Berisha: Dita e sotme shenon fundin e tranzicionit shqiptar

[Albo]

Kryeministri Berisha: Dita e sotme shënon fundin e tranzicionit të ekonomisë shqiptare

- Qeveria shqiptare dhe Fondi Monetar Ndërkombëtar nënshkruan sot letrën e mirëkuptimit për miratimin e rishikimit të 6-të dhe të fundit të marrëveshjes 3-vjeçare me FMN-në.

- Ann Margaret Westin: Gjatë këtij programi, Shqipëria, e nisur nga vendet me zhvillimin më të ulët ekonomik, është bashkuar me vendet që janë në zhvillim.

Qeveria shqiptare dhe Fondi Monetar Ndërkombëtar nënshkruan sot letrën e mirëkuptimit për miratimin e rishikimit të 6-të dhe të fundit të marrëveshjes 3-vjeçare me FMN-në. Dokumenti u firmos në Kryeministri, nga Kryeministri Sali Berisha, Ministri i Financave Ridvan Bode dhe Guvernatori i Bankës së Shqipërisë Ardian Fullani, në prezencën e Përfaqësueses së Misionit të FMN-së në Shqipëri Ann Margaret Westin. Ky dokument do të miratohet nga bordi i FMN-së në Uashington në fund të janarit, kur përmbyllet programi 3-vjeçar i Shqipërisë me FMN-në.

Pas nënshkrimit të dokumentit, Kryeministri Berisha u shpreh se dita e sotme shënon fundin e tranzicionit të ekonomisë shqiptare.

“Dita e sotme – tha Kryeministri - shënon fundin tranzicionit të ekonomisë shqiptare. Sot u firmos fundi i tranzicionit të një prej ekonomive më të centralizuara në Europë dhe në botë dhe tani ajo ecën me institucionet e maturuara të saj. Për një vend demokratik nuk ka asgjë më të rëndësishme sesa një ekonomi solide tregu, pa të cilën ajo nuk mund të ekzistojë.”

Kryeministri Berisha e vlerësoi nënshkrimin e këtij dokumenti një moment të veçantë që mbyll me sukses një program për të nisur një bashkëpunim të ri me FMN-në.

“Ky është një rast për t’i shprehur falënderimet e mia më të sinqerta FMN-së, e cili nisi punën në Shqipëri në një periudhë kolapsi total ekonomik e financiar me një inflacion 3 shifror, një deficit buxhetor 49 për qind, me një rënie dramatike të ekonomisë shqiptare. Gjatë këtyre viteve. FMN-ja është provuar një partner i shkëlqyer që ka ndihmuar qeveritë shqiptare në hartimin e politikave fiskale e monetare që kanë garantuar stabilitetin makroekonomik dhe rritjen e shëndetshme ekonomike të vendit. Në këtë kontekst kjo është një mbyllje fatlume dhe krenare, sepse ky program mbyllet në një kohë kur Shqipëria ka një stabilitet të shkëlqyer makroekonomik, mbyll vitin me inflacion rreth 2.2 për qind, me një rritje ekonomike të pakrahasueshme në rajon dhe më të lartat në Europë, me një ekonomike të gjallë e dinamike,” u shpreh Kryeministri Berisha.

Kryeministri Berisha shprehu gatishmërinë e qeverisë shqiptare për të punuar me të njëjtin seriozitet me FMN-në edhe në këtë stad të ri të bashkëpunimit.

“Unë shoh me shumë kënaqësi vazhdimin e bashkëpunimit me FMN-në, duke e garantuar se në këtë stad të ri bashkëpunimi që hyn qeveria shqiptare ne jemi të vendosur të ndjekim me seriozitetin më të madh projektimet e FMN-së. Dy ditë më parë ne miratuan buxhetin afatmesëm duke mishëruar aty të gjitha parimet e domosdoshme për garantimin e stabilitetit ekonomik, rritjes ekonomike, në një kohë kur vendet e thera po rrisin deficitet buxhetore ne po i ngushtojmë dhe jemi të vendosur ta ngushtojmë.”

