet pyetja Luanit për fazën e parapërgatitjes para se të dalë në skenë. Ai përgjigjet: “Kur unë jam në prapaskenë fokusohem me një objekt që e kam në skenë, që më ndihmon të koncentrohem. Ky moment është një fazë shumë e rëndësishme për aktorin, pasi ekziston një tremë e veçantë që mund të ndikojë në gjithë

Shfaqen”. Pastaj, Luani jep sqarime se jo rastësisht Stanisllavski i ka dhënë rëndësi të veçantë këtij momenti, ka punuar vite të tëra se si të përgatitet aktori për momentet e para të daljes në skenë, janë bërë ushtrime dhe lëvije koncentruese, që kontakti i parë me publikun të jetë i bindshëm, i sinqerë dhe shumë i afërt. Luani thotë se kurrë nuk mund ta mashtrohet publikun, se ai është i ngritur dhe e di shumë mirë se ti je ose nuk je i koncentruar në rolin dhe për atë që duhet bërë në skenë. Përgatitja mizanskenike është vendimtare për ecurinë e një shfaqjeje. Dhe jo rastësisht,si aktorët ashtu edhe regjisorët, në fillim të shfaqjes kanë në vete dozë më të lartë të ngritjes së andrealinit. Pra, gjithë trupi vehet në funksion për realizimin e qëllimit.

Libri, “Actor's hanbook” me nënpyetjet “Si dhe ku të bieni në kontakt e të merrni referenca për aktor, këngëtar dhe valltar”, të shkrimtares Sherry Eaker, është mjaft i kërkuar në mesin e rinisë amerikane dhe si i tillë do të gjejë vend për të gjithë ata që duan të marrin rrugët e aktërimit, ndërsa Luan Bexheti ndjen kënaqësi të veçantë për atë që është përfshirë dhe mburret që puna e tij e palodhshme shumëvjeçare po kurorëzohet edhe me një opinion shumë të vlefshëm për angazhimin e tij të ardhshëm në afirmimin e tij si aktor shiptar.

Luan Bexheti dëshiron të jetë sa më afër publikut shqiptar dhe me këtë rast e ofron web faqen e tij në internet, e cila është www.luanbegetti.com

[krokodili_73]

Doracak për aktorë

mos do ishte me mire te thoshim liber dore per aktore, se doracak sikurka kuptimin e dores me demtime ose shtremberime mjeksore.

[StormAngel]

Sot kishte nje emision me Luan Bexhetin.
Ky gjendet ne Maqedoni,mua me pelqen kshu si njeri e si aktor. Eshte djal i mire.

[Kosovari_78_Ca]

LUAN BEXHETI Shqiptari në Hollivud

NGA GENTIAN MINGA

Dikur nuk mund as ta mendonte, por ja që tani shumë shpejt do të jetë në një film përkrah aktorëve Tom Kruiz dhe Xhon Travolta. Ëndrra e tij është përvijuar bindshëm: të bëhet një nga aktorët më të njohur dhe të paguar në Amerikë.
uan Bexheti është nga Odri i Tetovës, ka lindur në vitin 1972. I ati i tij gjatë gjithë jetës ka punuar si arsimtar, kështu që ai dhe fëmijët e tjerë të shtëpisë morën një kulturë strikte dhe një edukatë të mirë. Megjithë rregullin dhe disiplinën, përsëri Luani nuk ka kaluar një fëmijëri me probleme. Përkundrazi! Ajo është një periudhë e lumtur të cilën e kujton me mall, sepse që fëmijë ai i kishte të gjitha kushtet e plotësuara. Nga ajo kohë plot me ëndrra, por jo aq të mëdha sa të orientonin të ardhmen e tij, ai kujton me shaka: “Në fillim kam pasur dëshirë të bëhem hoxhë, pastaj gangster dhe si përfundim u bëra aktor. Tani dua të bëhem producent. Nuk më zë vendi vend!”
Vetëm në moshën 4 vjeçare, Bexhetit iu desh të linte vendlindjen e tij, Odrin, sepse i ati nuk ishte komunist dhe atë kohë kjo përbënte një problem. Përveç faktit, që ai nuk e pranonte këtë përkatësi politike, ishte edhe një fakt tjetër, kombësia e tij shqiptare, ndaj maqedonasit do ta pushonin nga puna. Familjes së Bexhetit iu desh të emigronte në Oslo të Norvegjisë, ku vazhdon ende të jetojë sot e kësaj dite. Atëherë të atit të Luanit, një kushëri do t‘i këshillonte të emigronte në Çikago, sepse “Atje është jeta dhe jo kund tjetër” Një shok u përpoq t‘i siguronte atij një vizë, por nuk e mbajti fjalën... Ndoshta nuk ishte e thënë që qysh atëherë Luani të vinte në tokën e premtuar, aty ku do t‘i realizoheshin disa nga ëndrrat “e mezithëna me zë të lartë”. Kështu që, familja e tij emigroi në Perëndim, në Norvegji, sepse kjo ishte mundësia e vetme që iu dha për të mbijetuar. Sot Luani është i lumtur që jeton në Amerikë dhe ka çarë në atë vend që dikur iu mohua familjes së vet. “Gjithsesi babi, edhe kur e ftoj të vijë në Amerikë për qejf refuzon, sepse përton të udhëtojë tetë orë me avion”, shprehet Bexheti për revistën “Shqip” teksa vë buzën në gaz. Luani, edhe pse ka luajtur në shumë filma hollivudian, edhe pse punon me artistë të njohur në kontinentin e zilepsur, përsëri mbetet shqiptar, sidomos përsa i përket familjes: “Kam një familje të madhe, tipike shqiptare. Jemi tre vëllezër dhe tri motra”, vazhdon prezantimin e vet Bexheti. Vëllai i tij i vogël është inxhinier informatik, kurse i madhi punon si DJ prej 22 vitesh në një disko të madhe e të njohur në Oslo, pronë e familjes Bexheti. Një motër jeton në Danimarkë, kurse dy të tjerat në Norvegji ku punojnë si mjeke.
Si shkoi Luan Bexheti në Amerikë. Jeta dhe aktivitetet e tij atje

