Vendimi i SPAK: Arrest në shtëpi për udhëheqësin e opozitës, Sali Berisha

[Albo]

SPAK i kërkon Parlamentit leje për arrest shtëpie ndaj Sali Berishës. Ja dokumenti zyrtar



SPAK i ka kërkuar me shkresë zyrtare Kuvendit të Shqipërisë leje për “arrest shtëpie” për ish-kryeministrin Berisha.

Në fakt, kjo gjë pritej pasi ish-kryeministri nuk zbatoi asnjë masë ndaj tij marrë nga SPAK dhe Gjykata e Posaçme.

Interesante mbetet se si do të reagojë Berisha kur të ketë roje policie të dera e shtëpisë dhe të mos e lejojnë të dalë as nga shtëpia. E themi këtë sepse parlamenti do ta miratojë kërkesën e SPAK.

Më pas vjen arresti në burg. Por nuk besohet të dalë nga arresti shtëpiak…

Nëse ish-kryeministri Berisha do të ishte paraqitur në gjykatë ka mundësi që ose do ta fitonte betejën ligjore ose do të kishte masa me të lehta penaliteti ndaj tij dhe jo arrest shtëpiak.

Por tani po i vjen arresti…

“Mbështetur në nenin 73 të Kushtetutës së Republikës së Shqipërisë, nenin 231, 260, 288, 289 të K.Pr.Penale, si dhe në Rregulloren e Kuvendit të Republikës së Shqipërisë, nenet 13 dhe 118, bashkëlidhur ju përcjellim kërkesën për dhënien e autorizimit nga Kuvendi i Republikës së Shqipërisë, për arrestimin/heqjen e lirisë së deputetit Sali BERISHA, nëpërmjet zëvendësimit të masës së sigurimit personal shtrëngues nga ajo e “Detyrimit për t’u paraqitur në policinë gjyqësore”, parashikuar nga neni 234 i K.Pr.Penale dhe “Ndalim i daljes jashtë shtetit” parashikuar nga neni 233 i K.Pr.Penale, në atë të arrestit në burg/ arrest në shtëpi, parashikuar nga nenet 238/237 të K.Pr.Penale, në kuadrin e procedimit penal nr. 287 të vitit 2020, të Prokurorisë së Posaçme Kundër Korrupsionit dhe Krimit të Organizuar Tiranë”, thuhet në shkresën e SPAK-ut drejtuar Kuvendit.



Koha Jone

[Albo]

Gazment Bardhi: Do të votojmë pro arrestimit të Sali Berishës



Gazment Bardhi ka komentuar kërkesën që SPAK i ka dërguar Kuvendit për heqjen e imunitetit të Sali Berishës.

“Ne jemi njohur përmes mediave me kërkesën e SPAK. Lajm i mirë që e di adresën e Kuvendit. Ne votojmë pro çdo kërkese të SPAK. Por Rama të përmbushë tre kërkesat tona, dhe kthehemi në normalitet dhe marrim pjesë në votim. Në të kundërt, asnjë çështje dytësore nuk devijon opozitën nga aksioni”, tha Bardhi në një prononcim për mediat.

Koha Jone

[Albo]

Çim Peka: Tre gjërat që kërkon të arrijë Rama me kërkesën e sotme të Altin Dumanit

Gazetari Çim Peka me një reagim të tij në Facebook, shkruan se Edi Rama kërkon të arrijë tre gjëra, duke përdorur Altin Dumanin, i cili ka bërë sot kërkesë në Kuvend, për ndryshimin e masës së sigurisë.

Rama do të arrij tre gjera me vendimin e sotëm të Altin Dumanit:

1-Ti mbyll gojën Berishës për Rea Xhillarin dhe inceneratorin e Tiranës.

2-Ta bëjë fushë të djegur në opozitë për zgjedhjet e 2025.

3-Të deligjitimojë përfundimisht SPAK kur të vije koha të merren me të!

Për dy të parat se ka në dore Edioti, për të fundit e ka në dorë vetë “Banda kriminale SPAK”!

PS: Pardje Taulant Balla i ka kërkuar Irena Gjokes të ndërmarrë urgjent një hap tjetër pasi po i zë poshtë Berisha dhe grupi i PD me akuzat për Rean dhe inceneratorin e Tiranës.


Syri

[Albo]

Bushati: SPAK ka bërë gjënë e duhur! Shqipërisë i shkon të jetë një vend me liderin e opozitës në burg

Pas vendimit politik të SPAK për arrestimin e liderit të opozitës, Sali Berisha, ka reaguar edhe analisti i njohur, Andi Bushati.

Nëpërmjet një postimi në Facebook, Bushati shprehet se SPAK ka bërë gjënë e duhur sot, duke nënkuptuar se Shqipëria është një regjim i një partie shtet dhe si i tillë i shkon që lideri i opozitës së jetë në burg.



Syri

[Albo]

'Vepër e Ramës'/ Berisha: Ky akt që ndërmerret kundër meje është frymëzim, kushtrim i ri për opozitën



Pasi Struktura e Posaçme Antikorrupsion i kërkoi sot autorizim parlamentit për arrestimin, heqjes e lirisë së deputetit Sali Berisha, të cilit deri dje i kishte dhënë masë sigurie ndalimin e daljes jashtë vendit, Berisha u shpreh i qartë sot para mediave:

"Çfarëdo vendimi pas autorizimit të parlamentit, do ta respektoj pa asnjë diskutim, - tha ai. - Qëndrimi im, i përsëritur këtu, ua kam thënë sa herë keni pyetur, ka të bëjë me kushtetutshmërinë e vendit.

Unë nuk mund të bëhesha kurrë njeriu që zbatoi një vendim antikushtetues. Isha në vështirësi në këtë rast se kishte të bënte me mua, por ai ishte një akt i shkruarjes së Kushtetutës në zyrat e prokurorëve ose gjykatësve. Nuk mund të ndodhte dhe nuk ndodh kurrë përmes Sali Berishës.

Tani parlamenti të vendosë ç’të dojë, sepse unë kam firmosur në vitin 2012, abrogimin e nenit 70 të Kushtetutës, pikës 3 që i jep atributet deputetit. Ndaj dhe kjo është një gjë që po e vendosi parlamenti... unë vetë po e përgatisja për ta dërguar në Gjykatën Kushtetuese. Se në rast se Gjykata Kushtetuese vendos, unë do e zbatoj sepse vendimi i Gjykatës Kushtetuese është i barabartë me prerogativën kushtetuese.

Një vendim i Gjykatës Kushtetuese për mua do ishte 100 përqind i zbatueshëm për faktin se në doktrinën e të drejtës, vendimi i Gjykatës Kushtetuese është i barabartë me prerogativën dhe ajo bëhej shteg për t’u zbatuar ai amendament që unë kam çuar në vitin 2012...

...Kjo e gjitha është e Edi Ramës, por unë këtu para jush e kam thënë 100 herë që jam pa asnjë kusht për hetimin, sepse e kemi hequr nga Kushtetuta hetimin. Unë nuk mund të kem dy qëndrime, unë jam njeri i një standardi.