Me këtë rast, Kryeministri Berisha shprehu falënderimet për ndihmën shumë të çmuar të FMN-së në konsolidimin e praktikave më të mira në institucionet, duke qenë dhe një promotor në inkurajimin e qeverisë shqiptare drejt privatizimeve të mëdha.

“Dua të falënderoj zonjën Ann Margaret Westin për përfundimin e shkëlqyer të programit, të falënderoj me shumë mirënjohje të gjithë ekipin. Kanë qenë tre vite realisht të suksesshëm, tre vite debati intensiv, por edhe mirëkuptimi të madh.”

Zonja Ann Margaret Westin, përfaqësueses së Misionit të FMN-së në Tiranë u shpreh se tashmë Shqipëria i është bashkuar vendeve në zhvillim, duke siguruar për vazhdimin e mëtejshëm të mbështetjes.

“Gjatë këtij programi, Shqipëria, e nisur nga vendet me zhvillimin më të ulët ekonomik, është bashkuar me vendet që janë në zhvillim. Shqipëria që në fillim i është bashkuar programit të FMN-së dhe programi i fundit ishte i 6-i. Gjatë këtyre programeve, ne jemi fokusuar në çështje themelore që kanë të bëjnë me stabilitetin makroekonomik, si dhe në reforma kyçe që kanë të bëjnë me zhvillimin e qëndrueshëm ekonomik. Këto programe kanë të bëjnë me administratën e taksave, menaxhimin, mbikëqyrjen e bankave, statistikat dhe privatizimin e sektorëve. Pavarësisht se sot mbyllim programin, ne do ta mbështesim Shqipërinë nëpërmjet konsultimeve apo programeve të asistencës,” u shpreh znj. Westin.

Ministri i Financave Ridvan Bode theksoi se progresi i arritur gjatë zbatimit të marrëveshjes së fundit 3 vjeçare me FMN-në mundësoi kalimin në këtë nivel të ri më të lartë të marrëdhënieve me Fondin Monetar Ndërkombëtar.

“Marrëveshja e fundit 3 vjeçare, përfundimi me sukses i objektiva të saj, rritja e nivelit të maturitetit e institucioneve të shtetit shqiptar për të menaxhuar financat publike, zhvillimi i reformave ristrukturore në shkallë të gjerë e bindën FMN-në për të graduar Shqipërinë, për të kaluar nga faza e mbikëqyrjes në kuadrin e programit për zbutjen e varfërisë dhe nxitjen ekonomike, në një program të ri, i cili nënkupton artikullin 4 të FMN-së. Shqipëria kalon nga mbikëqyrja e drejtpërdrejt dhe e hapur, në një mbikëqyrje të dy-tre parametrave kryesorë makroekonomikë,” u shpreh Bode.

Guvernatori i Bankës së Shqipërisë Ardian Fullani vlerësoi si arritje të rëndësishme në këtë bashkëpunim të ngushtë me FMN-në në Shqipëri ndërtimin e strukturës dhe infrastrukturës së nevojshme për një shtet demokratik, duke veçuar krijimin e Bankës së Shqipërisë, të sistemit të kursit të këmbimit etj..

Kryeministria

[Brari]

