Bicikleta

[diikush]

....a mund te krahasohet nje bicikletist elegant me nje barkderr mafioz qe del nga benzi e duke shkundur valixhet e dhjamosura hyn ne klubi a ministri....

me kishte zene malli per vendlindjen....

[Brari]

Sa thoni ju kushton afersisht nje biciklet garash nga keto llojet e viteve te fundit qe perdorin ciklistet ..psh nga ato ne Tur de Franc apo xhiro d 'italia..?



ore sa pak amator biciklete paska ketu?

[Undefined]

edhe mua me pelqen bicikleta pasi me kushtoi shume te rrexuara edhe nxirje neper kembe apo te gervishtura kur e kam mesuar, me duket kam qene 10 vjece lol, kokedere une doja ta mesoja vetem, me kujtohet desh me ka shtypur makina pasi me pelqente ta mesoja ne rruge, pasi ishte e drejte ahaha, sorry kujtimet e atehereshme.
Ndersa ketu kam nje biciklete, dal mbasditeve kur kam kohe te lire. I like it

[Undefined]

ah po harrova te flisja per estetiken shenjat qe jam vrare atehere me kane kaluar pa merak. Eshte estetike pasi nuk ke nevoje te besh vrap lol, edhe ndihesh bukur ne kuptimin self-esteme, dmth komode ne aparence.
Do t'jua recomandoja
...

[FЯODO]

looooool .....ca teme
Qe ta dini ju kalamoja, une e ngisja bicikleten nga shpia ne pune per 4 vjet rresht 6 muaj ne vit
I have very good calves
E beja jo si detyrim por nga deshira, sa here me kapte shiu ne mes te autostrades.
Oh, harrova te them me kryesoren, gjatesia e rruges me kapte 40 minuta vajtje e 40 minuta ardhje

[GinaKoukla]

hera e fundit qe kam hypur ne biciklet ka qen kur kam qen 14 vjec

[mitjuk]

pershendetje

edhe ketu ku jetoj larg ATDHEUT tim kam biciklete

e preferoj (hahahahhaha)

[sirena_adria]

Çfarë ndodh pasi ngasim biçikletë për një orë?

Çiklizmi është një nga format e preferuara të rekreacionit, por ngadalë po bëhet mjeti kryesor i transportit.

Ndër të tjera, përmirëson shëndetin mendor, ndërton muskujt, zvogëlon rrezikun e sëmundjes së zemrës, ka një efekt pozitiv në tru, siguron gjumë më të mirë, forcon sistemin imunitar dhe shumë më tepër.

Ndërsa udhëtoni me biçikletë, ju jeni më pak të përqendruar në djegien e kalorive, lodhje dhe djersitje, dhe numri i kalorive të djegura rritet pa u përqendruar shumë. Ta themi thjesht, krijon një ndjenjë të mirëqenies që nuk është e pranishme në shumicën e formave të ushtrimit.

Një orë biçikletë në ditë është një mënyrë e shkëlqyeshme për të inkurajuar humbjen e peshës. Një person prej 80 kilogramësh do të djegë rreth 650 kalori gjatë një ore ngasje me një intensitet të moderuar.

Këto nuk janë të gjitha përfitimet e një udhëtimi një orë me biçikletë.

Shkencëtarët kanë zbuluar se ngasja e një biçiklete përmirëson gjendjen shpirtërore. Kur një person është i qetë dhe ndihet mirë, ka shumë më pak të ngjarë të ndiejë nevojën për të ngrënë shumë me ëmbëlsira dhe ushqime jo të shëndetshme.

Një orë vozitje në ditë do të ndihmojë gjithashtu në ndërtimin e muskujve, dhe rritja e masës muskulore krijon një formë të hollë dhe trupore.

Përveç kësaj, muskujt djegin më shumë kalori sesa dhjamin, edhe kur jeni ulur. Kjo do të thotë që edhe pas atyre orëve të biçikletës, trupi juaj do të djegë më shumë kalori se zakonisht.

Një orë në ditë në biçikletë do të jetë e mjaftueshme për të përmirësuar sistemin tuaj imunitar dhe për të luftuar më mirë infeksionet.


Bota Sot

https://www.botasot.info/mediale-vip...rst=1630679636

[sirena_adria]

Kush e shpiku biçikletën e parë ?

Biçikletat janë mjete jashtëzakonisht praktike. Duke iu falënderuar biçikletave mundemi që vetëm me fuqinë e muskujve tonë të udhëtojmë larg dhe qetë. Ilustrimin më të vjetër të njohur për udhëtimin mbi dy rrota e gjejmë në dritaren në kishën e “Stoke Poges”, në qarkun anglez të Buckinghamshire-it.


Kjo skenë vjen nga viti 1642 dhe tregon një burrë mbi një biçikletë të thjeshtë. Shënime të tjera të atij mjeti nuk kishte. Prodhimi i parë i biçikletës ka filluar në vitin 1790,transmeton gazeta Kosova Sot.

Më e suksesshmja ndër biçikletat e para ishte “Célérifere” (mjeti me dy rrota nga viti 1790 i cili lëvizte duke e shtyrë me këmbë nga toka ), kurse më vonë është quajtur “Velocifero” (rreth viti 1800, ajo drejtohej vetëm me këmbë pa i lëshuar në tokë). Mjeti i tillë prej druri, i quajtur “kalë prej druri”, ishte bërë në vitin 1791 në Francë, nga konti i Sivraca-s. Udhëtari thjesht hipte mbi atë dhe fillonte “të ecë”.

Megjithatë, ajo biçikletë e thjesht duhej ndalur në çdo hap për shkak se nuk kishte asnjë mekanizëm të kontrollit. Prandaj, biçikleta e parë ishte përdorur kryesisht vetëm për argëtim. Biçikleta e parë me boshtin e pasmë lëvizës u shfaq në vitin 1817. Shpikësi i saj, baroni Von Drais De Sauerbrun e quajti “Draisienn”.

Korniza e biçikletës ishte bërë nga druri me dy rrota të mëdha dhe zinxhirë nga hekuri. Ky dizajn shpejt u bë i popullarizuar në shumë vende, duke përfshirë edhe Anglinë, ku fitoi emërtimin, “hobby horse” (kali i drurit për fëmijë). Pavarësisht popullaritetit të saj, rreth vitit 1830, “Draisienne” doli jashtë modës, duke ndalur prodhimin e saj.

Progres i madh është arritur vitin 1838, kur një farkëtar skocez me emrin, Kirkpatrick Macmillan, shpiku biçikletën e parë me pedale. Pedalet janë shkelur me këmbë dhe kanë futur në lëvizje levën në rrotën e pasme. Në vitin 1861, Pierre dhe Ernest Michaux, në Paris prezantuan triçiklen e tyre.