A është i drejtë apo i padrejtë, ai është tjetër qëndrim, por asnjë lloj shmangie nga organet e drejtësisë nuk mund të ketë, përveç rastit kur ato i morën pushtet, parlamentit.

Tani e zgjidh parlamenti. Sa herë kanë ardhur për të sjellë ato fletushkat, u kam thënë dërgojini në parlament. Kjo ka qenë përgjigjia ime.

Tani vendos parlamenti, të jetë fare i lirë parlamenti."

"Edhe njëherë.

Vendimi i parlamentit do të zbatohet nga Sali Berisha, sado që vendimi i SKAP është vendim i paligjshëm, i bazuar në një vendim të paligjshëm.

Por nëse parlamenti (se edhe njëherë, kufizimet ndaj drejtësisë, imuniteti, nuk janë të individit, janë në radhë të parë të parlamentit; janë të parlamentit në mënyrë që askush të mos mund ta destabiliziojë me procedura të tjera parlamentin. Ky është morali i tyre; pastaj sigurisht individi është pjesë e parlamentit) në këtë kontekst, nëse parlamenti pranon këtë vendim të paligjshëm të bazuar edhe ky mbi një vendim antikushtetues të paligjshëm, është përgjegjësia e tij!

Unë do të përputhem me veprimet e gjyqësorit.

Përsa i përket opozitës të garantoj se asgjë nuk e ndalon dot betejën e saj pa kthim gjer në fitore. Ajo do të zhvillohet në çdo skaj dhe shqiptarët e shohin këtë si një përpjekje tjetër për të dëmtuar opozitën dhe për ta çaktivizuar atë. Por e kundërta do të ndodhë.

Ky është një frymëzim për opozitën. Ky akt që ndërmerret kundër meje, është një frymëzim dhe kushtrim i ri për opozitën. Në këtë kontekst ndihem më i motivuar se kurrë. "

Video


Syri

[Ingenuous]

Amerika kunder (me dosje te manipuluara nga MecGonigal)
Ramen kunder (perdor cdo pushtet e gjithcka per ta sulmuar)
Mediat kunder (sherbetore te qeverise)
Bashen kunder (pengu i Rames)
Spak kunder (me nje çeshtje qesharake)
Grupet mafioze kunder (sepse Berisha i ka sulmuar gjjthmone, i ka arrestuar te gjithe kur ai qeveriste)
Kohen kunder (mosha dhe koha ne politike)

Por keto skane asnje problem per Sali Berishen, sepse ai eshte nje Luftetar dhe nuk dorezohet kurre!

Kushdo tjeter ne keto kushte, do kishte marre fund... per Berishen eshte e kunderta, e shijon çdo beteje dhe merr vemendjen, mobilizohet dhe aktivizohet me shume. Mund te kemi e themi shume gjera kunder Berishes, ka bere te mira dhe te keqija, por nje gje eshte e vertete... Berisha eshte UNIK dhe GLADIATOR qe nuk dorezohet kurre!!!

[Albo]

Berisha: Skapistët do shkojnë në Këshillin e Mandateve për të legalizuar aktin e tyre të paligjshëm



Lideri i opozitës Sali Berisha i është përgjigjur interesit të mediave sot lidhur me qendrimin që do të mbajë ai dhe Grupi i tij parlamentar ditën e hënë, kur Këshilli i Mandateve do të shqyrtojë kërkesën e SPAK për ashpërsimin e masës së sigurisë ndaj tij.

"Për sa i përket pjesëmarrjes në Këshillin e Mandateve, - tha berisha, - unë do konsultohem me avoketërit, sepse aty në Këshillin e Mandateve, skapistët nuk shkojnë për të marrë miratimin siç përcakton Kushtetuta, të autorizimit për sanksionimit të Sali Berishës. Por në mënyrën më të turpshme shkojnë për të legalizuar aktin e tyre të paligjshëm, jolegjitim.

Shkojnë me kërkesën, meqenëse unë nuk kam pranuar masat e tyre të sigurisë, fund e krye antikushtetuese, meqenëse unë kam refuzuar të bëhem pjesë e një puçi antikushtetues të Edi Ramës, të marrjes së pushtetit të parlamentit, nëpërmjet larove në SKAP dhe gjykatë, atëherë sipas tyre, kërkojnë autorizim për rëndim të masave të sigurisë.

E kupton që dalin lakuriq mercenarë politikë?! Kjo është e vërtetë. Duke thënë të gjitha këto, unë do dëgjoj edhe zërin e avoketërve, sepse siç e keni konstatuar se pavarësisht nga të gjithë denoncimet e drejta që kam bërë për ta, jam përpjekur të dëshmoj se nuk pranoj të jem në një mjedis apo moment parashtetëror.

Jo, ato ashtu siç janë, avoketërit e mi kanë qenë vazhdimisht në ndjekje, ndonëse procesi është antikushtetues."

Video

Syri

[Albo]

Berisha: PD-në do ta drejtoj edhe nga qelia e burgut!



Sali Berisha në studion e “Opinion” te Blendi Fevziut tha ndër të tjera se Partinë Demokratike do ta drejtojë edhe nga qelia e burgut.

Me tej Berisha u pyet që mund t’ju ndalojnë edhe facebookun dhe komunikimin me ndjekësit nga rrjetet sociale. Ai insistonte se nuk më ndalon njeri dot, por nëse ka një vendim gjykate ai nuk ka asnjë mundësi të lidhet me demokratët.

Ndër të tjera ish-kryeministri demokrat shtoi se do të ketë mosbindje civile nga dita e hënë.

Koha Jone

[Albo]

Kur bën ujdi me djallin, nuk merr dot më mëshirën e Zotit, të pret vetëm ndëshkimi i Tij!

Edi Rama ka bërë ujdi me djallin. Dhe sot po e kupton që i ka ditët e numëruara jo vetëm në pushtet, por i ka ditët e numëruara edhe në Shqipëri. Të gjitha makinacionet e tij me blerjen e shantazhin e Lulzim Bashës, shpalljen e Berishës person të padëshiruar në Amerikë me ndihmën e miqve të paguar në FBI, të gjitha urdhrat e Baba Sorsoit dhe djalit të tij Lekos, u bënë që t'i mbyllej goja një shqiptari të vetëm me emrin Sali Berisha. Ky i fundit ishte një politikan pensionist. Të gjitha këto përpjekje të Ramës dështuan. Sali Berishës nuk ia mbyllën dot gojën. Duke qenë politikani më me përvojë dhe më i votuari i pluralizmit shqiptar, Sali Berisha di si të bëjë opozitë e të godasi atje ku i dhëmb pushtetit. Brenda një kohe të shkurtër, Sali Berisha demaskoi publikisht gjithë aferat korruptive të Ramës dhe njerëzve të tij. Ministrat e Ramës e gjejnë veten ose në burg, ose nën hetimin e drejtësisë.

Dhe dalim tek "arrestimi i Berishës".

Hall i madh e ka gjetur Edi Ramën. Pasi e mbushi parlamentin me deputetë nga bota e krimit që u shiste imunitetin ndaj ligjit në këmbim të parasë në xhepin e Ramës, sot i njëjti Rama u kërkon me plot seriozitet:

- Votoni që Sali Berishës t'i hiqet imuniteti e ta arrestojë SPAK!

