Monika Kryemadhi: SPAK po heton pasurinë time

[Albo]

Kryemadhi e pranon: Jam në hetim pasuror, do përballem me drejtësinë edhe sikur kryetar i SPAK të jetë vetë Edi Rama



Monika Kryemadhi ka pranuar se është në hetim pasuror nga Prokuroria e Posaçme, E ftuar në emisionin ‘Kontrast’, ajo tha se është e hapur të përballet me drejtësinë. Sipas deputetes së Partisë së Lirisë, hetimi ndaj saj nga SPAK ka nisur pas denoncimeve me fakte që ajo ka bërë për aferën e inceneratorëve.

“Çështja e inceneratorëve me dokumentet që unë i kam çuar SPAK, ka 70% të hetimit të çështjes. E ka llokum të qëruar për 3 inceneratorët. Me çështjen e dherave jo vetëm SPAK, por edhe antidroga, gjen paratë e drogës që janë hedhur. Kanë mundësi të gjejnë ku paratë e drogës janë injektuar.

Çështja e inceneratorëve përfshin piramidën, nga maja e saj, dhe them gjithmonë nuk është ushtari ai që ka përgjegjësinë, është ideatori.

Nëse denoncimet e mia nuk do të ishin kaq të egra dhe të drejtpërdrejta, nuk do të ishim në hetim pasuror dhe nuk më shqetëson pasi unë nuk kam asgjë për të fshehur. Dihet se çfarë shtëpia ka Monika. Në shtëpinë e Kryemadhit kanë hyrë të gjithë politikanët. Erion Veliaj shpërndan fjalët, do ta kryejë SPAK. Nuk bashkëpunoj për SPAK-n, po për veten time”- tha Kryemadhi.

Duke u ndalur tek vota e mazhorancës që i hoqën imunitetin Sali Berishës, e për rrjedhojë iu hap rrugë SPKA-ut për masën e arrestit ndaj tij, Kryemadhi u shpreh se e kishte të pamundur që të votonte, për shkak të gardistëve që ndodheshin në seancën plenare.

Deputetja tha se drejtësia në rastin e Berishës ka vepruar me dy standarde e se masa është marrë një mënyrë të paligjshme, megjithatë ajo është e mendimit se vetë do të përballej me drejtësinë, qoftë edhe Rama të ishte kreu i SPAK.

Për Kryemadhin kjo përplasje që po ndodh mes Sali Berishës dhe drejtësisë është një kauzë e mirë për të bashkuar opozitën

“Isha në Kuvend. Nuk arrije dot të votoje. Unë kam hyrë e para. Jam kundër çdo konfrontimi me gadistët. Marrin urdhërat e eprorëve të tyre. E gjithë salla ishte e mbushur me gardistë. Deputetët e PD-së ishin në kafe. Sapo filloi u kontrolluan.

Arsye për të pasur dhunë nuk do të kishte. Bardhi i kërkoi kryetares të largoje gardën. Çfarë diskutimi do të bëhej. Në vend të shufrave të hekurit ishin gardistët. Nuk ishte seancë dosido. Hiqej imuniteti i një ish-kryeministri, nuk ishte një seancë hajt se po kaloj.

Nuk e di nëse ka qenë e qëllimshme nga SPAK-u për të krijuar handikap ligjor. A e ka bërë në dijeni SPAK-u? Është një lloj kambanë që tregon sa të vështirë e ka edhe drejtësia për të vepruar nga një qeveri që e intimidon.

Është marrë në mënyrë të paligjshme masa ndaj Berishës. Për mendimin tim deputeti s’ka nevojë të ketë imunitet. Nëse është lojë e SPAK dhe GJKKO se ka probleme me drejtësinë nga ana tjetër, mendoj se i dha argumentin dhe shumë juristëve dhe ndërkombëtarëve që kanë qenë skeptikë për Reformën në Drejtësi, kërcet.

