Gjykata Kushtetuese: Te pezullohet zbatimi i Ligjit të Dosjeve aprovuar nga Kuvendi

[Duaje Siveten]

paralele (por jo pentagrame) nga BBC Shqip per ligjin

==============

...

Ndërkombëtarët duke shprehur rezerva, kërkuan më parë shtyrjen e votimit. OSBE tha se ligji ka implikime serioze kushtetuese dhe politike.

Këshilli i Evropës, e akuzoi Shqipërinë se është nxituar me ligjin, për të cilin kritikët thonë se pengon hetimet ndaj ish ministrit të Mbrojtjes lidhur me aferën e pretenduar të trafikimit të armëve.

Këshilli i Evropës shprehu shqetësimet se ligji do të mund të krijojë më shumë padrejtësi se do t'i ndreqë ato.

Ligji prek prokurorët që hetojnë shpërthimin që vrau 26 persona në punishten e çmontinimin e municioneve në Gërdec pranë Tiranës në muajin mars.

...

Në ish Bashkimin Sovjetik, me përjashtim të republikave balltike, tendenca ka qënë për t'i mbajtur të mbyllura këto arkiva të policisë sekrete sovjetike, KGB.

Ish oficerë të lartë të KGB-së janë në krye të politikës apo biznesit në Rusi.

...

=================

thoni pastaj se sigurim-punizmi nuk eshte ne krye te politikes dhe biznesit ne Shqiperi - i vetmi vend ne Europen Lindore qe akoma nuk ka hapur dosjet, si ne vendin e lenin-stalin-putinit ...

[Brari]

Godo:

Ligji i Dosjeve të rishihet, dënohet çiraku dhe jo ustai
» Vendosur: 30/12/2008 - 10:40



