Fredi Beleri: Rama më futi në burg se duan të vjedhin tokat e himariotëve

[Albo]

VIDEO/ Meta takon babanë e Fredi Belerit dhe akuzon: PS don të rrëmbejë pronat e himariotëve



Kreu i Partisë së Lirisë, Ilir Meta ka zhvilluar një takim me Petro Belerin, babanë e Fredi Belerit. Meta shkruan se shumë shpejt do e vizitojë në burg, pasi e konsideron atë “të rrëmbyerin politik nga banda në pushtet”. Sipas tij, e gjitha është e orkestruar për të rrëmbyer pronat e himariotëve në mënyrë që të pastrohen paratë e drogës dhe krimit të organizuar.

“Jam sot në Himarë, pranë Petro Belerit, babait të të rrëmbyerit politik nga banda në pushtet, që e ka rrëmbyer pikërisht për të rrëmbyer pronat e himariotëve në mënyrë që të pastrohen paratë e drogës dhe krimit të organizuar.

Himara do ia tregojë vendin edhe nga burgu, regjimit të pengmarrësve dhe do t’ua tregojnë gjithmonë siç ja u ka treguar osmanëve njëherë e një kohë dhe siç ja u ka të gjithë pushtuesve dhe zaptuesve.

Nga e hëna do bëj kërkesën për të vizituar të rrëmbyerin politik në një vend anëtar të NATO-s, në një vend që synon të çelë negociatat me Bashkimin Europian dhe të anëtarësohet, në një vend ku mbretëron arbitrariteti dhe jo vullneti i qytetarëve dhe demokracia.

Përshëndetje të gjithë himariotëve trima dhe guximtarë që u kanë dhënë shembull të gjithë shqiptarëve se si duhet sfiduar ky regjim grabitës dhe intimidues”, shkruan Meta.



Koha Jone

[Albo]

“Bashkitë e kapura nga krimi duhen shkrirë”, Lubonja: Blerina Bala u zgjodh kryebashkiake që “mos zbulohen kartat”



Analisti Fatos Lubonja, i ftuar në emisionin Open në News24, komentoi situatën politike në Himarë.

Lubonja theksoi se bashkitë që janë kapur nga krimi duhen shkrirë. Ai shtoi se Blerina Bala u zgjodh si kryebashkiake e Himarës, pasi ajo ishte zëvendësuese e Goros dhe për rrjedhojë, me të në krye të bashkisë, maxhoranca bën të mundur “që të mos hapen kartat” në Himarë.

“Nuk është e drejtë moralisht zgjedhja e Blerina Balës. Zgjedhja e saj është e padrejtë moralisht, sepse është zgjedhur nga Jorgo Goro. Në Itali ka një ligj, që nëse dyshohet se bashkia funksionon si organizatë kriminale, shkrihet. U vendos zonja, që mos t’ua zbulojmë kartat. Këtu bëhet fjalë për bashkëpunim me krimin e organizuar.

Është sistematike në Shqipëri që bashkitë funksionojnë si organizata kriminale, grabisin toka dhe bashkëpunojnë me krimin e organizuar dhe të gjithë mbahemi nga këta para. Bashkitë që janë kapur nga krimi duhen shkrirë”, deklaroi Lubonja.

(Balkanweb)

[Albo]

Rrezohet rekursi i Fredi Belerit për lejimin e betimit si kryebashkiak i Himarës

U mbajt sot në Gjykatën e Lartë seanca për rekursin e Fredi Belerit, kryetari i zgjedhur i bashkisë së Himarës, dalë nga zgjedhjet e 14 majit.

GJL vendosi mospranimjn e rekursit të Fredi Belerit

Ky i fundit ka bërë disa herë kërkesë për të marrë leje për të dalë nga qelie dhe më pas të bëhet betimi i tij si kryebashkiak, pretendime që janë rrëzuar nga GJKKO, por dhe Apeli i GJKKO.

Syri

[Albo]

Media greke: Ramës iu kërkua të mos e vizitojë Athinën!



Media greke Kathimerini ka shkruar se kryeministri i Shqipërisë, Edi Rama mori përgjigje negative në kërkesën e tij për të vizituar Greqinë nëpërmjet zëdhënësit të tij, Endri Fuga, por ai sërish ka këmbëngulur ta zhvillojë vizitën e tij siç e kishte planifikuar. Bëhet fjalë një takim me emigrantë shqiptarë që jetojnë në Greqi, të raportuar më herët në një shkrim të Lapsi.al, që njoftoi se Rama po nis një tur takimesh me emigrantë në të gjithë Europën.

Por grekët nuk janë shumë entuziastë. Të paktën nga sa shkruan Ekathimerini duket se nuk e gëlltisin dot burgosjen e Fredi Belerit, për me tepër që vizita po bëhet gjatë fushatës së zgjedhjeve për Parlamentin Europian. Që Rama është i padëshiruar, ia kanë bërë të qartë duke ia ndryshuar vendin e takimit.

“Vlen të theksohet se fillimisht tubimi ishte planifikuar të mbahej në stadiumin e mbyllur të Galatsit, por së fundmi Bashkia hoqi lejen që kishte dhënë fillimisht, për shkak të aktiviteteve të tjera që janë planifikuar. Ndaj, mbetet për t’u parë nëse dhe ku do të zhvendoset për zotin Rama ngjarja e emigrantëve shqiptarë” shkruan Ekathimerini.

Pala greke ende nuk ka një protokoll. Sipas Ekathimerini, Ministria e Jashtme është informuar për vizitën e Ramës, por ka refuzuar përgatitjet për një pritje të kryeministrit shqiptar.

“Z. Rama njoftoi jozyrtarisht synimin e tij për të vizituar Athinën nëpërmjet të besuarit të tij Endri Fuga, i cili ishte në Greqi disa ditë më parë. Ministria e Jashtme i bëri me dije të besuarit të zotit Rama se nisur nga faza parazgjedhore që po kalon Greqia për shkak të zgjedhjeve europiane, do të ishte e preferueshme të shtyhej për pas datës 9 qershor. Që atëherë, ftesa e Athinës është shpërfillur dhe kryeministri shqiptar thuhet se është i vendosur për të realizuar vizitën” vazhdon Ekathimerini.

Kuptohet se në sfond të vizitës është ajo që ndodhi në fushatën e 14 Majit në Shqipëri, kur kandidati i mbështetur nga Greqia në Himarë, Fredi Beleri u burgos dy ditë para votimit për blerje votash. Media greke thotë se me fjalët e tij, Rama mund të nxisë më tej konfliktin e brendshëm politik dhe të ndikojë në votën e emigrantëve shqiptarë.

“Nisur nga atmosfera e ngarkuar me ngjarje të Himarës, udhëtimi i Ramës mund të nxisë konfliktin e brendshëm politik, duke e ngritur lart çështjen Beleri në axhendën e debatit publik. Apo edhe të provokojë reagime nga elementi verior kontinental në Athinë, gjë që qeveria definitivisht nuk e dëshiron.

Burime diplomatike në Tiranë dhe Athinë theksuan se vizita e planifikuar mund të ketë objektivisht elementin e shfaqjes së forcës, ku Rama tenton të instrumentalizojë votën në zgjedhjet europiane të dhjetëra mijëra emigrantëve shqiptarë që kanë të drejtën ligjore për të votuar si shtetas grekë, në përgjigje të kandidaturës së Beleris. Megjithatë, një ngjarje e tillë, edhe nëse Rama i shmang referimet për zgjedhjet europiane, në çdo rast do të përbënte përfshirje indirekte në proces” shkruan Ekathimerini.