Përpara se të nisej në New York, Luani ishte tashmë i familjarizuar me kamerat. Në Norvegji kishte një karrierë të varfër në sasi, por tepër cilësore... Kishte bërë disa reklama të mëdhaja, ndër të cilat veçon atë të vitit 1994 kur u bë një nga fytyrat kryesore në reklamën kundër Unionit Europian, pasi atë kohë Norvegjia nuk pranoi të bashkohet me EU-në. Ky spot është transmetuar në CNN, Sky News, Euro News etj... “Gjithsesi nuk isha i kënaqur me kaq, doja të luaja në më shumë filma”, -tregon për ambicjet e veta Luan Bexheti, i cili do ta provonte sërish suksesin në fushën publicitare në Amerikë, kur do të bënte reklamën e NISSAN-it. Në kohën kur bluante në mendje plot ëndrra dhe dëshirat e pasionet e tij kërkonin të shpërthenin, dajua i Luanit, Jonuz Emini i ofroi nipit para për të studjuar në Amerikë. Bexheti do të mbërrinte në Los Angeles “me xhepat plot” – siç thotë ai, dhe do të merrte leksione teatri nga profesorët më në zë të kësaj gjinie, nxënës të Lee Strasbergut. Në shkollën ku do të regjistrohej, do të studjonte në të njëjtin kurs me fëmijë njerëzish të pushtetshëm, nga familje të njohura në Amerikë si për shembull, Afërditi Savalas, mbesa e Telly Kojak Savalasit apo të bijat e aktorit hollivudian Andi Garcia. Me ndihmën e profesorëve dhe miqëve të rinj, që Luani bëri gjatë kohës së shkollës, do të xhironte disa filma, reklama dhe do të interpretonte në disa pjesë teatrale. Kështu filloi karriera amerikane, e cila...: “Shpresoj të vazhdojë përgjithnjë”, -thotë Luani. Një nga momentet më të këndshme që kujton kur ishte në Amerikë për të studiuar, është kur jetonte përkrah Xhulia Robertsit. “Vëllai im ka ardhur enkas nga Norvegjia me shpresë se do të shihte Xhulian ’live’ dhe kur e pa, u habit tej mase.” Dikur edhe atij i bënin përshtypje të tilla gjëra, kurse sot jo më... “I njoh nga afër, personalisht thuajse gjysmën e aktorëve më të mëdhenj të Hollivudit,” -rrëfen për “Shqip” Bexheti.
Pas Sten Dragotit, vëllezërve Belushi dhe Eliza Dushkut një tjetër shqiptar hyn bindshëm në Hollivud. “Shpresoj se do e arrij qëllimin të bëhem një nga aktorët më të mëdhenj dhe të paguar në Amerikë”, -thotë Bexheti. Na rrëfen se Sten Dragotin e ka mik të afërm, takohen dhe bisedojnë shpesh së bashku për projekte filmash, madje aktualisht Dragoti po punon me idenë për të xhiruar një film ku ndoshta gjen një rol edhe për Luanin. “Edhe Xhejms Belushin e kam takuar, por me të nuk kam atë lidhje, atë marrëdhënie që do të doja të kisha. Është tip paksa i ftohtë!” -tregon Bexheti. Megjithatë, shqiptarë ose jo, këta janë më së shumti artistë të Hollivudit, sepse sipas dëshmisë së Luanit: “Nuk është e thënë që të jetosh se s`bën në Hollivud për të qenë pjesë e tij!”
Para se të fillonte ’boom’-in profesional në Njw York, Bexheti ka jetuar për disa kohë në Los Angeles e më pas në Kaliforni. Në këto dy vende jeta i është dukur paksa e bezdisshme, sepse ...: “Ngado që hidhje sytë, shikoje aktorë dhe kjo pas disa ditëve bëhej diçka bajate. Të paktën në Njw York njerëzit janë “normal” dhe nuk ndodh që edhe shoferi i autobuzit të jetë aktor në xhirim e sipër”. Kur fillimisht mbërriti në Amerikë, Luani mendonte se do të bënte karrierë shpejt e shpejt, por...shprehet ai: “Tani jam bindur, jam përgatitur shpirtërisht që të punojë edhe 50 vjetë të tjera nëse dua të arrijë qëllimet që i kam vënë vetes”.
Luani nuk i ka shkëputur gjithsesi lidhjet me vendlindjen e tij, sepse kthehet çdo verë për të pushuar rreth dy muaj në Odër. Lidhjet me vendlindjen dhe origjinën, i ruan edhe në profesion: Ka provuar që me regji të Nikolin Franit të interpretojë në Amerikë një pjesë teatrale të titulluar “Vëllazëri e Interes” së bashku me aktoren dhe këngëtaren e njohur sidomos në Shqipëri, Bleona Qerretin. Ky projekt nuk mori dot jetë, sepse kjo e fundit ka pasur impenjime në muzikë, ndaj nuk mundi t`i dedikohej këtij projekti teatral. Një përvojë “të papërsëritshme dhe unike” siç e quan vet Luani, ai e ka kaluar teksa xhironte në Gjirokastër filmin “Syri Magjik” me regjisorin shqiptar Kujtim Çashku.
Kurse kulmi i karrierës së Bexhetit, mund të quhet pjesëmarrja në shfaqjen televizive “Majkëll Mur live” të regjisorit Majkëll Mur, i cili vitin që shkoi fitoi çmimin e parë të Kanës me filmin dokumentar kushtuar ngjarjeve të 11 shtatorit në Amerikë, “Farenhajt 9/11”.

