Instituti i Statistikave nga dje ka një drejtor të ri. Shkarkimi i drejtoreshës Ines Nurja është bërë përmes një shkrese të firmosur nga Kryeministri Edi Rama dhe në vend të saj është emëruar drejtori i Institutit “Agenda”, Gjergj Filipi. Emërimi i një drejtuesi të ri në krye të INSTAT-it nuk është i vetmi vendim që është marrë nga Kryeministri Rama. Pak ditë më parë, në mbledhjen e qeverisë është shkrirë edhe Këshilli i Statistikave.
Shkarkimi
E kontaktuar dje nga gazeta “Panorama”, ish-drejtoresha e INSTAT-it, Ines Nurja, ka preferuar të mos bëjë komente rreth shkarkimit. Sipas saj, procedura ka qenë e thjeshtë dhe është bërë me dije për shkarkimin përmes një shkrese e cila bënte me dije gjithashtu emërimin e Filipit në vend të saj. Nurja ka refuzuar të komentojë nëse shkarkimi i saj lidhet me arsye politike, por nuk fshehu habinë për këtë veprim. Në fakt, Partia Socialiste dhe vetë Kryeministri Edi Rama në jo pak raste e kanë cilësuar INSTAT-in si një institucion pak të besueshëm. Gjatë kohës së tyre në opozitë ky institucion është akuzuar se manipulon shifrat dhe fsheh gjendjen reale të ekonomisë përmes treguesve që publikon. Dy vitet e fundit INSTAT ka qenë në epiqendër të akuzave të opozitës së djeshme, qeveria e sotshme, edhe për mosrespektimin e kalendarit të publikimit të të dhënave, sidomos e lidhur kjo me treguesit e Prodhimit të Brendshëm Bruto. Përkundër kësaj, INSTAT ka qenë i vlerësuar në disa raste nga FMN dhe Eurostat për statistikat e prodhuara dhe aplikimin e metodologjive të reja. Ish-drejtoresha Nurja punonte pranë INSTAT-it qysh nga vitit 2006, fillimisht si konsulente e jashtme dhe më pas në krye të institucionit. Ajo ka punuar si asistent pedagoge në Universitetin e Tiranës, në Fakultetin e Ekonomisë, ndërkohë që ka qenë pjesë e një sërë projektesh në disa universitete të huaja, kryesisht në Francë.
Drejtori i ri
Gjergj Filipi është emri i ri që do të jetë në krye të Institutit të Statistikave. Për shumë emri i tij nuk është i panjohur, pasi ka qenë aktiv në daljet publike në televizione, duke shfaqur kryesisht një qëndrim kritik ndaj qeverisë paraardhëse lidhur me politikat ekonomike. Ai është drejtor i institutit “Agenda”, i cili ka kryer një sërë kërkimesh, kryesisht të lëmit ekonomik dhe zhvillimit social. Në CV-në e tij bën pjesë edhe mësimdhënia si pedagog në Universitetin Europian të Tiranës, ndërkohë që emërimi në një pozicion kyç në një institucion të pavarur nga qeveria socialiste duket se nuk ka ardhur rastësisht. Në vitet 2003-2005 Filipi ka qenë koordinator i politikave për tregun e brendshëm në Departamentin e Integrimit Europian pranë Këshillit të Ministrave.
Mima: Shkarkimi i Nurjes, i paligjshëm
Deputeti Florjon Mima e cilësoi të paligjshëm shkarkimin e Ines Nurjes nga posti i drejtoreshës së INSTAT dhe vendosjes në vend të saj të drejtorit të institutit “Agenda”, Gjergj Filipi. “Sot të gjitha paralajmërimet e Partisë Demokratike lidhur me fushatën e spastrimeve politike dhe emërimeve të reja klienteliste e aspak meritokratike, po vërtetohen katërcipërisht. Sot kuptohet qartë qëllimi i atentatit ndaj konsensusit me shtyrjen e futjes në fuqi të ligjit për nëpunësin civil”, tha deputeti demokrat. Sipas tij: “Statistikat e vendit, një krenari kombëtare e cituar pa përjashtim në të gjitha raport-progreset e Bashkimit Europian, kanë pësuar sot atentatin më të rëndë dhe paralajmërimi tjetër i Partisë Demokratike për kapjen e statistikave të vendit dhe vendosjen e tyre nën thundrën e Kryeministrit të ri të vendit, është sot plotësisht i vërtetuar”.
NERTILA MAHO
Panorama
Përgjigju Duke Cituar
Postuar më parë nga Qyfyre
Krijoni Kontakt