Racizmi te Shqiptaret

[prizrenasi_30]

Racizmi është prezent kudo në botë e edhe te ne shqiptarët është shumë i përhapur.
Ka shumë raste te ne kur ata që janë bjondë, sygjelbër apo sykaltër mendojnë se janë më të mirë apo më të vlefshëm se të tjerët.
Ky është mendim i njejtë me atë të nazistave gjermanë!

Ka edhe të tillë që vëllezërit e tyre shqiptarë që janë zeshkanë i quajnë jevgj, hashkali apo romë.
Pra këta njerëz mendojnë se njerëzit e zinjë janë kategori e ulët.

Këtë pohim të tyre e mohon shumë qartë Kur’ani.
Sipas Kur’anit del se njeriu i parë ka qenë më shumë i zi sesa i bardhë.
Kjo është cekur në ajetet e mëposhtme dhe është përsëritur tre herë fjala “balta e zezë”:

15:26. Ne krijuam njeriun nga balta e argjilit, të zi e të prishur (me erë të keqe).

15:28. Dhe (përkujto) kur Zoti yt engjëjve u tha: "Unë po krijoj njeriun nga balta e tharë, e zezë e me erë.

15:33. Ai tha: "Nuk është për mua t'i bëjë sexhde një njeriu që e krijove nga balta e tharë, e zezë e me erë".

Islami vëllazërimin në mes njerëzve e ka bërë si argument dhe domosdoshmëri të besimit.
Islami vërteton se njerëzit janë të barabartë dhe se ata janë të krijuar prej një veteje sikurse që vërteton se nuk ka favorizim në mes racave, popujve përveq se me devotshmeri.

Sipas Islamit,vlera e njeriut mund të realizohet vetëm atëherë kur njeriu t'a kuptojë qëllimin për të cilin është krijuar dhe se favorizimi në nder,nuk është e drejte e askujt t'a pretendoje atë, por është e drejtë e Krijuesit të tyre, i Cili e di devotshmërinë dhe qëllimin e krijesave të Tij.

Pejgamberi s.a.v.s. ishte dërguar në kohën kur mburrja dhe kryelartësia kishin zënë vend në shoqërinë arabe më shumë se kudo tjetër në botë.
U dërgua me Kur'anin, fjalën e Allahut, Subhanehu ve teala ,i Cili thotë:

49:13. O ju njerëz, vërtet Ne ju krijuam juve prej një mashkulli dhe një femre, ju bëmë popuj e fise që të njiheni ndërmjet vete, e s'ka dyshim se te All-llahu më i ndershmi ndër ju është ai që më tepër është ruajtur (këqijat), e All-llahu është shumë i dijshëm dhe hollësisht i njohur për çdo gjë.

Pejgamberi s.a.v.s. , kishte vërtetuar se arabi nuk ka vlerë ndaj të huajit dhe anasjelltas, i bardhi ndaj të ziut dhe anasjelltas, përveq nëse janë të devotshëm.

Poashtu Pejgamberi s.a.v.s. kishte vërtetuar se Allahu, subhanehu ve teala, nuk shiqon fizionomitë dhe racat e njerëzve, por shiqon zemrat e tyre.

Autor: Sefedin Muqaj, Prizren, Kosovë

Referenca: Kur’ani Fisnik – përkthim i Sherif Ahmetit dhe faqja www.bibladhekurani.com