PDK i bën ftesë zyrtare AKR-së për koalicion qeverisës
Prishtinë, 10 shkurt 2011 (Kosovapress) Koha 18:55
Kryesia e PDK-së në mbledhjen e saj, të cilën e ka mbajtur të enjten mbrëma, ka vendosur të procedojë me fillimin e bisedave formale për krijimin e koalicionit të ardhshëm qeveritar. Anëtari i Kryesisë së PDK-së, Memli Krasniqi, ka thënë se PDK ka vendosur t’i bëjë ofertë zyrtare Aleancës Kosova e Re (AKR) për të zhvilluar bisedimet për arritjen e një marrëveshjeje për qeverinë e ardhshme. Sipas tij, partitë të cilave nuk do t’u bëhet ftesë nga PDK-ja janë LDK, AAK dhe Lëvizja Vetëvendosje.
Krasniqi ka thënë se takimet për formimin e qeverisë së ardhshme të Kosovës do t’i udhëheqë kryetari i PDK-së, njëherësh mandatari për krijimin e qeverisë së ardhshme Hashim Thaçi.
Ai ka shtuar se shumë shpejt do të ketë takime edhe me ekipin e AKR-së, në mënyrë që të konkretizohen hapat e ardhshëm në funksion të krijimit të institucioneve të dala nga zgjedhjet e 12 dhjetorit.
Krasniqi: PDK, ftesë zyrtare AKR-së për koalicion qeverisës
(Video)
“Si PDK kemi vendosur që t’i bëjmë ftesë zyrtare për ofertë zyrtare koalicionit Aleanca Kosova e Re për të zhvilluar bisedimet në funksion të arritjes së një marrëveshjeje për qeverinë e ardhshme dhe për institucionet tjera. Ekipi i PDK-së i udhëhequr nga kryetari i PDK-së dhe mandatari për krijimin e qeverisë së ardhshme Hashim Thaçi do t’i udhëheqë këto bisedime besoj se shumë shpejt do të ketë takime edhe me ekipin e AKR-së në mënyrë që të konkretizohen hapat e ardhshëm në funksion të krijimit të institucioneve”, ka thënë Krasniqi, duke sqaruar se bisedat me ekipin e AKR-së mund të procedojnë që nga ky moment e tutje.
Për sa i përket nëse do të pranojë PDK-ja që në të ardhmen të jetë Behgjet Pacolli president i Kosovës, Krasniqi ka thënë se oferta e Partisë Demokratike të Kosovës është çështje që do të diskutohet në këto takime zyrtare që pritet të fillojnë. Ai ka shtuar se do të ketë biseda edhe me Listën Ibrahim Rugova e cila ka një mandat në kuadër të koalicionit parazgjedhor me AAK-në, si dhe me partitë tjera nga radhët e pakicave që kanë fituar gjithsej 25 vende.
Krasniqi: Do të zhvillojmë bisedime edhe me partitë e tjera
(Video)
“Unë sot ju konfirmoj se ne do të zhvillojmë bisedime me AKR-në, ndërsa edhe për partitë e tjera duke përfshirë edhe Listën Ibrahim Rugova dhe partitë minoritare është një çështje e zhvillimit të takimeve të ardhshme, por mund të ju them se në parim ne kemi vija të përbashkëta dhe pajtim për të pasur një qeveri apo një pjesëmarrje edhe të të tjerëve në qeverinë e udhëhequr nga PDK-ja”, ka thënë ai.
I pyetur rreth mundësisë së krijimit të Qeverisë para datës 17 shkurt, kur shënohet trevjetori i pavarësisë së Kosovës, Krasniqi ka thënë se PDK po punon për formimin e qeverisë deri para kësaj date.
Krasniqi: Ne ende po punojmë në atë drejtim
(Video)
“Ne gjatë gjithë kohës ju kemi thënë se është edhe vullneti edhe qëllimi i Partisë Demokratike të Kosovës që të arrihet një marrëveshje për qeverinë e ardhshme dhe për institucionet më së largu deri më datën 17 shkurt dhe ne ende po punojmë në atë drejtim dhe kemi një optimizëm duke i parë zhvillimet se do të ndodhë një gjë e tillë”, është shprehur Krasniqi.
Mirëpo ai bëri të ditur se partitë të cilave nuk do t’u bëhet ftesë nga PDK-ja janë LDK, AAK dhe Lëvizja Vetëvendosje.
Krasniqi: Nuk do t’u bëhet ftesë LDK-së, AAK-së dhe Vetëvendosjes
(Video)
“Nuk ka absolutisht një vendim për t’i ftuar qoftë LDK-në, qoftë Vetëvendosjen apo AAK-në”, ka thënë Krasniqi.
AKR deri më tash ka këmbëngulur për postin e presidentit, si kusht për të qenë pjesë e qeverisë së ardhshme të vendit.
Ndryshe, PDK ka dalë partia e parë në zgjedhjet e 12 dhjetorit, duke siguruar 34 mandate, LDK 27 mandate, Lëvizja Vetëvendosje 14 mandate, AAK 12 mandate, AKR 8 mandate. Partitë tjera që kanë fituar mandate janë ato nga radhët e komuniteteve, SLS me 8 mandate, JSL 4 mandate, KDTP 3 mandate, Koalicioni VAKAT 2 mandate, ndërsa nga një mandat kanë fituar PDAK, PAI, SDSKIM, NDS, BSDAK, IRDK, GIG dhe PREBK. Nuk është ende e sigurt nëse të gjitha partitë nga radhët e komuniteteve do të jenë pjesë e qeverisë së ardhshme të vendit. /V.Dana/
Krijoni Kontakt