A është bërë të cenohet Reforma? Pse përdorni 3 standarde. Drejtësia nuk po përdor të njëjtin standard.

Rama se lë Bashën të bashkohet me PD-në. Basha ka problemet e veta ligjore. Kur i bën gropën shokut bie vet brenda! Ka bërë shumë gropa. Kanë rënë shokët por do bjerë më shumë vet.

Për mua edhe Edi Rama të jetë kryetar i SPAK jam për tu ballafaquar me drejtësinë. Nëse beteja ime nuk është me prokurorët apo gjyqtarët, çdo gjë është e shkruar. Ka shumë sy që vëzhgojnë.

Mund të të vijë të të marrë prokurori. Berisha ka sakrifikuar veten e tij, familjen e tij për të legjitimuar një sistem ku ne jemi sot.

Jamarbër Malltezi është i burgosur politik për mendimin tim. Sali Berisha ka sakrifikuar të ketë një kauzë”- tha Kryemadhi

Syri

[Albo]

Apeli rrëzon kërkesën e Monika Kryemadhit dhe lë në fuqi sekuestron mbi telefonin e saj

Gjykata e Posaçme e Apelit vendosi të lërë në fuqi masën e sekuestros ndaj një telefoni në pronësi të deputetes së Partisë së Lirisë Monika Kryemadhi.


Monika Kryemadhi duke hyrë në parlament. Foto: Xhemali Moku/ Reporter.al


Gjykata e Posaçme e Apelit vendosi të enjten të lërë në fuqi masën e sekuestros ndaj një telefoni në pronësi të deputetes së Partisë së Lirisë Monika Kryemadhi.

Telefoni i Kryemadhit është vënë në sekuestro pasi SPAK ka nisur hetime pas disa kallëzimeve ndaj saj dhe personave të lidhur me të përfshi ish-presidentin Ilir Meta.

Kryemadhi e kundërshtoi sekuestron fillimisht në Gjykatën e Posaçme të Shkallës së Parë, por u rrëzua. Të njëjtin fat ndërkohë ka pasur edhe ankimi në Apel, ku gjyqtarja Igerta Hysi, ka gjetur të drejtë sekuestrimin duke lënë në fuqi masën.

Apeli njoftoi se la në fuqi vendimin e “Gjykatës së Posaçme të Shkallës së Parë, që ka rrëzuar kërkesën e shtetases M.K. për heqjen e sekuestros dhe kthimin e sendit të sekuestruar (telefon i markës Iphone)”.


BIRN

[Albo]

Kërkoi t’i kthehej telefoni, Gjykata e Lartë rrëzon Monika Kryemadhin



Gjykata e Lartë nuk pranon rekursin e Monika Kryemadhit për heqjen e sekuestros së telefonit

Telefoni i Kryemadhit u vu në sekuestro pasi SPAK ka nisur hetime pas disa kallëzimeve ndaj saj dhe personave të lidhur me të, përfshirë ish-presidentin Ilir Meta.

Kryemadhi e kundërshtoi sekuestron fillimisht në Gjykatën e Posaçme të Shkallës së Parë, por u rrëzua. Po ashtu edhe ankimimi në Apel e gjeti të drejtë sekuestrimin, duke lënë në fuqi masën.

Ndërsa sot mësohet se as Gjykata e Lartë nuk ka pranuar rekursin.

Koha Jone

[Albo]

Ilir Meta vendos: Jo Monika Kryemadhi në strukturat drejtuese!



Ilir Meta do bëjë spastrime në PL, duke larguar nepotizmin. Rasti më nepotik mbetet Ilir Meta dhe Monika Kryemadhi, burrë dhe grua.

Monika Kryemadhi përballoi fushatëm më të egër të mafies politike kundër LSI në vitin 2021.

Ndërkohë Ilir Meta, kreu i PL-së, pritet që me një propozim per ndryshim statutor, të përjashtojë bashkëshorten e tij Monika Kryemadhin nga strukturat drejtuese të Partisë së Lirisë në nivel qendror dhe lokal.

