Lesi: Berisha te mbledhi te djathten

[Brari]

EDITORIALI

A ka dështuar projekti i Berishës për Bashkimin e Opozitës?

Mero Baze

Gati një vit më parë, kryetari i Partisë Demokratike Sali Berisha, hodhi idenë e unifikimit të opozitës, ose bashkimin e saj në një formacion opozitar, duke lënë të hapur të gjitha opsionet e përfaqësimit të grupimeve të vogla politike në të. Debati shkaktoi në atë kohë shumë polemika, nga brenda dhe jashtë Partisë Demokratike, por të gjithë u bashkuan në idenë se ai debat u hap në kohën e duhur. Atëhere ishte dhjetë muaj para zgjedhjeve lokale, dhe të gjithë opsionet mund të shërbenin për një lloj aleance parazgjedhore dhe më tej për strukturimin e saj. Një vit pas kësaj ideje, duket se opozita nuk ka nxjerrë asnjë ide racionale nga ky debat. Së paku brenda një viti, ende nuk kemi një përgjigje të qartë për konceptin mbi të cilin PD do ta mbështesë idenë e bashkimit të opozitës dhe, më tej akoma, nuk kemi asnje ide tjetër të ngjashme me atë, që të çojë te bashkimi i opozitës. Për të bërë edhe më të koklavitur e të mërzitshme këtë çështje, debati po rihapet jo rreth një ideje bazë për strukturimin e opozitës, por rreth përsëritjes së grindjeve dhe tentativave për protagonizëm të tepëruar nga grupet e vogla. Por le t'i kthehemi pyetjes qëndrore për shanset e këtij debati.



A ka dështuar projekti i Berishës?

Mendoj që ka dështuar. Arsyet duhen qëmtuar me kujdes, pasi ato mund të jenë po aq të vlefshme sa statistikat e suksesit të një bashkimi të mundshëm. Arsyeja e parë pse Berisha ka dështuar në këtë debat, lidhet fatkeqësisht me faktin se pati pak vlera të gatshme opozitare nga ajo që quhet opozitë e identifikuar që kanë dëshirë të jenë të bashkuar. Grupimet e vogla të së djathtës dhe të qendrës dëshmuan gjatë këtij viti se ishte më e lehtë të bashkëpunonin me qeverinë sesa me opozitën. Së paku Balli Kombëtar, Legaliteti dhe PDR, u prekën nga simptoma flagrante të bashkëpunimit me shumicën në pushtet. Kjo është një arsye madhore, për të dështuar një debat mbi bashkimin. Për një vit kur iu la kohë gjithë grupimeve opozitare për të debatuar rreth mundësisë së bashkimit në një formacion opozitar, ata humbën shumicën e kohës duke debatuar për mbështetjen që i dhanë koalicionit qeveritar. Kjo mungesë vullneti për bashkim e dërrmon në shtyllë kurrizore çdo përpjekje për të ngritur një strukturë të reformuar opozitare. Ajo që u vërejt gjatë këtij viti, nuk ishte më fenomeni i "opozitarëve të opozitës", por fenomeni i "opozitës së porositur", e cila bënte opozitë për llogari të qeverisë. Kjo u vërejt jo vetëm gjatë ngulmimeve të opozitës për komisione parlamentare, dhe gjatë zgjedhjeve, por dhe së fundi kur një sërë politikanësh të vegjël të opozitës i ka zënë meraku të ftojnë Ilir Metën në grup parlamentar, jo aq për të ndihmuar opozitën, por për të ndihmuar, mbi të gjitha, Fatos Nanon të lajë hesapet me kundërshtarët e tij. Ky "opozitarizëm i porositur" po bëhet dita-ditës modë dhe alibi për mungesën e opozitës reale në këto grupime. Për këtë arsye projekti për bashkimin e opozitës, duhet të kalojë nga identifikimi i vlerave reale opozitare të këtyre grupimeve dhe pastaj bashkëpunimi me to.

