Shpirt Shqiptari

Një miku im, që i pëlqen shakatë, më kontaktoi me një kërkesë të çuditshme para një viti.

- Dua të më bësh një nder e të më gjesh pak adresën e zyrës apo shtëpisë së Vladimir Putinit të Rusisë.

- Seriozisht e ke apo tallesh? Përse të duhet adresa e Putinit?



- Dua ti nis një kartolinë nga ana ime dhe familjes sime.

- Tani më bëre vërtet kurioz. Çfarë do ti shkruash në kartolinë?

- Do ti them vetëm kaq: "Faleminderit presidenti Putin që na e vrave covid-19! Familja XXXX"

- Putin vrau covid-19?



- Po ore, e vrau brenda ditës! Këta tanët në Amerikë kishin 2 vjet e nuk e vrisnin dot!

Unë fillova të qesh kurse ai për çudi nuk qeshi aspak, ishte vërtet shumë serioz.

- Pse qesh, kjo nuk është aspak për të qeshur. Qindra mijëra e miliona njerëz vdiqën nga covid-19.

- Po qesh me shakanë tënde.

- Jo për kokën e vajzës e kam shumë seriozisht. Nuk e kam me të tallur. Ti mbase nuk e vure re por unë e vura re. Sapo filloi lufta në Ukrainë, covid-19 vdiq! Nuk e dëgjoj më CNN të më thotë se sa amerikanë kanë vdekur nga virusi. Nuk e dëgjoj më as presidentin e Amerikës që të më thotë se duhet të vaksinohem me detyrim. Maskat ikën, mandatet ikën, jeta u kthye në normalitet.

Në atë moment e kuptova që ai po bënte një konstatim shumë të drejtë, që mua më kish shpëtuar nga vëmendja.

- Ka mundësi të ma gjesh atë adresën tani?

- Po, patjetër. Interneti për atë punë është.