Deputetët socialistë, shumica e të cilëve janë nga bota e krimit, nuk janë njerëz budallenj dhe nuk u jep dot as urdhra kollaj. Ata e dinë që po votuan për heqjen e imunitetit të Berishës, dhe i hapin krahun arrestimit të tij, kjo përbën një preçedent të rrezikshëm për ta. U bënë deputetë për ata imunitet ligjor! Sot ia heqin imunitetin Berishës. Po nesër kush e ka rradhën? Do të jetë interesante të numërojmë se sa socialistë do të votojnë pro apo kundër heqjes së imunitetit të Berishës.

Nga krahu tjetër i Kuvendit, demokratët janë gati të votojnë për heqjen e imunitetit të Berishës. Ata e dinë që akuzat ndaj Berishës nuk kanë asnjë bazë. Por ama ato do t'ia shtojnë rradhët e mbështetësve opozitës dhe do të ndihmojnë për të krijuar aksionin politik opozitar të rrezimit të Edi Ramës nga pushteti.

Dalim edhe tek gjataveli Edi Rama! Këtë të shkretin ka ditë që nuk e zë gjumi natën. Urdhrin për arrestimin e Berishës, nuk e ka dhënë ai, e kanë dhënë eprorët e tij në Gjenevë. Ai është kapteri që zbaton urdhrat e dhëna. Nuk e zë gjumi të shkretin pasi e ka të qartë që nga momenti që një kryeministër arrestohet e futet në burg, një fat i ngjashëm e pret edhe atë. Berisha nuk jeton në vila lluksoze dhe nuk ka probleme me ligjin brenda dhe jashtë vendit si kryeministri ynë Rama! Frikës se mos ish bashkëpuntorët e tij e denoncojnë hapur në publik dhe në prokurori për vjedhjet e kësaj dekadës së fundit, iu shtua edhe "çështja Berisha".

Siç tha një pensionist në Tiranë:

- Ore nuk e kuptoj! Berisha i gëzuar më del në televizor, edhe pse duan ta arrestojnë e fusin në burg! Ky i gjati nxin në fytyrë e ka harruar të qeshi!

Ia kthen miku i tij:

- E o Sulo e! Nuk kanë thonë kot ata të parët tanë. "Foli pragut, të dëgjojë dera!"

- Mos deshe të thuash: Fut në burg Berishën, që të dëgjojë Rama?!

[Albo]

Mbështetësit e Bardhit firmosin kundër arrestit për Berishën



Mes emrave të 30 deputetëve që kanë firmosur kërkesën dërguar në Gjykatën Kushtetuese, për të bërë të mundur pezullimin e arrestimit të Sali Berishës gjenden edhe ata që nuk e njohin atë për kryetar.

Përveç 19 deputetëve të Rithemelimit, firmën për mbrojtjen e ish-kryeministrit, në hetim për aferën e privatizimit të klubit “Partizani”, e ka dhënë edhe Gazmend Bardhi bashkë me 10 deputetë të grupit të tij. Në mesin e firmëtarëve përveç Gaz Bardhit janë dhe deputetë të grupit të tij si Agron Gjekmarkaj, Dhurata Çupi, Helidon Bushati, Saimir Korreshi apo edhe Lefter Gështenja.

Ky grupim i kërkon gjykatës një interpretim se si veprohet kur kufizohet liria e deputetit.

Por në pikën 4 të kërkesës që ata kanë depozituar në Gjykatën Kushtetuese kërkohet: “Pezullimi i masave shtrënguese të sigurimit personal ndaj deputetit Sali Berisha derisa Gjykata Kushtetuese të shprehet me vendim përfundimtar për këtë çështje”

Mbështetja e grupit të Bardhit kishte vlerë të veçantë për të siguruar numrin e firmave (jo më pak se 28 deputetë) për të bërë të mundur padinë në Gjykatën Kushtetuese. Grupi i deputetëve kërkon nga Gjykata Kushtetuese, rrëzimin e vendimit të parë të GJKKO-së dhe pezullimin e të gjithë të tjerëve që rrjedhin prej tij, në kushtet kur nuk u përfill imuniteti i deputetit dhe kur për masën “për detyrim paraqitje”, nuk u kërkua autorizim nga Kuvendi.

Të hënën në mesditë Këshilli i Mandateve mblidhet për të diskutuar kërkesën e SPAK për dhënien e autorizimit për arrestimin e Sali Berishës. Ish-kryeministri, ende nuk ka konfirmuar nëse do të jetë para anëtarëve të Këshillit të Mandateve për t’u mbrojtur. PD ka lajmëruar se do të thërrasë një protestë para kryesisë së Kuvendit.

Konfirmim nuk ka as për prezencën e anëtarëve të opozitës në Këshillin e Mandateve. 4 nga 5 prej tyre, Gazment Bardhi, Greta Bardeli, Ervin Salianji dhe Saimir Korreshi janë pjesë e aksionit me flakadanë për të mos lejuar funksionimin normal të kuvendit dhe nuk dihet nese do ta ndërpresin atë në mbrojtje të Berishës.


Lapsi

[Albo]

Lulzim Basha, sërish sot i shërbeu kryeministrit Rama



Përmes ushtarit të tij, Enkelejd Alibeajt, ai u siguroi socialistëve një votë për t’i hequr imunitetin, ish-kryeministrit Sali Berisha.

Sot në mbledhjen e Këshillit të Mandateve, Enkelejd Alibeaj u paraqit si përfaqësues i PD-së së vulës për të thënë se nuk ka asnjë dyjëzim në qëndrimin e tij dhe se është pro heqjes së imuntetit të ish-kryeministrit Sali Berisha.

"Sa herë ka një kërkesë dhënie imuniteti dhe heqje imuniteti, ne kemi qenë pro. Asnjë justifikim nuk duhet të ketë, asnjë pengesë nuk duhet të krijohet kur drejtësia e kërkon. PD ka përgatitur edhe një amendament për rregulloren e Kuvendit. Jam pro hapjes së rrugës së drejtësisë. Zero imunitet për askënd, mbështetje për SPAK-un", u shpreh Alibeaj.

Kështu, Basha vërtetoi se është kthyer në marionetën e Ramës, i cili e përdor sa herë i duhet një votë në parlament apo si në këtë rast në mbledhjen e Këshillit të mandateve.

Të njëjtën lëvizje, "petritët" e bënë dhe në seancën ku u miratuar projektbuxheti i vitit 2024.

Pavarësisht se votuan kundër ata plotësuan kuorumin dhe më pas deklaruan se ishin në atë seancë për t’i thënë jo projektbuxhetit të qeverisë.

Kjo është loja e pisët që Basha vijon të luajë në prapaskenë në shërbim të Ramës dhe kundër demokratëve.

Sot në Këshillin e Mandateve u votua me 6 vota pro heqjes së imunitetit të Sali Berishës, duke ui hapur kështu rrugën SPAK për të kryer arrestimin e ish kryeministrit.

Opozita zbriti sot në shesh për të protestuar kundër regjimit të qeverisë, që sipas saj ka kapur çdo pushtet.

Ish kryeministri Sali Berisha akuzohet për korrupsion pasiv për dosjen e ish kompleksit Partizani.