•

BLEDAR HOTI

Për politikanin e njohur Sabri Godo, Ligji i Dosjeve i miratuar së fundmi nga Parlamenti duhet të rishihet. Godo bën gjithashtu apel për kujdes në marrëdhëniet me SHBA. Presidenti i Asamblesë së PR-së ka folur gjithashtu edhe për Kodin Zgjedhor, ligjin e Prokurorisë si dhe për bilancin e qeverisë Berisha.
Zoti Godo, jeta politike parlamentare e vitit që po mbyllet u karakterizua nga debatet mbi 3 ligje kryesore: Kodi Zgjedhor, ligji mbi dosjet dhe ligji mbi Prokurorinë. Cili është vlerësimi juaj rreth këtyre ligjeve?
Së pari Kodi Zgjedhor: Nuk pretendoj të jap gjykime prej eksperti. Kam thënë dhe e përsëris se Kodi Zgjedhor nuk më duket më i përshtatshmi për kushtet tona. Është një eksperiment i ri. Por me këtë Kod do të shkojmë në zgjedhje, sepse i tillë ishte vullneti i shumicës, kështu funksion demokracia. Për rrjedhim nuk mbetet veç të punojmë të gjithë, që të zbatohet sa më mirë, duke qenë zgjedhjet e ardhme të një rëndësie shumë të madhe.
Në votimin e këtij Kodi qëndruan së bashku PS dhe PD. A ka të bëjë kjo me një diversion ndaj LSI së Metës?
Është gjë e mirë kur forcat politike arrijnë marrëveshje për probleme madhore. Koha do të provojë nëse në rastin e dhënë u bë ajo që duhet. Do ta shohim pas qershorit. Përsa i takon Metës, ai u la jashtë, ndërsa duhej të përfshihej. Kjo buron nga konflikti ndërmjet tij dhe Ramës, nga i cili nxjerr një përfitim Berisha. Kjo është normale në politikë. Loja ka qenë e hapur dhe këtë tashmë e dinë të gjithë.
Ligji për pastrimin e figurave. A kemi të bëjmë në këtë rast me shkelje të Kushtetutës, siç pretendohet nga disa parti?
Mendoj se ky ligj duhet të rishihet, sepse në disa nene të tij, kemi të bëjmë me parime juridike e morale. Ligji duhej t'u hiqte mundësinë të bëhen deputetë e funksionarë, ish-drejtues të Partisë së Punës dhe Sigurimit të Shtetit. Nuk mund të arrestohej një qytetar pa firmën e sekretarit të parë të rrethit. Ishin krerët e partisë dhe të sigurimit, ata që organizonin dhe drejtonin, luftën e klasave dhe përndjekjen e armiqve politikë. Këta lihen mënjanë. Kurse kërkohen dosjet e rangjeve të dyta e të treta. Kësaj i thotë të ndëshkosh çirakun dhe jo ustanë.
Ky ligj prek një numër të gjyqtarëve dhe prokurorëve? A mendoni se bëhet për hir të disa proceseve në zhvillim lidhur me mazhorancën?
Gjyqtarë, hetuesë e prokurorë, që kanë shërbyer me zell në procese politike, duke shkelur edhe vetë ligjet e diktaturës duhet të flaken nga drejtësia. Të kihet parasysh se edhe në gjykimin e krimeve "të rënda" ekonomike, ka patur ndikim të fortë të politikës. Le ta zëmë se një ish-i përndjekur ka sot një problem me drejtësinë si do të ndjehej ai, po të delte tani para të njëjtit hetues, që e ka proceduar brutalisht e nën tortura edhe 20 vjet më parë? Drejtësisë nuk i duhen këta hetues e gjyqtarë. Mendoj se seleksionimi i tyre duhet të bëhet nën frymën e këtij ligji. Nga KLD, nënpropozimet e Ministrisë së Drejtësisë, ose të një komisioni të posaçëm.
Ka shkelje të Kushtetutës në ligjin për dosjet?
Meqë kjo lë shteg për interpretime, duhet t'i nënshtrohet debatit. Fjala e fundit duhet të thuhet kur të ketë kaluar edhe në filtrin e presidencës, e cila duhet të bëjë konsultime dhe eventualisht, pasi të shqyrtohet nga Gjykata Kushtetuese.
Ambasadorët e SHBA, Anglisë dhe OSBE kanë shprehur haptas rezervat e tyre lidhur me këtë ligj. Këmbëngulja e Berishës në këtë rast, a u shërben interesave të vendit?
Përshëndes Berishën kur thotë se jemi një vend sovran. Me vendet miq mund edhe të diskutohet. Nuk është e ndershme dhe e dobishme të thuash "Yes Ser", edhe kur ke pikëpamje të kundërta. Kjo as që kërkohet, por kundërshtimet publike të palëve nuk lënë shije të mirë. Rrethanat politike të 100 vjetëve të fundit, veçanërisht Kosova, e kanë vënë Shqipërinë vendosmërisht në krah të SHBA e kështu do të jetë edhe në të ardhmen. Ndonjë keqkuptim për çështje të ditës duhet të zgjidhet si ndërmjet miqve të vërtetë e jo me fërkim brinjësh. Këtë nuk e pranojnë shqiptarët.
Lidhur me ligjin për prokurorinë, përsëri pamë një akordancë midis PS dhe PD.
Ti më ndihmo për Kodin Zgjedhor, unë ta shpërblej me Prokurorinë. Ndodh edhe kështu. Gjithsesi prokuroria nuk mund të qëndrojë mbi Kuvendin dhe mbi shtetin në tërësi. Mendoj se ligji është i mirë.
Si e vlerësoni punën e deritanishme të Prokurorisë së Përgjithshme?
Prokuroria ka zvarritur tej limiteve disa hetime të dorës së parë. Atëherë kam të drejtë të mendoj se të njëjtin fat do të kenë pësuar edhe çështjet të dorës së dytë dhe të tretë. Prokuroria duhet të ecë me hapa të sigurta, por jo duke numëruar në vend. Zgjatja e proceseve pa mbarim krijon pasiguri, dëmton klimën politike dhe dëmton moralisht personin nën hetim.
Viti që po mbaron u shpall nga PD si një vit i mbushur me sukses, ndërsa opozita thotë krejt të kundërtën. Cili do të ishte vlerësimi juaj?
Është krejt normale që shumica qeverisëse të brohorasë për sukseset, dhe pakica në opozitë të thërrasë për dështimet. Unë them se u bënë përparime, sidomos në infrastrukturë dhe në disa sektorë. U hodhën themelet për investime serioze në të ardhmen. Pati një ngritje të rrogave dhe pensioneve megjithëse jo realisht në nivelin që pretendohet. Pati zhvillim të përgjithshëm. Ishte një vit i mbarë edhe në rrugën e integrimit. Të gjitha këto janë pozitive. Lufta ndaj korrupsionit nuk dha rezultatet që priteshin, papunësia dhe varfërimi i një pjese të madhe të popullsisë mbeten shqetësuese, biznesi has vështirësi, bilanci tregtar mbetet problem. Këto jam qartësisht negative. Jemi ende larg nga dita kur mund të themi se e hodhëm hendekun.
Çfarë do të veçonit si mangësi kryesore të qeverisjes?
Pronat. Çdo gjë ecën si nën bluarjen e një mekanizmi të madh që vërtitet e nuk nxjerr miell. Ende nuk është kuptuar se pa u kthyer prona tek i zoti themelet e shtetit mbeten si në rërë dhe integrimi në Evropë do të jetë i vështirë.
Çfarë mund të bëhet aktualisht për pronat?
Problemi kërkon zgjidhje me themel. Zgjidhjet gjysmake janë gjithnjë të dëmshme. Duke meremetuar diçka të ngritur shtrembër, veç shtyn kohën, duke mbartur të keqen, megjithatë them se duhet nisur sa më parë revizionimi i ligjit 7501 dhe ligji mbi ish- fermat shtetërore, siç ka premtuar qeveria. Të lëvizë shpejt e drejt Agjencia e Kthimit të Pronave. Kështu lehtësohet pjesërisht e keqja.
Le të ndërrojmë temë. Kohët e fundit dhe juve jeni përfshirë në një debat mbi figurën e Skënderbeut, mit apo realitet. A mund të shtoni diçka mbi këtë?
I njoh të drejtën gjithkujt të thotë të tijën. Nuk duhet të na ngrihen përpjetë qimet e kokës, kur dikush shfaq një mendim të ndryshëm nga mendimi sundonjës. Por kur kalohen caqet atëherë duhet të ndalë. Del njëri dhe thotë se mbase Skënderbeu u hodh në kryengritje ngaqë ra në dashuri me të bijën e sulltanit. Del një tjetër dhe thotë se unë nuk e kam dashur Skënderbeun derisa lexova një libër aktual, ndërsa nuk i kishin mbushur mendjen njëmijë vepra të shkruara deri më sot për të. Një tjetër thotë se në vend të monumenteve për të kaluarën, le të ndërtojmë në qendër të qyteteve objekte të bamirësisë. Bota është e bukur pikërisht sepse ka nga të gjitha. Por ama duhet bërë edhe kujdes, që përçartjet të mos dëmtojnë të vërtetën dhe atë që është pasuri e përgjithshme. Për Skënderbeun, bëra sa munda në një libër prej 500 faqe, të botuar 4 herë në 45.000 kopje të rishikuar në botimin e fundit. Dua të shtoj vetëm këtë: Sot si komb jemi nën vëzhgim dhe rreth nesh zhvillohet një lojë, për shkak të Kosovës e pjesërisht edhe Maqedonisë. Nuk është rasti të përbaltim historinë tonë të vërtetë e të ngrejmë dyshime rreth identitetit kombëtar, se këto i bëjnë me tepricë disa qarqe mjaft të interesuara për të na sulmuar.
Këto që thatë, a kanë lidhje me zhvillimet në Kosovë e Preshevë, dhe si e shikoni të ardhmen?
Pavarësinë e Kosovës po e mbrojnë më së miri politikanët dhe drejtuesit e saj. Ne si shtet duhet t'i qëndrojmë në krah siç kemi bërë në muajt e fundit. Gjendja aty mbetet e rrezikshme. Agresiviteti serb është shtuar, ka ende paqartësi ndërmjet OKB dhe Evropës. Pra duhet përqendrim dhe vëmendje e lartë. Në Preshevë u dha një goditje anësore, brenda planit të përgjithshëm ruso-serb, dmth krahu sllavo-ortodoks. Nëse serbët do të shkojnë edhe më tej në Preshevë, do të thotë se do të kemi një shtim të mëtejshëm të agresivitetit edhe ndaj Kosovës. Mendoj se qeveria jonë duhet të bëjë një ankim në Këshillin e Sigurimit në BE dhe OSBE. Kërcënohet pa qenë në rajon.
Më në fund çfarë do t'u uronit politikanëve tanë dhe shqiptarëve në tërësi për vitin e ri?
Uroj që politikanëve t'u bëhen pësimet mësim, që të kthejnë mendjen nga e mbara dhe të kenë kohë të dëgjojnë njerëzit, sepse vetëm kështu do të kenë kohë të drejtojnë; uroj që gjithë shqiptarët kudo që janë të kujdesen për njëri-tjetrin, të kenë punë, shëndet e gëzim, e të ruajnë familjen si gjënë më të shtrenjtë. Nga Mot Gëzuar.