Kryeministri inspekton nga afër zonat e prekura nga reshjet e dendura të borës


Berisha: Qeveria, e mobilizuar për situatën në veriun e vendit


Kryeministri Berisha ka inspektuar dje nga afër zonat verilindore të vendit, për t'u njohur nga afër me situatën e krijuar nga moti i keq dhe masat e marra për përballimin e saj. Qyteti i Peshkopisë ishte ndalesa e parë e kryeministrit, i cili zhvilloi takime me banorët e kësaj zone duke dëgjuar shqetësimet e tyre lidhur me situatën e krijuar nga reshjet e shumta të borës. Ndërsa zhvilloi një takim në Bashkinë e qytetit, me përfaqësues të pushtetit vendor dhe shtabit lokal të emergjencës, kreu i ekzekutivit u informua mbi situatën e komunikimit të rrugëve, furnizimit me ushqime dhe emergjencave shëndetësore të këtyre zonave. Lidhur me këtë situatë, kreu i ekzekutivit shqiptar kërkoi nga të pranishmit marrjen e të gjitha masave për parashikimin e rezervave ushqimore, gjendjen e rezervave shëndetësore, si dhe vendosjen e kalueshmërisë së rrugëve dhe ndihmave emergjente. Megjithatë, kreu i ekzekutivit theksoi se në mobilizimin ndaj rehabilitimit të kësaj situate prioriteti kryesor duhet të mbetet jeta e njeriut. "Në prioritetet e emergjencave, i pari është njeriu. Kudo që të ndodhet një qytetar, ne duhet të bëjmë të gjitha përpjekjet për ta ndihmuar atë", u shpreh kreu i ekzekutivit, i cili përgëzoi dhe inkurajoi qeveritarët vendorë për punën e bërë për përballimin e situatës dhe ruajtjen e normalitetit të jetës në këto zona. Kryeministri theksoi se qeveria po ndjek me vëmendje të madhe dhe në vazhdimësi situatën në këto zona. Gjithashtu, kryeministri vuri në dukje se ka ndjekur hap pas hapi situatën në të gjitha vendet, të cilat kanë patur vështirësi për shkak të reshjeve të dendura të borës. "E kam ndjekur në mënyrë konstante situatën e krijuar në Dibër, Kukës dhe në qarqe të tjera që kanë pasur probleme. Tashmë është krijuar Shtabi Qendor i Emergjencave, i kryesuar nga zëvendëskryeministri Pollo dhe po e ndjekim situatën në vazhdimësi", theksoi kreu i qeverisë. Gjithashtu, kryeministri ka vënë në dukje se në situata të tilla ka dy aspekte kryesore që duhet të realizohen, së pari është mobilizimi dhe, së dyti, parashikimi i situatave. "Ju duhet të mobilizoni të gjitha resurset lokale, ndërkohë që qeveria ka kërkuar nga prefekturat që të shpallin gjendjen e emergjencës, mbi bazën e të cilës, ata, në përputhje me ligjin mobilizojnë çdo resurs lokal, në funksion të zgjidhjes së emergjencës", ka theksuar kryeministri ndër të tjera. Për më tepër, ai nënvizoi se në Tiranë është një skuadrilje e tërë me helikopterë që janë në gatishmëri për çdo rast të nevojshëm. Ai theksoi se, edhe në rast se helikopteri nuk mund të shkojë në atë zonë apo fshat, duhet të organizohet transporti me barelë apo me mjete të tjera të nevojshme i çdo qytetari. Kështu, kryeministri theksoi se është e domosdoshme ngritja e skuadrave të gatshme. "Duhet të ngrihen skuadra të gatshme dhe nuk duhet të lemë asnjë njeri pa ndihmuar", tha kryeministri.