SPAK ka kërkuar autorizim nga Kuvendi i Shqipërisë për zëvendësim të masës së sigurisë për Berishën, nga detyrim me paraqitje në arrest me burg/ shtëpie.

CNA

[Albo]

Rama dhe Basha bashkojnë votat për arrestimin e kreut të opozitës, Sali Berisha



Deputetët socialistë dhe Enklelejd Alibeaj votuan për arrestimin e kryetarit të opozitës, Sali Berisha.

5 deputetë të Edi Ramës kanë votuar pro, ndërsa votë pro ka dhënë edhe deputeti i Lulzim Bashës, Enkelejd Alibeaj.

Në këtë mënyrë, Këshilli i Mandateve ka vendosur për heqjen e mandatit të kreut të PD-së, Sali Berisha.

Ditën e enjte në 21 dhjetor, pritet që kërkesa e SPAK të votohet në parlament.


Syri

[Albo]

Ish prokurori i Krimeve të Rënda: Këshilli i Mandateve veproi me hile për rastin e mandatit të Berishës, nuk i kërkuan SPAK arsyen e kërkesës



Këshilli i Mandateve dhe Imuniteteve miratoi sot me 6 vota pro dhe asnjë kundër që kërkesa e Prokurorisë së Posaçme t’i kalojë Parlamentit për heqjen e mandatit të deputetit Sali Berisha.

Eugen Beci, ish-prokuror i Krimeve të Rënda, deklaroi në emisionin “Të Paekspozuarit”,, se Këshilli i Mandateve veproi me hile, duke mos i kërkuar Prokurorisë së Posaçme arsyet e kërkesës për heqjen e mandatit të Berishës.

“Ajo që ndodhi sot në Kuvendin e Shqipërisë, siç tha edhe z. Alibeaj, është një kërkesë proceduriale rutinë. Gjykata Kushtetuese do të gjykojë më vonë kërkesën e 1/5 së deputetëve, ndaj Këshilli i Mandateve zhvilloi një procedurë rutinë.

Gjykata Kushtetuese mund të rrëzojë gjithçka, edhe vendimin e sotëm e të Kuvendit, por nuk mund ta pezullonte sot.

Prokuroria e Posaçme ka menduar që duhet të rëndohen kushtet ndaj një shtetasi. Sot u kërkua heqja e imunitetit të një deputeti. Në rastin më të afërt të tillë, atë të Saimir Tahirit, Këshilli i Mandateve i dha autorizim Prokurorisë së Krimeve të Rënda që të caktonte detyrim për masë paraqitje, ndalimin e daljes jashtë shtetit dhe kontrollit personal, pra kuptojmë që Kuvendi i Shqipërisë paska autorizim për të ndaluar daljen jashtë shtetit, dhe në analogji me ditën e sotme duket se është tejkaluar nga Prokuroria e Posaçme.

Sot Këshilli i mandateve anashkaloi me hile, sepse, nëse i shkon Kuvendit dhe i thua dua që të lufizoj apo të heq imunitetin e një deputeti, ligji parashikon që ti duhet të shkosh me një relacion konkret dhe t’i thuash arsyet me prova ku ti e bazon këtë kërkesë dhe nuk mundet që të ecësh me hile proceduriale dhe të thuash se ne nuk kemi punë me fabulën, por kemi punë me këtë njeriun që i kam caktuar detyrim për t’u paraqitur dhe nuk është paraqitur. Nuk funksionon kështu, që të shkosh dhe të kërkosh heqjen e imunitetit dhe të mos thuash se çfarë ka bërë. Ligji e ka të përcaktuar qartë që kur i drejtohesh parlamentit për heqjen e imunitetit, duhet ta shoqërosh me një relacion me fakte”-tha Beci.

Syri

[Albo]

Deklaratë e Kryetarit të Partisë Demokratike, Sali Berisha



Siç është bërë tashmë e njohur, me datë 21 tetor 2023 prokurorët politik Arben Kraja, Enkeleida Millonaj dhe gjykatësja Irena Gjoka në një akt të pashembullt në 32 vite dhe në kundërshtim flagrant me kushtetutën njoftuan se kishin vendosur ndaj meje natyrisht me urdhër politik të Edi Ramës dhe pa miratimin e Parlamentit masat shtrënguese që vijojnë:

1- Heqjen e lirisë të lëvizjes jashtë vendi

2- Detyrimin për t’u parqitur dy herë në muaj në polici si person nën hetim.

Në krye të herës deklaroj:

Së pari, këto masa janë vendosur me urdhër të Edi Ramës bazuar kryekëput në shpifje trillime, fshehje dokumentash dhe manipulime të prokurorisë politike.

Pas tre vitesh hetimesh shterruese të nisura nga një kallzim i rremë i Taulant Ballës për privatizimin e Klubit Sportiv Partizani ata edhe sot nuk paraqitën dot asnjë provë, fakt, dokument apo dëshmi që të provojnë qoftë dhe një shkelje të vetme të ligjeve nga Sali Berisha dhe zyrtarët që janë marrë me procesin e dosjes së këtij privatizimi.

Në tre vite hetime shterruese prokurorët politik nuk kanë gjetur një vendim apo dokument të vetëm të firmosur nga Sali Berisha në 15 vite që kanë zgjatur proceset e njohjes dhe kthimit të pronës tek pronarët legjitim dhe as të privatizimit të objekteve të Klubit Partizani të ndërtuara mbi tokën e këtyre pronarëve.

Ata në tre vite hetimi shterrues kanë pyetur dhjetra e dhjetra punonjës që janë marrë me dosjen e Klubit Partizani dhe pronar të territorit të këtij Klubi, por nuk kanë gjetur një person të vetëm që të deklarojë se ka patur ndërhyrjen më të vogël nga Sali Berisha në vendimet e tij të lidhura me privatizimin e objekteve të Klubit Sportiv Partizani.

Gjithashtu në tre vite hetime prokurorët politik kanë pyetur dhjetra e dhjetra dëshmitarë, por nuk kanë guxuar kurrë të më pyesin një herë të vetme dhe kjo vetëm e vetëm se e dinë se piramida e tyre e mashtrimit do të shkrihej si bryma para diellit.

Së dyti këto masa janë vendosur në shkelje flagrante të Kushtetutës, konkretisht të nenit 73 pika 2 e të cilit thotë se ‘ Deputeti nuk mund të arrestohet ose t’i hiqet liria në çfarëdo lloj forme apo ndaj tij të ushtrohet kontroll personal ose i banesës, pa autorizimin e Kuvendit dhe nenit 38 i cili garanton lirinë themelore të individit, lëvizjen e tij të lirë brenda dhe jashtë vendi dhe që në pikën 1 dhe 2 garanton se:

Ky nen në pikën 1 shprehet:

Kushdo ka të drejtë të zgjedhë vendbanimin si dhe të lëvizë lirisht në çdo pjesë të territorit të shtetit, dhe në pikën 2 thotë se:
2-Askush nuk mund të pengohet të dalë lirisht jashtë shtetit’.

Ky vendim antikushtetues tipik për regjimet totalitare është i pari i këtij lloji në 32 vite Parlamenti pluralist.