oanorama


rd

2008, viti i shqiptarëve


Sali BERISHA


Së pari, ju përshëndes. Së dyti, dua t'ju jap një lajm të gëzuar. Para takimit me ju përgatita një fjalim të gjatë, por në fund më erdhi ndërmend se ky është viti që flet vetë dhe në këtë kontekst, e lashë mënjanë fjalimin.

Viti 2008 është viti i shqiptarëve. E vërteta më e madhe e këtij viti është se ai ishte viti i pavarësisë së Kosovës, si kurorëzim i një përpjekjeje mbinjerëzore, si një kryevepër e qëndresës së gjithanshme të shqiptarëve të Kosovës dhe kombit në tërësi, i cili, duhet ta pranoj, në një kuadër ligjor ndërkombëtar tmerrësisht të salduar dhe të konsoliduar, ia doli të shpallë pavarësinë. Me këtë akt, shqiptarët fituan dinjitetin që e kishin të përgjysmuar, gjersa gjysma e tyre nuk ishte e lirë.

Viti 2008 është viti i shqiptarëve, një vit ndër më të mëdhenjtë në historinë e kombit. Ky vit është viti kur Shqipëria mori ftesën e anëtarësimit në NATO. Kjo ftesë ka rëndësi të shumëfishtë, por dy janë më kryesoret. Shqiptarët do të kenë mundësi si komb i lirë të ndërtojnë të ardhmen e tyre, të shkëputen nga historia e tyre e mbijetesës dhe të hyjnë në historinë e ndërtimit të lirisë. Së dyti, ky është gjithashtu një moment i madh, sepse pas disa shekujsh pushtimesh, copëtimesh e diktature, vendi kthehet në familjen e kombeve të lira perëndimore. Nuk ka mëdyshje se ftesa e Shqipërisë për anëtarësimin në NATO dhe anëtarësimi i saj në NATO përbën, pas betejave të Skënderbeut dhe faqeve të ndritura që ai shkroi në histori, momentin më të rëndësishëm në rikthimin e kombit dhe të vendit në familjen e kombeve që ai i përket.


Konsensusi ndërpartiak, konsolidoi institucionet


Viti 2008 është viti i reformave të mëdha e të gjithanshme. Juve ju pëlqejnë konsensuset dhe ajo që mund të them është se si asnjë vit tjetër, ky vit nisi me konsensus për ligjin e votuar për sistemin e drejtësisë dhe u mbyll sërish me konsensus për Kodin Zgjedhor që u votua sot, ligji për Prokurorinë dhe një serë ligjesh të tjera të rëndësishme, pjesë e Kodit të Procedurës Penale dhe Civile etj. Këto reforma kanë konsoliduar institucionet e vendit, kanë shkëputur Shqipërinë nga "Dushku", kanë hedhur bazën ligjore për një sistem të lirë e të ndershëm zgjedhor. Këto reforma kanë konsoliduar parlamentarizmin në Shqipëri, kanë thelluar karakterin parlamentar të Republikës, pra, janë një fitore e republikanizmit.

Reformat kanë qenë shumë të rëndësishme për sistemin e drejtësisë. Faktikisht, ky sistem, në tërësi, funksionon mbi një bazë të re ligjore të standardeve ndërkombëtare. Reformës iu nënshtrua Këshilli i Lartë i Drejtësisë, i cili doli jashtë konfliktit të interesit, sistemi gjyqësor dhe tani së fundi, sistemi i institucionit të akuzës.

Reformat kanë qenë "perpetum mobile" në të gjitha fushat e tjera si atë fiskale, ekonomike, në fushën e arsimit etj..


Viti i reformave të mëdha


Ky ka qenë viti i reformave të mëdha, por edhe viti i rezultateve të mëdha të këtyre reformave. Këtë vit, Shqipëria ia doli të renditet e dyta në botë për sa i përket suksesit të reformave për klimën e biznesit.

Këtë vit, Shqipëria, në një turravrap të madh, la mbrapa 51 vende të botës në këtë reformë. Këtë vit, Shqipëria u rendit në 10 vendet më të suksesshme në botë për luftën kundër korrupsionit, një kancer i vërtetë që duhet luftuar çdo orë, çdo ditë, çdo javë për të zvogëluar e parandaluar pasojat e tij.

Këtë vit, Shqipëria u rendit e para në Ballkan për luftën kundër korrupsionit.

Rezultatet më spektakolare të këtyre reformave besoj se janë rritja ekonomike dyshifrore në tre tremujorët e parë të këtij viti. Shqipëria në orbitën e rritjes dyshifrore, është mesazhi më i mirë, më i fuqishëm dhe më pozitiv që vendi mund t'i dërgojë dhe i dërgon komunitetit ndërkombëtar të biznesit.

