Shpirt Shqiptari

Për plot një javë tashmë, gjithë vëmendja e botës u përqëndrua në Izrael e Palestinë. Ngjarjet makabre që ndodhën në Izrael kanë shokuar gjithë botën. Ekranet e televizioneve janë mbushur me to. Faqet e gazetave shkruajnë për to. Interneti është përmbytur me video dhe materiale propagandistike. Izraeli bën thirrje për mobilizim ushtarak dhe spastrimin e njerëzve të Hamasit nga Rripi i Gazes. Bota islame bën thirrje për xhihad dhe mbështetje të vëllezërve të tyre palestinezë. Dhe secili prej nesh përballet me presionin e të dy palëve: ti cilën anë mban, të Izraelit apo Palestinës? Sipas tyre, rrugë të mesme nuk ka. Të gjithë po përgatiten për luftë.



Jisu Krishti: "Lum ata që përpiqen për paqen, se ata do të quhen bij të Perëndisë!"

Lumërimi më lart, i dalë nga goja e Jisu Krishtit dhe e gjejmë të cituar tek Ungjilli sipas Mateut 5:9, është një lumërim shumë i madh. A ka majë mali apo qielli më të lartë ku mund të ngjitet shpirti i njeriut, se sa të bëhet bij apo bijë e Perëndisë? Ky është edhe dallimi i madh mes Krishtërimit dhe gjithë besimeve të tjera fetare të njerëzimit. Në besimet e tjera, besimtarët janë "shërbëtore" dhe "robër" të Zotit, nuk janë bij e bija të Tij. Vëtem i krishteri i lutet Perëndisë ashtu si na mësoi Vetë Jisu Krishti: "Ati ynë që jë në qiej..." Jo Zoti ynë që je në qiej. Por Ati ynë që je në qiej. Kjo tregon dashurinë e madhe të Perëndisë për njeriun! Kjo tregon edhe nderin dhe lavdinë e madhe që Perëndia rezervon për krijesën e Vetë të dashurisë, njeriun! As engjëjt në qiell nuk e gëzojnë këtë nderim e lavdi që Perëndia i ka rezervuar njeriut!

Në lumërimin më lart mësojmë edhe se çfarë i dallon bijtë e Perëndisë: Paqja! Paqja ka një burim, dhe ky burim është zemra e njeriut, vendtakimi i Perëndisë me krijesën e Vetë. Ata të krishterë që e mbajnë flakën e zjarrit të zemrës së tyre ndezur me lutjet e tyre, tek ta mbretëron gjithmonë paqja. Jo paqja njerëzore që është jetëshkurtër dhe e gënjeshtërt. Por paqja hyjnore, paqja që vjen nga lart, paqja e Zotit, Hiri i Shenjtë i Perëndisë që ndriçon jo vetëm zemrën e mendjen por gjithë shpirtin e njeriut. Kjo është ajo që e quajmë paqja e brendshme e njeriut. Kjo është siguria e të krishterit. Pavarësisht se sa e çmendur është bota rreth nesh, pavarësisht se sa të mëdha janë kërcënimet dhe persekutimet e princit të botës për ne, ne prapë nuk tutemi. Perëndia është me ne! Perëndia është në zemrat tona!

Lufta është ajo që dallon bijtë e djallit

Në 11 shtator 2001 avionët goditën kullat binjake në New York, SHBA. Ata që i kryen këto akte thanë se ishin "terroristë islamikë". Mijëra njerëz humbën jetën atë ditë. Një popull i tërë u shokua dhe revoltua. Çfarë ndodhi më pas?

Luftë në Afganistan.
Luftë në Irak.
Luftë në Siri.
Luftë në Libi.
Luftë në Jemen.
Luftë në Kurdistan.
Luftë në Ukrainë.
Luftë në Palestinë.

Miliona jetë njerëzish të humbura nga këto luftra. Qindra miliona refugjatë që u shpërngulën nga vatrat e konfliktit, pa shtëpi e katandi, në mëshirën e ndihmave humanitare të botës. Dy gjëra të bien në sy:

1. Stafeta e luftës ka vazhduar pa ndërprerje për mbi 20 vjet.
2. Çuditërisht, lufta ka prekur vetëm popujt myslimanë të Lindjes së Mesme, popuj fqinj të Izraelit.

Nëse Bijtë e Perëndisë i dallon paqja, bijtë e djallit i dallon lufta!

Të gjithë ata që ndjellin luftë, bëjnë luftë, përfitojnë nga lufta, të gjithë janë të mallkuar nga Perëndia! Mallkimi i Zotit është ndëshkimi më i rëndë, pasi nuk prek vetëm jetën tuaj mbi tokë, prek jetën tuaj në përjetësi. Dhe të gjithë ata njerëz që zgjedhin luftën si zgjidhje për planet e tyre, janë duke dëshmuar se nuk zgjedhin të jenë bij Perëndie por bij të princit të errësirës, satanait.

Vullneti i lirë i njeriut: Mos zgjidhni Izraelin e Palestinën, zgjidhni Perëndinë!

Në ditët, javët e muajt në vazhdim, do ta gjeni veten nën presionin e atyreve që u hanë brirët e duan të bëjnë luftë. Lufta për ta është një larje hesapesh të vjetra. Mbaj anën time, jo anën e tyre. O je me ne ose je kundër nesh! Harrojnë të mjerrët që vullneti i njerëzve të djallëzuar nuk mund ti imponohet dot Vullnetit të Perëndisë! Kujdes në zgjedhjet që bëni, pasi nuk jeni duke zgjedhur thjeshtë mes Izraelit e Palestinës, judenjve e muslimanëve, semitëve dhe arabëve. Jeni duke zgjedhur mes luftës dhe paqes. Jeni duke zgjedhur të jeni bij të djallit apo bij të Perëndisë! Dhe kjo zgjedhja juaj që ju do të bëni me vullnetin tuaj të lirë, nuk do të ndryshojë asgjë në fatin e botës, por do të rrëndojë ose lehtësojë shpirtin tuaj në përjetësi!

Lutjuni Zotit për paqe!
Lutja është ajo që e mban flakën e zemrës ndezur!
Perëndia troket e viziton vetëm zemrat e ngrohta e të ndriçuara!