Xheladin Hamza

[riza2008]

Në qetsinë e natës
kur i mbylli sytë
dhe bëhem kënga
e erërave të shkretëtirës
Ti prehu në përqafimin tim

Nga puthjet tona të prushta
mbi qerpikët e syve
yjet të shkëlqejnë kristalshëm

[riza2008]

I strukur nënë hijen
e së kaluarës
emri yt rrëshqet
nëpër damarët e shpirtit tim

Aty në horizont
kur njëherazi
takohet e puthitet ditënata
ëndrra e rinisë sonë
syhapur fle

Aty bilbili këngën e tij
e shndërron në vaj
mbi gjoksin tënd si dikur
përmallshëm edhe njëherë
dua të qaj.

[riza2008]

Nëse sonte
do të shkruaj
poezinë e ëndrrës
atëhere do të shkruaj
për buzëqeshjen e syve të tu
që rob shpirti
e bëra përjetësisht

Nëse ndonjëherë
do të shkruaj
poezinë për ylberin
atëhere do të shkruaj
për ngrohtësinë e përqafimit tënd
që më mban pa ndërprerë
mbështjellur me iluzione
apo...në pritje të ndodhisë

[riza2008]

Si në ëndërr kërkoj veten time
që më rreshqet mbi kujtimet e humbura
në greminën e dashurisë.

Sa e tharë më duket kjo jetë
kur mbi buzët e mia të çara
vajton si foshnjë e etur.

Yllëza me vellon e virgjërisë
në heshtje këmbëzbathur shikon
ranishtës n' meditim

Mëngjesi agon me kërkim të një ure
që lidh zemrat e plagosura
pas çdo ndarje të natës së heshtur

[riza2008]

E lëpij kohën e shkuar në qetësi-pa ty
yjendezur engjëllushë mbi kokë më rri

Lulet vyshken nga dhimbja që lëngon
ankthi gjoksin pa mëshirshëm shtërngon

Valë deti kujtimet për ty mi shpërlajnë
mburojë të madhe në shpirt për ty kam

[riza2008]

Do të dëshiroja të jem liqe
i pastër si loti i syve të mi
e ti hënë me vello nusërie
me endje të lahesh në thellësinë e tij

Do të dëshiroja të jem
burimi i Drinit të Bardhë
e ti lulja që rritesh aty pranë
që lëshon aromë anë e mbanë

Do të dëshiroja të bëhem
sythë trëndafili i kuq
e ti sqep zogu që më mban n'fluturim
në ëndrrën e gjatë pa mbarim

[riza2008]

Pa ty
e gjatë,shumë e gjatë
më duket kjo natë

Mos nguro
sonte të lutem eja
njëherë,vetëm dhe njëherë

Le të jetë kjo natë
e fundit natë

Yjet sonte le të ndriçojnë
për Mua,për Ty
veç për Ne

Në agun e mëngjesit
i shtrëngojmë zemrat

E di se shpirti po të rënkon këputur
por lamtumirë....
Jo,nuk të them dot

[riza2008]

Të thella si luginat biblike
të gjera si shkretëtira pa mbarim
të zbehta si fytyra pas vdekjes
të zbrazura si sytë e shtjerrur

Lëri në qetësinë e shpirtit tim
se janë vetëm ëndrrat e mia
pjesë e jetës sime

[riza2008]

Luginave rinore
lundrojnë ëndrrat
pa mbarim

Puhia e flladit veror
në djep të artë
i përkund

Loti i një bilbili
në vaj melankolik
i shndërron

Ti më je shtrati
ku dhembja e shpirtit
turbullt më fle

[riza2008]

Në qetësinë e natës
hëna me rrezet e saja
përkëdhelë meditimin tim

Aromë xheneti ndjej në nafile
në sexhde bij para të Madhërishmit
i lutem për shpirtin tim gjynahqarë

Në çdo pikë loti është një këngë
në çdo këngë është një kujtesë
në çdo kujtesë është një shpresë
në çdo shpresë lindë dhe një krijesë

Në ditën e Kiametit
O i Madhi Zot,
mos më ringjall të verbër
dhe në ëndrra
dua ta shoh bukurinë!