Arsyeja e dytë pse projekti i Berishës dështoi, qëndron tek vetë Berisha. I sigurt se ai përbën një figurë pak të konkurrueshme në opozitë, ai ngjalli plot dyshime me propozimin edhe brenda partisë së tij. Përjashto ndonjë ndihmës të tij, askush tjetër nga zyrtarët e opozitës dhe drejtuesit e saj nuk i bënë jehonë këtij projekti. Për të mos thënë që disa prej tyre filluan të identifikohen si "disidentë" vetëm pse kundërshtonin bashkimin. Për hir të së vërtetës duhet thënë se në kryesi të PD-së thuajse të gjithë janë të pakonkurrueshëm nga lidershipi i partive të vogla që ofroheshin për bashkëpunim, por megjithatë hermetizimi i PD-së e dha efektin e vet. Vetë PD-ja dhe drejtuesit e saj kanë një të drejtë kur kthejnë kokën nga aleatët e tyre të vegjël, dhe e drejta ka të bëjë me faktin se partitë e vogla ftohen zakonisht për figura, në mungesë të elektoratit, kurse partitë e vogla të së djathtës, nuk kanë as figura dhe as elektorat. Duke qenë se ofertën për Bashkim e bën Berisha, që mbetet ofruesi më i madh i koalicioneve në opozitë, ajo është parë me dyshim nga bashkëpunëtorët e tij se po u imponon sërish figura false në opozitë dhe po u heq "shansin" për të qenë të siguruar si deputetë, shumë prej figurave kryesore të kësaj partie.

Arsyeja e tretë qëndron tek moskrijimi i një fryme për bashkimin e opozitës. Kjo frymë duhet të krijohej për të zgjeruar fushën e bashkëpunimit të vlerave opozitare. Sot në shoqërinë shqiptare ka shumë herë më tepër vlera opozitare sesa ka në Partinë Demokratike. Ka elementë të shoqërisë civile që janë tribuna shumë më të mëdha opozitarizmi se vetë PD-ja. Ka gazeta dhe televizione që prodhojnë më shumë politikë kundër qeverisë, se sa gjithë opozita e marrë së bashku. Duke mos e bërë çështjen e bashkimit të opozitës, edhe çështje të kësaj opozite reale dhe të sinqertë, PD-ja nuk arriti të krijojë një frymë, e cila do të ishte një presion i domosdoshëm për të ndryshuar situatën. Sot, ndryshe nga një vit ose dy vjet më parë, shumë intelektualë të pavarur, madje ish mbështetës të së majtës, po ngrejnë hapur zërin kundër saj dhe po kërkojnë një rotacion të ndershëm të pushtetit. Zëri i tyre është sot një vlerë e mirëfilltë opozitare e paadministruar nga opozita.



Humbja e terrenit opozitar

Një zhvillim i ri i vitit të fundit janë dhe forcimi i frymës së protestës nga disa organizata joqeveritare, të cilat kryesisht sponsorizohen nga donacione të huaja. Këto lëvizje, të cilat formalisht përbëjnë lëvizje opozitare, janë të paintegrueshme në opozitë, pasi në thelb ato rrezatojnë një objektiv që synon krijimin e një fasade të re opozitare. Lëvizja "Mjaft" dhe "Koalicioni kundër Korrupsionit", kanë bashkuar së fundi edhe një sërë sindikatash rreth tyre dhe bëjnë spektakle opozitare. Ata protestojnë për ujin, për dritat, për çmimet, për të drejtat e njeriut etj.. Shumë vetë i vlerësojnë veprimet e tyre gati si heroizëm. Unë kam një vlerësim krejt të ndryshëm për efektin e asaj që ata po bëjnë dhe dëshiroj të jem i gabuar në dyshimet e mia. Lëvizje të tilla proteste kanë një të mirë se krijojnë menaxherë protestash dhe vetëm kaq. Ato nuk prodhojnë dot frymë protestash, biles më keq, ato ngopin opinionin publik me idenë e protestës që po bëhet. Niveli i protestës së tyre është social dhe si i tillë ai duket se dita-ditës po ngjan si një rregullator i defekteve të qeverisë. Denoncimi i korrupsionit nga lëvizje të tilla shkon deri tek ndonjë bakshish nën dorë në administratë apo tek rritja e çmimeve. Ato nuk trondisin as nëpunësin më të ulët të administratës, ndërkohë që me mbështetjen mediatike dhe financiare që kanë, krijojnë idenë se po udhëheqin frymën e protestës në Shqipëri. Niveli ku e çojnë opozitarizmin lëvizje të tilla, të çon tek pluralizmi i mendimit dhe liria për të protestuar, por jo tek e drejta për t'u dëgjuar dhe për të reaguar ndaj protestës. Ato nuk janë të dëmshme pse ekzistojnë. E thashë se ato janë një shkollë e mirë për menaxherë protestash, por ato janë një alibi për ekzistencën e protestës opozitare. Në Gjeorgji homologia e Lëvizjes "Mjaft", ishte në qendër të protestave për rrëzimin e Presidentit duke u kthyer në një lëvizje reale opozitare. Tek ne nuk pritet të jetë e tillë, por dhe ne nuk mund të presim të jetë ajo opozita. Ajo nuk është një lëvizje që ka lindur nga mendimi opozitar, por është më shumë një lëvizje e stimuluar si mjet edukativ për të mësuar shoqërinë të protestojë. Mahnitja e opozitës pas spektakleve të tilla, do ta lërë atë edhe më tej në stolin e rezervave, tashmë jo duke pritur ardhjen në pushtet, por dhe radhën për të qenë opozitë.

