------------------------------------------------------------------------------------
Grekët kanë vendosur të bëjnë gjithçka për të mos lejuar asnjë shqiptar të prekë flamurin e tyre. Ashtu si një vit më parë, një nxënëse shqiptare që mëson në një gjimnaz në Akaia të Peloponezit, është përballur dje me protestat e grekëve kundër mbajtjes së flamurit nga vajza në ditën e festës kombëtare greke. Solina Metushi, e cila jeton prej dhjetë vjetësh në Greqi, është caktuar pak ditë më parë nga këshilli drejtues i shkollës për të mbajtur flamurin grek në ditën e paradës, më 28 tetor. Por, nuk kanë qenë aspak dakord me këtë bashkëmoshatarët e saj, të cilët kanë protestuar, e madje kanë ndërprerë edhe mësimin për të kërkuar heqjen e privilegjit. Nxënësit kanë deklaruar se nuk do të lejojnë që një shqiptare të mbajë flamurin grek, pasi të afërmit e tyre kanë derdhur gjak në luftë me ta. Ata kanë pohuar se do të vazhdojnë të bojkotojnë mësimin në rast se nuk do të merret një vendim i ri për të rrëzuar atë të publikuar tashmë. Ky nuk është rasti i parë i ksenofobisë në Greqinë fqinje. Vetëm një vit më parë, 15-vjeçari shqiptar Odise Cenaj u përball gjithashtu me protestat e bashkëmoshatarëve të tij grekë për të mos mbajtur flamurin në ditën e festës kombëtare. Cenaj u detyrua të hiqte dorë nga mbajtja e flamurit gjatë paradës, pas presioneve të shumta nga shokët e shkollës. Ndërsa një situatë edhe më e keqe u krijua vjet në një gjimnaz në Kalithea të Athinës, ku 16-vjeçarja Maria Kendella parakaloi me flamurin helen, por u sulmua nga një grup ekstremistësh grekë të organizatës "Agimi i Artë". Kësaj here rikthimi i ksenofobisë i ka shqetësuar tej mase autoritetet e prefekturës, të cilat janë mbledhur urgjent për të shqyrtuar këtë çështje. Ata kanë rikujtuar ligjin grek, sipas të cilit nxënësit më të mirë të shkollës duhet të mbajnë flamurin grek në ditën e paradës dhe në këtë pikë nxënësit nuk kanë dallim nga njëri-tjetri. Ndaj ngjarjes së fundit ka reaguar edhe ministrja e Arsimit e Greqisë, Marieta Ianaku, e cila ka deklaruar se "flamuri nderon flamurtarin dhe jo flamurtari flamurin". Ministrja ka deklaruar se vajza shqiptare ka të drejtë ta mbajë flamurin dhe se autoritetet greke do të angazhohen plotësisht për të zbatuar kartën e të drejtave të njeriut.
------------------------------------------------------------------------------------
Krijoni Kontakt