KD: FMN shqetësohet nga premtimet e Thaçit
Premtimet e ditëve të fundit të kryeministrit të Qeverisë në largim, Hashim Thaçi, për rritje të pagave, e kanë shqetësuar kreun e Fondit Monetar Ndërkombëtar, ndërsa zyrtarët e FMN-së janë shprehur kundër rritjes së pagave, për më tepër që ky institucion financiar disa muaj më parë e kishte pranuar propozimprojektin e qeverisë Thaçi për buxhetin e vitit 2011, pavarësisht se projekti, si i tillë, nuk garantonte se mund të përballojë disa nga prioritetet, sidomos realizimin e punimeve në autostradën Vërmicë – Merdar- shkruan e përditshmja Koha Ditore.
Në marrëveshjen e arritur në korrik të këtij vit me Fondin Monetar Ndërkombëtar, krerët e Qeverisë janë zotuar se nuk do të premtojnë rritje të pagave për asnjë sektor që paguhet nga arka e shtetit për vitin 2011, kurse rritjet e pagave në sektorin publik nuk kanë qenë të parapara as në Kornizën Afatmesme të Shpenzimeve për vitet 2011-2013, dokument zyrtar qeveritar në bazë të të cilit kalkulohen shpenzimet e mundshme të secilit sektor publik.
Dhe, pikërisht kjo marrëveshje, sipas gazetës, ishte ajo që e bindi FMN-në t’i ofrojë Kosovës një hua të butë në shumë prej 110 milionë eurosh, me të cilën më pas siguroheshin edhe 300 milionë të tjera si ndihmë nga Bashkimi Evropian dhe nga Banka Botërore.
Koha Ditore shkruan se premtimet e Thaçit për rritje të pagave para se të reagojë FMN-ja, janë kritikuar edhe nga shumica e partive politike, nga shoqëria civile dhe nga ekspertët. Të gjitha kritikat janë bërë duke iu referuar raporteve zyrtare të Qeverisë për buxhetin e ri. Shpenzimet për vitin 2011 janë llogaritur të jenë 1 miliard e 426 milionë euro, kurse të hyrat e sivjetme janë afro 1 miliard e 100 milionë euro.
Mbulimin e diferencës mes hyrje-daljes që arrin në afro 300 milionë euro, Qeveria e pati planifikuar të arrinte nëpërmjet procesit të privatizimit të Postë-Telekomit. Kjo diferencë qindramilionëshe nuk ishte projektuar për paga dhe shërbime të tjera, por për investime në autostradë. Sipas dinamikës së paraparë në kontratën me konsorciumin “Bechtel-Enka”, Qeveria e Kosovës gjatë vitit 2011 duhet t’i paguajë 225 milionë euro për ndërtim dhe 50 milionë euro për shpronësime. Këto mjete ende nuk janë siguruar, meqë procesi i privatizimit të PTK-së ka ngecur në fillim të rrugës. /KD/Telegrafi/
http://www.telegrafi.com/?id=2&a=11631
Krijoni Kontakt