Në analizën e Ekathimerini, shkruhet se Rama vjen në Athinë si fitues i betejës për Himarën, ndaj gazeta i druhet një lloj “ndjenje (arrogante)” që mund ta shoqërojë fjalën e tij në Athinë.

Është e qartë se njoftimi i Ramës për një vizitë i ka turbulluar grekët. Të pamësuar me ushtrime të tilla “ndërhyrjes nga jashtë” në mesin e një fushate elektorale, mbetet për t’u parë nëse do të ketë një axhendë zyrtare të pritjes për kryeministrin shqiptar apo ai do të refuzohet për shkak të Fredi Belerit.

Duhet thënë se një vit më parë, kur grekët e mbështetën hapur Fredi Belerin në fushatë dhe kur kryeministri Micotakis udhëtoi drejt Himarës për të folur për helenizmën, Rama heshti dhe u duk se do ta pranonte në qetësi këtë ndërhyrje në zgjedhje. Vetëm kur kuptoi se Himara ishte e humbur për socialistët dhe se Beleri do të zgjidhej kryetar bashkie me ndihmën e Greqisë, policia ndërhyri duke e arrestuar.

Tani situata është përmbysur. Micotakis ka vënë një bast të rrezikshëm duke e futur Belerin në listat e kandidave për zgjedhjet e Parlamentit Europian. Rama po kërkon t’i kthejë borxhin duke e vënë në provë Micotakisin me një lojë nervash që nis nga vizita e tij në Athinë.

Në këtë lojë nervash, mediat greke vënë në pah edhe një simbolikë domethënëse. Në 12 Maj, kur Rama ka thënë se do të jetë në Athinë, bëhet fiks një vit nga arrestimi i Fredi Belerit.

Lapsi.al

[Albo]

Beleri flet nga burgu për mediat greke: Ndaj meje u bë grusht shteti



“Marr forcë dhe kurajë nga mbështetja e banorëve të Himarës dhe të gjithë grekëve”. Kryebashkiaku i zgjedhur i Himarës dhe tashmë edhe kandidat për në Parlamentin Europian me “Demokracinë e Re”, Fredi Beleri foli nga burgu për gazetarin grek Antonis Schroiter të televizionit Alpha. Beleri tha se qëllimi i tij ishte të merrte detyrën si kryetar i Bashkisë së Himarës.

“Duke qenë se regjimi shqiptar dhe zoti Rama kontrollojnë drejtësinë dhe pothuajse të gjitha pushtetet në Shqipëri, ata nuk më lejuan, në një grusht shteti, të merrja përsipër detyrat që më besoi populli i Himarës” – tha ai.

Në lidhje me kandidimin e tij, ai tha se “është një detyrim i madh, një nder i madh që i është bërë nga kryeministri grek. Më jep forcë dhe kurajë të vazhdoj luftën time për mbrojtjen e të drejtave të himarjotëve, por edhe të gjithë diasporës (greke) në Shqipëri”. Ai e quajti “padrejtësi” burgosjen e tij prej 1 viti, por shtoi se këto i kishte marrë parasysh kur hyri në betejën për kryebashkiak të Himarës.

“Nuk mund ta imagjinoni se sa mesazhe mbështetëse marr nga shumë bashkatdhetarë të mi nga të gjitha trevat e Greqisë”, – shtoi ai. “Në asnjë moment nuk kam menduar të bëj një kompromis me regjimin shqiptar apo të pranoj një zbritje për atë që besoj Lufta jonë është e drejtë dhe në fund do të fitojmë”, – tha ai prerazi.

LAPSI

[Albo]

Beleri bën rekurs në Gjykatën e Lartë kundër SPAK: Nuk hetoi kallëzimin tim



Teksa Gjykata e Apelit është tërhequr për të marrë një vendim përfundimtar për Fredi Belerin, kryebashkiaku i zgjedhur i Himarës ka hapur një tjetër betejë në Gjykatën e Lartë.

Kjo gjykatë ka regjistruar rekursin e Belerit kundër një vendimi të SPAK për të mos hetuar një kallëzim të bërë prej tij.

Bëhet fjalë për vendimin e 3 gushtit 2023 të SPAK për "mosfillim procedimi penal", për kallëzimin e bërë nga Beleri për "falsifikim" dhe "shpërdorim të detyrës".

Në kallëzimin e tij, kryebashkiaku i zgjedhur pretendonte falsifikim të dy akteve që ndodheshin në dosjen hetimore ndaj tij, dëshminë e penalitetit dhe regjistrin e procedimeve penale të Prokurorisë së Vlorës.

Vendimmarrjen e SPAK për të mos nisur hetim penal, Beleri e kundërshtoi fillimisht në Gjykatën e Posaçme e në Apel dhe së fundmi në Gjykatën e Lartë.

Provat e falsifikuara në dosje dhe ato të pavlefshme ligjërisht u pretenduan nga Beleri edhe në seancën e së enjtes në Apelin e Posaçëm, ku kundërshtoi dënimin e Shkallës së Parë me 2 vjet burg për akuzën e "korrupsionit në zgjedhje".

Vendimi përfundimtar në Apel do të shpallet me 25 qershor.

Syri

[Albo]

Apeli cakton 25 qershorin si datë për vendimin e Fredi Belerit

Gjykata e Apelit dëgjoi palët të premten mbi çështjen e kryebashkiakut të zgjedhur të Himarës Fredi Beleri dhe njoftoi se do të shpallë vendimin më datë 25 qershor. Beleri kërkoi pafajësi duke e përshkruar akuzën kundër tij si të motivuar politikisht.

Nga Edmond Hoxhaj


Fredi Beleri në seancë në Gjykatën e Apelit më 14 qershor 2024. Foto: Edmond Hoxhaj/BIRN

Gjykata e Posaçme e Apelit kundër Korrupsionit dhe Krimit të Organizuar, dëgjoi të premten më 14 qershor çështjen e kryebashkiakut të zgjedhur të Himarës Fredi Beleri, i cili aktualisht është deputet i Parlamentit Evropian për Greqinë dhe njoftoi shpalljen e vendimit më 25 qershor, ora 13. Bashkë me Belerin në gjyq është edhe bashkëpunëtori i tij, Pandeli Kokaveshi.

Beleri dhe Kokaveshi kërkojnë pafajësi për akuzën për blerje votash pasi janë dënuar në shkallën e parë, me 2 dhe 1 vit e gjashtë muaj burg respektivisht. Vendimi i Kokaveshit është i pezulluar me shërbim prove për tre vjet.

Pala e akuzuar kërkoi fillimisht ndryshimin e trupit gjykues nën pretendimin për njëanshmëri dhe zgjedhje përmes manipulimit të shortit, pretendime që u hodhën poshtë.

Gjatë seancës, mbrojtja përsëriti pretendimet se provat me të cilat Beleri është dënuar në shkallë të parë janë të pavlefshme apo të mbledhura në kundërshti me ligjin ndërsa vetë Beleri e përsëriti pretendimin se operacioni policor që solli arrestimin e tij ishte i porositur politikisht nga kryeministri Edi Rama.