“Statuti do e ndërtojë këtë parti me baza të reja duke i thënë fund nepotizmit, duke i thënë jo mosmbajtjes së përgjegjësive, kakofonisë në drejtim dhe lënies së hapësirës për alibi dhe shfajësime për ata që nuk përmbushin detyrimet e tyre”, tha Meta.

Propozimi do te jete se dy anëtarë nga një familje nuk duhet të jenë në nivelet drejtuese të partisë. Ilir Meta ishte i ashpër në fjalën e tij përpara anëtarëve te kryesisë.

Koha Jone

[Albo]

Meta sulmon kreun e SPAK: Kushëriri i Nuredin Dumanit! Ai “karafil” mund të kapë ndonjë “laraskë”, por PL ka 300 mijë “Vojo Kusha”



Kreu i Partisë së Lirisë Ilir Meta ka hedhur akuza të rënda në drejtim të kreut të SPAK, Altin Dumani.

Meta tha se kushëriri i Altin Dumanit, Nuredini ka vrarë, ndërsa kreu i SPAK po vret pluralizmin.

Ilir Meta: Kushëriri i tij, Nuredini ka vrarë, ndërsa Altin Dumani po vret pluralizmin. Ky karafil kërkon të bëhet vrasës i demokracisë.

Nuk ka ekzistuar asnjë sulm imi si President apo kryetar i PL ndaj SPAK-ut. E kam bërë të qartë se zgjedhja e Prokurorit të Përgjithshëm me 69 vota ishte kapje flagrante e SPKA dhe Prokurorisë sepse në këtë mënyrë u kap KLP.

VIDEO

Ju prisni të thotë kushëriri i Nuredinit që ka takuar McGonigalin? Të thotë që ka shkuar disa herë të Fier tek zoti Kastriot Ismaili që të dëshmonte kundër Ilir Metës që ai të dilte nga burgu dhe ky që nisi procedimin ndaj Ilir Metës, mbi bazën e një delokuenti që është dënuar për dhunë në familje, ky që thërret dëshmitar Ilir Matën që e ka vendin në burg…

Nuk presim sinqeritet e integritet nga një i papërgjegjshëm që thotë publikisht se gjykata do vendosë atë që thotë prokuroria. Nuk presim ndonjë integritet nga dikush që ka hyrë thellë në lojërat politike të Ramës.

Nuredini pavarësisht se është një personazh i një bote që e ka zgjedhur vbvetë, ka për mua një integritet më të madh se kushëriri i tij, sepse ky është zgjedhur për të respektuar Kushtetutën, pëtr t'i shërbyer drejtësisë e për t’u bërë vegël e shëmtuar e politikës. Nuredini ka bërë vrasje, port ky karajfil kujton se mund të bëhet vrasës i suksesshëm i pluralizmit në vend.

Nëse SPAK qenka shpresë e madhe, le të dalë si parti politike dhe të marrë votat. Laraskat mund të kapin ato, por ka 300 mijë Vojo Kushë Partia e Lirisë. I ka këtu, i ka në Angli, Amerikë, Bruksel dhe në mbarë botën.

Balkanweb

[Albo]

Akuzat e Metës, Ylli Manjani: Kreu i SPAK-ut s’ka asnjë lidhje gjaku apo farefisnie me Nuredin Dumanin



Ish-ministri i Drejtësisë, Ylli Manjani ka nxjerr zbuluar ish-kryetarin e partisë, Ilir Metën në lidhje me akuzat drejt kreut të SPAK-ut, Altin Dumani.

Pas sulmeve të Metës ndaj Dumanit, Ylli Manjani thotë se kreu i SPAK-ut nuk ka asnjë lidhje gjaku apo farefisnie me Nuredin Dumanin. Janë dy fise të ndryshme nga krahina të ndryshme.