Vendosjen e këtyre masave pa miratimin e parlamentit e kam denoncuar në mënyrë të përsëritur në media:

Së pari si një shkelje të rënde të Kushtetutss, neneve ts saj ts cituara më sipër dhe si një shkruarje të ligjit themelor të shtetit nga prokuror dhe gjykatës të papërgjegjshëm, gjë të cilën nuk mund ta bëjë asnjë person, president, kryeministër apo kushdo tjetër.

Këtë të drejtë e ka ekskluzive Parlamenti i Shqiperisë ose populli me referendum.

Së dyti po në kontekstin e marrjes me urdhër të Edi Ramës nga gjykatës dhe prokurorët politik, të kompetencave, pushtetit të parlamentit, institucionit qendror të shtetit në një Republike Parlamentare shtoj se kushtetuta e vendit garanton, njeh si pushtet ekskluziv të parlamentit jashtë rasteve të flagrancës dhënien e autorizimit sistemit gjyqësor për heqjen e lirisë së deputetit.

Në respekt të nenit 73 pika 2 të Kushtetutës në 32 vite pluralizëm nuk ka ndodh kurrë që të vendosen masa shtrënguese, heqje lirie ndaj ndonjë deputetit pa miratimin praprak të parlamentit. Imuniteti i deputetit nuk është i personit, por i parlamentit për mbrojtjen e funksinimit të tij.

Me këtë rast shtoj se refuzimi im për të pranuar këtë urdhër të prokurorëve dhe gjykatëses që për të zbatuar urdhërin politik dalin mbi kushtetutën dhe mbi parlamentin nuk ka patur asgjë personale, absolutisht asgjë personale. Rikujtoj këtu se në tetor të vitit 2012 kur parlamenti votoi për lejimin e hetimit të personave me imunitet pa miratimin e tij paraprak, une kam insistuar për abrogimin e plotë të pikës 2 të nenit 73 të Kushtetutës, pra kam kërkuar që të mos ketë asnjë lloj mbrojtje parlamentare për personat me imunitet. Por ky propozim të cilin jam gati ta votoj edhe sot u refuzua në mënyrë kategorike nga Edi Rama. Ndaj dhe kur ky nen ekziston në kushtetuten e vendit unë besoj fort se ai është vetëm për t’u zbatuar dhe nuk kam pranuar dhe nuk pranoj kurrë në asnjë rrethanë të legjitimojë një vendim antikushtetues që de fakto shënon abrogimin e nenit 73 pika 2 të Kushtetutës jo nga parlamenti, por njerëz të quajtur të ligjit, në fakt mercenar pa ligj dhe moral që në papërgjegjshmëri të plotë pranonin të shkruanin, ndryshonin sipas urdhërit politik librin themelor të shtetit duke injoruar me vetdije të plotë faktin se cilido që merr përsipër një akt të tillë, i merr parlamentit pushtetin me pasoja kjo katastrofale puçiste për rendin kushtetues të vendit. Personalisht nuk kam refuzuar dhe nuk do refuzojë ndonjëherë thirrjen e Prokurorisë apo Gjykatës për t’u pyetur, përkundrazi jam paraqitur kur jam thirrur dhe do të paraqitem sa herë të thirrem. Kështu që me refuzimin e vendimit politik nuk kam mbrojtur Sali Berishën si individ sepse ndoshta personalisht unë kisha interes të zbatoj vendimin antikushtetues dhe të mos merrem me parlamentin monist në të cilin jam në betejë pa kthim, mosbindje civile për të drejtat kushtetuese të mohuara. Por unë me qëndrimet e mia zgjodha të mbroj kushtetutën dhe pushtetin që ajo bazuar në parimin themelor të ndarjes dhe balancës së pushteteve i jep parlamentit, pushtet të cilin në një akt të mirëfilltë puçist, krim të shëmtuar ia marrin me urdhër prokurorët politik Kraja, Millonaj, Gjoka me porosi të Edi Ramës.

Pikërisht për marrjen në një akt puçist me urdhër të Edi Ramës të kompetencave të parlamentit nga prokuror dhe gjykatës politik, grupi parlamentar i Partisë Demokratike i është drejtuar Gjykatës Kushtetuse për t’u shprehur për këtë konflikt që nuk ka ndodhur kurrë më parë.

Por ndërkohë me datë 12. 12. 2023 po këta prokurorë që kanë shkelur rëndë Kushtetutën dhe kanë marrë pushtetin parlamentit duke e ndjerë veten përsëri mbi Kushtetutë dhe Parlament në një akt të pashembullt në histori i kërkuan këtij të fundit jo vetëm të legalizojë vendimin e tyre antikushtetues të dates 21. 10. 2023 por e urdhërojnë atë që meqenëse unë nuk e zbatova të zëvendësojnë këtë vendim të paligjshëm për të njëjtat shkaqe që kanë marrë vendimin e parë me një vendim më të rëndë arrest me burg ose arrest shtëpie, njëlloj sikur Parlamenti të ishte një prokurori e një shkalle më të lartë apo thjesht një zyrë legalizimi i aktve të paligjshme të tyre dhe jo Institucioni Qendror i Republikës. Ata pasi kanë konsumuar një vepër të rëndë para Parlamentit të cilët nuk morën leje për masat shtrënguese ndaj meje që nuk mund t’i vendosnin kurrë ndaj një deputeti pa miratimin e tij, tani e poshtruan atë duke i imponuar jo vetëm të përligj dhe pranojë faktin e kryer, por të nënshtrohet dhe të pranojë rendimin e masave shtrërngues jo mbi bazën e dokumentave, fakteve, provave apo dëshmive fajsuese, por vetëm për shkak të refuzimit nga unë të vendimit antikushtetues dhe në mbrojtje të parlamentit nga akti puçist i Edi Ramës me prokurorët dhe gjykatësit e tij politik.

Çdo njeri që njeh Kushtetutën, që njeh Parlamentin e ka të qartë se në kushte të respektimit te parimit të ndarjes dhe balancës së pushtetit kjo kurrë nuk mund të imagjinohej. Kjo kurrë nuk mund të pranohej nga një Parlament. Mirëpo ky është një realitet jo imagjinar por real. Kjo ndodhi vetëm e vetëm se sot prokuroret, gjykatësja speciale dhe parlamenti janë thjesht vegla të pushtetit të një njeriu, Edi Ramës që urdhëron parlamentin të pranojë kërkesa të tilla poshtëruese për të dhe të sillet para tyre thjesht si noter apo si zyrë e legalizimit të vendimeve të tyre antikushtetuse dhe madje edhe të vendosë sipas kërkesës së tyre masat që vetë Edi Rama i ka urdhëruar.

Per të gjitha këto une nuk mora pjesë në mbledhjen e Komisionit të mandateve dhe nuk mund të përligjja mbledhjen e një komisioni të bazuar në një kërkesë të paligjshme, absolutisht poshtrues të puçistëve që për llogari të Edi Ramës i morën pushtetin Palamentit dhe i imponuan atij të legjitimojë aktin e tyre të paprecedent si hakmarrje politike për mbrojtjen që unë me qendrimet e mia i bëra Kushtetutes dhe Parlamentit.