Pas rifillimit të seancës, avokatja Gjyzari u ndal në ato prova, në të cilat tha se ishte bazuar vendimi i shkallës së parë. Ajo tha se po ndalej fillimisht në dëshminë e dëshmitarit Arsen Rama. Ajo solli në vëmendje se besueshmëria e dëshmitarit të prokurorisë, Arsen rama ishte e cënuar, pasi ai kishte qenë i dënuar më parë për mashtrimin e një të mituri, si dhe për vjedhje. Ajo shtoi se Rama kishte probleme me kujetesën, pasi vetëm ai ishte shprehur gjatë dhënies së deklarimeve se ishte i stresuar dhe se nuk arrinte të kujtonte apo të përcaktonte orën dhe datën e ngjarjeve apo rrethanave për të cilat ishte pyetur.

Gjyzari këmbënguli se në asnjë nga ditët e pretenduara nga prokuroria, nuk rezultonte që dëshmitari Rama të kishte takuar Belerin. Po ashtu, ajo theksoi se Arsen Rama nuk ka qenë në Vlorë në momentin e nënshkrimit të marrëveshjes së simulimit.

Në vijim, avokatja solli në vëmendje të trupit gjykues, se deklarimet e dëshmitarit Arsen Rama janë kundështuar si nga të pandehurit të përfaqësuesit e tyre ligjorë, ashtu edhe prej prokurorisë.

Sipas Gjyzarit, Arsen Rama ka përfituar pagesë nga Drejtori i Përgjithshëm i Policisë. Pagesa e dëshmitarit është vepër penale”, tha ajo dhe shtoi se dhe punonjësi i policisë, Ermal Hajdini që ka mundësuar kryerjen e këtyre veprimeve të Ramës, është shpërblyer me transferimin nga Saranda në Vlorë, duke u rritur në detyrë. Gjyzari argumentoi se dhe kjo rritje në detyrë, ka sjellë përfitime monetare për Hajdinin. “Policia paguan informatorë të fshehtë dhe jo dëshmitarët e prokurorisë”, vërejti Gjyzari duke e cilësuar të falsifikuar marrëveshjen e lidhur me dëshmitarin Arsen Rama.

Ajo i cilësoi procesverbalet me rrethana të rreme dhe këmbënguli se duke qenë se provat janë të paligjshme, atëherë dhe vendimarrja e shkallës së parë nuk qëndron.

Gjyzari parashtroi qëndrimin e të pandehurit Beleri edhe lidhur me dëshminë e penalitetit të përdorur nga Prokuroria e Vlorës për të kërkuar masën e sigurisë “arrest në burg” ndaj tij. Sipas avokates, vetëm në dëshminë e penalitetit e shkarkuar më datë 12 maj, Beleri rezulton i dënuar. Gjyzari solli në vëmendje se specialistja e Drejtorisë së Përgjithshme të Burgjeve kishte sqaruar se kishte një çelës për institucionet për të aksesuar sistemin lidhur me dëshmitë e penalitetit, nga në çdo rast kishte rezultuar se Beleri figuronte i rehabilituar, ndërsa vetëm më datë 12 maj shfaqej si i dënuar.

Ajo pohoi se prokuroria refuzonte të vendoste në dispozicion CD-të origjinale të përgjigmeve dhe se shkalla e parë i kishte kufizuar Belerit të gjitha të drejtat e tij për t'u mbrojtur. Në përfundim, Gjyzari kërkoi që Beleri të deklarohet i pafajshëm.

Beleri deklaroi se u qëndronte gjithë parashtrimeve të avokates. Ai pretendoi se provat ndaj tij ishin manipuluar 15 ditë pasi e kishin arrestuar.

Edhe i pandehuri Pandeli Kokaveshi kërkoi të deklarohet i pafajshëm.

Prokurori i çështjes, Adnand Xholi kundërshtoi qëndrimet e Belerit dhe avokates së tij. Ai theksoi se nuk qëndronin pretendimet për mosvendosjen e provave në dispozicion të gjykimit. Sipas Xholit, i pandehuri mund ti kishte dispnuar dhe dëgjuar CD-të edhe gjatë gjykimit.

“Kanë deklaruar se nuk kishin pretendime për përmbajtjen, por për mënyrën e marrjes së provave”, vërejti Xholi.

Avokatja Gjyzari ndërhyri duke u shprehur se provat e marrë jo në përputhje me procedurën, janë të paligjshme. Ajo ngriti pretendime dhe mbi veprimet e sekretarisë së prokurorisë.

Prokurori Xholi parashtroi në vijim se vendimarrja e Gjykatës së Vlorës për caktimin e masës së sigurisë ndaj Belerit ishte gjetur e drejtë nga Apeli.

Lidhur me pretendimin se Arsen Rama dhe Beleri nuk kishin rezultuar asnjëherë së bashku, Xholi tha se dëshmitari kishte qenë pikërisht në Himarë dhe në asnjë vend tjhetër.

Për vërtetimin e gjendjes gjyqësore të shkarkuar nga sistemi më 12 maj, Xholi u shpreh se ishte për përdorim të brendshëm. Ai shtoi se Beleri rezulton të ketë qenë dy herë i dënuar më parë.

Për një kallëzim penal të kryer nga Beleri për falsifikim, Xholi tha se SPAK kishte vendosur mosfillimin e hetimeve, që ishte lënë në fuqi nga të dy shkallët e gjyqësorit të juridiksionit të posaçëm.

Sipas Xholit, të pandehurit dhe avokatët e tyre kanë qenë të njohur që në fillim me provat dhe se nuk kanë ngritur pretendime për takimin me dëshmitarin Arsen Rama.

Ai kundërshtoi dhe një pretendim lidhur me sekuestrimin e apartatit celular të të pandehurit Kokoneshi, që nuk pranohet nga mbrojtja. Xholi tha se seskuestrimi ishte kryer sipas rregullave dhe se nuk ishte konkluduar që celulari të mos ishte i këtij të pandehuri. Prokurori Xholi parashtroi gjithë rrethanat e hetimit dhe këmbëguli se provohet tej çdo dyshimi të arsyeshëm se dy të pandehurit kanë kryer korrupsion.

Në përfundim, avokatja Gjyzari kërkoi fjalën duke pretenduar se prokuroria shprehej gabim lidhur me disa prej qëndrimeve të mbrojtjes. Ajo theksoi se për Arsen Ramën kanë deklaruar se nuk gjendej në Vlorë për të nënshkruar marrëveshjen e bashkëpunimit. Ajo tha se disa prova nuk janë përdorur në vendimarrjen e shkallës së parë dhe theksoi se vendimi duhej të ishte marrë mbi prova të paanshme.

Në përfundim, trupi gjykues vendosi të shtyjë shpalljen e vendimit për më datë 25 qershor, në orën 13:00.

Çështja Beleri krijoi një konflikt shqetësues mes Tiranës dhe Athinës, ku qeveria e kryeministrit Kyriakos Mitsotakis e konsideroi arrestimin e tij si një cënim të të drejtave të minoritetit grek në Shqipëri ndërsa Tirana zyrtare pretendon se çështja është thjeshtë gjyqësore dhe se është jashtë funksionit të saj të ndërhyjë.

Beleri u zgjodh eurodeputet të dielën nga listat e partisë Nea Democratia të Mitsotakisit.


BIRN

[Albo]

KQZ vendos për Fredi Belerin, shpallet i pavlefshëm mandati për kryetarin e zgjedhur të Himarës



Komisioni Qendror i Zgjedhjeve, ka shpallur të pavlefshëm mandatin e kryetarit të zgjedhur të Himarës, Fredi Beleri.

Beleri siguroi votat dhe fitoi zgjedhjet e 14 majit në Bashkinë e Himarës, por dy ditë para se të mbaheshin lokalet, u arrestua për blerje votash.