Shtabi i Emergjencës, fonde për çdo komunë


Shtabi i Emergjencës do të përcaktojë fondet për secilën komunë për kapërcimin e vështirësive që kanë krijuar reshjet e dendura të dëborës në disa zona të vendit. Kryeministri Berisha, gjatë inspektimit në disa nga zonat e mbërthyera nga reshjet e dendura, i kushtoi një vëmendje të veçantë edhe furnizimit në kohë me ilaçe e medikamente të nevojshme, për të cilën Ministria e Shëndetësisë ka nisur menjëherë punën. "Mjekët më kanë informuar se ka disa probleme mungesash në ilaçe e probleme të tjera, për të cilat sot janë urdhëruar helikopterët të shkojnë në këto zona. Ndërkohë që ditën e djeshme, Shtabi i Emergjencës ka ngarkuar ushtrinë për të bërë të mundur kalimin e plotë të aksit Rrëshen-Lurë. "Probleme ka në Reç, Zall-Dardhë, etj, por ne nuk duhet të lëmë as edhe një familje të vetme pa vendosur komunikim me ta, sepse mjetet e komunikimit në këto situata janë të rëndësishme", theksoi kryeministri. Përsa i përket furnizimit me energji elektrike, kreu i qeverisë ka kërkuar që KESH-i duhet të jetë 24 orë në punë, për të lehtësuar banorët e këtyre zonave nga vështirësitë e krijuara. "Ata janë të papërgatitur për mungesën e energjisë dhe kjo është normale. Nuk mund t'ju kërkojmë atyre tashmë të kthehen te epoka e vajgurit. Ndaj duhet bërë çdo përpjekje që kudo ku konstatohet defekti, të bëhet i mundur rregullimi i tyre. Ka pasur një defekt të rëndë në linjën kryesore Lezhë-Vau i Dejës, por mbrëmë është vendosur që me shpejtësi të riparohet kjo linjë", vijoi ndër të tjera kreu i qeverisë. Gjithashtu, kryeministri ka vënë në dukje se në tërësi qeveritë vendore kanë funksionuar shumë mirë në përballimin e situatës. Ndërsa lidhur me situatën e shkollave, kreu i ekzekutivit nënvizoi se edhe këtu duhet të bëhen përpjekje që nxënësit e zonave të bllokuara të grupohen dhe t'u sigurohet transporti, me përparësi.


Qeveria, 300 milion USD kontigjencë për raste të papritura


Në përgjigje të interesit të mediave nëse e është e gatshme qeveria dhe Shtabi i Emergjencës që të përballojnë krahas kësaj situate të motit, edhe lëkundjet e mundshme të tërmetit në këto zona, kryeministri ka theksuar se qeveria është e gatshme të përballojë çdo lloj situate. Në këtë kontekst, kreu i qeverisë ka vënë në dukje se qeveria ka rreth 300 milion dollarë kontigjencë, të cilat janë të destinuara për përballimin e rasteve të papritura. "Qeveria është e gatshme të përballet me çdo lloj të papriture që mund të ndodhë. Kjo qeveri është një qeveri, e cila ka një buxhet shumë të shëndetshëm dhe në këtë buxhet, qeveria mban gjithmonë një sasi, e cila quhet kontigjencë, që do të thotë para të vendosura mënjanë në buxhet, pa destinacion, por që duhet të përdoren për destinacione të papritura. Për vitin 2009, kontigjenca është rreth 300 milion dollarë, një fond ky që i lejon qeverisë të reagojë në çdo situatë. Unë uroj të mos kemi asnjë problem, qoftë edhe minimal në këtë aspekt, por në të kundërt, qeveria i siguron qytetarët se ajo është e përgatitur në çdo rrethanë që të përballet me të papriturat që mund të ndodhin", konfirmoi kryeministri në fjalën e tij.

