Flamurtari në delir, tani “kokën” e Partizanit
Trajneri Edmond Liçaj shprehet se fitorja me Tiranën do të kompletohej me të kuqtë
Fitorja ndaj Tiranës ka shërbyer për ekipin vlonjat jo vetëm për t’u rikthyer te rezultati pozitiv, por mbi të gjitha edhe për të ngjitur shkallët e renditjes. Aktualisht ekipi i drejtuar nga trajneri Liçaj ndodhet në vend të 6 të të renditjes, ndërsa duket se synimi për të arritur në pesë ekipet më të mira tashmë mbetet realitet.
Diçka e parë edhe në takimin ndaj Tiranës, ku Flamurtari ka zhvilluar ndoshta një nga ndeshjet më të mira të sezonit, edhe pse duket se në kampin kuqezi kërkojnë të qëndrojnë me “këmbë në tokë”, për të mbyllur me sukses këtë vit, kur dihet që ndeshjen e fundit do ta luajnë përballë Partizanit.
Trajneri i Flamurtarit, Edmond Liçaj, është shprehur shumë i kënaqur me fitoren, ndërsa sipas tij, ekipi ka plotësuar deri në detaje të gjitha udhëzimet e dhëna nga stafi teknik. Një fitore që ka sjellë edhe entuziazëm te kampin vlonjat, edhe pse Liçaj kërkon të ndalojë euforinë te lojtarët e tij.
“Duhet të pranojmë se ndaj Tiranës kemi zhvilluar një ndeshje shumë të mirë, ndërsa për asnjë moment nuk e kemi lejuar kundërshtarin të na rrezikojë seriozisht. Mendoj se në çdo aspekt kemi qenë superiorë, pavarsisht se përballë kemi pasur një ekip si Tirana, së cilës i dihen vlerat në futbollin shqiptar dhe pa dyshim në gjirin e vet ka lojtarë cilësorë.
Megjithatë, nga ajo që pamë, duket se Flamurtari ka treguar se nuk ka asnjë diferencë nga ekipet e tjera dhe tashmë na duhet të mendojmë për të nbyllur me sukses këtë vit. Tashmë kjo fitore na ka shërbyer edhe për renditjen, ndërsa më duhet të pranojë se gjatë javës të gjithë futbollistët, por edhe ne si staf teknik, kemi qenë nën presion, pasi ndeshjet me Tiranën sjellin vetvetiu një tjetër atmosferë.
Fatmirësisht, gjithçka përfundoi në favorin tonë dhe tashmë duhet t’u gëzohemi tri pikëve, por vetëm kaq, pasi kemi edhe një tjetër ndeshje për të luajtur, të cilën duhet ta përgatisim me të njëjtin seriozitet.
Tirana është një ekip që tashmë e kemi mundur, por unë si trajner duhet të nisë tashmë që së bashku me grupin të mendojmë për ndeshjen e radhës. Të shtunën do të luajmë ndaj Partizanit dhe mendoj që do të jetë ndeshje e vështirë, pavarësisht renditjes së kundërshtarit.
Na duhet një tjetër rezultat pozitiv edhe në ndeshjen e radhës, për të mbyllyr me sukses këtë vit, por mbi të gjitha një rezultat pozitiv ndaj Partizanit, do t’i jepte vlerë edhe fitores me Tiranën,” - ka përfunduar trajneri vlonjat Edmond Liçaj, për të cilin, ashtu si edhe gjithë atmosfera e krijuar në Vlorë, fitorja ndaj Tiranës ka marrë shumë vlera, edhe pse tashmë drejtues të ekipit vlonjat kërkojnë të frenojnë entuziazmin, me qëllim përgatitjen për ndeshjen e radhës në kampionat.
Vlonjatët, nga 300 euro shpërblim
Fitorja ndaj Tiranës për lojtarët e Flamurtarit do të shpërblehet, pra do të ketë premio ekstra. Duket se është rreth 300 euro shuma për çdo lojtar, por ky vlerësim është edhe si një mbështetje për ndeshjen e radhës.
Një motivim më shumë për futbollistët vlonjatë, kjo jo vetëm për ndeshjen ndaj Tiranës, por ndoshta edhe ndaj Partizanit. Por një fitore në ndeshjen e fundit, mund të shpërblehet sërish. Pra, një fundviti me shumë shanse për të mbushur xhepat.
Krijoni Kontakt