“Nuk kanë asnjë nxitje jashtë asaj që KQZ e nxit ligji për dekriminalizimin. KQZ vendos që t’i heqë mandatin Fredi Belerit”, tha Celibashi ndërsa deklaroi mbylljen e seancës. Ky ishte një vendim i pritshëm nga ana e KQZ, gjë që e konfirmoi edhe vetë Beleri gjatë fjalës së tij. Ai tha se ishte i vetëdijshëm që do t’i hiqej mandati.

Koha Jone

[Albo]

KQZ konstaton pavlefshmërinë e mandatit të Belerit, Bashkia Himarë do të shkojë në zgjedhje

Komisioni Qendror i Zgjedhjeve konstatoi këtë të premte pavlefshmërinë e mandatit të Alfred Belerit, kryetarit të zgjedhur të Bashkisë Himarë.

Nga Anesti Barjamemaj


Alfred Beleri në KQZ | Foto: LSA

Komisioneri Ilirjan Celibashi deklaroi se KQZ ka tagrin ligjor për të këtë vendimmarrje, pavarësisht pretendimeve të Belerit – i pranishëm në sallë i shoqëruar nga forca të shumta policie, avokates së tij dhe përfaqësuesve të opozitës,

“Me bindje të plotë tej çdo komenti që çdokush mund të bëjë, unë mendoj se jemi në kushtet e humbjes së mandatit të kryetarit të Bashkisë Himarë,” u shpreh Celibashi, duke argumentuar se ligji i dekriminalizimit është i qartë dhe ndalon jo vetëm kandidimin e personave në konflikt me ligjin, por më shumë të atyre që janë të zgjedhur.

“Shpall të pavlefshëm mandatin,” theksoi ai, ndërsa shtoi se “kundër këtij mund të bëhet ankim brenda 30 ditëve”.

Beleri pohoi se ishte i vetëdijshëm që e kishte humbur mandatin dhe të drejtën për të qeverisur qytetarët e Himarës, por kërkoi që procedura për pavlefshmërinë e mandatit të tij të mos ishte politike, siç e konsideroi ai, por juridike dhe e drejtë. Ai theksoi se dikush do të nxjerrë gështenja nga zjarri me duart e KQZ-së.

“Institucioni që ju drejtoni ka ruajtur nderin e këtij shtetit, të gjitha institucionet e tjera janë bërë pjesë e paligjshmërisë për mua dhe banorëve të Himarës që më votuan për të drejtuar,” tha Beleri, ndërsa shtoi ai fillimisht duhet të betohet e më pas të shkarkohet.

“Jam i qartë që mandati im si kryetar bashkie ka mbaruar por duket qartë arroganca e tyre që t'i bëjnë votimet në gusht,” shtoi ai.

Ndërkohë avokatja e tij, Klodiana Gjyzari, pohoi se KQZ nuk e ka tagrin ligjor për të shqyrtuar këtë çështje. Sipas saj, nuk është kompetencë e KQZ që të verifikojë mandatin e Belerit në kushtet kur ai është zgjedhur, por nuk është betuar.

“S'ka asnjë depozitë të Kodit Zgjedhor që i jep të drejtë që në këtë fazë që është procesi i Belerit nga ana e KQZ të merren iniciativa të tilla. KQZ mund të kryejë verifikim të tillë vetëm bazuar në të dhënat e formularit të dekriminalizimit asnjë e dhënë jashtë formuarit s'mund të merret në verifikim nga KQZ, procedura është e pavlefshme, keni kaluar kompetencat që u parashikon ligji, kërkojmë pushimin e procedurës”, shtoi ajo.

Të njëjtën qasje pati dhe përfaqësuesi i Partisë Demokratike Ivi Kaso, i cili kërkoi që procedura për shkarkimin e Belerit të ndiqej nga Këshilli i Ministrave.

“Beleri është një person i zgjedhur, nuk ka ushtruar mandatin, është i dënuar, por nuk aplikohet ligji për dekriminalizimin, por ai për qeverisjen vendore. Pra në rastin konkret duhet që Qeveria ta shkarkojë Fredi Belerin dhe mos e trajtojë si patate të nxehtë çështjen. Edi Rama të marrë përgjegjësinë, të thotë se Fredi Beleri është dënuar me vendim të formës së prerë dhe ta shkarkojë”, pohoi Kaso.

Ndërsa për përfaqesuesin ligjor të Partisë Socialiste, Eridian Salianji, çështja ishte shumë e qartë dhe Beleri e humb mandatin për shkak të ligjit të dekriminalizimit.

“Nëse do të ishte bërë betimi dhe do kishte nisur detyrën, atëherë Rama mund të bënte shkarkimin”, tha ai.

Pavarësisht vendimit të komisionerit Celibashi, Beleri ka 30 ditë kohë për të ankimuar pranë Komisionit të Ankesave dhe Sanksioneve vendimin dhe Vangjel Dule në përfundim të seancës deklaroi ndjekjen e çdo hapi ligjor “për të vendosur të drejtën në vend”.

Në përfundim të të gjitha procedurave ankimuese, Presidenti i Republikës duhet të shprehet me dekret për zhvillimin e zgjedhjeve të pjesshme në Bashkinë e Himarës.

BIRN

[Albo]

Presidenti dekreton datën 4 gusht për zgjedhjet e pjesshme në Himarë

Presidenti Bajram Begaj dekretoi këtë të premte datën 4 gusht për mbajtjen e zgjedhjeve të pjesshme në Bashkinë Himarë.



Në një njoftim për mediat, Presidenca bën me dije se data 4 gusht është zgjedhur “si alternativa më e mirë që pajton nevojën për përgatitjen dhe zhvillimin e një fushate të rregullt zgjedhore dhe nevojën për përgatitjen optimale të administratës zgjedhore, me kushtet, rrethanat dhe ngarkesën që sjell sezoni turistik për bashkinë Himarë, si njësi bregdetare e qeverisjes vendore”.

Kreu i Shtetit u vendon në levizje nga Kryeministri për të konstatuar vakancën në Bashkinë Himarë. Sekretari i Përgjithshëm i Kryeministrisë, Ëngjëll Agaçi, si fillim mori dijeni nga Komisioni Qendror i Zgjedhjeve për vendimin e konstatimit të pavlefshmërisë së mandatit të Alfred Belerit dhe më pas iu drejtuar Presidentit.

Begaj pasi mori njoftimin nga Këshilli i Ministrave thirri dhe Ilirjan Celibashin për konsultim dhe më pas shpalli datën e zgjedhjeve.

Tashmë pritet që KQZ të përcaktojë dhe afatet për regjistrimin e kandidatëve dhe nisjen e fushatës.

Beleri u arrestua më 12 maj 2023, dy ditë para zgjedhjeve, kur një agjent policie i ofroi atij vota për para. Beleri pretendon se çështja kundër tij ishte e stisur dhe e sajuar si rrjedhojë e kërcënimeve që kryeministri Edi Rama dhe kundërshtari i tij politik bëri kundër tij pak ditë para arrestit.

Beleri është dënuar më parë për vepra të urrejtjes etnike në Shqipëri në vitin 2002, ndërsa në Greqi në vitin 1995 ishte një nga shtatë personat e arrestuar në kufirin greko-shqiptar në dy automjete në të cilat u gjetën armë, plumba, thika, uniforma ushtarake dhe kapuça.

Procesi gjyqësor ndaj tij u bë shkak për një krisje të marrëdhënieve mes Tiranës dhe Athinës, pasi kjo e fundit kërcënoi se do të bllokonte bisedimet e anëtarësimit të Shqipërisë në BE.