Vendimi i sotëm i komisionit Rama-Brava për të përligjur aktin antikushtetues të mercenarëve të Edi Ramës është një dëshmi tjetër e qartë e kontrollit total të Edi Ramës të çdo pushteti në Shqipëri

Duke përfunduar Partia Demokrtatike ju bën thirrje demokrateve dhe demokratëve, mbarë qytetarëve të vendit të vazhdojmë betejën tonë pa kthim të mosbindjes civile deri në përmbysjen e regjimit të Edi Ramës të bazuar në drogën, krimin dhe vjedhjen e shqiptarëve.

Koha Jone

[Albo]

Kuvendi dërgon në SPAK vendimin për Berishën



Vendimi i zbardhur dhe i firmosur i Kuvendit për heqjen e imunitetit të Sali Berishës i është dërguar sot Prokurorisë së Posaçme SPAK.



Me 75 vota pro dhe brenda 8 minutave Kuvendi ka votuar kërkesën e SPAK për heqjen e imunitetit për deputetin Sali Berisha.



Ish-kryeministri refuzoi të merrte fjalën gjatë nisjes së seancës plenare, ku iu kërkua të fliste mbi kërkesën e SPAK. Berisha kërkoi nga kryetarja e Kuvendit që të hiqej Garda e Republikës nga foltorja në mënyrë që ai të merrte fjalën.

Me vendimin e parlamentit tani i hapet rruga gjykatës për ashpërsimin e masës së sigurisë ndaj ish-kryeministrit.

Euronews

[Albo]

Berishës i hiqet imuniteti, Kuvendi i hap rrugë arrestimit të tij



Sali Berisha do të përballet me drejtësinë pa imunitetin e deputetit. Kuvendi votoi pro kërkesës së SPAK, i cili ka kërkuar një masë më të fortë, atë të arrestit me burg apo arrest shtëpie. Me 75 vota pro, u miratua në një situatë të pazakontë në sallën e seancave plenare, teksa opozita protestonte në sallë, por dhe jashtë Kuvendit. Zyrtarisht seanca plenare zgjati vetëm 8 minuta, ndërkohë që maxhoranca votoi njëzëri kërkesën e SPAK, që kërkonte heqjen e imunitetit për Berishën, i cili akuzohet për çështjen e privatizimit të ish-kompleksit Partizani.

ZHVILLIMET
Një seancë plenare në kushte të pazakonta. Teksa opozita protestonte jashtë sallës, kryeparlamentarja Lindita Nikolla njoftoi nisjes e seancës, ndërsa në rend të ditës, e para çështje ishte imuniteti i Berishës. Teksa lexoi rregulloren, Nikolla ftoi Berishën për të marrë fjalën, por ky i fundit refuzoi.

Kujtojmë se dje Gjykata Kushtetuese rrëzoi kërkesën e 30 deputetëve të opozitës për të cilësuar antikushtetuese masat ndaj Berishës, ndërsa ajo ia kaloi procedurën e radhës Kuvendit. Sakaq, dje ish-kryeministri Sali Berisha iu bëri thirrje qytetarëve që të jenë pjesë e protestës së opozitës. Nën moton “O sot, o Kurrë”, Berisha theksoi se kjo protestë do të mbahet pasi qeveria Rama po ndërmerr vendime antikushtetuese, si dhe paralajmëroi se jo vetëm jashtë Parlamentit, por më datë 21 dhjetor do të vijojë edhe mosbindja civile e deputetëve brenda sallës se seancës plenare.

Berisha paralajmëroi protesta edhe përpara SPAK, institucion, i cili sipas tij po amniston Ramën.

Video

Video

RAPORTET
Këshilli i Mandateve dorëzoi në Kuvend 2 raporte lidhur me kërkesën e SPAK për dhënien e autorizimit për arrestimin e ish-kryeministrit Sali Berisha. Konkretisht, u dorëzuan në Kuvend “Raporti rekomandues i deputetëve të shumicës parlamentare, anëtarë të Këshillit për Rregulloren, Mandatet dhe Imunitetin dhe Raporti rekomandues i deputetit Enkelejd Alibeaj, anëtar i Këshillit për Rregulloren, Mandatet dhe Imunitetin, për shqyrtimin e kërkesës së Prokurorisë së Posaçme kundër Korrupsionit dhe Krimit të Organizuar për dhënien e autorizimit për arrestim/heqje lirie për Berishën nëpërmjet zëvendësimit të masës së sigurimit”. Kujtojmë se pak ditë më parë, Këshilli i Mandateve dhe Imunitetit ka votuar pro dhënies së autorizimit të SPAK për heqjen e lirisë së Sali Berishës në lidhje me çështjen “Partizani”.

(BalkanWeb)

[Albo]

Gjykata Kushtetuese rrëzon kërkesën për pezullimin e masave ndaj Berishës

Sipas Gjykatës Kushtetuese, të drejtën për të kërkuar interpetim e ka ish-kryeministri Sali Berisha pas përfundimit të shqyrtimit në shkallët e tjera të gjyqësorit, SPAK, Gjykata dhe Kuvendi, por jo grupi i deputetëve.

Nga Edmond Hoxhaj


Ish-kryeministri Sali Berisha në një konferencë me gazetarët të premten, Foto: LSA

Në prag të seancës kur Kuvendi i Shqipërisë pritet të votojë kërkesën e SPAK për arrestimin e ish-kryeministrit Sali Berisha, Gjykata Kushtetuese nuk pranoi një kërkesë të disa deputetëve të opozitës për pezullimin e masave të sigurimit të caktuara nga Gjykata e Posaçme.

Më 15 dhjetor, një grup prej jo më pak se një e pesta e deputetëve të Kuvendit kërkuan në Gjykatën Kushtetuese intepretimin përfundimtar të nenit 73, pika 2 të Kushtetutës, duke parashtruar se ndaj Berishës janë vendosur masat shtrënguese “Detyrimi për paraqitje” dhe “Ndalimi i daljes jashtë shtetit”, pa u kërkuar më parë autorizimi i Kuvendit, sipas përcaktimeve të pikës 2 të nenit 73 të Kushtetutës.

Ata kanë pretenduar se në këto kushte, vendimet gjyqësore për caktimin e këtyre masave ndaj ish-kryeministrit Berisha kanë krijuar një mosmarrëveshje kompetencash midis organit të Kuvendit nga njëra anë, dhe organeve të SPAK-ut dhe GJKKO-së nga ana tjetër. Sipas grupit të deputetëve lind nevoja e interpretimit të nenit 73, pika 2, të Kushtetutës. Ata petenduan se këto masa janë marrë në kundërshtim me Kushtetutën, për rrjedhojë kanë kërkuar pezullimin e tyre.

Kryetarja e Gjykatës Kushtetuese, Holta Zaçaj tha gjatë një konference për shtyp se kërkesa nuk plotëson kriteret ligjore paraprake për pranimin e saj për shqyrtim në seancë plenare duke arsyetuar se, neni 124 i Kushtetutës parashikon se Gjykata zgjidh mosmarrëveshjet kushtetuese dhe bën interpretimin përfundimtar të saj.

