Haradinaj, Qeveria ime zgjidh problemet

[Llapi]

15 emra të rinj
Nga Faton Ismajli më 29.12.2008 12:33 CET

Kryetari i AAK-së, Ramush Haradinaj, bëri të ditur sot emrat e pesë nënkryetarëve dhe të Kryesisë së re 37-anëtarëshe, gati një muaj pas Kuvendit Zgjedhor, të mbajtur në fillim të dhjetorit.

Përbërja që ruan balancin e partisë konfirmon për nënkryetar të parë Blerim Shalën, ndërsa katër të tjerët janë: Ahmet Isufi, Ardian Gjini, Naim Maloku dhe Bajram Kosumi.

Në këshillin drejtues të AAK-së ishin të pranishëm 65 anëtarë, prej të cilëve 60 votuan pro, 3 abstenuan ndërsa 2 vota ishin kundër. Ernest Luma dhe Jonuz Jonuzi kanë qenë kundër, kurse ka munguar Bujar Dugolli.

Ashtu siç ishte përfolur, ish-ministri i Tregtisë, Dugolli, nuk është përfshirë fare në Kryesinë e AAK-së, e cila është propozuar nga Kryetari i partisë dhe është votuar nga Këshilli Drejtues.

Përveç 15 emrave të rinj, kësaj radhe të Kryesinë e AAK`së, janë emëruar tre llapjanë në Kryesi, ndryshe nga hera e kaluar ku nuk ka pasur asnjë anëtar të kësaj ane në Kryesi.

Kryesia e AAK-së përbëhet nga: Arben Qirezi, Pal Lekaj, Avni Arifi, Gjylnaze Syla, Zylfie Hundozi, Besnik Tahiri, Ali Berisha, Jonuz Salihaj, Talat Gjinolli, Fatmire Mullhaxha, Zenun Halili, Skënder Skënderi, Sali Ibishi, Jahja Lluka, Faik Muçiqi, Ibrahim Selmanaj, Ismet Abdullahu, Skenderbe Habibi, Rasim Selmanaj, Lulzim Leci, Ethem Çeku, Ernest Luma, Sebahate Greiçevci, Zylfie Pllana, Tine Kadriu, Agim Elshani, Fetije Huruglica, Afërdita Berisha, Mejreme Mara, Vasilika Zotaj, Valon Tolaj edhe Donika Kada - Bujupi.

Kryetari i AAK-së, Ramush Haradinaj, tha se Kosova dhe Aleanca nuk kanë arritur sukseset e pritura në punën e tyre. “Aleanca nuk ka qenë e suksesshme në këtë vit. Ne i gëzohemi vendimeve të mëdha të pavarësisë së vendit dhe Kushtetutës së vendit, por këto janë rezultat i punëve të vendit edhe kur nuk ka pasur aleancë”, u shpreh ai.

Haradinaj e shfrytëzoi edhe këtë konferencë për gazetarë, të fundit për sivjet, që të drejtojë akuza ndaj Qeverisë, e cila sipas tij, po i sjell vendit humbje të përgjithshme.

Por viti që po vjen, sipas Haradinajt, është vit prove, me ç’rast AAK-së do t’i jepet mundësia, që sipas kalendarit zgjedhor, të ndryshojë këtë qeverisje.

[Llapi]

AAK’së i bie një degë
Dega e AAK’së në Drenas njëherë e përgjithmonë është shkëputur nga trungu i partisë. Mungesa e përkrahjes nga qendra është njëra ndër arsyet e shuarjes të kësaj dege. Ka gjasë që ata t’i bashkohen partisë më të fuqishme në Drenas, PDK’së.
Nga Artan Behrami më 29.12.2008 8:03 CET

Vetëm pak javë pas mbajtjes së Kuvendit Zgjedhor të Aleancës për Ardhmërinë e Kosovës, dega e kësaj partie në Drenas është shuar përgjithmonë.

Largimi i anëtarëve të degës së AAK’së në Drenas nuk ndërlidhet vetëm me zhvillimet e kësaj dite, por edhe me pakënaqësi të grumbulluar për vjet. Vendimi i degës, zyrtarisht do t’i dorëzohet të hënën qendrës së Partisë në Prishtinë.

Ahmet Isufi, nënkryetar i AAK-së, thotë për Express se deri më tash nuk ka asgjë zyrtare rreth shuarjes së degës në Drenas.

“Nuk kemi ndonjë informatë zyrtare, por do të vejmë kontakt me degën e Drenasit edhe do të shohim a është e vërtetë apo jo”, vlerëson ai.

Ndërkaq, anëtari i qendrës i AAK’së me ndikimin më të madh në degën e Drenasit, Bujar Dugolli, nuk dëshiron të flas për këtë çështje.

Në kuvendin Zgjedhor Dugolli kishte dalë i 41’ti në listën për Këshillin Drejtues.

“Nuk jam i interesuar të flas për këtë çështje”, thotë Dugolli.

Megjithëkëtë, Shemsi Elezi, ish nënkryetar i degës së AAK’së në Drenas tregon se Dugolli ishte në dijeni për vendimin e degës në Drenas.

Sipas Elezit, Dugolli iu kishte sugjeruar atyre që mos të marrin një vendim të tillë. Elezi thotë për Express se shuarja e degës së AAK’së në Drenas nuk lidhet me mungesën e përkrahjes së Bujar Dugollin brenda AAK’së.

“Nuk ndërlidhjet ajo me Bujarin, por drejtpërdrejt me pakënaqësitë që janë në degë. Bujari nuk ka qenë i pajtimit për të bërë këto. Nuk na ka ardhur mirë që Bujari ka marr aq pak vota në Kuvend”, shton Elezi.

Mungesa e përkrahjes nga qendra e partisë, sipas tij, ka qenë shkaku kryesor i shuarjes së kësaj dege. Ai tregon se Këshilli i Drejtues i AAK’së nuk ka asnjë një delegat nga Drenasi.

“Në Kuvend asnjë anëtar nuk e kemi, as në Këshill Drejtues, përveç Bujarit edhe ai është delegat i Prishtinës - Dardanisë”, thotë Elezi.

Ai po ashtu është edhe i pakënaqur me kryetarin e AAK’së dhe pjesëtarë tjerë të qendrës. “Në asnjë takim nuk kanë qenë në gjendje me ardhë në Drenas. Nuk jemi trajtuar të barabartë”, thekson Elezi.

Pas shuarjes, Elezi dhe anëtarë të tjerë të degës së AAK-së në Drenas ende nuk kanë menduar se si do të vazhdojnë veprimtarinë e tyre politike. Megjithëkëtë, ai nuk përjashton mundësinë që ata t’i bashkohen ndonjë partie tjetër.

Partia Demokratike e Kosovës e cila çdo zgjedhje i fiton me rekord përqindje mund të jetë njëri nga opsionet e ish degës së AAK-së.

“Pa marr parasysh cila parti do të na afrojë më shumë, po ndoshta do të qëndrojmë deri në zgjedhjet e ardhshme. Aty nuk ka konkrete asgjë. Dorëheqja është lidhur me pakënaqësitë tona”, shton Elezi.