Kryeministri viziton nga afër pacientët në spitalin e Kukësit


Pas qytetit të Peshkopisë, kryeministri Berisha ka zhvilluar dje një vizitë në spitalin e Kukësit ku është njohur më nga afër me gjendjen e të sëmurëve të shtruar në këtë spital. Duke përgëzuar punën e mjekëve në ndihmë të banorëve për shkak të situatës së rënduar nga dëbora dhe reshjet, kryeministri tha se spitali i ofronte të gjitha ilaçet dhe shërbimet pavarësisht motit të keq. "Dua të përgëzoj mjekët e spitalit, të cilët kanë bërë një punë të shkëlqyer gjatë gjithë këtyre ditëve. Unë vizitova reanimacionin, ku janë operuar të sëmurë që kanë ardhur nga zona të thella dhe ku marrin të gjitha ilaçet dhe mjekimin e duhur. Pavarësisht nga vështirësitë e dëborës dhe motit të keq, në këtë spital ofrohen të gjitha shërbimet dhe për këtë mjekët meritojnë përgëzimin më të madh", tha kreu i qeverisë. Gjithashtu, ai ka garantuar se qeveria po bën të gjitha përpjekjet për lehtësimin e jetës së qytetarëve në këto zona. "Por dimri me dëborë ka edhe mirësi të mëdha. Për Shqipërinë, dëbora në këto zona është rezervë ujore për të ardhmen, është potencial i madh turistik. Unë i kam premtuar Shishtavecit rrugën dhe iu siguroj që do t'i qëndroj këtij premtimi. Por nuk është vetëm Shishtaveci zonë turistike, por duhet ta nisim nga Shishtaveci sepse ka potencialin më të madh dhe do ta shtrijmë projektin edhe në zona të tjera. Po ndërtohet rruga drejt Valbonës në Tropojë, rruga që bën lidhjen me Peshkopinë do të ndërtohet gjithashtu, ndërkohë që po ndërtohen rrugët gjithandej", vlerësoi kreu i qeverisë.






rd

[Albo]