Pavarësisht se në burg, Beleri arriti të mposhtë kryebashkiakun socialist Jorgo Goro. Kërkesa të përsëritura për institucionet shqiptare të drejtësisë për të lejuar Belerin të marrë detyrën e kryebashkiakut duke u betuar, u refuzuan, duke lënë socialistët efektivisht në kontroll të bashkisë pasi i kishin humbur zgjedhjet. .

Beleri u zgjodh anëtar i Parlamentit Evropian më herët këtë muaj dhe pritet të marrë detyrën pas disa muajsh, kur afati i dënimit me burg në Shqipëri të skadojë. Megjithatë, duke se me vendimin e sotëm të KQZ-së karriera e tij politike ka marrë fund.

BIRN

[Albo]

VOA: Shumica nxitoi të ribënte zgjedhjet në Himarë! Presidenti caktoi me urgjencë datën e re



Në Shqipëri, Komisioneri shtetëror i zgjedhjeve, Ilirjan Celibashi deklaroi sot pavlefshmërinë e mandatit të kryetarit të zgjedhur të Himarës Fredi Beleri, pas vendimit të formës së prerë të Gjykatës së Apelit e cila e dënoi atë me dy vjet burgim, për korrupsion në zgjedhje. Zoti Beleri, i pranishëm në mbledhje, por dhe mbrojtësit e tij, mbështetën idenë se Komisioni qëndror i Zgjedhjeve nuk mund të shprehej për këtë rast, pa një vendim të Qeverisë që e shkarkonte atë nga detyra. Por sipas zotit Celibashi, vendimi mbështetet në të ashtuquajturin Ligj të Dekriminalizimit. Me urgjencë Qeveria kërkoi më pas shpalljen e zgjedhjeve të reja në Himarë, nga presidenti, i cili po ashtu me shpejtesi dekretoi 4 gushtin si ditën e votimit.

“Jemi në kushtet e humbjes së mandatit të kryetarit të Bashkisë Himarë”, bëri të ditur zoti Celibashi, në përfundim të mbledhjes së thirrur për këtë çështje. Vendimin për humbjen e mandatit të tij si kryetar i Bashkisë së Himarës, zoti Beleri e dëgjoi në sallë, ku ai kishte ardhur i shoqëruar me punonjës të policisë.

Mbledhja e cila zgjati afro 1 orë u përqëndrua në debatin mbi bazën ligjore të rastit të tij. Përfaqësuesi i Partisë socialiste Eridan Salinji u shpreh se vendimi duhet të merret në bazë të ligjit të dekriminalizimit: “Ky është një proces automatik. Nuk mund të diskutojmë, kur ka një vendim të Gjykatës së Apelit. Këtu jemi thejsht për konstatimin e faktit. Ka një vendim të Apelit, po apo jo? Kjo është pyetja e vetme që duhet të bëhet”

Por për zotin Ivi Kaso, përfaqësuesin e koalicionit opozitar, nën siglën e të cilit zoti Beleri kandidoi në zgjedhjet e 14 majit të vitit të kaluar, qeveria po kërkon të përdorë KQZ për të zhvilluar sa më parë zgjedhjet në Himarë, sepse sipas tij duhet të ishte ajo që duhet ta shkarkonte atë: "Këtë gjë, shumica nuk do që ta bëjë, se nuk do që ta fusë në afatet kohore dhe ankimore që parashikon ligji 139, Neni 62, pra që pasi ta shkarkojnë, vendimi të bëhet përfundimtar vetëm kur të shprehet Gjykata Kushtetuese. Pra kanë ngut të bëjnë zgjedhjet në Himarë."

Këtë qëndrim mbrojti dhe vetë zoti Beleri në fjalën e tij: “Unë duhet të betohem dhe të më shkarkojnë, siç parashikon ligji dhe Kushtetuta. Eshtë e qartë, jam i qartë dhe unë, që mandati im si kryetar i Bashkisë së Himarës, ka mbaruar. Unë po flas, sepse këta do e bëjnë rrugë, do ketë vazhdim. Duket qartë arroganca e tyre, dëshira e tyre t’i bëjnë zjedhjet, kur ata duan, t’i bëjnë në mes të ngushtit”

Por Komisioneri i zgjedhjeve, Celibashi, u shpreh se ishte i bindur që në këtë rast zbatohej ligji për dekriminalizimin, pasi në të kundërt, ky ligj “nuk do të kishte pikën e kuptimit, në gjykimin dhe vlerësimin tim, nëse ne ndalojmë dikë të kandidojë, kur janë disa kushte që ligji i konsideron si ndaluese, dhe i themi personit, ti vazhdo, qëndro në detyrë, edhe pse ke kryer një prej atyre veprave penale, për të cilat ligji, ty të ndalon të kandidosh”.

Frika e zotit Beleri dhe përfaqësuesve të tij, se shumica po nxitonte të ribënte zgjedhjet në Himarë, rezultoi se nuk ishte e pavend. Menjëherë pas mbylljes së seancës në KQZ, Qeveria iu drejtua këtij institucioni për të patur njoftimin për vendimin. Dhe sapo mori përgjigjen, iu drejtua Presidentit Bajram Begaj, duke e vënë në dijeni për krijimin e vakancës, e duke kërkuar prej tij shpalljen e zgjedhjeve të reja. Shumë shpejt, ndonëse kishte një afat 48 orësh, Kreu i Shtetit dekretoi datën 4 gusht, për mbajtjen e zgjedhjeve. Lëvizjet urgjente të qeverisë, duket se ngrejnë pikëpyetje nga pikëpamja ligjore, përsa kohë vendimi i sotëm, është i apelueshëm, në Komisionin e Ankimimeve, siç e përcakton dhe vetë vendimi i zotit Celibashi. Për momentin nuk ka ndonjë shpjegim zyrtar për këtë.

Zyra e Kreut të Shtetit, nga ana e saj, në përgjigje të interesimit të Zërit të Amerikës, vuri në dukje, se “Presidenti i Republikës nuk është organi që konstaton vakancën, sikurse nuk merr në shqyrtim procedurën që i ka paraprirë asaj dhe as është instancë e ankimit administrativ. Në sistemin ligjor shqiptar, ka vetëm një rrugë ligjore për vënien në lëvizje të Presidentit të Republikës, në rastin e vakancave në qeverisjen vendore. Kjo rrugë është rruga e njoftimit nga Keshilli i Ministrave”. Sipas Kreut të Shtetit “procedura për caktimin e datës së zgjedhjeve dhe procedura për ankimimin e akteve administrative, janë që të dyja ligjore, dhe bashkëjetojnë me njera-tjetrën. Në rast se midis tyre krijohen përplasje – vijon shpjegimi - atëherë është gjykata kompetente që ka fuqinë të zgjidhë përplasjen. Mjetet ligjore për mbrojtjen e interesave të ligjshme, nuk shfuqizohen nga procedura e dekretimit të zgjedhjeve”, theksoi zyra e Shtypit e presidentit Begaj.

Syri

[Albo]

KQZ i hoqi mandatin Belerit, Dule: Proces politik nga rrëmbyesi i Bashkisë së Himarës, Edi Rama



Kreu i PBDNJ-së, Vangjel Dule ka akuzuar drejtpërdrejt Edi Ramën, për vendimin ndaj Fredi Belerit, të cilit KQZ i hoqi mandatin.

Deklarata e Dules u bënë teksa komentoi vendimin e KQZ.