Shqipëria një vend tërheqës për investimet e huaja. Në muajin dhjetor të këtij viti ju jeni dëshmitarë se janë firmosur koncesione në fushën e energjisë dhe fusha të tjera me vlerë prej 3.5 miliard euro.

Ky vit ishte viti i privatizimeve të mëdha, ARMO-s, TELEKOM-it, INSIG-ut.


Viti i mbajtjes së premtimeve të mëdha


Pra, është viti i mbajtjes së premtimeve të mëdha.


Natyrisht, viti 2008 ishte viti, në të cilin një aksident tragjik shumë i rëndë ndodhi në Gërdec. Qeveria bëri ndërhyrjen më energjike për rikuperimin e pasojave të këtij aksidenti dhe për rindërtimin e zonës. Një proces hetimor është në zhvillim, i cili shpresoj dhe uroj të vendosë para ligjit të gjithë përgjegjësit e tij.

Jam i bindur se ky ka qenë viti kur shqiptarët janë ndjerë më të lirë se kurrë. Liritë e të drejtat e tyre kanë njohur dimensione të reja. Liria e medias është respektuar e do të respektohet tërësisht. Nuk mund të them se nuk ka pasur akte agresioni ndaj gazetarëve, çka nuk e dëshiroj. Këto akte i kam dënuar dhe i dënoj me ashpërsinë më të madhe. Një prej tyre është kryer nga një zyrtar dhe është në turpin e atyre që nuk e vendosën para ligjit. Por ju siguroj se qeveria nuk do të heshtë. Ne nuk pranojmë qe kundërshtitë me Shqipërinë zyrtare, që ju keni dhe janë jetike për funksionimin e demokracisë, të shndërrohen, në asnjë rast apo rrethanë, në akte agresioni, intimidimi ndaj jush. Ju garantoj se kjo qeveri qëndron e do të qëndrojë me forcën më të madhe ndaj çdo cënimi që do t'ju bëhet juve. E theksoj sërish se ju përfaqësoni parlamentarët e fjalës së lirë. Raste të tjera nuk kanë munguar, por janë vendosur dhe do të vendosen rigorozisht para ligjit. Liria e shtypit është kusht vendimtar që qytetarët shqiptarë të gëzojnë liritë e tyre.


Rritje pagash e pensionesh për 800 mijë familje


Ky vit, ka qenë për 800 mijë familje shqiptare një vit në të cilin janë shpërblyer në masë si asnjëherë tjetër në historinë e tyre. Kështu, pagat e 104 mijë punonjësve të administratës pësuan një rritje mesatare, në një rezultante trevjeçare, me 54 përqind, të arsimtarëve me 75 përqind, punonjësve të shëndetësisë me 81 përqind, me 75 përqind u rritën pensionet në fshat, me 45 deri në 70 përqind pensionet në qytet. Në këtë proces, Shqipëria ndërmori rritje më të mëdha pagash e pensionesh se çdo vend tjetër në këtë kontinent. Dua të garantoj shqiptarët se kam qenë e mbetem i palëkundur në politikën time të rritjesh së pagave e pensioneve, se këtë komponent të Kejsit e konsideroj gjeniale, sikundër konsideroj gjeniale lirinë fiskale e taksën e ulët të Hajekut. Ndaj unë do të vazhdoj të lëviz në këto dy drejtime me shpejtësinë më të madhe të mundshme. Në këtë drejtim, këtë vit ne kemi lënë mbrapa jo vetëm vende të rajonit, por edhe vende të Bashkimit Europian. Sërish, këtë garë ne do ta vazhdojmë, sado e vështirë që është, në mënyrë që shqiptarët të mund të kenë një jetë më të begatë.

Por nëse më pyesni se çfarë i mbetet borxh vitit që shkoi, do të thosha se që të gjitha do t'ia laj gjatët vitit që vjen. Jam përpjekur të mos i mbetem, por kjo është e pamundur, gjithsesi vitin që vjen e kam përpara. Zotimi im është se do të bëj çdo përpjekje për zgjedhje të lira e të ndershme. Ky është detyrimi më madhor. Unë do të bëj çdo gjë që shqiptarët në këto zgjedhje të votojnë njësoj si qytetarët e tjerë europiane. Ju garantoj se ky është qëllimi im më i parë për këto zgjedhje. Së dyti, të respektoj me vendosmërinë më të madhe verdiktin e tyre.


Zgjedhjet e ndershme, objektivi më madhor i qeverisë


Duke i shpallur zgjedhjet e ndershme si objektivin më madhor të qeverisë, ju siguroj se reformat, sërish, do të mbeten "perpetum mobile". Ne do të bëjmë çdo përpjekje për lehtësimin e klimës së biznesit, në mënyrë që kriza që po troket derë pas dere në vende të tjera kësaj herë të na kursejë e të mos ndjehet. Dhe jam shumë optimist, sepse kemi vendosur një kuadër ligjor shumë të favorshëm. Jam optimist, sepse me një politikë të re të zbatuar i është dhënë përgjigje problemit të energjisë. Ju jeni dëshmitarë se premtimi im se, nga fundi i vitit 2007 e tutje nuk do të ketë ndërprerje, është realitet. Nuk mund të them se është realitet për shkak të burimeve të reja, por është realitet për shkak të zbatimit të politikës që përcakton çmimin më të lartë të energjisë, mungesën e saj, çka do të thotë, import maksimal energjie dhe jo ndërprerje të saj dhe kjo politikë ka dhënë rezultat. Përveç ndërprerjeve për defekte e riparime dhe në ndonjë rast edhe për papërgjegjshmëri, pasi zyrtarë e nëpunës të pandërgjegjshëm, të cilët ne po përpiqemi t'i identifikojmë, për të raportuar humbje më të ulëta, mund edhe ta kenë bërë këtë, në vitin 2007 politika e qeverisë ka qenë zero ndërprerje të energjisë. Këtë vit ne shkojmë drejt një sigurie më të madhe, sepse shtohen burime të reja, Vlora dhe ecim drejt burimeve të tjera të reja. Kështu që, mund të them se, përveç ndonjë situate tejet të jashtëzakonshme, shqiptarët shkëputen nga një politikë e shkuar, një politikë që për të pasur deficencë KESH-i, konsistonte në pasjen e një, dy, tre, katër opsione dhe një nga opsionet zyrtare ishte ndërprerja e energjisë dhe dënimi kolektiv i popullatës. Kjo nuk ndodh më dhe nuk do të ndodhë.


