Qindra studentët kanë hedhur sot vezë në drejtim të Ministrisë së Arsimit duke protestuar në këtë mënyrë kundër vendimeve të kësaj ministrie për Universitetin. Protestat janë organizuar nga drejtuesit e Parlamentit Studentor, ndërsa edhe sot në shumicën e fakulteteve të UP-së nuk është mbajtur mësimi. Protestuesit sot kanë kërkuar dorëheqjen e ministrin Agim Veliu dhe kanë paralajmëruar protesta të dhunshme nëse nuk merren parasysh kërkesat e tyre. Ministri Agim Veliu nga ana tjetër ka thënë se nuk e ka ndërmend të jap dorëheqje ndërsa kërkesat e studentëve i ka quajtur kërkesa politike. Ai ka thënë se subjektet politike opozitare kanë tendenca për ta zhvendosur luftën politike në Universitetin e Prishtinës. Këto pohime nuk janë komentuar nga opozita.
Me pankarta kundër ministrisë së Arsimit, studentët kanë marshuar nga Fakulteti Filologjik deri tek ndërtesa e Qeverisë, ku organizatorët e protestës kanë dorëzuar disa kërkesa në mesin e të cilave ishte edhe kërkesa për dorëheqjen e ministrit Agim Veliu. Kërkesat janë lexuar para studentëve protestues nga kryetari i Parlamentit Studentor, Elbasan Hoti. Studentët me vonë janë ndaluar para ndërtesës së ministrisë së Arsimit duke hedhur vezë dhe duke brohoritur kundër ministrit Veliu. Kryetari i Parlamentit Studentorë ka paralajmëruar protesta të dhunshme nëse kërkesat e tyre nuk realizohen. Por ministri i Arsimit, Agim Veliu tha menjëherë pas përfundimit të protestës se nuk do të ketë kurrfarë kompromisi me organizatorët e protestave. Sipas ministrit Veliu protesta e sotëm ku merrnin pjesë edhe disa profesorë të Universitetit që janë anëtarë të disa subjekteve politike, ka dëshmuar se subjektet politike opozitare po bëjnë përpjekje që luftën politike ta zhvendosin në Universitetin e Prishtinës. Nën anën tjetër deputeti i Partisë Demokratike të Kosovës, Enver Hoxhaj tha se nuk merret me deklaratat e ministrit.”Nuk duam të politizojmë më ministrin Veliu, pasi të gjitha çështjet për Universitetit do ti themi të premten në seancën e Kuvendit “ i ka thënë Radio Kosovës Enver Hoxhaj.Sidoqoftë sot gjatë ditës në Universitetin e Prishtinës mësimi sërish nuk është zhvilluar në mbi gjysmën e fakulteteve. Drejtuesit e parlamentit Studentor kanë bërë thirrje që bllokimi i procesit mësimor të vazhdojë edhe gjatë ditëve në vijim. Ndërkohe disa organizata studentore siç janë Organizata e Re studentore dhe Asociacioni i Shkencave Politike iu kanë bërë thirrje studentëve që ti kthehen procesit mësimor sepse sipas vlerësimeve të tyre çdo orë e humbur do të thotë humbje për studentët. Ndryshe gjendja në Universitetin e Prishtinës do të diskutohet në seancën e jashtëzakonshme të Kuvendit që është thirrur për të premten.
RTK 09/05/2006 16:36:35
Krijoni Kontakt