”Edhe njëherë, kërkohet fokusi tek sistemi i dështuar dhe jo tek personat. Meqë ra fjala, Altin Dumani nuk ka asnjë lidhje gjaku apo farefisnie me Nuredin Dumanin. Janë dy fise të ndryshme nga krahina të ndryshme. Kot, sa për informacion dmth”,-shkruan Manjani.

Koha Jone

[Albo]

Dumani i përgjigjet akuzave të Ilir Metës: Nuk e kam takuar kurrë McGonigal



Kreu i SPAK, Altin Dumani, ka reaguar në lidhje me akuzat e ngritura nga Ilir Meta se hetimet ndaj tij kanë nisur pas takimit që Dumani pati me ish-drejtuesin e lartë të FBI Charles McGonigal, në vitin 2019.

Në përgjigjen e dhënë për Euronews Albania, kreu i SPAK thotë se akuzat janë të pabaza dhe ai as nuk e njeh e as e ka takuar kurrë McGonigal.

Deklaratat e kreut të Partisë së Lirisë, Dumani, i cilësoi si një vijim të akuzave ndaj Prokurorisë së Posaçme.

“Unë nuk e kam takuar kurrë McGonigal. Gjithçka është thënë në media, është në vazhdën e akuzave të vazhdueshme, te pabaza që bëhen për institucion që unë drejtoj. Nuk ka pasur asnjë arsye për të takuar McGonigal, as nuk e kam njohur kurrë dhe emrin ia kam dëgjuar pas publikimeve ne mediat shqiptare”, tha Dumani.

Çfarë deklaroi Ilir Meta në një emision televiziv mbrëmjen e të hënës:

“SPAK nisi hetimet në dhjetor 2019, sipas të dhënave të mia, edhe pas takimeve të Dumanit me McGonigal. Dhe pse nisi në dhjetor 2019 për një çështje të mbyllur? Sepse ishte koha që Ilir Meta të mos lejonte që Gjykata Kushtetuese të pushtohej nga banda e Edi Ramës”.

Euronews

[Albo]

Meta sulmon ashpër Altin Dumanin: Vilat e mia, florinjtë e mi t’i sekuestrojë dhe t’ia japë popullit!



Burime të besueshme nga brenda SPAK flasin se një fletë-arresti është firmosur tashmë.

Ende nuk e bëjnë të ditur emrin, por nga veprimet që po kryhen me policinë e Shtetit, duket se SPAK do të jetë një emër që do të trazojë politikën.

Ndërkohë në një konferencë për shtyp, Ilir Meta, nuk i ka ndalur akuzat ndaj kreut të SPAK, Altin Dumani, teksa tha se ky i fundit i kishte çuar njerëz për t’i thënë të largohet nga vendi, por Meta shtoi se do ta vijojë luftën e tij edhe nga burgu.

“Mbështes deklaratën e ambasadës së SHBA-ve. Dje ua sqarova si është krijuar KLP-ja. Është krijuar mbi bazën e emërimeve të bëra nga Arta Marku që u bë prokurore me 69 vota. Miqve dhe aleatëve ua kam thënë me kohë “prokurorinë e keni ju dhe Edi Rama”. Vijmë te ‘Dumdumani’. U kërkoj ndjesë prokurorëve të SPAK që nuk janë si ai. Te SPAK ka Dumdumanë, ka edhe njerëz që luftojnë krimin dhe korrupsionin. Kam bërë deklaratë solidariteti për prokuroren që ishte kërcënuar nga banditët. I them Dumdumanit 3 herë ke përmendur emrin tim që po më heton mua. Ke çuar njerëz që të më thonë të iki nga Shqipëria”, tha Meta.