Po ashtu, është çmuar se bazuar në nenin 131, pika 1, shkronja “ç”, të Kushtetutës, gjykata vendos për mosmarrëveshjet e kompetencës ndërmjet pushteteve, e cila në rastin konkret pretendohet se është midis Kuvendit, nga njëra anë, dhe SPAK dhe GJKKO, nga ana tjetër.

“Kushtetuta ka mirëpërcaktuar rastet kur grupeve të deputetëve u janë njohur të drejta si entitete dhe në këtë drejtim, një e pesta e deputetëve dhe Kuvendi janë subjekte kushtetuese të ndryshme që nuk mund të barazohen me njëri – tjetrin”, vlerëson shumica e trupës së gjyqtarëve Kushtetues.

Për rrjedhojë, është çmuar se grupi i deputetëve, nuk legjitimohet t'i drejtohet Gjykatës Kushtetuese, me argumentin se ai nuk është subjekt në konfliktin e parashtruar, pasi nuk i është marrë ndonjë kompetencë apo të jetë cenuar drejtpërdrejt në ndonjë kompetencë.

“Grupi i një të pestës së deputetëve, pavarësisht se është pjesë e ushtrimit të veprimtarisë legjislative të Kuvendit, nuk nënkupton që është subjekti kushtetues për të cilin bën fjalë neni 73, pika 2, i Kushtetutës, pra ai nuk mund të veprojë në emër dhe me tagrat e Kuvendit,” arsyeton shumica dhe bazuar në këto arsye ka vendosur të mos e kalojë çështjen për shqyrtim në seancë plenare – prej nga mbeten pa u shqyrtuar në themelin e tyre pretendimet e deputetëve dhe kërkesa për pezullimin e masave të sigurimit personal të caktuara ndaj Berishës.

Kryetarja Zaçaj pohoi se, të drejtën për kërkimin e interpretimit të vendimarrjes së Gjykatës së Posaçme e ka ish-kryeministri Berisha, pas përfundimit të gjykimit në gjithë shkallët e gjyqësorit. Sipas saj, në momentin aktual janë të legjitimuara të bëjnë kërkim në Gjykatën Kushtetuese palët e përfshira në konflikt – SPAK, Gjykata e Posaçme dhe Kuvendi.

Këshilli i Mandateve i Kuvendit të Shqipërisë miratoi të hënën një kërkesë të SPAK për të lejuar caktimin e një mase arresti ndaj ish-kryeministrit Sali Berisha, i akuzuar për korrupsion pasiv në atë që njihet si afera me pronat e Klubit Partizani, pasi Berisha nuk zbatoi masën e mëparshme për detyrim paraqitje. Kërkesa e SPAK për të autorizuar arrestin do të votohet në Kuvend në seancën e së enjtes.

BIRN

[Albo]

Çfarë do të ndodhë me Rithemelimin pas masës së arrestit? Flet Sali Berisha



Në përfundim të mbledhjes së Kryesisë së Rithemelimit, ish-kryeministri Sali Berisha mbajti një prononcim të shkurtër për mediat, ku foli në lidhje me organizimin e partisë pas zyrtarizimit të masës së sigurisë ndaj tij.

Berisha tha se të shtunën pritet të mblidhet Këshilli Kombëtar, ku do të diskutohen çështjet organizative të funksionimit të partisë.

Ish-kryeministri tha se në parti do të caktohen disa koordinatorë, përfshirë dhe grupin e Gazmend Bardhit, të cilët do të kenë një rol të rëndësishëm në vendimarrjen e partisë.

Berisha tha se vendim i gjykatës nuk mund të realizojë ëndërrat e kryeministrit Rama për goditjen e opozitës. Ai nënvizoi se do i qëndroj përballë deri në gjunjëzimin e tij

“Vendimet e kryesisë janë së pari një shumëfishim i të gjitha përpjekjeve për betejën pa kthim; o sot, o kurrë.

Së dyti, kryesia vendos të thërrasë këshillin kombëtar ditën e shtunë. Pastaj u diskutua për disa çështje organizative në mënyrë që të ristrukturohet në një farë mënyre sektori i riorganizimit, duke mbetur z. Minarolli sekretar i organizimit për partinë, por duke krijuar edhe disa kordinatorë që do të merren me organizimin.

U hodhën ide, dhe është e mundshme që të krijohet një grup koordinator qendror për Tiranën.

Pyetje: Është diskutuar që në këtë riorganizim të thërritet edhe grupi i deputetëve të Gazment Bardhit?

Sali Berisha: Grupi i deputetëve të Gazment Bardhit janë deputetë të PD dhe në çdo hap të saj, kanë rolin e tyre dhe do ta kenë rolin.

Pyetje: Kordinatorët që do të përcaktohen, do të koordinoheni me z. Bardhi për të gjetur emra të përbashkët?

Sali Berisha: Natyrisht të gjitha do të bëhen në bashkëpunim, me të gjithë faktorët drejtues të partisë.

Pyetje: Z. Berisha keni kaluar një ditë të gjatë…,

Sali Berisha: Dita e gjatë, por siç e sheh energjia ëhstë e mjaftueshme për të vazhduar këtë ditë.

Pyetje: A do e drejtoni ju PD edhe pse gjykata mund të marrë çdo vendim.

Sali Berisha: Asnjë vendim i gjykatës nuk mund të realizojë ëndërrat e Ramës, por do i qëndroj përballë deri në gjunjëzimin e tij. Ai është frikacak, zgjodhi këtë rrugë, por e garantoj që do të përfundojë aty ku e meriton”, tha Berisha.

Euronews

[pirro2020]