Përfshirja e Luanit në Actor‘s Handbook (Doracaku i Aktorëve)

Është i vetmi aktor shqiptar që është përfshirë në antologjinë për aktor “Actor`s Handbook” shkruar nga Sherry Eaker. “Ndihem krenar, i lumtur dhe nuk më besohet se një intervistë që dhashë për gazetën “Backstage” do të botohej në librin “Actor’s Handbook” -shprehet Bexheti. Në faqen 321 të këtij libri, ai jep një këshillë për të gjithë ata që duan të bëhen aktorë, duke rrëfyer përjetimet vetjake: “Kur jam në prapaskenë fokusohem në një objekt që e kam në skenë, sepse ai më ndihmon të koncentrohem”. Këtë metodë të regjisorit të madh rus, Stanisllavski, Luani e ka mësuar në “Lee Strasberg Theatre Institute”. “Në fillim, kur dilja në skenë, frikësohesha prej publikut, por pasi e mësova këtë teknik frika ime zgjat vetëm 3 minuta. Pas kësaj, ndihem rehat në skenë, harroj gjithçka dhe mund të aktroj sinqerisht”, - shprehet Luan Bexheti.
Shkak për t‘u bërë pjesë e “Actor‘s Handbook” u bë regjisori Elias Stimaç, me të cilin Bexheti ka bashkëpunuar në disa projekte teatrale. Ky është një libër, të cilin e lexojnë me kërshëri jo vetëm pjesa më e madhe e atyre që aspirojnë për t‘u bërë aktorë në të ardhmen, por edhe vet aktorët e afirmuar dhe të njohur tashmë në skenat dhe ekranet botërore.