***

Mungesa e vullnetit të grupeve opozitare për t'u bashkuar me PD-në, mungesa e dëshirës së lidershipit të PD-së për t'iu përkushtuar një bashkimi real, mungesa e një fryme në opinionin publik për një opozitë të bashkuar dhe mbetja jashtë PD-së e një kampi të madh opozitarësh nga shoqëria civile, e ka deformuar idenë e Bashkimit të opozitës. Po t'u shtosh këtyre fenomeneve edhe mikroopozitarizmat që përmendëm më lart, ideja e një opozite të bashkuar, duket më kaotike se kurrë, megjithëse fryma opozitare është më e lartë se kurrë. Tashmë mbetet të diskutojmë nëse duhet çuar opozita tek opozitarët, apo opozitarët te opozita? E pasigurt është rruga që do të ndjekin opozitarët për t'u bashkuar me opozitën. Për të është sërish koha për të folur.


-------------------------marre nga tema---

[gabriel]

BERISHA NUK KA PAS NDONJEHERE IDE BASHKIMI.
FLAS BAZUAR MBI HAPA KONKRETE.
EDHE KUR KA PAS NEGOCIATORE NGA ANA E PD-se KA QENE VILI MINAROLLI,APO NDONJE FIGURE TJETER PERIFERIKE.
KJO DESHMON DHE SERIOZITETIN E PD-se PER BASHKPUNIM.


DHE PER TI RA SHKURT :
SA TE JETE BERISHA NE KRYE TE PD-se E DJATHTA NUK KA PER TE ARDHUR KURRE NE PUSHTET.
NDOSHTE SEPSE AI NDIHET MIRE DHE KESHTU SI 1-sh NE OPOZITE.
DHE KUR SHQIPTARET TA KUPTOJNE KETE DO JENE DJEG EDHE CA BREZA.......

[Brari]

Megjithate Berisha mbetet i vetmi opozitar ne Shqiperi.

Qe nje Parti te marri pushtetin duhet te kete "qejf" per ta marre pushtetin por dhe zotesi per te drejtuar kte pushtet.
PS i ka te dyja...dhe qejfin per pushtet dhe zotesine per te mbajt pushtet.

Qe te vij populli ne nje mendim se pushtetin duhet ta kete PD duhet qe te bindet se kur te jete PD ne pushtet do te dije ta mbaje dhe te drejtoje me drejtesi.

PD gjat gjith koheska pasur vetem nje gjel..Berishen.

PS ka shum gjela pra shum figura qe kan "reputacion" ne popull.

Berisha nuk ka asnji fshat ose qyteze ku te jete i sigurte se i merr votat e shumices se banoreve.
Ndersa socialistet kane shum fshatra e qytete ku me siguri i marrin votat e shumices se banoreve.
Perjashto SHKODREN ku PD ka nje elektorat te patundur ne qytete tjera ajo nuk ka siguri bile as ne TROPOJEN e Sali Berishes..

Reputacioni i Lidereve socialist nuk ka lidhje me cilesite e Mira te ktyre liderve por me PUNEN qe kryejne Baza e Partise.

Fino psh ska nevoj te duket shpesh ne Kucove..eshte baza fukso tutoro-enveriste aty qe punon e mban nen Kontroll "simpatine" per PS-ne..dhe kjo baze e telekomanduar punon dhe pa telekomande dhe eshte e gatshme tu siguroj fitore cdo socialisti qe propozon qendra..

Ruci ska nevoj tu bej miting tepeleno-Minatoro-Morracakve-memaliaj-lekdushas e progonatas bolshevike..
Mjafton nje xerr telefoni dhe Partia aty i ben gati votat per cilindo qe u thot Ruci..