Dule theksoi se ka pasur disa shkelje, ndërsa akuzoi KQZ se ka shkelur disa të drejta. Sipas tij Beleri nuk i është dhënë e drejta që të zgjedhë siç ia përcakton ligji, duke mos iu dhënë e drejta e votës apo në rastin e betimit të tij.

"Jemi përpjekur të evidentojmë shkeljet e Konventës Europiane.

Fatkeqësisht për këto shkelje autori e frymëzuesi i këtij procesi politik të rrëmbimit të bashkisë së Himarës për të vijuar procesin e tjetërsimit të pronës në favor të klientelës së tij, Rama përdori institucione që s’duhet të kishin rënë re e këtyre qëllimeve.

Përdori segmente të Policisë së Shtetit,.

Më lejoni t’ju përmend shkeljen e disa të drejtave themelore, nuk iu dha e drejta të zgjedhë më 14 maj, nuk iu dha e drejta e votës.

Nuk u përmbush e drejta edhe për pengimin e betimit të tij. U shkel prezumimi i pafajësisë.

U shkel e drejta e komunitetit himarjot për të zgjedhur. Flasim për situata dhe shkelje që duhet të vëmë alarmin për çdo situatë, për atë që ndodh, në procesin e zgjedhjeve, me votën e lirë dhe shtetin e së drejtës.

Ajo që ndodhi me Fredi Belerin dhe Himarën është jetike që mos të ndodhë me Tiranën dhe Kukësin, apo Dropullin. Po ju them a dozën më të vogël të ekzagjerimit. Po ju bëj një thirrje, nëse e konsiderojmë mision për vendin tonë, që të realizojmë zgjedhje të lira dhe të ndershme, do ju ftoja që të shikoni këtë proces.

Ju them me siguri se cilindo nga qytetarët e regjistruar si zgjedhës në bashkinë e Himarës, këdo që të zgjedhë koalicioni jonë, do të jetë fitues ndaj Ramës. Kemi dy gjëra të sakta; kundër grabitjes së pronës. Nuk ka socialistë dhe qytetarë të ndershëm që të mbështesin Ramën’, tha Vangjel Dule gjatë deklaratës së tij.

Syri

[Albo]

Beleri, i gjithë shteti në shërbim të Kryerilindësit

Nga Artan Hoxha


Fredi Beleri, kryetari i zgjedhur, por i pabetuar i Himarës, u dënua me vendim gjyqësor të Apelit të GJKKO. Mbi këtë bazë, Komisioneri Shtetëror i Zgjedhjeve, Ilirjan Celibashi, konstatoi dhe shpalli pavlefshmërinë e mandatit bazuar në ligjin për dekriminalizimin.

Brenda të njëjtës ditë, 5 korrik, kërkoi nga Celibashi e mori njoftim prej tij për këtë pavlefshmëri, Sekretari i Përgjithshëm i Këshillit të Ministrave, Engjëll Agaçi, e në emër të këtij këshilli njoftoi Presidentin e Republikës, Bajram Begaj, ndërsa Shkëlqesia e Tij, po brenda ditës, shpalli zgjedhjet në Himarë për në datën 4 gusht.

Strumbullari i gjithë ‘meselesë Beleri’, Kryerilindësi Rama, vijon qetësisht dhënien e certifikatave të pronave në Himarë.

Ligji 139/2015 për Qeverisjen vendore, neni 62, përcakton se: ‘Kryetari i bashkisë shkarkohet me vendim të Këshillit të Ministrave në rastet kur:…..b) dënohet për kryerjen e një vepre penale, me vendim të formës së prerë, nga gjykata;’ duke qenë ky një nga rastet e përfundimit përpara kohe të mandatit, sipas nenit 61, pika 1, germa ‘ç’ e këtij ligji.

Situata ligjore ishte fare e qartë: Fredi Beleri kishte marrë mandatit e Kryetarit të Bashkisë Himarë, me fitoren e tij në zgjedhjet e vitit të kaluar, verifikuar dhe shpallur ky mandat me vendim të të gjitha organeve kompetente në kësi rastesh.

Fredi Beleri nuk u lejua (padrejtësisht) të kryente betimin dhe pra nuk e filloi ushtrimin e mandatit, por vetë mandati ekzistonte gjatë gjithë kohës dhe ishte i vlefshëm. Ai dhe vetëm ai ishte Kryetari i Bashkisë. Të tjerët, të emëruar, ushtronin detyrën në vend të tij.

Ne këto rrethana baza ligjore e drejtpërdrejte dhe e vetme për t’u zbatuar pas vendimit te apelit gjyqësor ishte ajo e sipërcituar, pra qe Këshilli i Ministrave duhej te merrte vendim formal për shkarkimin e Fredi Belerit.

Edi Rama nuk ndërmori një vendim te Këshillit te Ministrave dhe e ‘nxori pataten e nxehtë me duart’ e zotërinjve të sipër përmendur. Arsyet mund të kenë qenë disa: vetë Kryerilindësi nuk donte të përfshihej as vetë as si Këshill Ministrash; vendimi i Këshillit të Ministrave mund të ishte i ankimueshëm në Gjykatën Kushtetuese e në këtë rast, sipas Kushtetutës, shkarkimi pezullohet deri në vendimin e kësaj gjykate ndërkohë që duket se regjimi Rama ka urgjencë në kryerjen e zgjedhjeve në Himarë, e nuk pret as mbarimin e sezonit veror.

Komisioneri Celibashi ‘e nxori pataten me duart e tij’, duke marre vendim me një baze ligjore që nuk vlen fare, po fare-fare, për rastin Beleri. Ligji i dekriminalizimit ndalon kandidimin për disa shkaqe që kanë ndodhur përpara fitimit të mandatit, jo mbas fitimit të tij nga personi. Natyrisht, nëse pas fitimit të mandatit rezultojnë se janë fshehur ato shkaqe që do ta kishin penguar personit të ishte kandiduar atëherë mandati i tij bëhet automatikisht i pavlefshëm. Por, pas fitimit të mandatit, për të gjitha llojet e mandateve përfshirë ato vendore, ka zgjidhje të tjera ligjore, siç edhe në këtë rast, ai sipas nenit 62 germa ‘b’ e ligjit 139/2015.

Qofte edhe tërësisht i gabuar, ky vendim i Komisionerit Celibashi, si akt administrativ, ka afat ankimi dhe s’mund të prodhojë efekte deri në shqyrtimin e ankimit dhe marrjen e një vendimi përfundimtar, së pari nga KAS-komisioni i Ankimeve dhe Sanksioneve i KQZ, së fundmi në Kolegjin Zgjedhor.

As sekretari Agaçi, as Presidenti Begaj nuk priten, përkundrazi, me urgjencë e padurim, brenda ditës, vijuan procedurën për caktimin e datës së zgjedhjeve duke e kaluar kështu dorë më dorë, në shërbim të Kryerilindësit, ‘pataten e nxehtë’ Beleri.

Natyrisht qe ‘Çeta nuk mund të presë sa të mblidhet fshati’.

Në pararendje Fredi Beleri nuk u lejua asnjëherë, as nga Drejtoria e Burgjeve as nga Prokuroria e Posaçme (SPAK) as nga Gjykata e Posaçme (GjKKO) e as nga vete Gjykata e Lartë të shkonte 2 a 3 orë në Himarë për të bërë betimin me pretekstin që ligji për të drejtat e të burgosurit (edhe të paraburgosurit) nuk e parashikon shprehimisht këtë rast (ligji njeh lejen e posaçme për fatkeqësi e gëzime familjare apo provim shkollor), por Beleri fare bukur shkoi në mbledhjen e KQZ-së ndonëse edhe një rast i këtillë nuk përmendet shprehimisht në ligj.

