Banorët e B.E.
Pesëdhjetëvjeçarin e fundit, Bashkimi Europian ka krijuar për qytetarët e tij predispozitat bazë të një hapësire te përbashkët prosperiteti dhe paqeje, që i lejon të gëzojnë në një nivel të kënaqshëm të mirat bazë të lirisë, të drejtësisë dhe të sigurisë. Gjithsesi, këto të mira nuk përbëjnë të drejtë ekskluzive vetëm të qytetarëve të B.E.
Bashkimi Europian përbën nje pol tërheqës për shumë burra dhe gra nga vende të treta. Ata arrijnë në kufijtë e shteteve anëtarë në kërkim të punës, ose thjesht për një jetë më të mirë e cila nuk i ofrohet në vendin e origjinës.
Sot, ekzistojnë më shume se 175 milionë emigrantë në mbarë botën. Pothuajse, 56 milionë banojnë në Europë.
Një nga vlerat e B.E. është dhe lufta kundër të gjitha formave të diskriminit, racizmit dhe ksenofobisë. Bashkimi Europian mundohet t’i përballi këto fenomene me masa ligjore, ekonomike dhe sociale të cilat synojnë në luftën kundër marxhinalizimit dhe përjashtimit social të popullatës së huaj me banim në 25 shtetet anëtare të tij.
Nën këtë objektiv dhe në kuadrin e politikës së përbashkët të emigracionit, Këshilli Europian në Tampere (1999) hodhi bazat e një kornize legjislative të përbashkët. Qëllimi i kësaj kornize legjislative është sigurimi i trajtimit të barabartë dhe të drejtë të të gjithë të huajve me qëndrim të ligjshëm në territorin e shteteve anëtare të B.E. duke i dhënë atyre sa më shumë të drejta, të ngjashme me të drejtat e qytetarëve Europian, meqënëse suksesi i kohezionit social në mbarë Europën dikton integrimin social, politik dhe ekonomik të emigrantëve me qëndrim të ligjshëm në shtetet anëtare.
Të drejtat e të gjithë atyre që banojnë brenda B.E përfshijnë të drejtën e qëndrimit, të arsimimit, të punës së varur ose të pavarur, të drejtën e qarkullimit të lirë për një afat të shkurtër kohor brenda kufijve të B.E. si edhe të drejtën e trajtimit të barabartë. Gjithashtu, korniza e përbashkët ligjore parashikon:
- ata që kërkojnë azil të gëzojnë trajtim të drejtë
- emigrantët e ligjshëm të integrohen në shoqëritë europiane dhe të gëzojnë të drejtën e drejtësisë dhe të sigurisë,
- kur qëndrimi i emigrantëve është shumëvjeçar, t’ju jepet mundësia e marrjes së nënshtetësisë të shtetit anëtar në të cilin banojnë, dhe si rrjedhojë edhe të nënshtetësisë europiane.
- të merren masat e nevojshme për ruajtjen efektive të kufijve të jashtëm, dhe përballimin e emigracionit klandestin, duke ofruar paralelisht mbrojtjen e mjaftueshme viktimave të trafikut klandestin.
Vitet e fundit Bashkimi Europian ka bërë hapa të rëndësishëm për zbatimin dhe konsolidimin e vlerave që përfaqëson si brenda B.E. ashtu dhe në marrëdhëniet e jashtme të tij. Përpjekjet nuk kufizohen vetëm në mbrojtjen e të drejtave të qytetarëve dhe banorëve të tij, por edhe në promovimin e të drejtave të njeriut në vendet me të cilat bashkëpunon dhe ka marrëdhënie tregtare.
Por, implementimi i këtyre objektiva të B.E. ndesh vështirësi si në nivel kombëtar ashtu dhe në atë lokal dhe rajonal dhe padyshim ekziston mundësia e përmirësimit të tyre.
Përgjigju Duke Cituar
Krijoni Kontakt