Mos u bë koprrac

[Drini_i_Zi]

O Zoti ynë, Ty të falënderojmë, kërkojmë mbrojtje prej veprës sonë së keqe dhe mëshirë në Mëshirën Tënde të pakufishme. O Krijues i Botrave! Dëshmoj dhe deklaroj se nuk ka Zot tjetër përveç teje dhe se Muhammedi a.s. është rob dhe i Dërguari yt. Na streho nën hijen Tënde atë ditë kur nuk do të ketë hije tjetër. Paqja, shpëtimi dhe bekimet qofshin për Muhammedin a.s., familjen e tij, sahabët dhe ndjekësit e tij deri në Ditën e Llogarisë.

Vëllezër musliman! Thotë Allahu i Lartësuar në Kur'an: "O ju besimtarë, respektojeni All-llahun dhe respektojeni të dërguarin, e mos i çoni kot veprat tuaja!" (Muhamed: 33)
Veprat tona të mira që i bëjmë në këtë botë nuk kanë vlerë nëse nuk e njohim dhe respektojmë Allahun dhe Muhammedin a.s. Allahu xh.sh. na drejtohet me emrin më të mirë, o ju besimtar..., veprat tona nuk kanë kuptim pa të, ato bëhen shkak që ne të fitojmë kënaqësinë e Tij, ose edhe të biem në hidhërimin e Tij.

Vëllezër, cili prej nesh respekton Allahun dhe Muhammedin a.s. në çdo segment të jetës sonë? A nuk jemi ne ato që në tregtinë tonë gjithmonë bëjmë manipulime, mundohemi të vjedhim, të plaçkitim, grumbullojmë pasuri dhe në fund bëhemi edhe koprrac, nuk e japim atë që Allahu xh.sh. dhe Muhammedi a.s. na kanë obliguar që ta japim?!!!

Ndërsa Pejgamberi a.s. na ka mësuar se si të jetojmë edhe në vështirësi, duke thënë një lutje të thjesht dhe të sinqertë deri tek Allahu i Madhërishëm: "Në emër të Zotit për veten time, pasurinë time dhe fenë time. O Allah! Më bëj mua të jem i kënaqur dhe i lumtur me caktimin Tënd! Më jep mirësi në atë që është caktuar për mua, me qëllim që të mos dëshiroj të shpejtoj atë që Ti e ke vonuar e as të mos e vonoj atë që Ti e ke shpejtuar." (Transmeton Ibën Sini , hadithi gjendet në Fikhu Sunneh-1, Sejid Sabik, Tiranë, 2007 fq.790).

O vëllezër, nëse Allahu na ka caktuar që ne të jemi të pasur atëherë përgjegjësia jonë ndaj Tij është më e madhe, sepse ne detyrohemi edhe për ato gjëra që të varfrit nuk detyrohen. Koprracia është kryeja e fatkeqësisë së Ummetit tonë sot. Fatkeqësisht shohim nëpër rrethet tona shumë fytyra të mrrolura dhe shumë pjesëtar të këtij dini që janë të pasur, por frikësohen edhe një pjesë të vogël të pasurisë ta japin për hir të Allahut dhe Pejgamberit të tij. Shoqëria e jonë ka nevojë që të ndihmohet ndërmjet veti, një pjesë minimale e të pasurve e japin zekatin obligimin islam. Ndërsa xhamitë dhe institucionet islame janë shndërruar në shoqata bamirëse dhe humanitare kur është në pyetje edhe zekati për të cilin Ebu Bekri r.a. nisi luftë.

Vëllezër, ai që lutet është Allahu dhe jo i pasuri, atij duhet marrë zekati edhe pa dëshirën e tij. Zekati nuk duhet të pritet që të jepet kur i pasuri të "bindet" se duhet dhënë, ky mendim është krejtësisht i gabuar. Institucionet islame në Ballkan siç janë Bashkësitë Islame duhet që në mënyrë të organizuar ta marrin këtë detyrim islam prej të pasurve dhe t'ua shpërndajnë të varfërve. Nëse nuk munden ta bëjnë këtë vet, individualisht atëherë le të përgatisin ndonjë projekt ligj për vendet ku veprojnë dhe me ligj të caktohet 2.5% e pasurisë së të pasurve musliman, të merret nga institucionet e shtetit dhe bashkësitë islame t`ua shpërndajnë të varfërve në formë të pagës (ndihmesë mujore).
Edhe pse kjo gjë është shumë e thjesht e cila me pak organizim mund të realizohet nuk bëhet në këto troje për arsye se edhe vet hoxhallarët i ka kapluar koprracia dhe kanë filluar që t`i frikësohen riskut të Allahut xh.sh.