Vitin e ardhshëm, rritje e shpejtë ekonomike


Pra, janë të gjitha shanset e mundësitë që vitin që vjen të ketë një rritje të shpejtë ekonomike. Sa do të jetë shkalla e ndikimit të krizës globale nuk mund të parashikoj, veçse parashikoj se do të bëjmë çdo përpjekje që ajo të jetë minimale. Nuk besoj që kjo krizë të jetë kaq e qëndrueshme. Shpresoj se 20 janari shënon një datë kthese. Inaugurimi i Presidentit të Shteteve të Bashkuar të Amerikës, Barack Obama, përbën një moment entuziazmi të madh jo vetëm politik, por edhe për tregjet e SHBA-së, ekonomia e së cilës udhëheq ekonominë botërore.

Gjithashtu, do të bëjmë çdo përpjekje për anëtarësimin e Shqipërisë në NATO në samitin e prillit. Deri tani, procesi ka ecur me shpejtësi të madhe. Protokolli i Anëtarësimit është ratifikuar nga shumica e vendeve anëtare dhe është në proces ratifikimi në rreth 7 vende të tjera.

Muajt e parë të vitit të ardhshëm, siç e kemi deklaruar, Shqipëria do të paraqesë kërkesën zyrtare për statusin e vendit kandidat në Bashkimin Europian. Shpresoj të gjejmë mirëkuptim, sikundër jemi të vendosur të bëjmë të gjitha reformat dhe të plotësojmë çdo kërkesë të domosdoshme për statusin e kandidatit.

Në mbyllje, dua ta ritheksoj se kemi pasur një vit të papërsëritshëm në histori, por parashikoj një vit sërish të madh, një vit siç do ta donim ne të gjithë.






Fundi si fillim


Në këto orë të fundit të 2008, gjithkush bën bilancin e 12 muajve që e kanë shoqëruar. Më pesimistët mundohen të gjejnë pikët e errëta të tij, më optimistët të shohin ngjarjet në kahjen pozitive, ndërsa realistët mundohen të venë në peshoren e tyre dy të parat. Ajo që mund të thuhet me saktësi në këtë fundviti është se, për fatalistët ka shumë pak hapësirë, të cilën mund ta kultivojnë vetëm me të shkuarën e tyre.

Shqipëria në këto 12 muaj ka arritur të paraqesë kartolinën më të mirë të saj, në të gjithë këtë periudhë të pasrënies së diktaturës, duke i dhënë përgjigje shumë dilemave. Treguesit janë ata që flasin dhe jo demagogjia, shifrat të bindin, ndërsa aluçinacionet të çorodisin. Dy kulminacionet e këtij viti janë padyshim, marrja e ftesës për anëtarësim në Aleancën e Atlantikut dhe fitorja e pavarësisë së Kosovës.

Janë dy ngjarje, për të cilat shqiptarët gjatë gjithë historisë së tyre kanë sakrifikuar lirinë për t'i pasur pronë të tyre dhe ne u bëmë dëshmitarë këtë vit që shqiptarët arritën të kapërcenin të gjitha barrierat dhe të bëjnë historinë, duke siguruar si NATO-n, ashtu edhe pavarësinë e Kosovës. Prej dekadash shqiptarët e Kosovës kanë luftuar dhe janë përpjekur për të siguruar lirinë dhe pavarësinë dhe ajo u bë realitet vetëm këtë vit. Kjo pavarësi nuk erdhi vetvetiu, por në sajë të një qëndrese historike, të një përballje sfiduese dhe të një këmbëngulje të madhe të këtij kombi për vlerat e lirisë dhe të drejtat e njeriut, për të cilat nuk u bë kurrë kompromis. Pavarësia e Kosovës gjatë këtij viti ishte fundi i një sage të gjatë vuajtjesh dhe sakrificash të shqiptarëve, ku një komb, pa ushtri dhe armatime, por vetëm me besim arriti të thyejë një nga diktatorët më gjakatarë që ka njohur historia e Europës gjatë këtyre 20 viteve të fundit. Natyrisht, një mirënjohje e madhe për këtë shkon për Shtetet e Bashkuara dhe të gjitha ato vende që ju gjenden në krah në ato ditë të vështira Kosovës dhe shqiptarëve. Kosova vetëm gjatë këtij viti është njohur nga shtetet më të fuqishme të globit, duke u bërë kështu shteti më i ri i botës dhe aleati i Perëndimit.

Një arritje po kaq historike për të gjithë shqiptarët është marrja e ftesës për anëtarësimin në Aleancën e Atlantikut të Veriut. Ky moment është një pikë kulmore në historinë e këtij vendi, për mijëra e mijëra shqiptarë që sakrifikuan veten dhe liritë e tyre për ato vlera që sot janë boshti i demokracive perëndimore. Ky është një moment mjaft kulmor edhe për ata qindra studentë të dhjetorit që shembën diktaturën më mizore komuniste të Europës, me fjalët "E duam Shqipërinë si Europa, Amerika". Sot Shqipëria është pjesë e kësaj familjeje të Aleancës së Atlantikut dhe ministri i Jashtëm shqiptar ulet në krah të Sekretares amerikane të Shtetit, në krah të ministrit të Jashtëm britanik, gjerman e francez, ndërsa trupat ushtarake kontribuojnë në misione ushtarake në ato vende ku e kërkon detyra e Aleancës.