“Legen si ti jam unë? Gjëmon vjehrrën time t’i që ta marrësh peng? Kujton se do marrësh Partinë e Lirisë ti që t’ia çosh atij tarallakut? Pse nuk nxorëm mësim ne me lulushët këtu që përdor çimkaxinjtë? Pse mo palaço kam frikë unë nga burgu yt? O palaço hajde dil në televizor me mua ti? Si flet ti në emër të SPAK? Ne SPAK prandaj e bëmë që çdo prokuror të ketë përgjegjësinë e tij. Ti je injorant! Të kanë thënë ty amerikanët të më fusësh mua në burg? Kur të duash ti dhe amerikanët ballafaqohemi këtu. Mua ka dashur të më fusë në burg legjendari që në vitin 1992. Ti i ke vajtur 20 herë në burg Kastriot Ismailit që të japësh dëshmi kundër Ilir Metës.

Ti merresh me ato punë se nuk ke takat që arrestosh Veliajn se u mbyti me favore ty dhe ata të tjerët. Ti nuk ke takat se je palaço të thërrasësh Edi Ramën. Ti je prokuror jo i amerikanëve, por i Engjell Agaçit. Ka amerikanë të ndershëm që janë shumica, ka edhe McGonigalë. Unë jam nga rraca e Vojo Kushit. Dumdumani, vilat e mia, florinjtë e mi, t’i marrë dhe t’i sekuestrojë dhe t’ia japë popullit. Që t’i shkojë mendja Dum Dumanit me atë çantë që vë ashtu si teveqel, që do marrë Partinë e Lirisë, për t’ia çuar Edi Ramës…”

Koha Jone

[Albo]

Kryemadhi u përgjigjet akuzave të Metës për nepotizëm: Protagonizëm bosh!



“Shfokusimi nga INCENERATORËT që unë kam kallëzuar me përgjegjësinë e firmës time dhe protagonizmi BOSH janë sot shërbimi më i mirë që mund ti bësh Edi Ramës, Erion Veliajt & bandës së tyre.
Denoncimi me fakte, prova dhe firmë konkrete kundër bandës në qeveri dhe bashki; këto janë tema kryesore që mendoj se duhet të udhëheqin aksionin opozitar.
Gjithashtu, unë besoj se shqiptarët presin nga Opozita ide, vizion dhe propozime konkrete, që ngjallin shpresë dhe besim për popullin shqiptar. Se si do të rrisim mirëqenien dhe sigurinë e tyre.
Filmat e vjetër me të njejtin përfundim janë pa interes për shumicën e shqiptarëve”, ka deklaruar Monika Kryemadhi në një postim në Facebook.

Koha Jone

[Albo]

[Albo]

A është çmendur Ilir Meta?

Nga Armand Shkullaku

Peisazhi mediatik i ditëve të fundit është përmbytur nga titujt e komentet e një çështje, e cila për nga hapësira që ka pushtuar, duket kapitale për fatet e vendit: A është çmendur apo jo Ilir Meta? Nëse ndjek debatet, analizat e lajmet frenetike për “fenomenin Meta”, krijohet përshtypja se në këtë vend, ku gjithçka shkon më së miri dhe të gjithë gëzojnë shëndet mendor të plotë, rreziku që mund të çekulibrojë shoqërinë vjen nga marrëzia e një individi.

Dilema nëse është çmendur ose jo Ilir Meta, nuk shtrohet sot për herë të parë. Ajo vjen si nevojë për të mbuluar çmendurinë e vërtetë, përballë së cilës shoqëria ka mbetur si e mpirë dhe pa fuqi reagimi. Përpara zgjedhjeve të vitit 2021, “lajthitja” e presidentit Meta ishte përsëri kryefjala e propagandës për të zhurmuar çmendurinë e mazhorancës në raport me ligjin dhe kushtetutën. Përballë akteve të çmendura të pushtetit, problemi nuk duhet të ishin ato vetë, por reagimi atipik i presidentit.

