Mbi katër mijë tonë zink dhe aq koncentrat i plumbit po ruhen në depot e minierës së Stantërgut, sikur edhe një sasi e konsiderueshme e argjendit, për t’u shitur me çmime më të mira. Por, as rënia e çmimeve të metaleve në tregun ndërkombëtar e as pagat e ulta nuk i pengojnë minatorët të gërmojnë, duke shpresuar se një ditë nuk do të kenë probleme me pagat

“Me fat!” Qindra minatorë çdo mëngjes urojnë njëri - tjetrin derisa nisen thellë në nëntokën e minierës “Trepça” në Stantërg. Në horizontin e dhjetë, në thellësi mbi 700 metra. Aty ku deri më tani minatorët kanë gërmuar mbi 17 milionë tonë xehe të plumbit, zinkut e argjendit. Sikur edhe 30 vite të mos bëhet asnjë hulumtim në këtë minierë, “armata e nëntokës” thonë se kanë xehe për të nxjerrë.

Ata nuk ndalen. As tani kur nga pasuria nëntokësore që nxjerrin nuk mund të sigurojnë pagat e tyre.

Me shpresën se kriza ndërkombëtare financiare do të kalojë dhe vlera e metaleve do të ngritet, mbi katër mijë tonë zink dhe aq koncentrat i plumbit po ruhen në depot e kësaj miniere me flotacion. Ashtu sikur edhe një sasi e konsiderueshme e argjendit, që presin të shiten në ditë më të mira.

“Ishalla këtë muaj mund t’ua sigurojmë pagat punëtorëve”, thotë drejtori i minierës, Beqir Maliqi, që ka kaluar 30 vite si punëtor në zgafellet e Stantërgut.

Deri më tani ai thotë se kanë qëndruar mirë financiarisht dhe punëtorëve u janë dhënë pagat me kohë. “Tani rënia e çmimeve na ka goditur rëndë”, thekson Maliqi.