Shqipëria është transformuar rrënjësisht. Nga vendi i telave me gjemba dhe bunkerëve sovjetikë, nga vendi i trafiqeve, krimit dhe korrupsionit, Shqipëria është shndërruar në partneren e Perëndimit që prodhon paqe dhe eksporton stabilitet e siguri jo vetëm për veten e saj, por për të gjithë rajonin. Është kthyer në parajsën e investimeve të huaja, duke thithur edhe në këtë periudhë të një krize globale, miliarda euro investime strategjike. Ekonomia shqiptare renditet nga raportet e organizmave ndërkombëtare si një ndër ekonomitë më të shëndetshme që, si asnjë vend tjetër i rajonit, po njeh rritjen ekonomike dyshifrore.

Ky është vërtet fundi i 2008-ës, por nuk është fundi i rezultateve historike të Shqipërisë dhe shqiptarëve. Fundi i këtij viti është një fillim i mbarë për vitin e ri, ku sfida dhe ngjarje të tjera historike e presin vendin, duke siguruar një vijimësi të garantuar. Vetëm pak javë më pas, Shqipëria pritet që të aplikojë për vendin kandidat për statusin e anëtarit të Bashkimit Europian, duke hyrë në listën e atyre vendeve që pret zyrtarizimin për të qenë pjesë jo vetëm natyrale, por edhe organike e familjes europiane. Në këto 12 muaj, u arrit që Marrëveshja e Asociim-Stabilizimit të nënshkruhet nga të gjitha vendet e Bashkimit Europian, ndërsa Greqia pritet ta hedhë një hap të tillë gjatë ditëve të ardhshme. Kjo ishte një kohë rekord e ratifikimit të kësaj marrëveshjeje, krahasuar me shumë vende të tjera, të cilat kanë shpenzuar shumë më tepër kohë për të arritur në këtë finale.

Në samitin e pak muajve më parë Shqipëria pritet të jetë zyrtarisht anëtare e NATO-s, pasi ka arritur në këto pak javë të marrë rezultate befasuese në ratifikimin e Protokollit të Anëtarësimit në NATO nga pjesa më e madhe e vendeve të Aleancës. Viti i ardhshëm pritet të jetë njëkohësisht viti i liberalizimit të plotë të procesit të vizave me BE, një premtim i dhënë nga shumë zyrtarë të lartë të Brukselit

Viti i ri do të jetë viti i përfundimit të Korridorit të shqiptarëve, i rrugës Durrës-Kukës që do të lidhë Shqipërinë me Kosovën në një kohë mjaft të shkurtër. Një projekt gjigant, që u lind dhe u materializua brenda një kohe rekord dhe që i bën shqiptarët të ndjehen shumë më pranë njeri -tjetrit, ndërsa Shqipërinë një treg të konsoliduar ku mundësitë e zhvillimit ekonomik shumëfishohen, duke i shndërruar rrugët e portet e saj në ura të pazëvendësueshme të lidhjes me Perëndimin.

Mirënjohja më e madhe për këto rezultate i takon në radhë të parë të gjithë atyre shqiptarëve që, me votën e 3 korrikut të tre viteve më parë votuan për ndryshimin e madh të historisë së këtij vendi dhe të historisë së tyre. Dhe sikurse po e provon realiteti, ata sot janë krenarë për votën e tyre dhe nuk kanë arsye përse të ndjehen të zhgënjyer. Natyrisht, në këtë rrugë të mbushur me sfida dhe barriera, ka vend për përmirësime, por nëse kthejmë kokën pas e kemi më të lehtë të kuptojmë se ku kemi arritur.

Mirënjohja për këtë Shqipëri ndryshe i shkon qeverisë "Berisha" dhe kësaj mazhorance që, me vullnetin e saj të hekurt për të ecur përpara, i shpalli luftë, krimit të organizuar që kishte mbërthyer këtë vend deri tre vite më parë, i shpalli luftë të gjitha llojeve të trafiqeve që lulëzonin, i shpalli luftë luftë korrupsionit, këtij virusi që ishte shndërruar në një edukatë të punës për të gjitha institucionet dhe drejtuesit e tyre. Mes kartolinës së një viti më parë dhe kartolinës së këtij viti, bilanci është i qartë. Shqipëria ka ndryshuar si kurrë më parë.


rd
--

[land]

o brari,e ke lexu ate romanin qe ka shkru sabriu per xhaxhin enver ne kohen e luftes partizone?

[djaliepirotas]

o brari,e ke lexu ate romanin qe ka shkru sabriu per xhaxhin enver ne kohen e luftes partizone?

O king..te pergjigjem une per Brarin.
Per xhaxhin ne ate kohe kane shkruar te gjithe: qe nga Kadareja e deri tek Fuat Cela.
Skane shkruar vetem ata qe jane pushkatuar, burgosur, syrgjinosur.
Sabriu nuk eshte nga ata mund tjua mbyllesh gojen lehte. Busulla e tij politike orientohet kah e mjera Shqiperi qe ai me shoke mundohen tja qisin koken lart.

[Brari]

nuk besoj se ka bere godo plaku roman me luft te enverit..
mos flisni kot..

thot dicka godua aty lart e ne se je shqiptar per at pun do duheshe te diskutoje.. o snaku ..

[Duaje Siveten]

qaj godo, bash burr i menqem ...

krytar ho(no)rrifik i republikasve, si m'vaktin i debatikasve ...

sa do t'ket marr prej mediut, veqmas per gerdeci ...

edhe cucen ia bom partizone ... domethon ministre ...