Sikur Ruci tu thote..se kte radhe nuk do votoni per Ruken ose Nanon por per nje Biciklete kineze 28-tshe ata e votojne dhe pike se per militante te njohur as qe diskutohet..keshtu ka then partia dhe pike..
Pra forca e PS-se eshte uniteti i celnikte dhe Bindja pa asnji ekuivok ndaj NJESHAVE nga Qendra..
PD nuk ka te tilla resurse..dhe as qe do qe ti kete..

Pra ne nuk dime se a do PD pushtet apo jan te kenaqur me statusin e opozites..
Sikur te donte pushtet do punonte ndryshe..


..

[Redi]

Kryetari i PDK, Nikollë Lesi, u bëri thirrje partive opozitare të organizohen për të qenë të gatëshme për zgjedhjet e parakohshme. Në thirrjen e tij kreu demokristian kërkon nga të gjitha partitë e djathta të mblidhen në një tryezë të përbashkët për të përcaktuar kushtet e një koalicioni të djathtë nën drejtimin e partisë më të madhe opozitare, PD nën drejtimin e Sali Berishës. Në këtë mënyrë Lesi përcakton si liderin e opozitës Berishën dhe përjashton krijimin e një koalicioni tjetër opozitar, duke hedhur poshtë fjalët për krijimin e një koalicioni të tretë, parlamentar, këtë herë nga opozita. Situata politike sipas Lesit mund të çojë në zgjedhje të parakohshme prandaj opozita si një e vetme duhet të jetë e bashkuar në një koalicion të qëndrueshëm.

[Redi]

Kete Lesin nuk e kuptoj.

Per vite me rradhe volli vrer ndaj Berishes e cfare nuk i la pa thene. E akuzoi dhe si autor te djegjes se gazetes 'Koha Jone".

Tani e kerkon si lider i se djathtes.

[Brari]

Arithmetika e "Polit të Tretë"


EDUARD ZALOSHNJA

Në mars të vitit '92, rreth 70% e shqiptarëve patën bindjen se PD-ja e udhëhequr nga Berisha do të realizonte atë që kishin ëndërruar prej shumë vitesh, që Shqipëria të bëhej si gjithë Europa. Por pas pesë vjetësh, një pjesë e mirë e tyre u deziluzionuan. Shqipëria u bë një vend ku zgjedhjet "fitoheshin" me mbi 90%, dhe ku piramidat mashtruese gllabëronin kursimet e fituara me djersën dhe gjakun e shqiptarëve të thjeshtë. Në qershor të vitit 1997, balanca politike u përmbys, dhe shumica e shqiptarëve krijuan bindjen se PS-ja e udhëhequr nga Nano do të realizonte më së fundi bërjen e Shqipërisë si Europa. Por pas shtatë vjetësh, një pjesë e mirë e tyre përsëri u deziluzionuan. Shqipëria u bë një vend që ngjason më shumë me Kolumbinë, se me Europën. Dhe shumë nga ata që janë deziluzionuar si nga Berisha edhe nga Nano, shpesh bëjnë pyetjen se si nuk po del një pol i tretë që t'i eklipsojë polet që përfaqsojnë këta dy udhëheqës. Ndërkohë, disa të tjerë bëjnë pyetjen më esenciale në lidhje me aftësinë që ka elektorati i deziluzionuar për të nxjerrë një alternativë më të mirë se alternativat që ofrojnë aktualisht Nano dhe Berisha. Këto dy pyetje, praktikisht, rrotullohen rreth problemit proverbial të gjenezës së pulës dhe vezës. Por pavarsisht nga zgjidhja e problemit filozofik të gjenezës së një poli të tretë eventual, ai detyrimisht do të përballet me këtë arithmetikë të thjeshtë: 25% e votuesve janë totalisht të dedikuar për PS-në dhe satelitët e saj, 25% janë totalisht të dedikuar për PD-në dhe satelitet e saj, 30% nuk votojnë, dhe 20% jetojnë jashtë Shqipërisë.
Që poli i tretë të jetë i suksesshëm, udhëheqësve të tij do t'i duhet të rezatojnë aq shumë shpresë për të ardhmen, saqë 30 përqindëshi që sot nuk voton t'i kthehet përsëri kutive të votimit, një pjesë e atyre që jetojnë përreth ta marrin mundimin të votojnë në qoftë se qëllojnë të jenë në Shqipëri kur të bëhen votimet, dhe një pjesë e votuesve që votojnë për satelitët e dinosaurve politikë të dezertojnë llogoret e tyre 12 vjeçare. Dhe ky është një mal shumë i përpjetë për këdo që synon të ngjitet në majë të tij. Ata udhëheqës që eventualisht do të përpiqen ta krijojnë polin e tretë duhet të kenë urtësinë që të jenë sa më unifikues. Sepse çdo rrjedhje e vogël mund t'i sjellë këtij poli atë që i ndodhi dikur Aleancës Demokratike dhe, rishtazi, Partisë Demokrate të Rinovuar - të përfundojë në forcë politike kafenesh. Dhe Shqipëria nuk ka nevojë për një forcë të tillë më tepër në parlament, ka mjaft të tilla sot atje që nuk bëjnë gjë tjetër veç shitblerjes së votave. Ajo që ka nevojë Shqipëria është një alternativë politike që do t'i thotë përfundimisht mjaft papërgjegjsisë në qeverisje, korrupsionit e inefiçensës në administratë, shtetit joligjor, ekonomisë së monopolizuar të tregut, varfërisë, dhe mungesës së ujit e dritave. Me pak fjalë, një alternativë që do t'i dërgonte dinosaurët Nano dhe Berisha në muzeumin politik.