Projekti më i fundit.
Ambicjet për të ardhmen

Projekti që Luani sapo ka përfunduar është filmi dokumentar “The Cadillac Man” ku ai është në rolin e producentit. Protagonisti i kësaj historie është personazh real, i vërtetë. Bëhet fjalë për një prej afro 500.000 veteranëve të luftës që jeton rrugëve të SHBA-së. Cadillac man e ka marrë emrin prej disa makinave që e kanë shtypur herë pas here në rrugët e Njw Yorkut dhe që janë çuditërisht të gjitha të tipit Cadillac. Teksa kthehej nga Majemi në Njw York me avion, Luani lexoi në revistën e njohur amerikane “Esquire” historinë e këtij njeriu dhe i propozoi mikut të vet, regjisorit Majkëll Regan, që ta takonin këtë njeri dhe të bënin për të një film dokumentar. Cadillac man-i është me famë në Amerikë dhe shumë gazeta e revista kanë shkruar për të, por ky është i pari dhe i vetmi film dokumentar që i kanë kushtuar.
Për të ardhmen, Luan Bexheti ka ambicje edhe më të mëdha… Nuk dëshiron që një ditë të mendojë “pse nuk provoi të realizonte ëndrrën për t`u bërë aktor”, – siç i pëlqen ta theksojë herë pas here. “Nuk dua të jetoj dhe të vdes anonim. Kur të vdes unë, dua ta dijë krejt Bota se ka vdekur Luan Bexheti”, – shprehet ai... Ndaj edhe po punon që ta realizojë këtë ambicje! Aktualisht, është në diskutim e sipër një projektfilm me aktorët Tom Kruiz dhe Xhon Travolta ku edhe Luani mund të interpretojë. Nëse ky projekt merr udhën e realizimit, atëherë mund të themi se Bexheti ka goditur në zemër të Hollivudit. Ne e pyetëm Luanin se çfarë po bëhet aktualisht me këtë plan ambicioz, dhe ai na tha se ende asgjë nuk është vendosur përfundimisht, por shanset janë të mëdha. Filmi është dokumentar dhe titullohet “Scientology”, një temë që sipas Bexhetit është fort e dashur për Tom Cruizin dhe Xhon Travoltën. E bukura e kësaj pjese, ajo që e josh më tepër Luanin është pikërisht pjesëmarrja në të e dy kolosëve të ekranit të vogël amerikan, pasi dokumentarët nuk janë të preferuarit e tij. “Parapëlqej filmat artistik dhe pjesët teatrale”, – shprehet Bexheti. Kjo është arsyeja pse pranoi me kënaqësi të interpretojë një pjesë në dramën “Hija” me skenar të Ismail Kadaresë dhe regji të shqiptarit tjetër që jeton në Amerikë, Xhevat Limani. Kjo do të jetë e dyta herë që Bexheti punon me Limanin, pas vënies në skenë të dramës “Anatema” ku ai interpreton rolin e Djallit.

[Cimo]

Luan Bexheti, djaloshi tetovar i filmave



Luan Bexheti, aktori shqiptar nga Tetova që ka bërë famë në rrugët e Broadwayt, të New Yorkut, ekskluzivisht për TetovaOnLine jep një intervistë, ku pos tjerash thotë se: kanë dëshiruar t'a bëjnë mjek, është në kontakt me fotomodelet shqiptare, është shqiptari i vetëm në 'Actors Handsbook'...


TetovaOnLine.info: Luan, keni qenë vetëm 4 vjeçar kur ikët nga vendlindja për ne Norvegji, pse ndodhi keshtu?

Ishte koha postkomuniste, gjendja ekonomiko-politike atëherë në Maqedoni ishte jo e kënaqshme. Më pas babai im filloj një punë në Norvegji në vitin 1969 dhe na morri edhe neve, familjen time, në vitin 1976 kur unë isha vetëm 4 vjeçar. E kemi patur ndërmend të kthehemi në vendlindje, por nuk kemi patur mundësi, sepse është tepër vështirë të kthehesh në një vend jo aq stabil ekonomikisht, kur je mësuar të jetosh në shtetin më të mire të botës, Norvegji.

TetovaOnLine.info: Jeni i lindur në Tetovë, i rritur në Norvegji, i pjekur profesionalisht në New York, Amerikë! A nuk eshte një përzierje personalitetesh për ju kjo?