Të gjitha organet e përfshira zbatuan pra direktivën e Kryerilindësit, thënë kjo direktive publikisht që para një viti: ‘Fredi Beleri as nuk betohet, as nuk shkarkohet deri në një vendim gjyqësor përfundimtar’. Këshu e tha Kryerilindësi, kështu ia zbatuan shërbëtorët, me pikë e presje.

Nëse gjithë këtij zinxhiri veprimesh i shtojmë edhe dyshimet e rënda për procesin provokativ, në formë kurthi ndaj Fredi Belerit, që u ekzekutua fillimisht me zell nga policia, prokuroria dhe gjykata e Vlorës, fill pas akuzave e kërcënimeve të vetë Kryerilindësit gjatë fushatës zgjedhore prill-maj 2023, pasuar me arrestimin e Belerit, vijuar më tej nga SPAK e GjKKO me të njëjtin zell shërbëtor e inkuizitor, del fare e qartë se si i gjithë shteti ishte në shërbimin e plotë të Kryerilindësit, pa kushte e pa kundërshti. E Beleri nuk është i vetmi rast.

Bëje zot ëndërr, nënshtrohu, emigro ose ngrihu ta ndalojmë.

Zgjidh.

Syri

[Albo]

Zgjedhjet në Himarë në 4 gusht, Beleri i drejtohet Gjykatës Administrative: Pezulloni dekretin e Begajt



Fredi Beleri, kryebashkiaku i zgjedhur i Himarës, ndaj të cilit KQZ tre ditë më parë vendosi zbatimin e ligjit të dekriminalizimit, pas vendimit të Apelit të GJKKO-së, që e dënoi me dy vite heqje lirie për korrupsion zgjedhor, ka kërkuar në Gjykatën Administrative pezullimin e dekretit të Presidentit të Republikës për dekretimin e datës së mbajtjes së zgjedhjeve të pjesshme vendore në Bashkinë e Himarës.



Gazetarja Klodiana Lala bëri të ditur për Balkanweb se Beleri ka depozituar në Gjykatë një kërkesë, përmes të cilës kërkon pezullimin e zbatimit të dekretit. Beleri kërkon pezullimin e zbatimit të dekretit deri në marrjen e një vendimi përfundimtar për Himarën.

Presidenti i Republikës dekretoi 4 gushtin si ditën e mbajtjes së zgjedhjeve, ndërsa socialistët kanë caktuar Vangjel Tavon si kandidatin e PS-së për Kryebashkiak të Himarës.

Opozita në anën tjetër ka akuzuar Presidentin se nuk respektoi asnjë procedurë ligjore për dekretimin e zgjedhjeve në Himarë, duke mos respektuar afatet që përcaktohen në ligj.

Balkanweb

[Albo]

Si po përpiqet PS ta ‘kthejë’ në kampin socialist bashkinë Himarë

Partia Socialiste zgjodhi Vangjel Tavon si kandidat për kryebashkiak të Himarës, ndërsa dekreti i presidentit për datën e zgjedhjeve u kontestua në gjykatë nga ish-kryetari i dënuar Fredi Beleri – një garë zgjedhore të cilën e ekspertët e shohin të lidhur me interesat e mëdha financiare dhe pronat në bregdet

Nga Blerina Gjoka


Kryeministri Edi Rama shpërndan certifikata pronësie në Himarë

Partia Socialiste bëri zyrtare të hënën kandidatin e saj për bashkinë Himarë, prefektin e qarkut Vlorë, Vangjel Tavo, pasi presidenti shpalli zgjedhjet e pjesshme vendore më 4 gusht.

Ishte kryesia e kësaj partie që vendosi për Tavon, një ish-deputet i Gjirokastrës, por emri i tij nuk ishte surprizë pasi kryeministri Edi Rama e lajmëroi gjatë një vizite në Himarë një javë më parë ku shpërndau personalisht certifikata pronësia për banorët e zonës.

Sekretari i Përgjithshëm i PS-së, Blendi Klosi, e cilësoi Tavon një “kandidaturë përfaqësuese e këtij komuniteti”, gjatë deklaratës për mediat pas mbledhjes së kryesisë, duke iu referuar përkatësisë së tij etnike si minoritar grek.

Zgjedhjet e reja u shpallën nga presidenti Bajram Begaj brenda pak orëve pasi Komisioneri i Zgjedhjeve Ilirian Celibashi vendosi të premten ndërprerjen e mandatit të kryetarit të zgjedhur në zgjedhjet e 14 majit 2023, Fredi Beleri.

Beleri, një kandidat i koalicionit opozitar “Bashkë Fitojmë”, u arrestua dy ditë para zgjedhjeve dhe u dënua me 2 vite burgim për korrupsion zgjedhor.

Ai nuk e ushtroi asnjë ditë detyrën e kryetarit dhe të hënën ai ka ankimuar dekretin e presidentit për zgjedhjet e pjesshme, me një kërkesë për pezullim drejtuar Gjykatës Administrative të Tiranës me argumentin se është “në kundërshtim flagrant” me procedurat e Kodit Zgjedhor.

Gjatë kohës që Beleri priste verdiktin e drejtësisë drejtimi i kësaj bashkie ndryshoi disa herë me kryetarë të komanduar nga këshilli bashkiak i kontrolluar nga socialistët, ndërsa dy prej tyre Jorgo Goro dhe Vasil Bollano janë nën hetim për falsifikim apo abuzime me pronat.

Arrestimi i Belerit, pjesë e minoritetit grek në zonë, u bë shkak e përplasjeve politike mes Tiranës dhe Athinës duke çuar deri në kërcënime të shtetit fqinj se do të bllokonte bisedimet e anëtarësimit të Shqipërisë në BE.

Opozita nuk ka bërë zyrtare akoma një kandidat për këtë bashki, ndërsa Skerdian Dhuli, një aktivist i Partisë Bashkimi për të Drejtat e Njeriut, PBDNJ e cila kishte propozuar Belerin, i tha BIRN-it se kandidat pritet të shpallet djali i kryebashkiakut të dënuar, Petro Beleri.

Por, kryetari i kësaj partie Vangjel Dule, nuk e konfirmoi menjëherë kandidaturën e Petro Belerit. Ai i tha BIRN-it se po diskutohen kandidaturat dhe nuk donte “të paragjykonte vendimmarrjen”.

Edhe pse kandidatët e dy palëve pritet të jenë pjesë e minoritetit grek, ekspertët e politikës nuk e shohin këtë garë si çështje kombësie, por se cila forcë politike do të ketë në dorë menaxhimin e kësaj bashkie bregdetare, ku ka një lakmi për investime turistike, për shkak të vendndodhjes së saj gjeografike.

Ervis Iljazaj, pedagog i Shkencave Politike pranë Universitetit Europian të Tiranës, duke analizuar zgjedhjen e Tavos si kandidat, i tha BIRN-it se prejardhja etnike greke e tij është një tentativë e Ramës për të shuar konfliktin me Greqinë, por nga tjetër synimi kryesor është të ketë një njeri që të zbatojë kërkesat e tij për zhvillimin e turizmit.

Sipas tij, Himara është një nga zonat ku luhen interesa të mëdha ekonomike, investime të mëdha priten të bëhen dhe Rama “kërkon të ketë në pushtetin lokal një kryetar bashkie që thjesht të zbatojë shijet e tij personale për turizmin”.