Ajo kishte pedale që direkt fuste në lëvizje rrotën e pasme. Në vitet gjashtëdhjeta u prezantuan fellnet me tela dhe rrotat nga goma. Në këtë mënyrë, u rrit shpejtësia e biçikletës, kurse si pjesë e pajisjes ishin inkorporuar frenat.


Kosova Sot

https://www.kosova-sot.info/ok-kids/331186//

[sirena_adria]

Bicikleta e parë në Shqipëri nga Konsulli Suedez në Shkodër

Nga Skender Temali , shkrimtar - Qershor 2017


Marubi, 1897 Shkodër

Mbase jo të gjithë ju që po lexoni këtë shkrim e dini se në Europë jeton një qytet që lëviz mbi dy rrota: është Shkodra, një qytet verior në Shqipëri. Shumë i lashtë, sa daton XXV shekuj më parë. Ka qenë kryeqytet i mbretërisë ilire, por që kur lindi e u zhvillua, unë do të thosha, edhe kryeqytet i mrekullive natyrore: ka fusha, kodra e male, ka tre lumenj Drini, Buna e Kiri që i qëndrojnë si brerore. Kështjella me gurë ciklopik e që sundon tërë relievin, që nga bregdeti Adriatik e deri në Alpe, ka në “themel” një legjendë impresionuese të nënës që muroset në mënyrë që të mos shembet kurrë! Mbase këto burime natyrore patën shtuar në rrjedhë të shekujve edhe lakmitë e pushtuesve.

Por ne në këtë shkrim nuk do të merremi me aspektin historik e gjeografik, por dhe të asnjë fushe tjetër gjurmëlënëse; do u paraqesim një dukuri të rrallë, mbase dhe në Ballkan, pasi Shkodra është një qytet që lëviz mbi dy rrota. E kuptueshme tani për lexuesin, një qytet që lëviz mbi biçikletë, edhe falë faktit se ku ai popullohet është i sheshtë, 12 km i gjatë dhe rreth 6 km i gjerë, e kështu mjaft praktik për pedalim, aq sa jo pak kronistë, shkrimtarë e gazetarë e kanë quajtur atë “Qyteti i biçikletave”, një model i transportit ekologjik, sidomos tani kur mbi qytete nuk enden retë që sjellin shi, por retë e smogut që të asfiksojnë.

E ka kaluar shekullin që kur në Shkodër u pa të lëvizte rrugëve të saj, sa me kalldrëm e sa gjithë pluhur, një i huaj me një mjet që s’e kishte parë asnjë vendali i padalë jashtë shtetit. Kalendari fiksonte vitin 1907. Ai qe konsulli i nderit i Suedisë, ndaj edhe kush e dëgjoi, u dynd andej nga rruga kryesore ku ai lëvizte që ta shihte me sy atë mjet që ecte mbi dy rrota pa u tërhequr nga kafshët. Me kaq, kurioziteti u shua, po s’u shua lakmia për ta pasur një mjet të tillë udhëtimi dhe kush qe më i kamur e më i dalë jashtë Shqipërisë, nuk ngurroi të sillte biçikleta të markave të ndryshme, më së shumti italiane.

Por në kuadrin historik na duhet të përmendim edhe një foto të dy burrave me biçikleta, të nxjerrë nga fototeka “Marubi” e vitit 1897, me veshje kombëtare shqiptare, por që nuk janë të evidentuar se kush janë për t’i dhënë më vërtetësi kohore asaj. Fillimisht biçikleta në qytetin tonë u quajt “Velisipet”, por edhe dyrrotullake.

Shkodra, ky qytet që besonte në tri fe: myslimane, katolike dhe ortodokse, Shkodra – kjo pioniere e thuajse të gjitha fushave të artit e të kulturës në Shqipëri, pati edhe anën tjetër të medaljes: gruaja qe e mënjanuar nga jeta e shoqërisë, fanatizmi bënte punën e tij, ndaj dhe një ditë, si pas një kushtrimi, qytetarët u dyndën sërish nga rruga kryesore ku po kalonte… një grua mbi biçikletë. Dhe ajo nuk qe shqiptare, por një grua e konsullatës austriake. Edhe pse biçikleta nuk kishte fituar “qytetarinë” e plotë, ajo po kuptohej sikur ishte krijuar enkas për këtë qytet, aq sa policia vendore që në vitin 1915 u pajis e nisi të pedalojë me biçikleta.

Me shtimin e numrit të biçikletave, një grup qytetarësh shkodranë vendosën të krijojnë sportin e çiklizmit që në vitin 1920. Rrethi i parë çiklistik, që është edhe i treti në Europë për nga vjetërsia, pas Francës e Italisë, është organizuar pikërisht në qytetin tim. Ndaj dhe në vazhdimësi Shkodra ia ka dhënë tonin këtij sporti, aq sa jo vetëm të rriturit, por nuk ka fëmijë që të mos dijë të ngasë biçikletën.

Duke pasur parasysh se deri në dekadat e para të shekullit XX shtëpitë shkodrane ishin një dhe dykatëshe e rrallë trekatëshe, se shumica prej tyre kishin oborre e haure, mundësia e mbajtjes dhe e lënies së biçikletave ishte e jashtëzakonshme. Ato erdhën nga viti në vit duke u shtuar, por si gjithnjë, deri në çlirimin e Shqipërisë nga nazifashistët më 29 nëntor 1944, biçikleta qe privilegj i burrave e djemve. U arrit deri atje sa të kishte dhe një “konkurrencë” se kush të kishte biçikletën më të bukur.

Zhvillimi i Shkodrës, krijimi i një zone industriale jashtë vijës së verdhë të qytetit, e bëri biçikletën një mjet pune të domosdoshëm, jo vetëm për burrat, por edhe për vajzat e për gratë, aq sa, në aneksin e stadiumit të qytetit e në fusha të periferisë shihje vazhdimisht me dhjetëra femra duke mësuar pedalimin në biçikletë.

Qe një kohë kur qarkullimi nga shtëpia në qendrën e punës nuk përballohej dot nga 2-3 autobusë urbanë, kur askush, veç pushtetarëve të lartë vendorë e qendrorë, nuk kishte mundësi të udhëtonin me vetura, biçikleta qe zgjidhja e vetme, edhe pse kërkesat në rritje nuk plotësoheshin dot nga importimi i tyre (fillimisht nga vendet e Lindjes e më pas nga Kina). Me biçikleta dilnin në punë mjekët e mësuesit, mjeshtrit e çirakët, inxhinierët e artistët, nëpunësit e ushtarakët, etj.