A mund të sillej si një president skandinav Ilir Meta, kur mazhoranca rrëmbente të shtunën për diell anëtaren e Gjykatës Kushtetuese dhe çonte të betohej tek një noter te ura e Lanës? Si mund të sillej presidenti kur dekretet e tij, jo që nuk zbatoheshin, por as botoheshin në fletoren zyrtare? Ç’duhet të bënte ai, kur një marrëveshje politike grisej dhe ligji zgjedhor qepej me porosi nga Rama, në kundërshtim me rekomandimet e ODHIR dhe Komisionit të Venecias? A duhej ta ngrinte ai zërin, kur prova dhe dëshmi të shumta faktonin masakrën zgjedhore që po përgatitej nga regjimi, ndërsa ky i fundit hartonte kërkesën për shkarkimin e Presidentit?

Në të gjithë cirkun propagandistik të psikanalizës për Ilir Metën, ka patur dhe ka vetëm një qëllim. Reagimet e tij, të forta dhe shpesh të çartura, të mos trajtoheshin si pasojë e çmendurisë së frikshme të pushtetit, por si anomali e një individi që shpërthen pa shkak. Herë duke e trajtuar si të sëmurë e paranojak, herë si personazh estrade e herë si të çekuilibruar nga frika e drejtësisë, sjellja e Metës është çuar në ekstrem për ta bërë të gëlltitet si normale çmendurinë e pushtetit.

Abuzimi me pushtetin, skandalet dhe vjedhjet masive, shkeljet e Kushtetutës dhe të drejtave të opozitës, përdorimi i mediave dhe drejtësisë së re, kriminalizimi i ekonomisë dhe batërdia zgjedhore, për nga përmasat e tyre, do të luanin mendsh çdo njeri e çdo shoqëri normale.

Mazhoranca vendos se kush duhet të jetë opozita e vendit. Mbi gjysëm milion shqiptarë privohen nga e drejta për të qenë të përfaqësuar nga ata që kanë zgjedhur me votë. Parlamenti vendoset mbi Gjykatën Kushtetuese dhe të drejtat po kushtetuese që i takojnë pakicës. Zyrtarët më të lartë kapen duke vjedhur dhe askush nuk merr përgjegjësi të paktën morale. Drejtësia e re shkon deri tek ish kryeministri për akte të përpara 15 viteve dhe nuk guxon të marrë në pyetje e t’i përmendi emrin një kryetari bashkie që lejon t’i kalojnë dhjetra milionë euro kompanisë së drejtorëve të tij. Muratorë, elektriçistë, qoftexhinj e bukëpjekës përdoren për të zhvatur paratë publike dhe ata që janë përgjegjës për administrimin e kësaj paraje publike, pa u skuqur e pa u zverdhur, lajnë duart duke thënë se nuk është punë e tyre kush ha dardha e mollë pas shpine.

A ka çmenduri më të madhe se kjo?

Ilir Meta ka mbi shpinë plot mëkate të abuzimit me pushtetin kur ka patur mandatin ta ushtrojë atë. Veprimet e tij janë edhe kostot që po paguan ai përsonalisht dhe forca politike që ai drejton. Ato mëkate që herë aminstoheshin nga Sali Berisha e herë nga Edi Rama, kur iu duheshin numrat e LSI, mbeten në hipotekën e Ilir Metës. Por nuk janë kurrsesi alibija për katastrofën që ka prodhuar Rilindja. Aq më tepër bëhet qesharake, kur kjo katastrofë tentohet të mbulohet nga çmenduria e Ilir Metës.

Ilir Meta mund edhe të jetë çmendur, por kjo nuk na shpëton nga çmenduria e një regjimi që nuk ka asnjë kufi për ta ndalur. Më mirë një i marrë që bërtet, se sa qindra mijë të tjerë që pranojnë të drejtohen nga marrëzia e një pushteti. Me gisht nuk duhet treguar Ilir Meta, por ata që e kanë kthyer vendin në çmendinë prej nga ku duan të ikin të gjithë.

LAPSI