Po është. Kur jam në Norvegji më thuajnë se flas me theks amerikan, kur vij në Tetovë, e ndjej veten si norvegjez, ndërsa kur jam në Amerikë apo Norvegji, e ndjej veten si patriot shqiptar! ( hahaha - qeshet )



TetovaOnLine.info: Po ndërhyj këtu: E ndjeni veten më shumë tetovar, evropian apo amerikan? Drejt ju lutem! (hahaha - intervistuesi qeshet)

Shqiptar me mentalitet skandinav! Dmth, shqiptar! Jam krenar që jam lindur shqiptar!

TetovaOnLine.info: Po ju arritët kulmin e karierës suaj në Amerikë, mendoni se nga filozofia amerikane asgjë nuk j’u është ngulitur në kokë?

Jo. Nga Amerika nuk kam përfituar asgjë nga ana emocionale apo shpirtërore, përveç karierës.

TetovaOnLine.info: Duke gjurmuar për Luan Bexhetin në 'The Internet Movie Database' (IMDb) hasëm në një kolekcion të tërë filmash, dokumentaresh, dramave, të luajtura apo regjisuara nga ju? Në sa filma keni lujtuar deri më tani?

Kam luajtur në më tepër se 40 filma, drama apo dokumentare. Ndërsa si producent, vetëm një regji kam bërë!



TetovaOnLine.info: Jeni shqiptari i vetëm në IMDb? (The Internet Movie Database)

Jo, ka edhe shqiptarë tjerë në IMDb, ai është James Biberi.

TetovaOnLine.info: Por jeni shqiptari i vetem ne Actor‘s Handbook?

Po jam. Atë libër e lexojnë e gjithë rinia e fushës së artit.

TetovaOnLine.info: Pasi jeni bërë i njohur si aktor, tashmë shfaqeni dhe si producent. Si erdhi kjo zgjedhje tek ju?

I ndihmova një shokut tim, i cili ka shumë para dhe dëshiron të bëhet regjisor. Unë ja gjej projektet, ai i financon. Por, edhe une sot punoj si producent, këto ditë kemi blerë një skenar nga një shkrimtar nga California, Michael Reagan, dhe do t’a xhirojmë në muajin Janar 2007.

TetovaOnLine.info: Luan ku e ndjen veten më mirë: si aktor apo producent?

Si aktor, atëherë e ndjej veten më të lumtur.

TetovaOnLine.info: Te kthehemi në fillet e karieres suaj artistike, ju për herë të parë u shfaqët para kamerave televizive në fushatën e vitit 1994 kur u bëte një nga fytyrat kryesore në reklamën e Norvegjisë kundër Unionit Europian!

Hahaha. Po, ashtu është!

TetovaOnLine.info: Ç’rol pati kjo paraqitje në karieren tuaj?

Në vitin 1991 kam realizuar reklamën e pare, por më 1994 ka qenë njëra nga reklamat më të mëdha. Me këtë reklamë dhe me ndihmën e dajës sim që më dha edhe 100.000 dollarë tjerë, unë erdha në Amerikë, dhe ku jam edhe sot.

TetovaOnLine.info: Kontrata ime me lypësin, apo - "Cadillac man"! Na thoni diçka më shumë për këtë projekt? Është njëri nga realizimet më të sukseshme nga repertuari juaj artistik?

Po, se kam patur bashkëpunime me njerëz të njohur, si nga revista Esquiere dhe agjentët në fushën e filmit në agjencitë më të mëdha të Hollywoodit, dhe më kanë dhënë mundësinë të jem i sukseshëm.



TetovaOnLine.info: Pse pikërisht një film për "Cadillac man"?

Është krejt rastësisht. Michael Reagan, regjisori i projektit, deshironte të realizon një projekt për këta njerëz, që janë pa strehë, pa kulm mbi kokë, dhe që flenë në rrugë. Ndërsa CADILLAC MAN-i, ka qenë njëri prej atyre.

TetovaOnLine.info: Karriera juaj artistike si aktor evidentohet në mjaft filma shqiptarë dhe të huaj. Keni luajtur nëpër filma shqiptar, dhe a kishit luajtur?

Po kam luajtur. Kam marrë pjesë në disa filma shqiptarë, dhe tash para një muaji isha në vizitë në Shqipëri për të marrë pjesë në filmin ‘Nata e kometës’, por i kemi ndërpre xhirimet, për shkak të motit, ndërsa do të vazhdojmë në pranverë përsëri. Në këtë film është pjesmarrës edhe edhe Blerim Destani.

