1 korrik, rrogëtarët 10 % tatim

[Zemrushja]

ERALD KAPRI

Zbardhet “Taksa e Sheshtë” duke i hapur rrugën uljes së Tatimit mbi të Ardhurat

Kryeministri Berisha u shpreh se kalimi në këtë taksë do krijojë problem, por do të mbyllte informalitetin

Kryeministri Sali Berisha ka zbardhur dje personalisht skemën e barazimit të taksave, e cila do të nisë më 1 korrik me Tatimin mbi të Ardhurat Personale, duke e çuar në nivelin e 10 përqindëshit. Kjo do të thotë që pas 1 korrikut të këtij viti, çdo rrogëtar në shtet apo privat, me pagë të ulët apo të lartë, do të paguajë 10 për qind të pagës në shtet. Ky nivel takse do të krijojë një problem financiar dhe moral për rrogëtarët, por do të krijonte mundësinë e uljes së formalitetit. Ky ka qenë edhe shqetësimi i Kryeministri, i cili u shpreh se në bashkëpunim me biznesin do të bëhet e mundur ulja e informalitetit, gjë që do të çonte në rritjen e mirëqenies së shqiptarëve. Në takimin e djeshëm me Bashkimin e Dhomave të Tregtisë, Kryeministri Berisha premtoi se Tatimin mbi të Ardhurat Personale, do të ulet më 1 korrik të këtij viti, duke i hapur rrugën uljes së mëtejshme vitin e ardhshëm të disa taksave të tjera. “Duhet të dalim nga kjo situatë pasi informaliteti është armiku më i egër. Garancia e integrimit do të jetë vendosja e ligjit”,- tha Berisha para biznesmenëve.

Tatimi mbi të Ardhurat

Tatimi mbi të Ardhurat Personale është futur në skemën e Taksës së Sheshtë, por që do të pësojë ulje e para. Aktualisht është një skemë, e cila ka tatim të diferencuar. Pagat minimale paguajnë 1 për qind tatim, pagat e mesme paguajnë nga 5 deri në 15 për qind, ndërsa pagat e larta paguajnë 20 për qind tatim mbi pagën e tyre. Mbas një korrikut, çdo rrogëtar do të paguajë njësoj këtë taksë pavarësisht sa fiton. 10 përqindëshi i pagës do të kalojë në shtet. Kjo taksë regresive, sipas Kryeministrit, do të krijojë mundësinë e formalizmit të ekonomisë, duke bërë që pavarësisht se në momentin e parë do të krijonte vështirësi, formalizmi i tregut do të bënte që pagat të rriten më tej.

Taksa e Sheshtë

Taksa e sheshtë do të prekë disa taksa, të cilat do të shkojnë në nivelin e 10 përqindëshit. Tashmë është lënë që ulja e taksave të ndjeshme të bëhet në fillimin e vitit 2008 dhe në mesin e po këtij viti. Në1 janar 2008 do të ketë edhe një ulje prej 10 për qind të taksës së koorporatave ose siç quhet ndryshe Tatimi mbi Fitimin, siç ishte programuar në fillim. Njëkohësisht Kontributi i Sigurimeve ka për tu ulur përsëri duke e çuar në 10 për qind edhe këtë taksë që e paguajnë sipërmarrësit për punonjësit e tyre. Në vitin 2006, kontributi u ul me 30 për qind, por mbas një viti kjo taksë do të ulet ndjeshëm në raport me nivelin aktual. Reagimi i FMN-së duket se ndikoi drejtpërdrejtë në rishikimin e uljes së taksave për këtë vit. Pavarësisht këtij reagimi, Tatimin mbi të Ardhurat Personale duket se tashmë do të jetë 10 për qind në Paketën Fiskale të mesvitit.

Taksa e Sheshtë

Tatimi mbi Fitimin

1 janar 2008 pritet ulja në 10 % nga 20 aktualisht

Tatimi mbi të Ardhurat Personale

1 korrik 2007, ky tatim i diferencuar do kalojë 10 %

Kontributi i Sigurimeve

1 janar 2008 pritet të shkojë 10 %

[Gerrard]

Tatim-taksat, letër bizneseve për pagën minimale


Duke hasur në kundërshtitë e biznesit prodhues për rritjen e pagës minimale për sektorë të ndryshëm, tatimorët janë munduar të zbusin tonet. Para disa ditësh, Drejtoria e Përgjithshme e Tatimeve ka dërguar një kërkesë pranë subjekteve private ku kërkon propozimet e tyre përsa i përket Vendimit 42 të qeverisë për kategorizimin e pagave sipas sektorëve për kategoritë e caktuara në ligj. Brenda pak ditësh, sipas kërkesës së Drejtorisë së Përgjithshme të Tatimeve, të gjitha subjektet do të paraqesin propozimet e tyre në lidhje me Vendimin 42, që parashikon rritjen e pagës minimale të punonjësve të sektorit privat për efekt të llogaritjes së kontributeve të sigurimeve shoqërore. Sipas Vendimit 42 të qeverisë në nivelin e punonjësve të kualifikuar, ku paga minimale nuk do të jetë më pak se 23,600 lekë, janë përfshirë pozicione të tilla si: brigadier, teknik prodhimi, kontrollor cilësie dhe normist. Ndërkohë që paga minimale për nivelet drejtuese është e ndryshme në varësi të sektorëve. Në personelin drejtues dhe teknik janë përfshirë administratori, ekonomisti, inxhinieri i modelimeve dhe inxhinieri teknolog. Ndërsa në Ministrinë e Financave është ngritur grupi i punës, që po rishikon kategorizimin e pagave në biznese të caktuara.