Nga fundi i viteve ’50 të shekullit të kaluar, kur Shkodra kishte kund rreth 60 000 banorë, ka të dhëna të plota se në qytet numëroheshin mbi 10 000 biçikleta. Ishte koha kur edhe biçikletat regjistroheshin dhe çdo qytetar, ndaj një pagese simbolike merrte një llamarinë me fushë të bardhë sa një celular mesatar ku kishte të stampuar numrin, që ishte i detyruar ta vendoste nën shalën e biçikletës. Pat njerëz të fiksuar pas numrave, aq sa në Shkodër dihej se violinisti Kolë Vjerdha kishte gjithnjë numrin 1, se Nazmi Mandia e Kel Temali qenë ndër të parët që pedalonin mbi biçikleta, se ai që e mbante “Bianchi-n” e tij edhe pse e përdorte prej disa vitesh si të kishte dalë atë ditë nga fabrika, se Faik Quku, instrumentist i njohur i ahengut shkodran, se Fadil Kruja e Ragip Curri qenë ndër të parët që futën në Shkodër biçikletën dyshe, se Mark Mirashi, sapo mori diplomën si kirurg bleu një “Mifa” e me të doli në pension, etj. Shkodra kishte më shumë se çdo qytet tjetër shqiptar reparte e dyqane të riparimit të biçikletave, pasi nevoja për to, edhe në kushtet kur jo të gjitha rrugët qenë të asfaltuara, qe e madhe. Janë të njohur në Shkodër mjeshtrit biçiklistë, si Qazim Damnori, vëllezërit Kallugjeri, Sadetin Ulqinaku, Enver Kosova e shumë të tjerë.

Një dekadë më pas, ndërmarrja e re e punimeve artistike, me afro 3 000 punëtore, kishte në sheshin para zyrave e reparteve çdo ditë mbi 1 000 biçikleta, ku vajzat e gratë shkodrane shkonin e dilnin nga puna.

Pas përmbysjes së sistemit të kaluar, në vitin 1991 e deri më sot nuk mund të themi se është e njëjta statistikë, edhe pse qyteti për nga ana demografike ka shënuar rritje të ndjeshme. Kjo për arsye se zona industriale që numëronte dhjetëra mijëra punëtorë u asfiksua dhe shumë ndërmarrje u mbyllën. E nëse deri dje qyteti ecte plotësisht mbi dy rrota, sot ai ndoshta në të njëjtat raporte ecën mbi katër rrota, mbi makina të markave të ndryshme, aq sa sidomos në rrugët kryesore veç në mesnatë mund të gjesh vend për parkim. Por gjithsesi, Shkodrës askush nga qytetet shqiptare nuk ka mundur t’ia heqë nga koka kurorën e kampiones së biçikletave. Sërish me mijëra të tilla qarkullojnë arterieve të tij. Autori i këtij shkrimi, aq i dashuruar pas zhvillimit e së resë, nuk ka bërë “kompromis” e as ka provuar të marrë patentën e makinës, pasi siç them sot me humor, “nuk kam ndërmend ta ndërroj “Benz”-in tim, që është një biçikletë e markës gjermane, as me “Benz”-in e vitit 2013!”.

Të impresionon fakti që Jozef Zualleart, një njohës nga më të azhurnuarit e pedalimit me biçikleta në Europë, në një studim të vitit 2011 e dallon Shkodrën si qytet rekord në Shqipëri, madje në Europën Juglindore dhe atë Qendrore, me një përqindjeje të lartë pedalimi prej 29%. Ajo renditet mes qyteteve europiane të njohura për kulturën e lartë pedaluese, të tilla si: Bolzano, Ferrara, Fraiburg, qytetet e Vendeve të Ulëta dhe Vendeve Skandinave.

Krijimi në Shkodër i një organizate jofitimprurëse, e quajtur ‘GO2’ [shko me 2 këmbë dhe mbi 2 rrota] me fokus lëvizjen urbane të qëndrueshme, ndër të parat në llojin e vet në Shqipëri dhe mbështetja që ajo ka gjetur nga pushtetarët vendorë e banorët, flasin se pedalimi me biçikleta do të fitojë terren e do të vijë duke e pasuruar përvojën e saj të hershme me elementë bashkëkohorë.

Lëvizja e Shkodrës mbi dy rrota ka inspiruar edhe poetin Mehmet Gucia, lëvruesi i parë dhe më i suksesshmi i hajkut japonez në këtë qytet. Ai ka në dorëshkrim një vëllim me 100 hajke, kushtuar biçikletës në Shkodër. E për të shuar kureshtjen e lexuesve të këtij shkrimi, po sjellim dy hajke, njëra prej të cilave i kushtohet poetit më modern të shekullit të kaluar, Migjeni, i cili sa qe mësues në Vrakë, rrugën nga Shkodra në këtë fshat e kthim disa kilometra e bënte përditë me biçikletë: Përballë murlanit/Nuk ndalet biçikleta./Është Migjeni dhe: Shoh nga Rozafa/ Udhën nga valon Buna: Lumë biçikletash! Sot përditë e më shumë pranë institucioneve e ndërmarrjeve, ndanë pazareve, stadiumeve e fushave të sportit sheh jo me dhjetëra, por edhe me qindra biçikleta të parkuara; në ditët pa shi, me biçikleta, plot familje apo grupe shoqërore bëjnë ekskursione deri në Shirokë e Zues e tek Ura e Mesit, disa kilometra larg qendrës së qytetit. Dashuria për pedalimin mbi biçikletë u rrënjoset fëmijëve që të vegjël, aq sa kush është familjar, para biçikletës do të ketë edhe një kosh ku vë fëmijët e moshës 2-5 vjeç dhe me të shëtit rrugë më rrugë.

Sot në Shkodër ka disa markete ku shiten biçikleta të tipeve të ndryshme, por edhe pjesë këmbimi për to, ka një lëvizje sociale për të shtuar numrin e përdoruesve të biçikletave, aq sa u arrit deri atje sa të tërhiqej vëmendja e opinionit e në prefekturën e Shkodrës të organizohej simpoziumi i parë ndërkombëtar mbi lëvizjen e qëndrueshme, më tetor 2012. Por kjo lëvizje merr përmasë e kuptim të ri, kur që nga kryetari i bashkisë e deri tek presidenti i një firme, që nga deputeti e drejtori i gjimnazit, që nga nëpunësi e ushtaraku të shkojnë në zyrë me biçikletë, jo sa për të dalë në një foto.

