Ministri i jashtëm italian Franko Frattini: Kryeministri Berisha i mbajti premtimet e dhëna Europës
Kryeministri Berisha mirëpriti sot në një takim Ministrin e jashtëm italian Franko Fratini. Të dy personalitetet vlerësuan marrëdhëniet e shkëlqyera që ekzistojnë midis Shqipërisë dhe Italisë, si dhe mundësitë gjithnjë në rritje të bashkëpunimit në fusha me interes të përbashkët.
Ministri i Jashtëm italian Frattini u shpreh se Kryeministri Berisha i ka mbajtur tashmë premtimet e dhëna Evropës, duke garantuar në këtë mënyrë ecjen me sukses të Shqipërisë drejt integrimit në BE dhe anëtarësimit të plotë në NATO.
Duke pohuar se rruga drejt BE-së varet nga reformat dhe rezultatet që Shqipëria do të arrijë, Ministri Frattini siguroi se në këtë rrugë Shqipëria do të ketë gjithmonë mbështetjen e Italisë.
Nga ana e tij, Kryeministri Berisha i shprehu zotit Fratini dhe nëpërmjet tij qeverisë italiane dhe popullit mik italian mirënjohjen më të thellë për bujarinë, solidaritetin dhe ndihmën e jashtëzakonshme që i japin Shqipërisë, në ndërtimin e demokracisë, ekonomisë së tregut dhe përparimit në proceset integruese.
Në fushën e bashkëpunimit ekonomik, Kryeministri garantoi se qeveria shqiptare nuk do të reshtë përpjekjet për ta bërë Shqipërinë vendin me mundësitë më të mira për tërheqjen e investimeve të huaja, duke rritur kështu interesin e investitorëve italianë për të shtuar investimet në vendin tonë.
Në përfundim të takimit, Kryeministri Berisha dhe Ministri i Jashtëm italian Fratini bënë këto komente për mediat:
Kryeministri Berisha: Sapo përfunduam një takim shumë të përzemërt me mikun tim të shquar dhe të kombit shqiptar, Ministrin e Jashtëm të Republikës Italiane zotin Franko Fratini. Takimi ishte një rast i shkëlqyer për mua për ti shprehur zotit Fratini, qeverisë italiane dhe popullit mik italian, mirënjohjen time më të thellë dhe të shqiptarëve, për bujarinë, solidaritetin, ndihmën e jashtëzakonshme që i japin Shqipërisë, në ndërtimin e demokracisë, ekonomisë së tregut dhe integrimin në institucionet evropiane dhe euroatlantike.
Shqiptarët kanë patur dhe kanë tek Ministri i Jashtëm Fratini një avokat të shkëlqyer, të përpjekjeve të tyre për integrim evropian dhe atlantik. Në memorien e tyre janë të freskëta mesazhet e mëdha që zoti Fratini solli si nënpresident i Komisionit Evropian, kontributin e tij, respektin dhe dashurinë ndaj shqiptarëve, gjatë periudhës që drejtonte Ministrinë e Jashtme, si dhe gjatë detyrave të tjera të rëndësishme në qeverinë italiane.
Ne sot bëmë një shqyrtim të hollësishëm të marrëdhënieve dhe të bashkëpunimit midis dy vendeve. Ajo çka më jep kënaqësi mua sot është se mikut tim Franko Fratini unë i paraqes bilancin e një Shqipërie tjetër. Do ta filloj me një demonstrim të përpjekjeve tona për pasaportat biometrike dhe kartat e identitetit. E bëj këtë sepse Ministri i Jashtëm Fratini, si një mik i Shqipërisë dhe shqiptarëve solli këtu disa muaj më parë mesazhin e hapjes së negociatave për liberalizmin e vizave.
I premtova zotit Fratini se Shqipëria do të bëjë të gjitha përpjekjet për të patur dokumentet më të shkëlqyera të identitetit, kontrollin më të mirë të kufijve, për përmbushjen e të gjitha detyrimeve që rrjedhin për liberalizmin e vizave.
Me ministrin e jashtëm Fratini ne diskutuam gjerësisht për bashkëpunimin ekonomik dhe të të gjitha fushave midis dy vendeve. Tre vjet më parë unë kam vizituar Romën dhe jam takuar me Kryeministrin Berluskoni. Instituti për Tregtinë e Jashtme të Italisë më krijoi një takim të shkëlqyer me biznesin italian. Dua të tregoj këtu se në këtë takim unë shkova, ashtu siç shprehet dhe Edgar Allan Poe shpirtndezur dhe zemërthyer. Shpirtndezur sepse dëshira ime ishte që të tërhiqja interesin e investitorëve italianë për vendin tim. Zemërthyer, sepse isha i vetëdijshëm që qindra dhe mijëra prej tyre ishin larguar nga vendi im. Unë u zotova para tyre që qeveria ime do të bëjë çdo përpjekje që ta bëjë Shqipërinë një vend sa më tërheqës për investimet tuaja.