Më në fund pas 33 vjet sundimi të paligjshmërisë në Shqipëri e cila ishte sipas Fatos Nanos një ``Han pa porta`` vjen një lajmi gëzuar: personi i cili drejtoi Shqipërinë dhe Opozitën për 33 vite më në fund i u hoqi muniteti, dhe kërkohet nga drejtësia shqiptare për shkelje të ligjeve, momentalisht për vendime të paligjshmë për privatizimin e klubit `Partizani`, dikur në kohën kur ai për të dytën herë u bë kryeminstër pikërisht me ndërhyrjen indirekte e fqinjit grek në zgjedhjet e vitit 2005.
Shkaqet se përse në vitin 2005 fitoi Partia Demokratike pas tre muajsh hezitime të KQZ, kur shtator në mëyrë jo korrekte kaluan në koalicion e Berishës dy parti të majta Partia Agrare e Lefter Xhuvelit dhe PPDNJ e Vangjel Dules i cili njihet si një leve e politikës greke. Në këtë mënyrë PD e viteve 2005 e cila kishte krijuar dhe KOP, fitoi zyrtarisht zgjedhjet e fituara nominalisht nga PS e Fatos Nanos. Fjalët qarkulluan sepse Fatos Nano i atëhershëm nuk përmbushi dëshirat e grekëve për minoritetin grek në Shqipëri ndërsa Berisha u garantoi grekëve (sipas thashemeve politike) që minoritarët do të jenë më të privilegjuar. Për këtë qëllim erdhi dhe ish-kryetari i CIA-s amerikane Teneti cili ishte me origjinë nga Himara , me sa duke garantoi se PD dhe KOP-i do të përkrahnin çdo inisjative greke në Shqipëri për dobi të minoritetit.
Duke lënë mënjanë shkeljet e ligjit të viteve para 2005 kur Fatos Nano nuk e akuzoi Berishën për ngjarjet e vitit 1997 për Firmat Piramidale dhe për grushtin e shtetit të vitit 1997 kur u vra Azem Hajdari, dhe kur u bë një protestë në korrik të 1998 kuri jati i Leka Zogut doli me armë në dorë dhe i veshur ushtarakisht në Tiranë për të kërkuar `të drejtat e mohuara` nga Referendumi me zgjedhje në Shqipëri në së duhej Monarki apo Republikë Parlamentare, të cilat populli votoi për Republikën- fitorja e Partisë Demokratike e vitit 2005 , hapi përsëri një vazhdë shkeljesh të rënda ligjore në të gjitha fushat eqeverisjes, ashtu sikur kishte bërë Presidenti Berisha gjatë viteve 1992-1997, me pretekstin e luftës kundër korrupsionit. Vazhda e paligjshmërive vazhdoi pa ndërprerje duke shkaktuar Gërdecin, prishjen e mbikalimit të `Zogut të Zi`, në të cilën megjithse gjykata i dha të drejtë Bashkisë së Tiranës, Qeveria e Berishës nuk pagoi dëmet dhe vazhdoi më shitjen e tokave të lira me `1 euro` duke favorizuar Fazlliç dhe miqtë e tij.
Korrupsioni dhe shkelja e ligjeve vazhdoi edhe në zgjedhjet lokale në Bashkinë e Tiranës, Ku Berisha nëpërmjet makinacioneve, i a dha fitoren zotit Basha. Në të gjithë atë periudhë 8 vjeçare nuk u fol fare për kanabizimin e vëndit, sepse qeversja e PD nuk lejoi transparencën në mediat e lira e në Gazeta për të parë realitetin ku Shqipëria në heshtje ishte zhytur në kanabis duke u mbjellë në gjithë vëndin prej kohësh madje edhe në kohën e qeverisjes së Fatos Nanos, ku problem doli vetëm Laxarati, problemi cili u la i hapur edhe nga Berisha, duke krijuar përshtypjen se në Shqipëri kanabisi rritej vetëm në një zonë të caktuar ku po merreshin masa nga qeverisja e Berishës.
Një nga skandalet e pa precedent ishte shkarkimi i Ministtrit të Shëndetësisë Prof. Dr. Maksim Cikuli dhe zëvëndësimi i tij me një `Elifi Matrak`z. Nard Noka i cili i dha dërrmën Sistemit Publik Shëndetësor Shqiptar, duke shkaktuar një rritje galopante të korrupsionit dhe të mitmarrjes në sistemin shëndetësor publik, korrupsion dhe mitmarrje nga e cila vuajnë edhe populli shqiptar edhe në ditët e qeverisjes së Partisë Socialiste, megjithë përpjekjet e saj të fundit për të çrrënjosur korrupsion dhe mitmarrjen në systemin public shëndetësor spitalor dhe kudo, gjëndja mbetet e njëtë dhe popullsia që paguan Siguracionet Shëndetësore çdo vit e për vite më rradhë, vazhdon të paguajë nën dorë për shërbimet mjekësore të cilat duhet ti merrte falas.
Pavarësisht këtyre shkelje të ligjeve nga Berisha dhe miqtë e tij, këto shkelje vazhduan edhe gjatë qeverisjes së të majtës, sepse asnjëherë Berisha, nuk u paraqit para drejtësisë duke menduar se është mbi ligjet.
Sot, me heqjen e imunitetit ish Kryeministrit Berisha, përfundon njëherë e mirë edhe sistemi i paligjshmërisë në Shqipëri, madje përfundon edhe njëherë e mirë periudha e gjatë e tranzicionit nga diktatura komuniste në Demokraci pas 33 vitesh. Pavarësisht gabimeve gjatë qeverisjes së Maxhorancës së majtë , pavarësisht emigracionit për shkak të rrogave të ulta, sot në Shqipëri Drejtësia më në fund është pushtet i e tretë i pavarur nga ndonjë pushtet tjetër, dhe shpresojmë që ligjet të respektohen si nga më i varfri dhe i pa pushtetshmi , ashtu dhe nga i pasuri dhe nga të pushtetshmit.
Tranzicioni i vonuar dhe i detyruar nga drejtues dhe deputetë të të dy paleve Opozitarë dhe maxhoritarë të cilët në fakt ishin të përzgjdherurit e PPSH, sepse ishin ish bashkëpuntorë të Sigurimit, ish drejtues të partisë komunistë dhe miqtë e tyre gjatë 33 viteve të Demokracisë në Shqipëri, po merr fund me largimin nga pushteti dhe parlamenti i një nga drejtuesit më të papërgjegjshëm përsa i përket respektimit të ligjeve.
Shpresojmë që Drejtësia të veprojë me vendosmëri ndaj çdo shkelësi të ligjit sidomos ndaj atyre të veshur më pushtet egzekutiv dhe partiak.

priftipirro2017@gmail.com

[Albo]

Masa e arrestit për Berishën do të shqyrtohet të martën

Pas dorëzimit të kërkesës për zëvendësimin e masës së sigurisë ndaj ish-kryeministrit Sali Berisha nga SPAK, Gjykata e Posaçme vendosi ta shqyrtojë atë të martën.



Një ditë pas marrjes së autorizimit nga Kuvendi, Prokuroria e Posaçme dorëzoi në gjykatë kërkesën për zëvendësimin e masës së sigurisë ndaj ish-kryeministrit Sali Berisha, i akuzuar për veprën penale të “korrupsionit pasiv”. Përmes një njoftimi për shtyp, Gjykata e Posaçme deklaroi se seanca gjyqësore për shqyrtimin e kësaj kërkese do të zhvillohej të martën më 26 dhjetor.

Berisha, 79 vjeç, është zyrtari më i lartë në tre dekada që përballet me një situatë të tillë ligjore. Hera e fundit që një ish-kryeministër është përballur me heqje imuniteti dhe arrestim ka qenë korriku i vitit 1993, kur mazhoranca e asaj kohe e Partisë Demokratike autorizoi arrestimin dhe përndjekjen e ish-kryeministrit socialist, Fatos Nano.

Kërkesa për ashpërsimin e masës së sigurisë ndaj Berishës erdhi pasi ky i fundit kundërshtoi si antikushtetuese masat e mëparshme të detyrimit për paraqitje dhe ndalim të daljes jashtë shtetit, duke mos i zbatuar ato. Kodi i Procedurës Penale parashikon zëvendësimin e masës në raste të tilla.

Në një konferencë për shtyp me gazetarët të premten, Berisha e krahasoi Prokurorinë e Posaçme me policinë famëkeqe të komunizmit, ish-Sigurimin e Shtetit, ndërsa akuzoi Gjykatën Kushtetuese për shkelje me vendimin e saj për të rrëzuar një kërkesë të 30 deputetëve të opozitës për pezullimin e masave ndaj tij.

Berisha përsëriti sërish qëndrimin e tij mohues ndaj akuzave të SPAK, ndërsa deklaroi se “opozitat nuk janë mposhtur kurrë me burgje”.


BIRN