TetovaOnLine.info: Përmendët Blerim Destanin, ç'ka ju motivoj të bashkpunoni me këtë aktor, duke ditur se ai është aktor relativisht i ri në skenën e filmit shqiptar?

Po, ai ka investuar në filmin e Fatmir Kocit. Blerim Destani është një person shumë i mire, dhe i ka të gjitha predispozitat të bëhet një aktor shumë i famshëm. Ka para, dhe në këtë profesion, paraja është çelësi i suksesit.



TetovaOnLine.info: Kuptohet se aktorët udhëtojnë shumë. Ju udhëtoni vetëm apo jeni nën shoqërimin e ndojnë fotomodeleje shqiptare?

Kam femra me vete gjatë udhëtimeve plot, shyqir Zotit, por unë dua të martohem me një shqiptare dhe të bëj një shqiptar të vogël.

TetovaOnLine.info: Preferoni shqiptaret, apo?

Normal, më mirë kur të thotë ajo ‘TË DUA’, se sa ‘I love you’!

TetovaOnLine.info: Luan, cila është ëndrra juaj profesionale, edhe pse keni arritur mjaft në profesionin tënd?

Të kem një karierë të mirë në fushën e filmit dhe teatriti, der kur ti mbushi 90 vjet. Kjo është ëndrra ime profesionale.

TetovaOnLine.info: Prefernecat tuaja artistike, qofshin ato aktorë shqiptarë apo te huaj?

Robert De Niro është aktori im i preferuar. Ndërsa po ashtu preferoj edhe këngëtarin folklorik shqiptar Mahmut Feratin, që ka qenë nxënës i babait tim. Babai im ka qenë tërë jetëm mësues, dhe ishte ai që nuk dëshironte të bëhem unë aktor, por më thonte bëhu mjek, bëhu mjek. (hahaha)

TetovaOnLine.info: Luani është padyshim shqiptari më i njohur në Broadway? A e konsideroni veten albanian V.I.P?

Nuk jam vetëm unë bë Broadway, këtu është edhe Uliks Fehmiu (djali i Bekim Fehmiut) dhe Agim Biberi. Tash jemi duke përgatitur një dramë bashkë, unë, Uliksi dhe Agimi, drama emërohet ‘American Buffalo’.



TetovaOnLine.info: Në Ballkan thonë: nuk jetohet nga aktrimi, arti s'ka para! Ju si jetoni, punoni edhe diç tjetër pos aktrimit?

Po punoj edhe si producent, prej asaj edhe jetoj aktualisht. Ndërsa prej aktrimit ende nuk mund të bëj një jetë luksoze, por në të ardhmen shpresoj se po.

TetovaOnLine.info: Ku jeni për momentin, Tetovë, Oslo, New York!

Në NEW YORK CITY!

TetovaOnLine.info: Në projektet e Luanit është dhe një film me Tom Cruise e John Travolta!

Jo, ato nuk e pranuan projektin tonë.

TetovaOnLine.info: Këtë e keni thënë për revistën shqiptare Klan, pse dështoi projekti?

Revista KLAN ka marrë gabimisht informatën. Unë fillova të realizoj një dokumentar për religjionin Scientology, fe që i takojnë Tom Cruise dhe John Travolta, dhe doja ti marr ato në intervistë për dokumentarin tim, por agjentët e tyre nuk pranuan dhe projekti dështoi. Ndërsa KLANI ka shkruar se unë do të luaj në film me Tom Cruise dhe John Travolta. Informatë e servuar gabimisht në opinion.





TetovaOnLine.info: ‘Gandhi Park’ është projekti më i ri i juaji, ju luani rolin e Anthonyt. Çka do të na thoni për këtë film?

Ky projekt është film tipik indiano-amerikan. Muzikë dhe probleme mes familjes së një vajze nga India dhe një djali nga Amerika.

TetovaOnLine.info: Cili është roli juaj më konkretisht?

Luaj një rol episodik në këtë film, xhirimet e filmit për momentin zhvillohen në Indi, ndërsa në dhjetor do të vijnë këtu në New York ku do të inkuadrohem edhe unë. Njëkohësisht në këtë film jam edhe si ko-producent.

TetovaOnLine.info: Para se të bëhej aktor, Luan Bexheti, ëndrronte të bëhej GANGSTER, por më pas shijoi burgun dhe vendosi që rolin e gangsterit të luaj vetëm nëpër filma!