Pse jo, në një shesh kryesor, biçikletës t’i ngremë një monument, pasi ajo ka qenë bashkudhëtare e jetës që prej një shekulli e këndej e të mos mjaftohemi me vendosjen e një skeleti të saj në një rrethrrotullim të qytetit.


https://www.voal.ch/bicikleta-e-pare...media/dossier/

[sirena_adria]

"Biçikleta është shpikja më e nënvlerësuar e njerëzimit"

Përgatiti: Nuhi Shala - KALLXO


“Biçikleta është shpikja më e nënvlerësuar e njerëzimit”, kështu thotë Jody Rosen në librin e tij “Two Wheels Good”.

Në vitin 1896, një nga gazetat më me ndikim të Joseph Pulitzer, World, raportoi një histori klasike për një shtëpi të shkatërruar. “Henry Cleating dhe gruaja e tij dikur jetonin të lumtur së bashku … por tani ata kanë shkuar në gjykatë për proces divorci”, transmeton gazeta, “dhe gjithçka për shkak të biçikletës së saj dhe të brendshmeve të kuqe.” Cleating ishte i mërzitur sepse gruaja e tij “po bënte shëtitje të gjata me biçikletë dhe i kishte lënë pas dore detyrat e saj shtëpiake”. Përfundimisht, pasi ajo u kthye nga një shëtitje veçanërisht e gjatë, i shoqi “mori një sëpatë dhe, pas dhimbjes së padurueshme në prapanicën e saj, e përplasi biçikletën në goma të këputura dhe tuba të shkatërruar”, duke i dhënë fund martesës. Të brendshmet e kuqe “do t’i shërbejnë si ekspozita në padinë e divorcit”.Ky fragment vjen nga një koleksion fragmentesh nga fundi i shekullit të 19-të dhe fillimi i shekullit të 20-të, të mbledhura nga Jody Rosen, një gazetar me bazë në Nju Jork, për librin e tij të ri për biçikletën. Ai premton ta zbulojë “historinë dhe misterin” e formës më të njohur të transportit të njohur ndonjëherë për njerëzimin, përveç dy këmbëve të veta. Sepse kjo është ajo që është biçikleta. Më shumë bicikleta prodhohen çdo vit vetëm në Kinë se sa automobila në mbarë botën. Në nivel global, pothuajse gjysma e familjeve zotërojnë një biçikletë, shumë më tepër se një makinë. Siç argumenton z. Rosen, “qytetet dhe qytezat që ne jetojmë, ekonomitë tona, ligjet tona janë të dizajnuara për makina; ne kalojmë përmes kontinenteve me aeroplanë. Megjithatë ne jetojmë në një planet me biçikleta.”

Megjithatë, megjithëse çdo student biznesi e di se si Henry Ford e solli automobilizmin tek masat dhe se si ai zhvillim pastaj e ndryshoi krejt shoqërinë, shumë më pak njerëz e kuptojnë se sa transformuese ka qenë biçikleta. Në fund të epokës viktoriane, për shembull, ajo u jepte mundësine grave të reja të jetonin vetëm, duke e lejuar një epokë të çlirimit seksual shumë përpara shpikjes së pilulës kontraceptive.
Siç tregon zoti Rosen, edhe biçikletat e transformuan luftën. Gjatë luftës së Boerwve, skautët afrikanë filluan përdorimin e tyre në sulmet goditëse kundër britanikëve; 70 vjet më vonë, Viet Kongwt u mbështetën tek ato për t’i lëvizur furnizimet nëpër xhungël dhe për ta mposhtur Amerikën. Në sheshin Tiananmen në vitin 1989, protestuesit mbanin parulla me biçikleta. Si përgjigje, qeveria komuniste kineze shtypi qindra rrota nën shinat e tankeve. Menjëherë pas kësaj Kina e ndërroi politikën e saj në katër rrota në raport me dy sosh.Motoristët në rrugë që nxjerrin tym mund të mos e kuptojnë këtë, por edhe ata ua detyrojnë mjetet e preferuara të udhëtimit çiklistëve. Rrotat e gomës të fryra me ajër u shpikën fillimisht për t’u përdorur nga biçikletat, jo nga veturat. Vetura e parë e Ford-it u quajt “katërçikletë” dhe ishte Liga e Çiklistëve Amerikanë (League of American Wheelmen) që bëri përkjekje për rrjetin e parë mbarëkombëtar të rrugëve në vendin e tyre. Libri i z. Rosen shtrihet në të gjithë këtë histori, si dhe në tema më të veçanta, si mbreti i çiklizmit i Nepalit, fetishistët e pornografisë me biçikletë të Portland, Oregon dhe Danny MacAskill, një çiklist skocez marifet gjenial.Lexuesit që shpresojnë për një argument të qëndrueshëm se pse biçikleta meriton një reputacion më të lavdishëm mund të mbeten pak të pakënaqur. Dashuria për transportin me dy rrota përshkon çdo fjali në libër, por struktura e saj shpesh shpërndahet në mënyrë frustruese dhe elementët më emocionues nënvlerësohen. Në veçanti, z. Rosen mund të kishte thënë shumë më tepër për shpikësit dhe popullarizuesit e çiklizmit, dhe ndikimin e inovacionit të tyre në botë, dhe disi më pak për biçikletat dhe seksin.

Ndërkohë armiqësia e jo-çiklistëve ndaj mekanizmit – i ndjeri P.J. O’Rourke e quajti vetë ekzistencën e biçikletës “një ofendim për arsyen dhe mençurinë” – është paraqitur, por është lënë i paeksploruar dhe i pashpjeguar. Gjithsesi, kushdo që lëviz kryesisht me dy rrota, në kundërshtim me automjetet gjithnjë e më të mëdha, gjithnjë e më të shumta me motor në rrugë, do ta ketë kënaqësinë ta shijojë këtë udhëtim argëtues.


/ The Economist / Kallxo.com

https://kallxo.com/ndryshe/bicikleta...-e-njerezimit/

[sirena_adria]

Holanda, vendi me 17 milionë banorë dhe 23 milionë biçikleta

Holanda me një popullsi prej 17 milionë banorë ka 23 milionë biçikleta, mesatarisht 1,3 biçikleta për person në mbarë botën dhe për këtë njihet si “vendi i biçikletave”.

Asambleja e Përgjithshme e Kombeve të Bashkuar (OKB) për të inkurajuar përdorimin biçikletave, mjetet e transportit miqësor me mjedisin dhe të shëndetshme, në vitin 2018 e shpalli 3 Qershorin si Dita Botërore e Biçikletës.