[rhust]

çfare dosjesh do te hapen dhe te kujt? sigurimsat, dhe hartuesit e ketyre dosjeve do e kishin ne dore edhe ti fallsifikonin apo ti zhduknin ato. Ky pastrim i politikes esht mashtrim, nuk mund ta bejn kte pastrim ish komunistat, pasi kushti i pare qe te ishe komunist ishte te ishe spiun, te ndiqje vijen e partise dhe ta zbatoje ate. kte do ta bejn brezat qe do vijn ata sdo ken lidhje fare me te kaluaren.

[Duaje Siveten]

Budallenj apo te Inkriminuar?

Nga Bashkim Kopliku

Më së fundi dhe Presidenti Topi foli troç, duke thënë pak a
shumë: “politikanë shqiptarë, mos bëni hipokritin kaq pa moral”.

Të hënën më 12.1.2009, asistuam në kulmin e një presioni
mjeran që kishte disa ditë që ngrihej: studentë nga Tirana dhe
Shkodra, të përndjekur nga Shqipëria e Amerika, të gjithë në
mënyrën më prej budallai, i bënin thirrje e peticione
Presidentit Topi, që të firmoste ligjin e ndërkallur nga
kryeministri Sali Berisha, ligjin e tij gjoja kundër
komunizmit. Mirë ato gratë “e përndjekura”, që mbase internimi
i vuajtur nga partia komuniste, mund t’u ketë dëmtuar trurin,
po studentët, vajza e djem të rinj, rreth të 20-tave, që
firmosin për “ligjin e Berishës”, duke kërcënuar presidentin e
vendit që të shkelë Kushtetutën. Ata, fëmijët tanë po na
ngjajnë me Hitlerjugend (rininë hitleriane). Ja se ç’bën
propaganda berishiste e stilit komunist: të budallalleps (të
kthen në budalla).

Tashmë është e qartë dhe për më budallain: kryeministri Sali
Berisha do të detyrojë Presidentin e vendit Bamir Topi të
firmosë ligjin e tij “për dosjet”, pavarësisht se ky ligj
shkel kushtetutën e vendit, pavarësisht se ky ligj mbron Sali
Berishën e ish-komunistët ofiqarë të tjerë. Berisha është
ish-sekretari i partisë komuniste. Topi nuk ka qenë kurrë
anëtar i partisë komuniste, bile thuhet se është me prejardhje
ish-pronarësh. Kujt i besojnë ata “anti-komunistët” e budallallepsur?!

Prandaj më e lehta që mund të shkruajmë, është se
“protestuesit” janë budallallepsur. Një shok imi thotë se ata
nuk janë budallallepsur, por janë të detyruar, me blerje apo
kërcënime, për t’u bërë pjesë e makinës propagandistike
mashtruese berishiste. Nejse, mua më pëlqen të them më të
lehtën: janë budallallepsur.

Bamir Topi, por edhe ne, por edhe shumica e shqiptarëve duan
një ligj për të dënuar komunizmin. Këtë ligj nuk e do Sali
Berisha, prandaj ka nxjerrë njerëz që ulërijnë për “ligjin e
Sali Berishës”, që i mbron ish-komunistët ofiqarë, dhe nuk i
dënon ata. Ata që bërtasin për “ligjin e dosjeve”, po bërtasin
për ligjin e Berishës, e jo për ligjin e dekomunistizimit të vendit.

Tashmë është shpjeguar në format nga më të thjeshtat, për të
kuptuar dhe një deficient: Kushtetuta jonë thotë se çdo njeri
i lirë dhe jo i çmendur, ka të drejtë të zgjidhet—pikë. Që të
bësh një ligj që thotë se “të poshtrit nuk duhet të zgjidhen
(edhe kur ata janë të lirë, pra nuk janë në burg; edhe kur ata
nuk janë të çmendur)”, duhet të ndryshosh së pari Kushtetutën,
e pastaj të bësh atë ligj. Presidenti është vënë për të
mbrojtur kushtetutën, dhe jo për ta shkelur atë, sepse
ulërijnë falangat berishiste.

Nëse dikush mendon se ka të drejtë të bëjë ligje që bien qartë
në kundërshtim me kushtetutën, normalisht ai është më i keq se
komunisti më i keq. Baza e një shteti është kushtetuta. Nëse
shteti lejon që dikush të shkelë me ligje kushtetutën, ai
shtet ka mbaruar. Një shoqëri që lejon shkeljen e Kushtetutës
së vet, është njësoj e ndyrë si komunizmi.

Pra vetëm një budalla nuk e kupton se që të bëhet një ligj i
fortë për dekomunistizimin, duhet së pari të bëhen ndryshimet
përkatëse në Kushtetutën e Shqipërisë, siç u bënë ato para se
të bëhesh kodi i ri zgjedhor. Nuk ka asnjë mundësi tjetër o
studentë të budallallepsur, o gra ish-të përndjekura që ju ka
marrë Berisha trutë, më keq se komunizmi; o ju të Vatrës në
Amerikë që nënshkruani kërkesa budallenjsh që të shkelet
kushtetuta, e nga ku pa, nga vendi më mbrojtës i kushtetutës i
Botës, nga USA.

Apo mos jeni hafije, njerëz me dosje të sigurimit, dhe bëni budallain?

Qofshi më mirë budallenj, sesa të poshtër.

Shqipëria nuk duhet të shkelë kushtetutën. Ne jemi për një
ligj që të fshijë nga administrata ish-komunistët ofiqarë, por
duke ndryshuar kushtetutën që pastaj ky ligj të bëhet pa
shkelur kushtetutën. Popujt e fortë janë vrarë që mos të
shkelet kushtetuta: kur do të bëhemi edhe ne një popull i fortë?!