Zoti Ministër, një vit më parë së bashku me ambasadorin D’elia ne kemi vizituar një sipërmarrje italiane në Shkodër. Presidenti i saj Cottonela na u shpreh të dyve duke na thënë: Zoti kryeministër, në rast se ju do të realizoni këtë reformë fiskale që keni shpallur, ju krijoni në Shqipëri një parajsë të vërtetë për investitorët.
Unë kam zbatuar pikë për pikë atë që kisha shpallur. Shqipëria nuk është parajsë sepse parajsa është hyjnore, por unë i garantoj investitorët italianë se do të vendos në këtë vend praktikat më të mira për investimet e tyre.
Me Ministrin e Jashtëm Frattini diskutuam për korridorin 8, një vepër madhore që do të transformojë jugun e Ballkanit. Vendet tona presin me kënaqësi të shohin Italianë, lokomotivë, të këtij projekti të madh.
Gjatë këtij takimi kemi diskutuar për projektin e ardhshëm të kooperacionit , i cili do të fillojë së shpejti, sepse qeveria italiane do ti akordojë Shqipërisë një ndihmë të konsiderueshme në kuadrin e këtij kooperacioni. Ne këtë kuadër, ne sigurisht që do të përcaktojmë përparësitë, por unë iu shpreha ministrit të jashtëm se një përparësi madhore për ne përbën bujqësia. Në Itali ky është një nga sektorët më të zhvilluar në botë. Fermerët tanë kanë nevojë jetike për një ndihmë të madhe që të përgatiten për të përballuar procesin e integrimit në BE. Ne ramë dakord për të gjitha gjërat që diskutuam.
Edhe njëherë falënderoj me shumë mirënjohje zotin Ministër për të gjithë ndihmën, ndjenjat miqësore dhe kjo vizitë mund të them se është një kontribut tjetër madhor në marrëdhëniet e shkëlqyera midis dy vendeve tona.
Ministri i Jashtëm italian Franko Frattini. E falënderoj zotin kryeministër për fjalët e tij dhe deshiroj ti shpreh ndjenjat e miqësisë sime personale ndaj personit të tij, por edhe ndjenjat e miqësisë që udhëheqin qeverinë italiane dhe popullin italian, në marrëdhëniet midis dy vendeve tona. Italia do të vazhdojë të mbështesë me bindje dhe me një energji akoma dhe më të madhe rrugën e integrimit Euro-Atlantik të Shqipërisë.
Kryeministri Berisha i mbajti premtimet e dhëna Evropës. Dhe kjo i hap rrugën arritjes së atyre rezultateve që do të jenë të prekshme, të dukshme për të gjithë qytetarët shqiptarë.
Duke filluar me një regjim të liberalizuar të vizave, tani me prodhimin dhe më pas me shpërndarjen e pasaportave biometrike, do të jetë një proces që i afrohet përfundimit dhe plotësimit të tij.
Vitin e ardhshëm, Shqipëria do të bëhet anëtare me të drejta të plota të NATO-s dhe kjo hap me siguri një perspektivë të re, për stabilizimin dhe sigurinë e tërë rajonit.
Natyrisht, rruga drejt BE-së varet nga reformat dhe rezultatet që Shqipëria do të dijë të arrijë, por është një rrugë ku Shqipëria do të ketë gjithmonë mbështetjen e Italisë.
Në planin dypalësh të gjitha marrëdhëniet tona janë të shkëlqyera, në të gjitha fushat dhe sigurisht rezultatet që Shqipëria do të arrijë, do të inkurajojnë edhe më tej, një numër gjithmonë në rritje, të sipërmarrësve italianë, të cilët do të investojnë në Shqipëri. Marrëveshjet e rëndësishme që ne firmosëm sot janë një provë e kësaj.
I shpreha kryeministrit që jemi të gatshëm të fillojmë për përcaktimin e një marrëveshje të re kuadër për bashkëpunimin për zhvillim midis Italisë dhe Shqipërisë. Është një marrëveshje për të cilën ne po punojmë, në të cilën do të bëjnë pjesë sektorë të tjerë shumë të rëndësishëm, siç është ai i bujqësisë. E konsiderojmë bashkëpunimin në sektorin e infrastrukturës një prioritet dhe Korridorin tetë një prioritet akoma dhe më të madh.
Sigurisht kemi një interes të madh për mundësitë që Shqipëria na ofron për prodhimin e energjisë elektrike për të cilën Italia ka shumë nevojë. Mendojmë se një bashkëpunim më i ngushtë edhe në sektorin e turizmit do të ishte një mundësi e mëtejshme për investitorët italianë që të mund të vlerësojnë dhe te shfrytëzojnë këto mundësi për investimet e tyre në Shqipëri.
Në përfundim do të thoja se është një marrëdhënie speciale midis vendit tim dhe vendit tuaj, një marrëdhënie speciale që natyrisht do të pasurohet më tej në të ardhmen.
27/10/2008
Faqja zyrtare e Kryeministrise
Përgjigju Duke Cituar
Postuar më parë nga goldian
Krijoni Kontakt