Në këtë ditë inkurajohet organizimi i aktiviteteve ndërkombëtare dhe vendore që do të mbështesin zhvillimin e kulturës së çiklizmit në shoqëri.

Sipas të dhënave të njoftuara nga Unioni i Çiklistëve të Holandës, vendi posedon 2,3 për qind të 1 miliard biçikletave që gjenden në mbarë botën ndërsa kjo korrespondon mesatarisht me 1,3 biçikletë për person.

Holandën e ndjek Danimarka me 0,8 për qind, Japonia me 0,6 për qind, Belgjika me 0,5 për qind, Kina me 0,4 për qind dhe SHBA-ja me 0,3 për qind.

– Holandë

Biçikleta, një pjesë e ditës së përditshme në Holandë, përdoret nga të gjithë duke filluar nga 7 deri në 70-vjeç.

Holanda me popullsi prej 17 milionë banorësh përbën 0,2 për qind të popullsisë në botë ndërsa vendi numëron 23 milionë biçikleta

Biçikleta më së shumti në këtë vend përdoret për të shkuar në punë ose për dërgimin e fëmijëve në shkollë. Gjithashtu preferohet edhe për argëtim pa marrë parasysh motin. Në kuadër të kësaj, biçikleta 22 për qind përdoret për punë, 18 për qind për në shkollë, 14 për qind për të bërë pazar. Gjithashtu 31 për qind biçikleta përdoret për argëtim dhe 16 për qind për qëllime të tjera.

Në Holandë ku biçikleta është një mënyrë jetese, çdo vit shiten rreth 1 milion biçikleta të reja. Gjysma e këtyre përbëhet nga biçikletat me asistencë elektrike, e cila falë baterisë në të, siguron energji shtesë për përdoruesin kur pedalon.

Pjesa dërrmuese e popullatës, e cila njihet me biçikletën që në moshë fëmijërie, përdor biçikletë të dorës së dytë.

Në vendin ku është aktiv aplikacioni i biçikletave të përbashkët, ka afërsisht 22 mijë biçikleta në më shumë se 300 pika të ndryshme. Këto biçikleta mund të huazohen me një sasi të caktuar të parave ndërsa pasi të përdoren lihen në vendin ku janë marrë.

Në Holandë ku ka 37 mijë kilometra shtigje biçikletash që i afrohen gjerësisë së perimetrit të botës, me biçikletë udhëtohet mesatarisht 888 kilometra për person në vit dhe afërsisht 15 miliardë kilometra në vit në të gjithë vendin.

Biçikleta, e cila preferohet sepse është e dobishme për shëndetin dhe parandalon ngecjen në trafik, veçanërisht në qytetet e mëdha, është mjet transporti i përdorur gjerësisht për shkak se është më ekonomike.

Nëse 10 punëtorë përdorin biçikletat e tyre në vend të automjeteve tre ditë në javë dhe shkojnë në punë me biçikletë në një drejtim për 20 minuta, kjo i kursen punëdhënësit 18.654 euro në vit për sa i përket fitnesit, produktivitetit dhe shmangies së mungesave.

Hapësirat përreth stacioneve të trenit përdoren si vende parkimi për biçikleta ndërsa në Utrech i cili njihet si qendra e të gjithë stacioneve ndodhet parku më i madh në botë me kapacitet prej 12.500 biçikletash.

Gratë preferojnë 80 për qind më shumë biçikletën sesa meshkujt. Gratë biçikletën e përdorin 180 milionë herë në vit ndërsa meshkujt 100 milionë herë.

Në Holandë në vit vidhen gjysmë milionë biçikleta. Dëmi material i shkaktuar nga vjedhja e biçikletave është rreth 600 milionë dollarë në vit.

– Spanjë

Spanjollët janë në nivelin mesatar në aspektin e përdorimit të biçikletave në mesin e vendeve të Bashkimit Evropian.

Sipas anketës së publikuar nga kompania Global Consumer Suvey në vitin 2021, në Spanjë 24 për qind e popullsisë së moshës 18-64 vjeç të paktën dy herë në javë preferon biçikletën për transport urban.

Shtatë për qind e spanjollëve biçikletën e përdorin çdo ditë ndërsa 48 për qind të popullsisë e cilëson veten si përdorues i biçikletës.

Qeveria synon rritjen e përdorimit të përditshëm të biçikletës në mbarë vendin në 10 për qind deri në vitin 2030.

Në Spanjë, ku 47 për qind e qyteteve ofrojnë shërbime publike të lira për qira të biçikletave elektrike (midis 25-50 euro në muaj) për qytetarët, përdorimi i biçikletave është intensiv, veçanërisht në Vitoria, Seville, Barcelona, ​​Valencia, San Sebastian, Las Palmas dhe Zaragoza.

– Zvicër

Pas pandemisë së COVID-19 shitja e biçikletave dhe skuterëve elektronikë është rritur në Zvicër ndërsa 69 prej 100 personave kanë të paktën një biçikletë.

Në vend mesatarisht 320 mijë biçikleta shiten në vend. Rrugët kombëtare dhe vendore të biçikletave janë 8.500 kilometra.

Derisa ka 9 rrugë kombëtare dhe 54 rajonale për biçikleta në vend, qeveritë vendore po rrisin numrin e korsive të biçikletave për të reduktuar bllokimin e trafikut dhe për të promovuar transportin miqësor ndaj mjedisit.

– Gjermani

Në Gjermani, ku shitja e biçikletave dhe skuterëve elektronikë është rritur ashtu si në Zvicër, ka 81 milionë biçikleta.

Vitin e kaluar në vend u prodhuan 2,3 milionë biçikleta. Qyteti Münster në Gjermani njihet si qyteti i biçikletave.

Gjermania, 20 për qind të nevojës së biçikletave i importon nga Kamboxhia.

Rruga më e njohur e biçikletave në vend është Elbradweg. Rruga nga Cuxhaven deri në Bad Schandau në kufirin çek është 860 kilometra e gjatë.

Në veçanti, shteti i Berlinit po rrit numrin e rrugëve për biçikleta për të promovuar transportin miqësor ndaj mjedisit.


/ KultPlus.com

https://www.kultplus.com/lajme/holan...one-bicikleta/

[sirena_adria]

3 Qershori - Dita Botërore e Biçikletave

Përdorimi i biçikletës është padyshim një nga metodat më ekonomike dhe të shëndetshme për të qarkulluar në rrugë dhe është mjaft e rëndësishme për një mjedis dhe shoqëri më të mirë për të jetuar.


Dita Botërore e Biçikletave festohet çdo vit më 3 qershor, ku vende të ndryshme në të gjithë botën sensibilizohen për të përdorur më shumë biçikleta dhe për të evituar mjetet e ndryshme të transportit që shkaktojnë ndotje të ajrit, trafik të rënduar dhe rrugë të mbipopulluara.