Fakt. (hahaha) Isha në burg vetëm 3 orë, por kur më nuk dua të shkoj përsëri. E kisha ëndërr të bëhem gangster i imponuar nga filmat gangster, por kur më zuri policia e pashë se ç’është të jesh në shënjestër të policisë gjithmonë.

TetovaOnLine.info: Kohët e fundit ke patur një bashkëpunim për reklama me firmën japoneze të makinave “Nissan” si dhe në Show-in e Michael Moore.

Po. Po ashtu kam luajtur edhe me Michael Moor në programin e tij, ai u bë njëri ndër regjisorët më të sukseshëm në botë me dokumentarin 9/11.



TetovaOnLine.info: Dhe për fund Luan, cili është mesazhi juaj drejtuar vizitorëve të portalit mbarëkombëtar shqiptar TetovaOnLine.info?

Shpresoj se webportali juaj do të bëhet një qendër informimi kolosale dhe se më në fund shqiptarët do të gjejnë një strehë ku mund të lexojnë lajmin në original. Dhe për fund, ju falemenderit për kohën dhe ju uroj suksese në jetë. Me respekt Luani!


Per me shume foto KLIKO KETU

[Cimo]

Luan Bexheti, producenti, aktori i njohur nga Tetova, në Nju Jork vjen me një komedi në njërin prej teatrove "Gotham Comedy Club" në Broadway.


Producenti dhe aktori i njohur me origjinë tetovare, Luan Bexheti ofroi para publikut amerikan një komedi të improvizuar të stilit amerikan me humor nga më të ndryshmit, në njërin prej teatorve të famshëm në Broadëay.
Emri dhe vepra e tij tashmë janë afishuar në stendat e reklamat e këtij bulevardi të mahnitshëm njujorkas. Ai kështu pas disa aktrimeve të suksesshme, dhe realizmit të disa filmave vjen në teatrin e quajtur "Gotham Comedy Club" në Manhattan në Nju Jork me një shfaqje plot humor.
Bexheti thotë se kënaqësin më të madhe si në aktrim ose në produksionin e filmave e ndien kur atë e ndjekin me vemendje shqiptarët.
Kurse kulmi i karrierës së Bexhetit, mund të quhet pjesëmarrja në shfaqjen televizive “Majkëll Mur live” të regjisorit Majkëll Mur, i cili vitin që shkoi fitoi çmimin e parë të Kanës me filmin dokumentar kushtuar ngjarjeve të 11 shtatorit në Amerikë “Farenhajt 9/11”.

Kush është Luan Bexheti ?

Luan Bexheti ka lindur në Odri afër Tetovës në Maqedoni më 11 gusht 1972. Në moshën katër vjeçare familja largohet drejt Norvegjisë. Familja e tij vazhdon të jetojë ende në Norvegji, ku Bexheti shkon për pushimet e Dimrit. Ndërsa, pushimete verës i kalon në Tetovë, dhe shpesh herë në ishujt egzotikë nëpër Karaibe. Vetë jeton në Nju Jork, që nga viti 1995, ku dhe ka kryer studimet në Institutin e njohur të teatrit në Nju Jork "Lee Strasberg". Para disa vitesh është përfshirë në librin “Actors handbook” për metodën e Stanisllavskit “The Method”, të cilën e ka studiuar në Lee Strasberg Institute.
Karriera e tij artistike si aktor evidentohet në mjaft filma shqiptarë dhe të huaj. I njohur tek "Maree", një prodhim shqiptaro-italian i regjisorit italian, Xhejms Pellerito. “Maree” (Baticat) ka marrë vlerësimet maksimale gjatë vitit 2003-2004, duke fituar çmime në Festivalin e Nju Orleansit, në Festivalin e Tiburonit me çmimin "FedericoFellini", në Festivalin në Los Anxhelos, ndërsa në Festivalin e Filmit Amerikan është shpallur filmi më i mirë me metrazh të shkurtër.
Ndoshta, një prej "perlave" të tij është padyshim edhe filmi "Cadillac Man". Filmi që Luani ka përfunduar dhe ka pasur sukes të plotë është filmi dokumentar “The Cadillac Man”, ku ai është në rolin e producentit.
Protagonisti i kësaj historie është personazh real, i vërtetë. Bëhet fjalë për një prej afro 500.000 veteranëve të luftës që jeton rrugëve të SHBA-së. Cadillac man e ka marrë emrin prej disa makinave që e kanë shtypur herë pas here në rrugët e Neë Yorkut dhe që janë çuditërisht të gjitha të tipit Cadillac. Teksa kthehej nga Majami në Neë York me avion, Luani lexoi në revistën e njohur amerikane “Esquire” historinë e këtij njeriu dhe i propozoi mikut të vet, regjisorit Majkëll Regan që ta takonin këtë njeri dhe të bënin për të një film dokumentar.
Cadillac man-i është me famë në Amerikë dhe shumë gazeta e revista kanë shkruar për të, por ky është i pari dhe i vetmi film dokumentar që i kanë kushtuar."Cadillac Man", kështu quhet një i pastrehë që jeton poshtë një ure treni në një lagje të qytetit të Neë Yorkut për afro 12 vjet.
Ndryshe nga të pastrehët e tjerë, 55 vjeçari, veteran i luftës në , tërhoqi vëmendjen e shumë revistave dhe gazetave të njohura si Esquire apo Neë York Times, me ditarin e rregullt që ai ka mbajtur rreth jetës në rrugë. Këtu e morën pikënisjen edhe regjisori Michael Regan dhe producenti Luan Bexheti për të bërë një dokumentar rreth jetës së njeriut të pastrehë. Dokumentari i Bexhetit, ka konkuruar në disa festivale kombëtare dhe ndërkombëtare, dhe e ka bërë emër shumë të njohur aktorin dhe regjisorin shqiptar, me origjin nga Tetova, Luan Bexheti.