“Në atë zonë luhen interesa të mëdha financiare dhe politike, sidomos në fushën e turizmit që Rama kërkon ta kthejë në markën e tij personale, pasi dihet që vitet e fundit investimet më të mëdha financiare janë në këtë fushë, sidomos në atë zonë, të cilat kryhen shpesh nga sipërmarrës që janë shumë afër me qeverinë”, theksoi Iljazaj.

Zgjedhjet e gushtit pritet të jenë konfliktuale pikërisht për shkakt të interesave financiare dhe konfliktit diplomatik me vendin fqinj.

“Çështjet e pronave, korrupsioni apo investimet, besoj do te jenë kryefjala e zgjedhjeve të 4 gushtit”, parashikoi Iljazaj, duke shtuar se “problemet me pronat në Himare marrin një vëmendje të veçantë pikërisht për vlerën e lartë që ato kanë dhe lidhjet që krijojnë midis pushtetit dhe klientëve të tij”.

Po, ashtu sipas tij, konflikti diplomatik me Greqinë pritet të vijojë edhe pse Rama ka zgjedhur një minoritar grek për të shuar mosmarrëveshjet.

“Fatkeqësia është se këto zgjedhje po kthehen në zgjedhje të interesave financiare, politike dhe diplomatike, dhe jo zgjedhje për hallet dhe problemet e qytetarëve të Himarës”, përfundon ai.

BIRN

[Albo]

Beleri kërkon të drejtën për vetëvendosje në Himarë



Fredi Beleri ka dhënë një intervistë për ANT1 në Greqi një ditë pasi u lirua nga burgu në Shqipëri. Ai ka folur për betimin si eurodeputet në Strasburg, ndërsa ka falenderuar Kiriakos Micotakis për kandidimin.

Ndërkohë, duke folur për Himarën, Beleri ka kërkuar të drejtën për vetëvendosje. “Ne duhet të kemi të drejta civile. Duhet të kemi të drejtën për vetëvendosje” tha ai.

Duke folur për dënimin ai tha se do të kthehet në burg së shpejti. “Kam bërë një kërkesë për lirimin nga burgu. Do të kthehem në Himarë, është shtëpia ime. Nuk do të largohem. Do të përballem me dënimin tim, cilidoqoftë ai” tha Beleri. Sipas gazetës, Beleri ka thënë se Himara është e banuar nga grekë dhe shqiptarë që kanë bashkëjetuar për shumë vite dhe se kështu duhet të vazhdojë të jetë.

“Shumë raste kanë treguar se drejtësia dhe ndarja e pushteteve nuk funksionojnë. Shqipëria është një vend europian gjeografikisht dhe unë dua të besoj se është ashtu edhe kulturalisht. Por lidershipi atje nuk ka bërë përpjekje për t’u afruar me Bashkimin Europian” ka thënë ai.

[Albo]

SYRI TV/ Lirohet nga qelia, Fredi Beleri: Do të kërkoj të drejtën në Strasburg

Lirohet nga qelia Fredi Beleri. Pasi iu dogj mandati i kryebashkiakut, dhe Partia Socialiste rimori Himarën, sot gjykata ka vendosur lirimin e Belerit, i cili gëzon edhe mandatin e eurodeputetit. Vendimi i Gjyktës së Fierit erdhi pas zvarritjes që iu bënë 3 seancave të shkuara. Avokati Geni Gjyzari, ironizoi pas procesit, se ai që mban çelsat e burgut, vendosi lirimin, ndërsa Fredi Beleri u shpreh se do të vijoj kërkimin e drejtësisë deri në Strasburg.

VIDEO

Fredi Berleri është liruar me kusht sot nga burgu, edhe pse për 1 vit me rradhë, nuk iu dha leja as për tu betuar dhe marrë detyrën e besuar nga qytetarët si kryebashkiak. Pas djegies së mandatit të kryebashkiakut dhe zgjedhjeve të parakohëshme ku socialistët morën mandatin, sot Prokuroria dhe Gjykata kanë vendosur lirimin nga qelia të Belerit, i cili mori edhe mandatin e eurodeputetit me votat e qytetarëve grek. Pas seancës, avokati geni Gjyzari, ironizoi për mbajtjen në qeli të Belerit për qëllime politike, duke i lidhur me zgjedhjet në Himarë.

Pas lirimit nga Qelia, Beleri u shpreh se mandati i tij i kryebashkiakut iu hoq padrejtësisht nga EdI Rama dhe se do të vijojë kërkimin e drejtësisë deri në Strasburg.

Procesi për lirimin nga qelia të Fredi Belerit u zvarrit në tre seancan e kaluara me argumentin se kishte mungesë dokumentacioni, dhe fill pas përfundimit të zgjedhjeve në Himarë, u mor edhe vendimi për lirim. Fredi Beleri u arrestua një ditë para zgjedhjeve në mënyrë të dyshimtë, ndërsa u dënua për blerje votash, me dëshmi, që avokatët mbrotjtës i kanë cilësuar si inskenim nga ana e Policisë. Pak javë më parë, Belerit iu dha leje e posatshme për tu betuar si eurodeputet në respekt të votës së qytetarëve grek, por i njëjti standard nuk u respektua nga qeveria shqiptare për respektimin e votës së qytetarëve shqiptarë, duke i djegur Belerit mandatin e kryebashkiakut.

Syri

[Albo]

VIDEO/ Beleri: U burgosa dhe u lirova me vendim politik, beteja ime do të vazhdojë në PE

VIDEO

Eurodeputeti, Fredi Beleri i cili sapo la ambientet e burgut pas vendimit të gjykatës për ta liruar para kohe është shprehur se në Shqipëri vendimet janë politike ashtu si burgosja por edhe liri im nga burgimi.

Beleri ka theksuar se beteja e tij do të vazhdojë në Strasburg dhe do ta ngrejë zërin e tij për padrejtësitë që bëhen në Shqipëri nga pushteti.

"Në Shqipëri nuk ka zgjedhje sepse pushteti ka vendosur që këtu të mos ketë zgejdhje. Unë fitova në 14 maj dhe këto që zhvilluan tani në gusht ishin të paligjshme dhe kryeministri implikoi të gjithë mafien për të fituar në Himarë.

Dueht të dini që liria është e shenjtë për çdo njeri de një ditë në burg nuk ja vlen nëse je padrejtësisht, do të luftoj nga një pozicion tjetër për këtë padrejtësi.

Unë bëj pjesë në partitë popullore të PE-së dhe me mundësinë që kam do të ngre zërin për padrejtësitë që bëhen në Shqipëri. Vendimi sot ishte politik ashtu si janë vendimet në Shqipëri.

Për mua kjo çështje do të mbyllet në Strasburg dhe atje do të kërkoj të drejtën time dhe do të vërtetoj se jam burgosur padrejtësisht."

Syri

[Albo]

VIDEOLAJM/ Fredi Beleri lirohet nga burgu politik, qindra banorë të Himarës dalin në shesh për ta pritur

VIDEO

Pasi lirimit nga burgu i Fierit, Fredi Beleri është ka mbërritur në Himarë ku është pritur nga qindra banorë.

Nga pamjet e ardhura në redaksinë e SYRI-t, dallohen banorët e Himarës të cilët janë mbeldhur në sheshin pëballle zyrës së Omonias.

Eurodeputeti Fredi Beleri do te mbaj një fjalim përpara mbështetësve të tij dhe më pas është organizuar dhe një festë.

Syri

[Albo]

Intervista e Fredi Belerin me Syri TV:





VIDEO