(s.g/GazetaShqiptare/BalkanWeb)

[white-knight]

Por Kryeministri i lexon ndryshe kritikat. Akuzon edhe anëtarët e Gjykatës Kushtetuese

Këshilli i Evropës ka reaguar për të dytën herë, duke kundërshtuar ligjin për "Dosjet", duke paralajmëruar qeverinë që të mos nisë "gjuetinë e shtrigave" ndaj politikanëve, gjyqtarëve dhe prokurorëve. Nga Strasburgu, Sekretari i Përgjithshëm i KE-së, Terri Davids, ka hartuar një deklaratë të ashpër, të cilën e ka shpërndarë dje paradite. Në të, ai ka shprehur qëndrimin e qartë se ligji i "Dosjeve" nuk i përmbush parametrat e kërkuara nga standardet evropiane. Në këtë deklaratë, kreu i Këshillit të Evropës thekson: "Për disa dekada, populli shqiptar vuajti nën një prej regjimeve komuniste më të ashpër dhe më mizorë në Evropë, prandaj dhe unë e kuptoj përpjekjen për të vendosur të vërtetën dhe për të dënuar ata që dhunuan të drejtat e njeriut gjatë kësaj periudhe. Por çdo përpjekje e tillë duhet të jetë në përputhje me standardet e Këshillit të Evropës për demokraci, të drejtat e njeriut dhe sundimin e ligjit. Kundrejt këtij sfondi, shpreh shqetësimin që ligji i lustracionit, i miratuar nga Parlamenti shqiptar më 22 dhjetor 2008, nuk i përmbush këto kritere".

Terri Devis thekson më tej në deklaratën e tij se qëndrimi i Këshillit të Evropës nuk është thjesht një deklaratë emocionale, por një analizë e thellë e bërë nga ekspertët e njohur evropianë. Duke detajuar defektet e ligjit, Sekretari i Përgjithshëm i Këshillit të Evropës thekson se "analiza e ligjit nga ekspertët e Këshillit të Evropës ka evidentuar disa probleme në lidhje me standardet e Këshillit të Evropës. Këto përfshijnë:

shtrirjen tepër të gjerë të ligjit, për sa i përket kategorive të zyrtarëve që mund të preken dhe faktin që ligji përfshin persona qe aktualisht janë në detyrë; paanësinë dhe proporcionalitetin e procedimeve të lustracionit; rreptësinë e sanksioneve të parashikuara dhe faktin që nuk ka një limit kohor". Por kundërshtimet e britanikut që prej kohësh drejton ekzekutivin e organizatës që merret me mbrojtjen e të drejtave të njeriut nuk mbarojnë me kaq. Duke vazhduar më tej, Devis thekson se "gjithashtu vërej disa mospërputhje të rëndësishme në lidhje me Rezolutën mbi masat për heqjen e trashëgimisë së ish-sistemeve komuniste totalitare, të miratuar nga Asambleja Parlamentare e Këshillit të Evropës në vitin 1996. Asambleja jonë ka bërë të qartë që çdo masë individuale lustracioni nuk duhet t‘i kalojë pesë vjet, që procesi i lustracionit duhet të përfundojë brenda datës 31 dhjetor 1999 dhe që lustracioni nuk duhet të aplikohet mbi kandidatët në zgjedhje. Asnjë prej këtyre udhëzimeve nuk është marrë në konsideratë nga ligji shqiptar i lustracionit. Këshilli i Evropës është i gatshëm t‘u ofrojë autoriteteve shqiptare këshillim dhe asistencë në gjetjen e mënyrave për të arritur objektivin legjitim të trajtimit të së kaluarës, në përputhje të plotë me standardet e Këshillit të Evropës".

Berisha kundër KE: Ligji i lustracionit me afat 5-vjeçar

Ligji i lustracionit vendos në vështirësi marrëdhëniet e qeverisë me Këshillin e Evropës. Kryeministri Berisha ka hedhur poshtë deklaratën e sekretarit të Përgjithshëm të KE-së, Terry Davis, duke thënë se ligji ka afat 5-vjeçar, ndryshe çka pretendohet nga Këshilli i Evropës se ai nuk ka afat. Kryeministri, megjithëse ka treguar se ka respekt për institucionin e KE-së shprehet se "nëse lexoni deklaratën e zotit Davis, në të thuhet se ligji nuk përcakton një afat, por ju si shqiptarë e dini se ky ligj ka një afat dhe ky afat është 5-vjeçar. Unë mund të pranoj se ka një kufizim të të drejtave, por nuk mund ta pranoj se nuk ka afat".

Kreu i qeverisë theksoi se ashtu si Rumania, Çekia apo vendet balltike, edhe Shqipëria ka të drejtë të ketë një ligj lustracioni. "Nuk ka ligj lustracioni pa kritika", theksoi Berisha. Pyetjes për ligjin e lustracionit, Kryeministri i është përgjigjur po me pyetje duke u shprehur se "Po c‘të drejtë paska më shumë Rumania që në vitin 2007 i dha institutit të studimeve të krimit të komunizmit atributet e një seksioni të tij dhe të prokurorisë. Ç‘të drejtë paska parlamenti çek që zgjati efektin e këtij ligji? Ç‘të drejtë paskan parlamentet e vendeve balltike?". Shefi i qeverisë ka pohuar se gjyqtarët, të cilët kanë punuar përpara viteve 1990 nuk do të mund të marrin në shqyrtim këtë ligj, në rast se kjo gjë do të kërkohet nga eksponentë të ndryshëm. Dorëheqjen e prokurorit Zamir Shtylla, kreu i qeverisë e cilësoi si akt individual që merret mbi bazën e logjikës së atij që do të përballet. "Ligji shqiptar është një ligj që nuk bën persekutime. Ligji parashikon se ata që japin dorëheqjen dhe më pas me dosjen e tyre nuk merret njeri. E gjykoj këtë pozitive", theksoi Berisha. Por zgjedhjet parlamentare përbëjnë një tjetër pikë ku partitë priten të fokusohen për zgjedhjet e kandidaturave. "Kur të vijnë zgjedhjet, ata që kanë probleme nuk do të kandidojnë, vetvetishëm nuk besoj të kandidojnë, kështu që procesi kalon në mënyrë shumë të civilizuar", thekoi Kryeministri.

Burimi

[Dajti]

..dhe shume mire e ben.
Ne e meritojme te gjithe Berishen si udheheqes.