19/01/2004 shekulli

[Redi]

Zaloshnja si ne shume shkrime te tija flet me Ideale pa kurrfare tabani.

Polin e trete jane munduar ta krijojne shume parti dhe figura politike dhe kane deshtuar. Ata nuk kane deshtuar personalisht pasi tek e fundit e kane gjetur ndonje kocke per te lepire, por ka deshtuar populli apo ai 30% qe permend Zaloshnja per te konfirmuar ate pol.

Kjo eshte propaganda manipuluese qe ka vite qe ka dale nga Selia Roze. Duke sulmuar si Nanon dhe Berishen ne te njejten kohe, ata manipulojne masat duke i larguar nga kutite e votimit.

Sa me pak te marrin pjese ne votime, aq me mire eshte per Nanon pasi e di qe Baza e Indoktrinuar Enveriste nuk ka per ta lene kurre ne balte.

Problemet per Nanon do te shtoheshin atehere kur populli do ti rikthehej masivisht kutive te votimit por dhe kete gje ai e ka marre parasysh duke shkaterruar cdo alternative te trete qe ka dale keto vite.

Keshtu qe Shqiptaret, do apo z'do Zaloshnja kane vetem dy alternativa per zgjedhur midis tyre.

Kete e kuptoi me ne fund dhe Lesi, anti-berishiani me i terbuar gjate periudhes se qeverisjes demokratike.

[Brari]

Pse Berisha nuk interesohet asnjihere para Votimeve per sigurine e votes por e ngre si problem vec mbas votimeve?


Pse Nano ishte i sigurte per fitoren qe para Votimeve dhe i kerkoi Berishes ne Zerin e Amerikes qe..te prononcohej..ne se do i njihte ose jo Rezultatet dhe Berisha vec belbezoi..

Pse Pd e berishes kujtohet te kontrolloje antaresine dhe simpatizantet vec nji dit para votimeve ose hic fare..ne se jan aty..ne se i kan emrat ne lista etj etj..gjera me rendesi vendimtare te cilat Ps i ujdis nji muaj para cdo votimi?

Pse berisha megjithse e dinte se sipas Letrave qe komisioni bipolar me Jemin Gjanen e PD-se dhe Eqrem ruken e PS..kishin vulosur nje KQZ ku 4-5 ishin Socialiste te thekur e vec 2 demokrat te shkindur ai nuk mori asnji mase para zgjedhjeve..por e ngriti kte problemin..Celibash-Subash mbas pilafit ?

Berisha duhet te dorzoje zyren e kryetarit te PD per pune te dobet (per te mos thene sabotuese) gjat ktyre viteve..

Ai kurre nuk informon bazen e Partise se cfar kullundris me Xhefrat e Pak-prodat..

Une dyshoj se... Berishes i eshte thene drejt e ne fytyre nga XHEFER-PRODAT ..se..Ti BERISH nuk do lejohesh te vish ne Pushtet..por ne si Xhefra e proda smund ta leme PS-ne ne Pushtet pa nji opozite formale.. prandaj... plzz i dashur Beryy .. luaj pjesen ca vite keshtu..si deri tani..

Nje Parti e nje Lider qe do te vij ne Pushtet ben tjera gjera..