Përdorimi i këtij mjeti, sa ekonomik aq edhe i dobishëm, na bën mirë të gjithëve dhe ka disa avantazhe: është një aktivitet fizik i moderuar, i dobishëm për shëndetin dhe mjedisin; zvogëlon rrezikun ndaj sëmundjeve të zemrës, infarkteve dhe diabetin e tipit dy; ul prevalencën e obezitetit; ruan dhe rrit forcën, përkulshmërinë, rezistencën dhe densitetin e kockave.

Në Shqipëri përdorimi i biçikletave është kthyer në një trend, ku çdo ditë e më shumë rritet numri i atyre që përdorin këtë formë të transportit për më shumë shpejtësi dhe argëtim njëkohësisht.

Përveç qyteteve të cilat shquhen për përdorimin e biçikletave, kryeqyteti po bëhet gjithnjë e më tepër miqësor me këtë formë transporti, aq sa në më pak se 20 minuta mund të përshkosh Tiranën me lehtësi nga njëra anë në tjetrën.

Aktiviteti i rregullt fizik, të tilla si ecja, çiklizmi ose sportet tjera, sjellin përfitime të jashtëzakonshme për shëndetin, tek të gjitha moshat.

Kjo pasi disa aktivitete fizike të thjeshta janë më të mira se asnjë. Duke u bërë më aktiv gjatë gjithë ditës në mënyra relativisht të thjeshta, njerëzit mund të arrijnë me lehtësi nivelet e rekomanduara të aktivitetit.

Përhapja e përdorimit të biçikletës, e cila është shumë e dobishme si në aspektin mjedisor e shëndetësor, ashtu edhe në aspektin social, është mjaft e rëndësishme për një mjedis dhe shoqëri më të mirë për të jetuar.


Shqiptarja.com

https://shqiptarja.com/lajm/3-qersho...-e-bicikletave

[sirena_adria]

Bloomberg përzgjedh Tiranën ndër 10 qytetet e biçikletave

Tirana është përzgjedhur mes shumë aplikantësh nga e gjithë bota, si një ndër 10 qytetet përfituese të grantit të Bloomberg Philanthropies për Bloomberg Initiative for Cycling Infrastructure (BICI)!

Investimet në përmirësimin e infrastrukturës, veçanërisht në rritjen e sigurisë për këmbësorët dhe çiklistët, ka bërë që Tirana të tërheqë vëmendjen ndërkombëtare. Bloomberg Philanthropies shpalli fituesit e parë të Iniciativës së Bloomberg për Infrastrukturën e Çiklizmit (BICI), me dhjetë qytete globale, që marrin mbështetje për të ndërtuar infrastrukturën inovative të çiklizmit dhe opsionet e lëvizshmërisë së qëndrueshme për banorët e tyre.

Krahas Tiranës, ku do të mbështetet ndërtimi i një rrjeti çiklizmi për të gjitha moshat, nëpërmjet zbatimit të projektimit të kryqëzimeve të sigurta, përfitues janë edhe Milano në Itali dhe Lisbona në Portugali.

Qëllimi i kësaj nisme është të ndihmojë qytetet të dizajnojnë rrugë që rrisin përdorimin e biçikletave, rigjallëron lagjet dhe promovojnë shëndetin dhe mirëqenien e komuniteteve të tyre. Përveç financimit, Tirana do të marrë dhe asistencë teknike për projektimin dhe zhvillimin e projekteve. E nisur në vitin 2014, misioni i Iniciativës Globale të Projektimit të Qyteteve është të transformojë rrugët në mbarë botën.

https://www.bloomberg.org/press/ten-...ibextid=Zxz2cZ


Tiranapost.al

https://tiranapost.al/qyteti/bloombe...letave-i525971

[ATMAN]

Përdorimi i biçikletës është jo vetëm një mënyrë e shëndetshme dhe e qëndrueshme për të udhëtuar, por gjithashtu është një mënyrë e shkëlqyeshme për të zvogëluar ndotjen e ajrit dhe për të bërë një ndryshim pozitiv në mjedisin tonë. Duke ecur ose duke udhëtuar me biçikletë, ne ndihmojmë në zvogëlimin e emetimeve të gazrave të ndotjes së ajrit, duke e bërë ajrin më të pastër dhe më të shëndetshëm për të gjithë.

Në këtë kend veshtrim ne mund të inkurajojmë njëri-tjetrin të përdorim më shumë biçikleta dhe të ndajmë përfitimet e përdorimit të tyre me miqtë dhe familjen tonë. Mund të shkojmë në punë ose në shkollë me biçikletë, të bëjmë blerje apo të shkojmë për një shëtitje të shkurtër me miqtë ose familjen.

Kjo ditë gjithashtu mund të kujtojë qeveritë dhe autoritetet vendore për rëndësinë e investimeve në infrastrukturën e biçikletave, duke përfshirë shiritat e ndarjes së rrugës për biçikleta, parkimet dhe rrjetin e sigurisë për të inkurajuar njerëzit të përdorin biçikletat me më shumë siguri dhe lehtësi.

Bicikleta është një mundësi për të reflektuar mbi rëndësinë e përdorimit të mjetit të transportit të qëndrueshëm dhe për të bërë një ndryshim pozitiv në mjedisin dhe shëndetin tonë.

Përveç kësaj, përdorimi i biçikletave ka edhe përfitime të tjera, si rritjen e mirëqenies fizike dhe mendore. Duke udhëtuar me biçikletë, ne ushtrijmë muskujt dhe forcojmë sistemin tonë kardiovaskular. Një shëtitje me biçikletë mund të ndihmojë në zvogëlimin e stresit dhe ndihmon në rritjen e ndjenjës së lumturisë dhe qetësisë.

Përdorimi i biçikletës gjithashtu mund të ndihmojë në uljen e shpenzimeve të transportit dhe në rritjen e qasjes në hapësirat urbane. Duke përdorur biçikletën si mjet i transportit, ne mund të evitojmë kostot e transportit publik ose të makinës, duke e bërë më të lehtë qasjen tonë në qytet dhe duke bërë më të përshtatshme rrugët e ngushta të qytetit.

Në mënyrë të ngjashme, përdorimi i biçikletave mund të ndihmojë në rritjen e bashkëpunimit dhe solidaritetit në komunitetet tona. Duke udhëtuar me biçikletë, ne mund të njohim njerëz të tjerë në rrugë, dhe mund të ndajmë përvojat dhe sfidat e udhëtimit me miqtë dhe familjen tonë.