Vëllezër musliman! Thotë Allahu i Lartësuar në Kur'an: "Ata, të cilët bëjnë koprraci me atë që nga të mirat e veta u dha All-llahu, të mos mendojnë kurrsesi se ajo është në dobi të tyre. Jo, ajo është në dëm të tyre. Ajo e mirë me çka bënë koprraci, në ditën e kiametit do t'u mbështillet në qafën e tyre. All-llahut i mbesin trashëgim qiejt dhe toka, All-llahu është i njohur mirë më atë që veproni." ( Ali Imran: 180)

Jeta e muslimanit është e infiltruar në të keqen dhe sfidat e saj. Sot është bërë trend që të përmendet dinamizmi i jetës. Nuk ka dyshim, se zhvillimi i teknikës dhe teknologjisë e bëri të veten si në aspektin pozitiv poashtu edhe në aspektin negativ. Zemrat filluan që të egërsohen, shpirtrat filluan që të ngurtësohen, mëkatet u shtuan, numri i të varfërve u rrit dukshëm. Sot për dukuritë e inflacionit dhe rritjes së çmimeve edhe ato që nuk janë ekonomist kanë filluar që të flasin. Nëpër ndeja tona bisedohet për vajzën e filanit e cila kishte ikur për filanin. E dikur vetëm të përmendej emri i vajzës së dikujt, ai që përmendte detyrohej që ta marrë për grua ose përndryshe dënohej në emër të popullit. Po, nuk ka dyshim se prej këtyre anomalive më e dhimbshmja dhe më me pasoja është sëmundja e koprracisë.
Shoqëria jonë muslimane i ngjet shoqërisë qysh në kohën e Resulullahit a.s.
A ju kujtohet në kohën e Resulullahit a.s. se çka i premtuan mushrikët Muhammedit a.s. për ta lënë thirrjen islame? Atij (a.s.) i premtuan: pozitë në shoqëri, pasuri të majme dhe vajzën më të bukur. Padyshim këto janë tre elemente përmes së cilave njeriu e humb këtë botë dhe ahiretin ose përmes këtyre i fiton dyja. Muhammedi a.s. i fitoi trijat, pozitën, pasurinë dhe gra shumë të bukura. Por, ai (a.s.) i sprovuar në këtë formë përmes inspirimit në Allahun dha këtë përgjigje: "Sikur edhe Diellin të ma vendosni në krahun e djathtë, e Hënën të ma vëndosni në të majtën unë nuk do të tërhiqem prej thirrjes në të Vërtetën." Përmendi Diellin dhe Hënën, këto dy sende të paarritshme për njeriun e atij shekulli, dhe kulmi i famës, pasurisë dhe begatisë për arabin e atij shekulli.

Vëllezër Musliman! Thotë Allahu i Lartësuar në Kur'an: "Të cilët vetë bëjnë koprraci dhe me koprraci i këshillojnë njerëzit. E kush largohet prej dhënies, le ta dijë se All-llahu është i begatshëm, i lavdishëm." (El-Hadid : 24) "E sa i përket atij që bën koprraci dhe ndien veten të pavarur (nga Zoti)," ( El-Lejl: 8) "Ndërkaq, kur e gjen e mira, ai bëhet tepër koprrac." (El-Mearixh: 21)
"Shumë koprrac ndaj rrugës së mbarë, i pafrenueshëm, mëkatar,." (El-Kalem: 12)

Nëse i lexojmë me vëmendje këto ajete kur'anore do të kuptojmë se njeriu bëhet koprrac edhe ndaj mirësisë që Allahu ia ka dhënë. Ai ia dha duart, sytë, mendjen, zemrën, shpirtin, trupin, ndërsa njeriu prapë i bën mëkat Allahut xh.sh. Ai bie në sexhde, bën një mëkat, kërkon falje prej Allahut xh.sh., Allahu ia pranon faljen, dhe nuk e di se me çfarë zemre robi prapë i bie në sexhde Allahut dhe me çfarë fytyre Ditën e Llogarisë do të dalë para Allahut të Madhërishëm?

Nuk ka dyshim se koprracia është njëra prej sëmundjeve më të thella të shoqërisë sonë. Të shpresojmë që Allahu të na shëroj prej saj.

O Allah na ushqe me hallall dhe na ruaj prej haramit.
O Allah na mbroj prej zjarrit të xhehenemit dhe na fut në xhennet.
O Allah na bënë bartës të fjalës Tënde o Krijues i Botrave.
O Allah na mundëso ndërmjetësimin e Resulullahit a.s. Ditën e Llogarisë.
Falënderimet dhe lavdërimet i takojnë Allahut, Zotit të Botrave.




Shkruan: Hamdi NUHIJU