Shpirt Shqiptari

E mbani mend Ali Babanë dhe 40 hajdutët? Nuk keni pse ta kërkoni e gjeni në faqet e librave dhe pluhurin e historisë. Hajdeni në Tiranë të takoheni me mishërimin e Ali Babait, piktorin rilindas, Kryeministrin e Shqipërisë, Edi Rama. Kryeministri ynë e theu heshtjen e tij para shqiptarëve në lidhje me kërkesën e prokurorëve të SPAK për arrestin e Arben Ahmetaj. Njeriut që mediat e quajnë: zv. kryeministër i qeverisë Rama, ministër i qeverisë Rama, ministri më jetëgjatë i qeverisë Rama, krahu i djathtë i Edi Ramës në qeveri, deputet socialist. Doli kryeministri ynë para shqiptarëve dhe na tha se sa punë të madhe ka bërë ai në këto 10 vjet për të krijuar "reformën në drejtësi". A e shikoni o shqiptarë se sa i fortë është Edi Rama? Ai me kartonat e deputetëve të tij në parlament po i jep leje SPAK që ta arrestojë Arben Ahmetaj. Shqiptarët e dëgjuan e qeshën me të. Arben Ahmetaj na i iku drejtësisë. Rrota e drejtësisë së Ramës nuk ia kapi dot bishtin para se të largohej nga vendi pa pengesën më të vogël orë para se SPAK të shpinte kërkesën e vetë në parlament.



Në mendjen e tij piktori rilindas po krijon shtet modern. Asnjë nga paraardhësit e tij nuk i ka futur ministrat e vetë në burg në këto 30 vjet! Për këtë, duhet ti heqim kapelen Edi Ramës. Pasi lista e ministrave dhe miqve të tij që kanë përfunduar në burg në këto 10 vjet po rritet nga dita në ditë. Pyes veten pa të keq: A është kjo vallë një meritë e drejtësisë së Edi Ramës, apo një tregues i shkallës së korrupsionit brenda qeverisë së tij?! Mos i jepni përgjigje kësaj pyetjeje, pasi nuk duam që të dilni në përfundimin e gabuar e të na nxirrni piktorin rilindas një njeri të korruptuar ordiner.

Nuk janë vetëm shqiptarët që qeshin e tallin me shakaxhiun e madh Edi Rama që kërkon të qëndrojë në pushtet duke i bërë shqiptarët për të qeshur. Gjithë ambasadorët e huaj në Tiranë dhe eprorët e tyre në vendet përkatëse që ndjekin zhvillimet politike në Shqipëri, qeshin me piktorin rilindas të shqiptarëve. Nuk jam fort i sigurt nëse qeshin me Ramën apo me ata që ia dhanë votën Ramës, por kjo pak rëndësi ka. Doni të mësoni arsyen përse qeshin me shakatë e rradhës së Ramës?

Në çdo vend të botës së qytetëruar, nëse kryeministrit të një vendi drejtësia do ti fuste një ministër në burg, ai kryeministër do të jepte dorëheqjen pasi përgjegjësia nuk është personale e ministrit, përgjegjësia është e drejtuesit të qeverisë. Kryeministri ynë është me origjinë nga malet e Transilvanisë dhe e ka lëkurën pak më të trashë se bota e qytetëruar dhe nuk i kupton këto gjëra aq shpejt sa duhet. Në mendjen e tij, detyra e tij është të argëtojë shqiptarët nëpër ekranet e televizioneve, rrjetet sociale dhe me podcastin e tij të famshëm. Po pse, ai duhet të mbajë përgjegjësi pse gjysma e ministrave të tij kanë përfunduar në burg apo janë nën hetim nga prokuroria?!

Dikush duhet ta uli me qetësi piktorin rilindas në kolltukun e Kryeministrisë e t'ia shpjegojë shkurt e qartë:

- Kur të fusin bashkëpuntorin tënd më të ngushtë në qeveri në këto 10 vjet në burg, minimumi që duhet të bësh është të japësh dorëheqjen si kryeministër i atij vendi. Le të themi se je i pafajshëm dhe gjithë fajin e kanë ministrat e korruptuar që ti punësove në qeverinë tënde. Prapë, përgjegjësia është jotja pasi u tregon shqiptarëve që ti je njeri i paaftë për të qeverisur atë vend. Ministrat e tu po vjedhin e bëjnë korrupsion qindra miliona euro nën hundën tënde. Le të themi se je i fajshëm dhe ti ke vjedhur fondet e qeverisë shqiptare së bashku me ministrat e tu. Qëndrimi yt në krye të qeverisë edhe pas këtij skandali kaq të madh vetëm sa u dëshmon shqiptarëve që ti ke frikë nga drejtësia shqiptare dhe vazhdon të qëndrosh në krye të qeverisë vetëm për tu fshehur pas imunitetit të ligjit.

Dalja jote para publikut shqiptar pa dhënë dorëheqjen vetëm sa vulosi përfshirjen tuaj në këtë aferë korruptive dhe përpjekjen për tu fshehur pas imunitetit ligjor dhe politik. Në mendjen tuaj ti kujton se ua mbushe mendjen shqiptarëve dhe ia hodhe edhe kësaj rradhe. Teksa ti u flisje nga Tirana shqiptarëve, kancelaritë diplomatike të vendeve mike po bëjnë atë pyetjen tjetër:

- Rama u dogj. Kush vjen pas Edi Ramës?

Një ministre e veshur bukur e qeverisë Rama ishte fotografuar në Uashington këto ditë.