Për të përmbyllur, është një mundësi për të inkurajuar përdorimin e më shumë biçikletave për të ndihmuar në zvogëlimin e ndotjes së ajrit dhe për të promovuar shëndetin dhe mirëqenien fizike dhe mendore. Ne mund të ndajmë përfitimet e përdorimit të biçikletave me miqtë dhe familjen tonë dhe të inkurajojmë autoritetet vendore të investojnë në infrastrukturën e biçikletave për të inkurajuar njerëzit të përdorin më shumë biçikleta në transportin e tyre të përditshëm.

[sirena_adria]

1 Qershori / Përurohet Akademia e parë e Çiklizmit, Veliaj: Dhuratë për fëmijët e Tiranës, regjistrojini në kurse sportive

Në Parkun e Liqenit Artificial të Tiranës u inaugurua Akademia e Çiklizmit, një hapësirë e standardizuar e stërvitjes dhe garave për të vegjlit. Përveç pistës prej 280 metrash, në këtë hapësirë ka edhe kënde të tjera lojërash dhe hapësira për fëmijë, në mes të parkut të gjelbër të Tiranës.

Kryetari i Bashkisë së Tiranës, Erion Veliaj, i cili inauguroi në ditën e fëmijëve Akademinë e parë të Çiklizmit, u shpreh se çdo vit Bashkia e Tiranës ka surprizuar më të vegjlit me një projekt të ri për 1 Qershor.

“Stacionet më të rëndësishme të bashkisë i kemi të lidhura me 1 Qershorin. Beteja jonë e madhe e parë ka qenë për parkun e fëmijëve. Pastaj, 1 Qershorin e kaluar hapem Kopshtin Zoologjik. 1 Qershorin përpara hapem Parkun Rinia dhe më rezultojnë se të gjitha kanë qenë projekte të debatuar.a Sikur gjithë këtë energji që harxhojmë duke penguar njëri-tjetrin, ta çonim për të krijuar një qytet dhe një hapësirë më të mirë për fëmijët, do kishim ecur edhe më shpejt. Për sa kohë që çdo 1 Qershor hapet një tjetër hapësirë për fëmijët, pas parkut Rinia, këndit të lodrave, këndi TIKA, Kopshtit Zoologjik, tani kemi këtë stacion këtu, unë besoj se vërtet duhet të mësohemi me logjikën që çdo vit të jemi pak më mirë se ç’ishim vitin tjetër,” u shpreh Veliaj.

Kryetari i Bashkisë njoftoi gjithashtu se së shpejti merr jetë projekti i përbashkët me GIZ dhe KFW për transportin e shpejtë publik në Tiranë.

“Ne sapo kemi hapur edhe garën me GIZ dhe KFW për transportin publik në Tiranë. Ky është një lajm i mirë edhe për ata që përdorin transportin privat, edhe për ata që përdorin transportin publik. Me kolegët e GIZ dhe KFW ishim në atë presionin që ta jep fushata, të thuash marrëzi të gjërave që nuk bëhen, por për ata që planifikojnë e menaxhojnë punë serioze duhen thënë vetëm ato që mund të bëhen e mund të realizohen dhe që për Tiranën eshte gjetja më e mirë. Më vjen mirë që me GIZ dhe KFW po përgatitemi për një mega projekt të lëvizjes së shpejtë me autobus, që unë besoj që është një formulë win-win, përfitojnë edhe ata që përdorin transportin publik, sigurisht edhe transporti privat,” deklaroi ai.

Veliaj ftoi l të gjithë prindërit të regjistrojnë fëmijët në sport. “Për të gjithë qytetarët, ne do të jemi të hapur çdo ditë, me fokus kryesisht në fundjavë, por kjo akademi është ftesë për të gjitha shkollat. Ftesa është edhe për të gjithë prindërit, sidomos këtë vit që jemi Qyteti Evropian i Sportit: Blini një biçikletë, regjistrojini fëmijët në një kurs sportiv, blijuni një top, merruni me aktivitet fizik! Kur shikoj që fëmijët po luajnë edhe me biçikleta, po bëjnë edhe yoga, po përgatiten edhe për kalçeto, do të thotë që i kemi të gjithë mundësitë sot. Sot nuk ka justifikime – s’ka vend, s’ka hapësirë, s’ka mundësi – sepse i kemi të gjitha këto,” e mbylli Veliaj fjalën e tij.


Ballkanweb.com

https://www.balkanweb.com/1-qershori...urse-sportive/

[sirena_adria]

4 Arsye të Vlefshme Përse Duhet të Përdorni Biçikletën Çdo Ditë

Çiklizmi është një mënyrë e shkëlqyer për të kryer aktivitet fizik dhe për të humbur kilogramët e tepërt. Por jo vetëm kaq. Çiklizmi është një mënyrë shumë e mirë për të luftuar stresin dhe për t’u ndier mirë.

Në këtë artikull të AgroWeb.org do të mësoni më shumë për përfitimet që ofron çiklizmi që në pedalimin e parë.

I Bën Mirë Zemrës

Aktiviteti fizik e bën zemrën të rrahë më shpejt dhe të furnizojë trupin me oksigjen dhe gjak. Me kalimin e kohës, ky lloj aktiviteti fizik do ta bëjë zemrën tuaj më të fortë dhe do të ulë rrezikun e sëmundjeve kronike.

Ekspertët rekomandojnë ngarjen e biçikletës për të paktën 2 orë e gjysmë në javë.

Ju Ndihmon Të Digjni Më Shumë Kalori

Nëse dëshironi të humbisni në peshë, atëherë është koha të përdorni biçikletën.

Çiklizmi, në varësi të intensitetit, mund t’ju ndihmojë të digjni deri në 740 kalori në orë.

Më Shumë Rezistencë

Pedalet e biçikletës formojnë një lloj rezistence për muskujt duke ndihmuar zhvillimin e tyre.

Një pedalim më i fortë dhe më i shpejtë do ju ndihmojë të keni muskuj të fortë e të tonifikuar të këmbëve.

Një gjë e tillë do të ofrojë më shumë mbështetje dhe lehtësi edhe për njerëzit që janë mbipeshë.

Më Pak Dhimbje Kyçesh

Çiklizmi është një aktivitet shumë i mirë për njerëzit që vuajnë nga dhimbjet e kyçeve, gjunjëve dhe që kërkojnë një mbështetje kockore për peshën e madhe të trupit.

Lëvizja e gjunjëve rrit prodhimin e lëngjeve që lubrifikojnë kyçet dhe zbut dhimbjet.