Fundi i modelit ekonomik të tranzicionit

ADRIAN CIVICI

Bashkë me vitin 2009 duket se po shkojmë edhe drejt “mbylljes” së një cikli të rëndësishëm pothuajse 20 vjeçar të tranzicionit. Kemi folur e jemi përpjekur shumë për vendosjen dhe performancën e ekonomisë së tregut në Shqipëri, kemi zbatuar me rigorozitet recetat e FMN-së dhe Bankës Botërore për privatizimin e ekonomisë dhe hapjen e saj, jemi treguar maksimalisht ortodoksë në çështjen e ruajtjes së ekuilibrave makroekonomikë, jemi fokusuar pothuajse plotësisht te rritja ekonomike si treguesi i vetëm i suksesit e performancës së politikave ekonomike e qeverisjes. Pra, me fjalë të tjera, kemi ndërtuar një model ekonomik të tranzicionit, një profil të vetë ekonomisë shqiptare që me të mirat dhe defektet e tij u bë “lokomotiva” që na tërhoqi deri në fund të dekadës së dytë të këtij tranzicioni radikal “nga plani tek tregu”.
Por, duket se kohës dhe përmbajtjes së këtij modeli po i vjen fundi, në kuptimin që shumë nga elementët dhe energjitë e tij duket se e arritën maksimumin e tyre dhe tashmë rezultojnë të ezauruara për një periudhë tjetër 10 ose 20 vjeçare në të ardhmen. Kriza aktuale ekonomiko-financiare globale më shumë se sa ndikimi direkt i saj në ekonominë apo financat shqiptare, na evidentoi dhe disa probleme kardinale: sa e qëndrueshme është rritja jonë ekonomike ? A kemi modelin e përshtatshëm ekonomik për të garantuar ritmet e kësaj rritjeje në vitet që vijnë? A kemi një ekonomi të strukturuar me të cilën mund të shkojmë drejt një zhvillimi të qëndrueshëm afat-gjatë? Duke supozuar se efektet direkte e indirekte të krizës ekonomiko-financiare ndërkombëtare janë një ose dy vjeçare, dhe pastaj ne duhet të përballemi « me normalitetin », vlerësohet se pikërisht këtu qëndron problemi ynë më serioz. Vërtet që në 2009 dhe 2010 ekonomia shqiptare mund të ketë një rritje ekonomike më të ulët se trendi disa-vjeçar i saj, dhe kjo është « e justifikueshme » si pasojë e krizës globale, pikëpyetjet e mëdha duket se fillojnë pikërisht pas kësaj periudhe.
Garantimi i rritjes së qëndrueshme nënkupton faktin se sa do të jemi ne në gjendje që të gjejmë e identifikojmë “burime të reja që ushqejnë rritjen ekonomike” apo dhe « zëvendësuesit » e disa prej burimeve aktuale të rritjes që në periudha afat-shkurtër e afat-mesme pritet të kontribuojnë shumë më pak se deri tani. Si do ta eliminojmë apo ngushtojmë deficitin e lartë tregtar dhe atë të pagesave? Si do ta ristrukturojmë hapësirën rurale shqiptare ku mbizotërojnë mini-fermat bujqësore?, Si do ta zhvillojmë, ristrukturojmë e modernizojmë biznesin shqiptar që akoma reflekton mjaft elementë arkaikë e informalë? Cilat janë politikat më të mira strukturore që na konvergojnë me ekonominë evropiane ku synojmë të integrohemi? Cilët do jenë sektorët që do përbëjnë « motorrin » e ekonomisë shqiptare në vitet në vazhdim?, Turizmi?, Bujqësia dhe agro-industria?, Energjia? Industria?, Infrastruktura?, Arsimi? Ekonomia e dijes?, Shërbimet?, Zhvillimi i biznesit të vogël e të mesëm?, etj. Duket se ka ardhur plotësisht koha që të jemi sa më të qartë në objektivat themelore të zhvillimit dhe modelit të rritjes për 10-20 vitet në vazhdim. Këtë mangësi e bën akoma më të rëndë edhe fakti se forcat kryesore politike janë në antagonizëm të vazhdueshëm ndërmjet tyre, antagonizëm që shprehet në qëndrimet mohuese të çdo arritjeje ekonomike reciproke dhe neglizhenca e dukshme ndaj konceptit të një « strategjie kombëtare të zhvillimit » të përgatitur me konsensusin maksimal politik e shkencor të nevojshëm dhe e respektuar nga të dyja palët.
Ndodhemi në një moment thelbësor për të diskutuar e precizuar një koncept e një politikë të qartë për modelin e rritjes ekonomike dhe faktorët esencialë të saj. Mbyllja e “periudhës 19-20 vjeçare të tranzicionit” si dhe kriza aktuale ekonomiko-financiare na ka vënë përballë një fakti të pakundërshtueshëm. Modeli i deritashëm garantues i rritjes ekonomike në Shqipëri i mbështetur kryesisht në të ardhurat nga emigracioni që në disa vite kanë qenë edhe më të larta se 1 miliard euro në vit, donacionet e shumta si vend i varfër dhe në zhvillim që kemi përfituar me shumicë, kreditë e buta dhe ndihmën e huaj që kanë qenë një arterie e rëndësishme që furnizonte rregullisht ekonominë tonë, privatizimet masive që i kanë krijuar buxheteve tona luksin e të qenit në ekuilibër dhe me deficit minimal, vetëpunësimi kryesisht bujqësor, “boom” 15 vjeçar i sektorit të ndërtimit, shkarkimi i papunësisë nëpërmjet emigracionit drejt Greqisë apo Italisë, “rekomandimet detyruese” të FMN-së, etj., duket se po shkon drejt tezaurimit total ose të pjesshëm. Edhe politikat 18 vjeçare me prioritet absolut për “ruajtjen e ekuilibrave makroekonomikë” duke krijuar kështu mundësi për rritjen ekonomike duket se nuk mund të jenë më të vetme. Ka ardhur koha të bëjmë politika më të strukturuara, të mirë adresuara e të gjera për nxitjen maksimale të rritjes ekonomike, për garantimin faktorial të qëndrueshmërisë së saj.