Përfshirja e Luanit në Actor‘s Handbook (Doracaku i Aktorëve)
Është i vetmi aktor shqiptar që është përfshirë në antologjinë për aktor “Actor`s Handbook” (Doracaku i Aktorëve) shkruar nga Sherry Eaker.
“Ndihem krenar, i lumtur dhe nuk më besohet se një intervistë që dhashë për gazetën “Backstage” do të botohej në librin “Actor’s Handbook” -shprehet Bexheti. Në faqen 321 të këtij libri, ai jep një këshillë për të gjithë ata që duan të bëhen aktorë, duke rrëfyer përjetimet vetjake: “Kur jam në prapaskenë fokusohem në një objekt që e kam në skenë, sepse ai më ndihmon të koncentrohem”. Këtë metodë të regjisorit të madh rus, Stanisllavski, Luani e ka mësuar në “Lee Strasberg Theatre Institute”.
“Në fillim, kur dilja në skenë, frikësohesha prej publikut, por pasi e mësova këtë teknik frika ime zgjat vetëm 3 minuta. Pas kësaj, ndihem rehat në skenë, harroj gjithçka dhe mund të aktroj sinqerisht”, shprehet Luan Bexheti.
Shkak për t‘u bërë pjesë e “Actor‘s Handbook” u bë regjisori Elias Stimaç, me të cilin Bexheti ka bashkëpunuar në disa projekte teatrale. Ky është një libër, të cilin e lexojnë me kërshëri jo vetëm pjesa më e madhe e atyre që aspirojnë për t‘u bërë aktorë në të ardhmen, por edhe vet aktorët e afirmuar dhe të njohur tashmë në skenat dhe ekranet botërore.Pas Sten Dragotit, vëllezërve Belushi dhe Eliza Dushkut një tjetër shqiptar hyn bindshëm në Hollivud. “Shpresoj se do e arrij qëllimin të bëhem një nga aktorët më të mëdhenj dhe të paguar në Amerikë”, thotë Bexheti.
Na rrëfen se Sten Dragotin e ka mik të afërm, takohen dhe bisedojnë shpesh së bashku për projekte filmash, madje aktualisht Dragoti po punon me idenë për të xhiruar një film ku ndoshta gjen një rol edhe për Luanin.
“Edhe Xhejms Belushin e kam takuar, por me të nuk kam atë lidhje, atë marrëdhënie që do të doja të kisha. Është tip paksa i ftohtë!”, tregon Bexheti. Megjithatë, shqiptarë ose jo, këta janë më së shumti artistë të Hollivudit, sepse sipas dëshmisë së Luanit: “Nuk është e thënë që të jetosh se s`bën në Hollivud për të qenë pjesë e tij!”.

www.Poroj.com

[Tigrimelara]

Cimo me duket si ti bere foto me Luanin ne dasem

[KUSi]

Cimo me duket si ti bere foto me Luanin ne dasem

Tigrimelara a ke dasma e Nikit ja bone foton

[Tigrimelara]

Tigrimelara a ke dasma e Nikit ja bone foton

Po Kusi,ama foton se kam be une, vetem me kujtohet kur Cimoja shkoj te dal foto, .