Imami politik
Askush nga Bashkësia Islame e Kosovës nuk ka dashur të komentojë deklaratat politike dhe fyese që ka bërë imami i Xhamisë së Madhe të Prishtinës, Shefqet Krasniqi, për Lëvizjen Vetëvendosje. "Subhan'Allah", ka qenë komenti i vetëm i kryeimamit Sabri Bajgora. Glauk Konjufca thotë se imami është politik dhe i shitur, kurse KDMLNJ’ja vlerëson se është më mirë që Krasniqi të merret me fe.
Lëvizja Vetëvendosje ka reaguar ashpër ndaj deklaratave të imamit të Xhamisë së Madhe të Prishtinës.
Reagimi ka ardhur pasi që Shefqet Krasniqi, në cilësinë e ligjëruesit islam, duke përzier fenë me politikën, ka folur ashpër kundër Lëvizjes Vetëvendosje të Albin Kurtit, duke e quajtur atë enveriste dhe duke thënë se myslimanët që votuan për të, bënë një mëkat të madh.
“Vetëvendosja është një lëvizje enveriste dhe myslimanët duhet me qenë larg saj. Është mëkat me ia dhanë votën Vetëvendosjes, por ne nuk kemi punuar për ta sqaruar mendimin e islamit për Vetëvendosjen, sepse nuk ka pasur kohë. Vetëvendosjes, është haram, është mëkat me ia dhanë votën. Kaq”, ka thënë Krasniqi për TV Klan.
Ndaj këtyre deklaratave publike ka reaguar aktivisti i Vetëvendosjes, Glauk Konjufca, i cili imamin Shefqet Krasniqi e ka quajtur hoxhë të shitur.
“Nuk ia vlen të merremi me të, ai është një hoxhë i shitur, hoxhë politik”, ka thënë Konjufca për Express.
Sipas tij, nuk është hera e parë që imami i Xhamisë së Madhe bën këso deklaratash, duke ofenduar parti të caktuara politike.
“Ai edhe më herët ka dalë publikisht, duke bërë thirrje që të votohen parti të caktuara politike”.
Imami Krasniqi ka thënë, po ashtu, se nuk sheh jetë të gjatë për Lëvizjen e Albin Kurtit, sepse votat këtë herë kanë qenë euforike dhe në zgjedhjet e ardhshme nuk do të mund të fitojë shumë.
Shefqet Krasniqit i ka ardhur keq që partia e biznesmenit kosovar, Behgjet Pacolli, AKR, nuk ka mundur të marrë më shumë vota në zgjedhjet e fundit. Në zgjedhjet e vitit 2007, Krasniqi partisë së Pacollit i ka dhënë edhe përkrahje publike.
Gjithashtu, Krasniqi ka paralajmëruar PDK-në të mos mendojë se mund të qëndrojë në pushtet gjithmonë, sepse mund t’i ndodhë një situatë si e Egjiptit.
Askush nga Bashkësia Islame e Kosovës nuk ka dashur t’i komentojë deklaratat e Krasniqit, e as të merret me to.
Kryemami Sabri Bajgora ka thënë se nuk ka qenë në Kosovë dhe nuk di çfarë ka deklaruar imami. Bajgora ka kërkuar që shkurt t`i lexohet deklarata e Krasniqit dhe, më pas, komenti i tij ka qenë: "Subhan'Allah"!
Ai ka sugjeruar që për këtë të pyetet zyrtari për media i BIK-ut, Ahmet Sadriu. Ky i fundit ka hapur telefonin dhe nuk ka dashur që të bezdiset gjatë vikendeve.
“Jam në ambient familjar dhe e kam nënën e sëmurë”, ka thënë shkurt ai.
Për Këshillin për Mbrojtjen e të Drejtave dhe Lirive të Njeriut, deklaratat e imamit janë skandaloze.
Behxhet Shala, drejtor ekzekutiv i KMDLNJ-së, ka thënë se nuk është hera e parë që ky imam bën deklarata të tilla.
Sipas tij, Krasniqi më shumë merret me politikë, sesa me fe, për të cilën është edhe i thirrur.
“Ai është më mirë të merret me fenë për të cilën edhe është i thirrur, sesa të bëjë deklarata politike”, ka thënë Shala.
Më herët, imami Krasniqi kishte shkaktuar reagime të ashpra në opinion, me deklaratat kundër Nënës Tereze. /express/
P.s Ka rinisur fushata e gazetës Express kundër Imamit Krasniqi, por prapë e kotë, secili njeri ka të drejtë të përcaktohet se cilin krahë politik deshiron t'a përfaqsoj, kurse Vetëfundosja e ka vetëm një hall pse askush nuk po e përkrahë por të gjithë janë kundër saj. Hashim Thaçi shumë shpejt do të rizgjidhet Kryeministër dhe deputetet e Vetëfundosjes do të përngjajnë në ata të pakicave serbe në Parlament.
Krijoni Kontakt