Leter e hapur drejtuar Ali Ahmetit!!!

[pacifist]

Leter e hapur drejtuar Ali Ahmetit!!!

I nderuari z.Ali Ahmeti nëse edhe për një çast pyesni veten përse kjo letër është e drejtuar deri tek ju, përgjigjen do ta gjeni në brendinë e saj.

Në këto momente të vështira, jo vetëm për mua por për një masë më të gjerë në këtë vend, kur nocioni “vlerë” ka humbur kuptimin dhe është shndërruar në antivlerë, kur ajo që quhet të menduarit ndryshe, dënohet, nënçmohet dhe mundohet të shuhet pa mos zgjedhur masat dhe mënyrat, jam i detyruar që në formë të letrës së hapur të shpreh indinjatën time, dëshpërimin të cilin edhe kur endeshim në burgjet e idrizoves nuk e shijonim, e qe tani, 20 vite pas asaj ere komuniste, arrihet ne formën më perfide, jo nga ata komunist, por nga ana e atyre pas te cilëve u lidhëm dhe sakrifikuam edhe atë më të shtrenjtën.

Qëllimi i informimit të opinionit më të gjerë nuk është në asnjë mënyrë realizimi i ndonjë të drejte individuale, por një të drejte kolektive, një të drejte që duhet ta gëzojnë me siguri një numër i madh i mësuesve të cilët edhe pse janë më tepër se një dekadë në procesin arsimor mbeten peng i dëshirave të drejtorëve që Ju dhe hierarkia Juaj keni vendosur në këto pozita.

Ju drejtohem për këtë në opinion pasi desha të trokas në ndërgjegjen e Juaj, disa shokëve të mi dhe shokëve tuaj, nëse ka mbetur ndërgjegje tek Ju dhe hierarkia Juaj që keni në Gostivar, Vrapçisht dhe gjetiu nëpër qytete tjera, me shpresë që vepra të këtilla të shëmtuara të kësaj natyre mos përsëriten. Nuk Ju drejtohem Juve rastësisht, Ju jeni përgjegjësi direkt apo indirekt me katrahurat që bëjnë të emëruarit e Juaj duke u tallur me dinjitetin e familjeve, familje që dhanë një kontribut të çmueshëm në historikun e lëvizjeve të ndryshme për avancimin e pozitës politike-ekonomike dhe kombëtare shqiptare në këtë trevë.

Nëse Ju dhe hierarkia Juaj mendoni se me pushimet nga puna arrini aspiratat dhe avancimin e pozitës shqiptare e keni gabim. Duke larguar nga puna anëtare të familjeve të ushtarëve apo të ish-burgosurve politik...kjo kategori njerëzish dëmtohet ngjashëm si dikur kur pikësynim i shërbimeve të ndryshme antishqiptare ishte që me çdo kusht të dëmtonin dhe të asgjësonin këtë kategori njerëzish, dallimi qëndron vetëm në atë se në ditët e sotme këta njerëz dashakëqij thirren ne emrin Tuaj!

Nëse një grup i njerëzve janë të kënaqur me arritjet, unë dhe me siguri një numër i madh shohim pak më ndryshe. Pse kërkuam ndryshe nga që kërkonte pushteti para 20 vitesh atëherë me paralelet e përziera në arsim ashtu kemi kërkuar një pozitë më të avancuar edhe më vonë.

Për veprën e bërë më 1988 në Gostivar dikush kërkoi varjen tonë, bënë burgosjen tonë, largim nga puna dhe çka jo tjetër...dhe Ju shkruanit në atë kohë për rezistencën e të rinjve Gostivaras në diasporë dhe sot po të njëjtit duhet të ndeshen me diferencim, margjinalizim, pushim nga puna apo nuk e di çka tjetër edhe pas kaq vitesh... E ARRITUR!?

Keni për obligim dhe përgjegjësi për njerëzit që dhanë kontribut qoftë në aradhet e krijuara më 2001 qoftë edhe më herët, të ndërmerrni masat për mbrojtjen e kësaj kategorie të njerëzve ashtu siç merren të tjerët e të cilët me ligj janë duke i garantuar të drejtat e tyre familjare,ekonomike, shëndetësore, arsimore, financiare, etj. Nëse nuk mund te ndihmoni këtë kategori njerëzish, atëherë mos i ngucni, mos i margjinalizoni, mos prekeni aty ku shqiptari nuk e ka zakon te preket në dinjitet dhe nderin familjar. Përgjegjësitë që keni Ju, shtrojnë para jush shumë kërkesa. Duhet pasur kujdes se cilin afirmoni dhe në asnjë mënyrë mos lejoni të dëmtoni, së paku leni të qetë njerëzit që në asnjë çast nuk hezituan për të qenë në ballë të proceseve dhe dhanë mundin dhe kontributin.

Afirmoni njerëzit që deri dje nuk dinin për çështje kombëtare as nuk lodhnin trurin dhe mendjen, ndërsa dëmtoni ato të cilët mjaft mirë i dëmtoi pushteti gjatë tërë kohës. Tani duhet që drejtorët tuaj, me urdhër apo amanet të dikujt, të pushojë nga puna bashkëshorten time pas 13 vjet përvojë pune në procesin arsimor. Vallë nuk mjaftuan dënimet e atyre kundër kujt bashkë luftuam?

Dëmtoni ata të cilët që në momentet e para përkrahin çdo iniciativë kombëtare, duke konsideruar edhe atë Tuajën më 2001.

Personalisht kam mbrojtur këtë kategori njerëzish, ish të burgosurit, kur ata sulmoheshin nga të tjerë, si ish kryetar i degës së Shoqatës së të përndjekurve dhe të burgosurve politik në Gostivar. Kam qenë gjithë kohës krah i shokëve të mi ushtarë. Të drejtën dhe lirinë kam kërkuar në të gjitha format po edhe në këtë rast do të bëj të njëjtën. Le të brejnë ndërgjegjen ata që dëmtojnë.

Unë mbetem krenar me atë që kam bërë dhe kontributin e dhënë, dhe ç’është me e rëndësishmja, asnjëherë në dëm të dikujt tjetër. Nuk e di si ndjeheni Ju i nderuari Ali Ahmeti !?

KOHA, 27.09.2008

Dashmir Osmani, ishkryetar
i degës së Shoqatës
së të përndjekurve dhe të
burgosurve politik në Gostivar
dhe ish ushtar i UÇK-së