Vargu biblik i ditës

[simonpjetri]

Mësimi mbi lutjen

(Mt 6; 5‑15)

“Kur të luteni, mos bëni si shtiracakët, të cilëve u pëlqen të luten në këmbë në sinagoga dhe në sheshe të rrugëve, që t’i shohin njerëzit. Përnjëmend po ju them: u ndanë veç me atë shpërblim! Ndërsa ti, kur të lutesh, hyr në dhomën tënde, mbylle pas vetes derën e lutju Atit tënd që është në fshehtësi; e Ati yt që sheh në fshehtësi, do të të shpërblejë.

E kur të luteni, mos e teproni me fjalë të kota porsi paganët: ata mendojnë se do t’u plotësohet lutja nëse thonë shumë fjalë. Mos bëni si ata, sepse Ati juaj e di mirë se për çka keni nevojë para se t’i luteni.

Prandaj lutuni kështu:

Ati ynë që je në qiell,

u shenjtëroftë Emri yt!

Ardhtë Mbretëria jote!

U bëftë vullneti yt

si në qiell ashtu në tokë!

Bukën tonë të përditshmen na e jep sot!

Na i fal fajet tona, si i falim ne fajtorët tanë!

E mos na lër të biem në tundim, por na shpëto nga i Keqi!

Vërtet, në qoftë se ju ua falni njerëzve gabimet e tyre, edhe Ati juaj qiellor do t’jua falë juve; por, nëse ju nuk ua falni njerëzve gabimet e tyre, as Ati juaj qiellor nuk do t’jua falë juve gabimet tuaja.”

[toni77_toni]

"Dua mëshirën e jo flinë"

Në atë kohë ‑ një të shtunë ‑ Jezusi kaloi nëpër të mbjella. Nxënësit e tij të uritur, filluan të këpusin kallinj e të hanë. Kur i panë farisenjtë, i thanë:

“Ja, nxënësit e tu po bëjnë çka s’është e lejueshme të bëhet të shtunën!”

Jezusi u përgjigj:

“Vallë a nuk keni lexuar ç’bëri Davidi kur u urit ai dhe shoqëruesit e tij? Si hyri në Shtëpinë e Hyjit dhe i hëngrën bukët e kushtuara, që nuk ishte e lejueshme t’i hante as ai as shoqëruesit e tij, por vetëm priftërinjtë? Apo nuk keni lexuar në Ligj se priftërinjtë e prishin të shtunën në Tempull në ditë të shtuna e nuk bëjnë mëkat? E unë po ju them: është këtu diç më e madhe se Tempulli! Ta kishit kuptuar se ç’do të thotë fjala: ‘Dua mëshirën e jo flinë’, nuk i kishit dënuar këta njerëz që s’po bëjnë faj. Biri i njeriut është me të vërtetë i zoti i të shtunës!” (Mt 12; 1-8)

www.bibla.net

[toni77_toni]

"Do t’i njihni prej fryteve të tyre"


“Ruajuni prej profetëve të rrejshëm, që vijnë tek ju e ju shtiren si dele, kurse përbrenda janë ujq grabitqarë. Do t’i njihni prej fryteve të tyre. A thua vilet rrushi prej ferrave ose fiqtë prej murrizave? (Mt 7, 15-16)


www.bibla.net

[toni77_toni]

"..ua mbyllni njerëzve derën e Mbretërisë së qiellit!.."


Vaj për ju, skribë e farisenj, shtiracakë, sepse ua mbyllni njerëzve derën e Mbretërisë së qiellit! Ju vetë nuk hyni as nuk i lini të hyjnë ata që duan të hyjn! (Mt 23; 13)


www.bibla.net

[toni77_toni]

"..shtiracakë, që kërkoni det e tokë për të fituar një proselit e, kur kthehet, e bëni bir të ferrit.."

Vaj për ju, skribë e farisenj, shtiracakë, që kërkoni det e tokë për të fituar një proselit e, kur kthehet, e bëni bir të ferrit dy herë më të keq se veten!

Vaj për ju, udhëheqës të verbër, që thoni: ‘Nëse ndokush betohet me Tempull, ai betim s’detyron, por, nëse betohet me arin e Tempullit, atëherë e detyron betimi.’

Të marrë e të verbër! Po cili është më i madh: ari apo Tempulli, që e shenjtëron arin?

Ju thoni edhe: ‘Kush betohet me lter s’detyron ai betim, porse, kush betohet me dhuratën që është mbi lter, atëherë e detyron betimi!’ Të verbër! Po çka është më e madhe: dhurata apo lteri që e shenjtëron dhuratën?

Tashti kush betohet me lter, betohet me të dhe me krejt çka ka në të! Kush betohet me Tempull, betohet me të dhe me Atë që banon në të. Kush betohet me Qiell, betohet me fronin e Hyjit dhe me Atë që rri në të. (Mt 23; 15-22)



www.bibla.net

[toni77_toni]

"Udhëheqës të verbër! Ju shtrydhni mushkonjën e kapërdini gamilen!"


Vaj për ju, skribë e farisenj, shtiracakë, që lani të dhjetën e mendrës, të murajës e të kimit, por lini pas dore atë që është më e rëndësishme në Ligj: drejtësinë, mëshirën e besnikërinë! Këtë është dashur ta bëni e nga ajo e para, s’është dashur të hiqni dorë. Udhëheqës të verbër! Ju shtrydhni mushkonjën e kapërdini gamilen! (Mt 23; 23-24)



www.bibla.net

[toni77_toni]

"Farise i verbër! Pastroje më parë brendinë e gotës, që edhe përjashta të jetë e pastër!"

Vaj për ju, skribë e farisenj, shtiracakë, sepse pastroni anën e jashtme të gotës e të enës, ndërsa përbrenda janë plot rrëmbime e papërkormëri! Farise i verbër! Pastroje më parë brendinë e gotës, që edhe përjashta të jetë e pastër! (Mt 23; 25-26)


www.bibla.net

[toni77_toni]

"..Kështu edhe ju përjashta njerëzve u dukeni të drejtë.."

Vaj për ju, skribë e farisenj, shtiracakë, që u përngjani varrezave të zbardhuara me gëlqere, që duken përjashta të bukura e përbrenda janë plot eshtra të vdekurish me gjithfarë ndyrësie. Kështu edhe ju përjashta njerëzve u dukeni të drejtë, kurse përbrenda jeni krejt hipokrizi e padrejtësi. (Mt 23; 27-28)

"Ju dini të paraqiteni para njerëzve të drejtë, porse Hyji i njeh zemrat tuaja!" (Lk 16, 15)

www.bibla.net

[toni77_toni]

"..zbatoni gjithçka t’ju thonë, por mos bëni si bëjnë ata.."


Atëherë Jezusi i tha turmës dhe nxënësve të vet:

“Në katedrën e Moisiut ndenjën skribët e farisenjtë. Pra, ju duhet t’i dëgjoni e të zbatoni gjithçka t’ju thonë, por mos bëni si bëjnë ata. Ata nuk veprojnë siç thonë. Ata lidhin barrë të rënda që mezi mund të barten dhe ua ngarkojnë njerëzve në krahë, kurse vetë as me gisht nuk i luajnë. (Mt 23; 1-4)


www.bibla.net

[toni77_toni]

"..S’ka gjë të mbuluar që nuk do të zbulohet.."


“Ruajuni prej tharmit të farisenjve d. m. th. hipokrizisë! S’ka gjë të mbuluar që nuk do të zbulohet, as të fshehur që nuk do të merret vesh". (Lk 11, 1)


www.bibla.net