Rritja ekonomike për një vend si Shqipëria mund të nxitet në tre mënyra : nëpërmjet borxheve dhe kredive nga jashtë; nëpërmjet eksporteve të lëndëve të para dhe disa produkteve të gatshme; nëpërmjet ristrukturimit ekonomik, diversifikimit të produkteve dhe adoptimit masiv të teknologjive të reja. Dy mënyrat e para gjykohet se janë më të lartë risku dhe jo shumë të qëndrueshme” në raport me të tretën. Ta mbështesësh rritjen pothuajse vetëm tek investimet apo kreditë e huaja, gjë që ne na pëlqen ta përmendim shpesh si “kulmin e suksesit të çdo qeverie” do të thotë të ushqesh iluzionin e një jetese dhe zhvillimi përtej mundësive të tua konkrete, do të thotë të jesh i varur shumë nga flukset, “devijimet” dhe “kapricot” e shpeshta të tregjeve financiare ndërkombëtare, do të thotë të prodhosh një rritje ekonomike jo shumë reale të mbështetur në monedha të fuqishme e të mbivlerësuara të cilat sintetizojnë një strukturë ekonomike e konsumi larg realitetit tonë. Edhe rritja ekonomike e bazuar ekskluzivisht tek lëndët e para dhe eksporti i tyre apo “eksporti i punës” kur është fjala për sektorin me fason vlerësohet si jo e qëndrueshme në periudha afat-mesme, sidomos për shkak të fluaktuacioneve të mëdha të çmimeve të tyre në tregjet ndërkombëtare. Kriza e tanishme që preku rëndë sektorin e industrisë minerare, eksportet me fason,etj., është një dëshmi më shumë e këtij konkluzioni. Ndërkohë, mënyra e tretë, që sipas shumë shembujve pozitivë në mjaft vende të botës, ka prodhuar një rritje konstante afat-gjatë është “promovimi i produkteve të përpunuara dhe ofrimi i shërbimeve moderne”. Duke parë zgjerimin e tregjeve ndërkombëtare dhe kërkesës për produkte të përpunuara si dhe efektet pozitive që ato japin në rritjen e punësimit të brendshëm, nga shumë qendra e institucione të specializuara duhet që vendet si Shqipëria të bëjnë politika specifike rritjeje ekonomike me këtë fokus.
Duke qenë se ne duam të nxisim rritjen ekonomike afatgjatë duhet të mos mbetemi vetëm tek “politikat fondamentale” të programeve të axhustimeve strukturore si p.sh., stabiliteti makroekonomik, thellimi i privatizimeve, hapja e liberalizimi ekonomik, por të fokusohemi maksimalisht drejt politikave prodhuese e sidomos politikave energjetike, industriale dhe agrare, të jemi të kujdesshëm me stabilitetin financiar, të jemi maksimalisht të prirur për futjen masive të teknologjive të reja në të gjithë sektorët e ekonomisë dhe biznesit tonë, të kemi realisht në fokus zgjerimin e kapitalit human dhe përfshirjen sa më të gjerë të popullsisë aktive e territorit në “kontributin dhe përfitimet nga rritja ekonomike. Rritja ekonomike që ekziston në një terren ekonomiko-financiar të dominuar nga deficiti i bilancit të pagesave, deficiti shumë i konsiderueshëm tregtar, treg ushqimor i varur dukshëm nga importet, nxitja subjektive e kërkesës së brendshme, mospërfshirja e gjerë e grupeve të ndryshme sociale dhe tërësisë territoriale në kontributin e përfitimet nga rritja, etj., nuk vlerësohet si rritje ekonomike e qëndrueshme dhe efiçente.
Kolona vertebrale e këtij ndryshimi duhet të jetë biznesi privat, ristrukturimi dhe modernizimi i tij. Por, ky objektiv duket shumë larg arritjes së tij po të kemi parasysh gjendjen aktuale të tij. Është e vërtetë që ne kemi bërë e vazhdojmë të bëjmë shumë politika favorizuese “për përmirësimin e klimës së biznesit” apo “lehtësimin e presionit fiskal ndaj tij”, por vetëm kaq duket se nuk mjafton. Ajo që është shqetësuese është “cilësia” e këtij biznesi, është brishtësia dhe në mjaft raste “amatorizmi” i tij. Mjafton ti referohemi disa prej indekseve më të rëndësishëm ndërkombëtarë për ta sintetizuar këtë tablo. Kështu për shembull, sipas “Indeksit të konkurueshmërisë globale 2009” që publikohet nga Forumi Ekonomik Botëror kur është fjala për “shpenzimet për kërkim-zhvillim nga ana e biznesit” jemi renditur të 126 nga 133 vende të marra në studim. Po kaq problematike duhet gjendja edhe po ti referohemi treguesit tjetër të “sofistikimit të biznesit”, tregues që krijon garancinë për zhvillim apo shpreh dobësitë e bizneseve në një vend. Jemi në vend të fundit në botë në treguesin “bashkëpunimi biznese-universitete”, ndërkohë që në elementin “zhvillimi i klasterave” rezultojmë të 130, tek “sasia dhe cilësia e ofertës lokale”, pra e prodhimit të brendshëm për të cilin flasim kaq shumë se duhet ta mbështesim me politika e masa konkrete, rezultojmë në vend të 110 dhe 116. Këtu mund të shtojmë dhe elementin e “përshtatjes me teknologjitë e reja” në të cilin jemi në vend të 105-të. Në këtë sens shkon dhe publikimi i fundit nga ana e Bankës Botërore i indeksit mbi ekonominë e dijes. Jemi klasifikuar në vendin e 93 nga 135 vende të botës duke rezultuar mbrapa Paraguait, Kubës, Ishujve Fixhi, Mongolisë, Xhamajkës, etj., si dhe të fundit në Ballkan larg Serbisë që është e 53, Maqedonisë që është e 58-ta. Është e qartë se edhe ky indeks i rëndësishëm na evidenton edhe njëherë situatën shqetësuese të cilësisë së ekonomisë shqiptare dhe dobësive strukturore të faktorëve të rritjes ekonomike.