[krokodili_73]

Vetë lideri i PD-së, Berisha, duhet të heqë dorë nga lëvizjet kaotike dhe donkishoteske. Në këtë drejtim duhet të dalë një lider i ri, i cili, me veprimet dhe politikën e tij, duhet të na bashkojë dhe jo të na përçajë”, tha Shehu


Partia Demokrate e Re dhe Republikane kërkojnë strategji për të djathtën, por jo me thirrje e sharje

“Tani opozitës i duhet një lider i ri”
Shehu: Berisha po tregon se nuk mund të bashkojë të djathtën


Agim Haxhiu

Partitë e spektrit të djathtë kërkojnë hartimin e një strategjie për opozitën, e cila mund të arrihet vetëm nëse në krye të saj vjen një lider i ri dhe frymë e re.

Partia Demokrate u shpreh dje se largimi i Berishës nga kreu i PD-së, apo edhe i opozitës mund të sjellë një ndryshim në bashkëpunimin mes partive të djathta. Edhe kreu republikan, Mediu, shprehet se unifikimi i opozitës bëhet me përfshirjen dhe afrimin e të gjithë personave, qofshin ata intelektualë apo njerëz që më parë kanë qenë në parti, por më pas janë larguar.

Ndryshimet
“Opozita duhet të bëjë ndryshime të mëdha brenda vetes. Vetë lideri i PD-së, Berisha, duhet të heqë dorë nga lëvizjet kaotike dhe donkishoteske. Në këtë drejtim duhet të dalë një lider i ri, i cili, me veprimet dhe politikën e tij, duhet të na bashkojë dhe jo të na përçajë”, tha dje nënkryetari i PDR-së, Shehu. Po ashtu, ai shtoi se kjo kërkesë e tij lidhet me faktin se opozita ka treguar se jo vetëm nuk po gjen një mirëkuptim, por, përkundrazi, vazhdon me akuza të ndërsjella. “Fatkeqësisht, po tregohet se brenda opozitës veprojnë njerëz që vetëm nuk e bashkojnë, por edhe e përçajnë atë”, shtoi ai. Edhe lideri i PR-së, Mediu, tha se opozita nuk vjen në pushtet me thirrje, por me një bashkëpunim me të gjitha partitë, apo edhe shtresat e tjera të shoqërisë. Unë mendoj se opozita nuk është ushtri, që vendoset në një rresht, por një mozaik vlerash dhe identitetesh, të cilat duhet të shfaqen. Ne duhet të ndërtojmë një kamp opozitar, ku të kontribuojnë intelektualë apo përfaqësues të shtresave të tjera shoqërore, që kërkojnë ndryshimin e kësaj situate në vend. Dy drejtesusit e mësipërm kanë shtuar se, nëse opozita kalon krizën brenda vetes, atëherë duhet të ndërmarrë nismën për të hartuar një strategji të besueshme për qytetarët.

Programi
“Ardhja e opozitës në pushtet nuk bëhet vetëm me thirje për revolta. Opozita ka nevojë për një strategji konkrete për organizimin dhe funksionimin e saj, duke përfshirë këtu të gjithë elementët përbërës”, tha Mediu. Ai tha se ky program mund të arrihet pasi të kapërcehen problemet brenda opozitës. “Ne kemi qenë dhe do të jemi të gatshëm të kontribuojmë në këtë drejtim, por këtë duhet ta bëjnë të gjithë, dhe askush të mos e cilësojë veten të parë e të tjerët ushtarë”, tha ai. Po ashtu, edhe reformatori Shehu tha se partia e tij ka treguar vullnet për bashkëpunim, i cili mund të arrihet me tryeza, të cilat duhet të përfshijnë jo vetëm partitë politike. “Të hartohet një platformë e qartë politike, por kjo arrihet vetëm pasi të gjendet vullneti real politik te të gjitha partitë dhe drejtuesit e tyre. Por, nëse nuk zgjidhen problemet, që ngrita më lart, nuk mund të flitet për vullnet politik”, tha ai. Kritikat e shfaqura nga dy drejtuesit janë shtuar së tepërmi kohët e fundit edhe nga drejtues të tjerë partish, kryesisht aleatë të PD-së si Lëvizja e Legalitetit, Balli Kombëtar, apo edhe joaleate të spektrit të djathtë si ajo Demokratike e Rinovuar. Pothuajse të gjitha kritikat janë drejtuar në politikën që po ndjek Partia Demokratike, veçanërisht kryetari i saj, Berisha. Këto rezerva, të cilat shpeshherë kanë qenë edhe akuza, janë shtuar pas zgjedhjeve lokale të tetorit, ku opozita nuk arriti të fitojë shumicën.