Kyçet dhe muskujt duhen mbajtur në lëvizje, por ajo duhet të jetë e kontrolluar në rast se keni probleme serioze që ndikojnë në lëvizshmërinë tuaj.

Nëse keni probleme të tilla, ekspertët e AgroËeb.org sugjerojnë që përpara se të ndërmerrni një aktivitet të caktuar fizik të konsultoheni me një mjek ortoped.


/ AgroWeb.org

https://agroweb.org/ne-forme/trupi-s...cikleten-dite/

[ATMAN]

Përdorimi i biçikletës çdo ditë ka shumë arsye të vlefshme dhe përfitime për shëndetin tuaj, mjedisin dhe qarkullimin e trafikut. Këtu janë disa arsye pse duhet të përdorni biçikletën çdo ditë:

1. Shëndeti fizik: Përdorimi i biçikletës është një mënyrë e shkëlqyeshme për të ushtruar trupin tuaj. Duke e përdorur biçikletën për transportim ose për të bërë stërvitje, ju ndihmoni të rritni nivelin e aktivitetit fizik dhe të përmirësoni kondicionin fizik. Guida e biçikletës përfshin lëvizjen e muskujve të gjithë trupit, si këmbët, muskujt e barkut dhe të poshtëm, duke ndihmuar në forcimin e muskujve dhe në përmirësimin e rezistencës kardiovaskulare.

2. Shëndeti mendor: Përdorimi i biçikletës ka edhe përfitime të mëdha për shëndetin mendor. Aktiviteti fizik i rregullt, siç është ecja me biçikletë, ndihmon në zvogëlimin e stresit dhe ankthit, rrit nivelin e energjisë dhe ndihmon në përmirësimin e gjumit. Guida e biçikletës në natyrë ose në hapësirat e hapura mund të sjellë ndjenjën e qetësisë dhe gëzimit.

3. Mjedisi: Përdorimi i biçikletës është një mënyrë e qëndrueshme dhe e pastrë për transportimin. Në krahasim me automjetet që përdorin benzinë, biçikleta nuk prodhon ndotje ajri dhe nuk shkakton ndotje zëri. Duke e përdorur biçikletën për të udhëtuar, ju ndihmoni në zvogëlimin e ndotjes së ajrit dhe në mbrojtjen e mjedisit.

4. Ekonomia: Përdorimi i biçikletës është një zgjidhje e lirë dhe e efektshme për transportimin. Në vend që të paguani për karburant ose transport publik, ju mund të përdorni biçikletën tuaj për të shkuar në vendet e punës, në dyqane apo në destinacione të tjera të nevojshme. Kjo ju ndihmon të zvogëloni shpenzimet personale dhe të mbani buxhetin nën kontroll.

5. Qarkullimi i trafikut: Përdorimi i biçikletës ndihmon në zvogëlimin e trafikut në qytete dhe ndihmon në zbutjen e kongestionit rrugor. Duke iu përkushtuar biçikletës për udhëtimet e shkurtra, ju ndihmoni në zvogëlimin e numrit të makinave në rrugë dhe në përmirësimin e fluksit të trafikut për të gjithë.

Këto janë vetëm disa nga arsyet pse duhet të përdorni biçikletën çdo ditë. Përdorimi i biçikletës nuk është vetëm një mënyrë e shkëlqyeshme për t'u lëvizur, por gjithashtu sjell përfitime të mëdha për shëndetin tuaj dhe mjedisin.

[Jetmiraaa]

E kam mësuar biçikletën që e vogël.
Ndaj nuk kam frikë ti jap makinës.
Një njeri që din ti japë biçikletës,din ti japë edhe makinës .
Biçikleta është e lehtë për tu mësuar.

[sirena_adria]

Shkodra, vendlindja e çiklizmit shqiptar

Nëse ka një qytet që lidhet me historinë e biçikletave në Shqipëri, si pjesë e trashëgimisë, ky qytet është Shkodra.

Ishte viti 1907, më shumë se një shekull, kur në Shkodër u pa të lëvizte një i huaj. Ai përdorte një mjet që askush nuk e kishte parë më parë. Ky burrë ishte Konsulli i Nderit i Suedisë, ndaj edhe kureshtja për ta parë ishte mjaft e madhe. Dëshmitë e kohës rrëfejnë se kush e dëgjoi, u dynd andej nga rruga kryesore ku ai lëvizte që ta shihte me sy atë mjet që ecte mbi dy rrota pa u tërhequr nga kafshët.

Në kuadrin historik duhet të përmendim edhe një foto të dy burrave me biçikleta, të nxjerrë nga fototeka “Marubi” e vitit 1897, me veshje kombëtare shqiptare, por që nuk janë të evidentuar se kush janë.

Por Shkodra shënon edhe një rekord tjetër që lidhet me biçikletën. Gruaja e parë që nisi një biçikletë ishte sërish një grua, e kësaj radhe, vinte nga konsullata austriake. Njerëzit sërish u dyndën nëpër rrugë për ta parë atë dhe kuptuan se dyrrotaku nuk ishte pronësi vetëm e meshkujve, por se edhe femrat mund ta ngisnin një të tillë.

Kështu biçikleta fitoi qytetarinë e saj. Është fakt interesant se në vitin 1915, policia e qytetit u pajis me biçikleta dhe ushtronte detyrën e saj duke përshkuar rrugët me to.

Me shtimin e numrit të biçikletave, një grup qytetarësh shkodranë, në vitin 1920 vendosën të krijonin sportin e çiklizmit. Rrethi i parë çiklistik, që është edhe i treti në Europë për nga vjetërsia, pas Francës e Italisë, është organizuar pikërisht në Shkodër. Ndaj dhe në vazhdimësi Shkodra ia ka dhënë tonin këtij sporti, aq sa jo vetëm të rriturit, por nuk ka fëmijë që të mos dijë të ngasë biçikletën.

Nga fundi i viteve ’50 të shekullit të kaluar, kur Shkodra kishte rreth 60.000 banorë, ka të dhëna të plota se në qytet numëroheshin mbi 10.000 biçikleta. Ishte koha kur edhe biçikletat regjistroheshin dhe çdo qytetar, ndaj një pagese simbolike merrte një llamarinë me fushë të bardhë sa një celular mesatar, ku kishte të stampuar numrin, që ishte i detyruar ta vendoste nën shalën e biçikletës.

Shkodra ka disa rekorde sa i takon biçikletës, p.sh., biçikleta e parë dyshe hyri në Shkodër, sikundër pati edhe numrin më të madh të dyqaneve të shërbimit për riparimin e tyre.


/ atsh/ KultPlus.com

https://www.kultplus.com/trashegimia...zmit-shqiptar/