Panorama

[VOLSIV]

>>> Po sikur Sala para zgjedhjeve tha qe nuk do merrte me borxh tek FMN?
> Po ashtu tha dhe Ridvani para ca kohe duke permendur se ekonomia eshte e forte dhe shpresonte shume qe t'ia dilnin mbane vete, pa borxhe?

[mesuesi_1]

Kryeministri Berisha: Dita e sotme shënon fundin e tranzicionit të ekonomisë shqiptare

-
“Dita e sotme – tha Kryeministri - shënon fundin tranzicionit të ekonomisë shqiptare. Sot u firmos fundi i tranzicionit të një prej ekonomive më të centralizuara në Europë dhe në botë dhe tani ajo ecën me institucionet e maturuara të saj. Për një vend demokratik nuk ka asgjë më të rëndësishme sesa një ekonomi solide tregu, pa të cilën ajo nuk mund të ekzistojë.”

Kryeministri Berisha e vlerësoi nënshkrimin e këtij dokumenti një moment të veçantë që mbyll me sukses një program për të nisur një bashkëpunim të ri me FMN-në.

i bie qe me nenshkrimin e kesaj rradhe Shqiperia te kete bere shume me pak koncesione se here te tjera ..... dmth te kete ruajtur sovranitetin e saj me me dinjitet

[OPARI]

keta me duket se po tallin l...et me popullin ,kemi ngritje ekonomike me te madhe ne evrope prandaj po bejme cmos te heqim vizat dhe te ikin shqipetaret se plasen nga bojlleku,nuk kemi krize ekonomike ,hyme ne NATO ngjarja me e madhe historike,kane me muaj te tere vetem per edi ramen flasin ,le te jete cfare te jete ,min kultures -flet per ramen,min bujqesise takim me fermeret- flet per ramen
kryetarja e parlamenti dhuna kundra gruas-flet per edi ramen,harrojne se perse kane shkuare te flasin
po na behen shume ngjarje historike por ishalla nuk i vene dite pushimi se i bie te kemi nja 3-4 muaj pushim