Gjergj Koja: Ja cilat vota synon Partia Socialiste e Re

[Begby]

Tuesday, 16 September 2008
Ajo që po lind, Partia Socialiste e Re, konsiderohet nga nismëtari Gjergj Koja, si lëvizje për të ndihmuar të majtën në fitoren e saj në vitin zgjedhjet e vitit 2009. Vota që synon kjo parti janë të atyre që nuk votojnë as Edi Ramën , as LSI-në. Politikani Koja, thotë se partia e tyre nuk do të lejojë rrjedhjen e votave, nga e cila humb e gjithë e majta shqiptare. Ai tregon kontradiktat që ka pasur me kryetarin e PS-së, Edi Rama, mungesën e analizave për humbjet elektorale në PS dhe si vendosën të ndahen nga PS aktuale. “Nuk jemi politika e vjetër, jemi socialistët e vërtetë”- thotë Koja i trishtuar, kur i zë në gojë FRESSH-in.Ky forum, -sipas tij,- e ka humbur misionin, pra e ka mbyllur përgjithmonë fletën e tij. Kush është raporti juaj personal me kryetarin e PS-së Edi Rama? A ka ndikuar ky raport në ndarjen tuaj me lidershipin e PS-së? Unë, siç e dini, kam shumë vite që aderoj në PS dhe që merrem me politikë. Kësisoj “vjetërsia” ime në politikë dhe përvoja që kam grumbulluar nga zhvillimet shpesh herë të vrullshme dhe emancipuese në PS ndër vite, më kanë mësuar dhe detyruar që të mos sillem asnjëherë në politikë i ndikuar emocionalisht apo subjektivisht nga marrëdhëniet personale me drejtuesit e PS-së, qoftë ky edhe Kryetari i PS-së. Nga ky parim i imi nuk ka bërë përjashtim as kryetari aktual i PS-së aktuale, Z. Edi Rama. Pra, unë nuk kam dhe nuk do të kem asnjëherë asnjë inat apo qejfmbetje personale me Edi Ramën. Kritikat e mia publike ndaj tij janë bërë vetëm mbi bazën e botëkuptimit tim politik për mënyrën se si po e drejton ai PS-në dhe përçarjen e madhe që ai ka shkaktuar në PS. Çfarë ka ndodhur me FRESSH-in pas largimit tuaj? A ka ndryshuar status ky forum dhe është shkrirë me partinë, apo gëzon autonomi? E kam thënë edhe një herë tjetër që FRESSH-i e ka mbyllur kapitullin e tij një herë e mirë, sepse Edi Rama i ndryshoi atij misionin e madh politik që kishte ndër vite brenda në PS. Dhe natyrisht që ndjehem i trishtuar për këtë që ndodhi. Ka mendime se divergjencat tuaja me Kryetarin e PS-së nxiten dhe nga fakti se humbët postet në parti. A është bërë në PS ndonjë analizë për zgjedhjet e 2005 dhe më pas për zgjedhjet vendore? Ne fillim fare, d.m.th. nga fundi i vitit 2005, ishin jo të paktë ata që deklarimet publike kritike të Gjergj Kojës ndaj lidershipit të PS-së i konsideronin si pakënaqësi personale të Kojës ndaj Ramës. Por më pas, me zhvillimet politike në PS gjatë viteve 2006, 2007 e 2008, opinioni ndryshoi rrënjësisht dhe ishin të shumtë figurat politike në PS, por edhe socialistët e thjeshtë në rrethe që kundërshtimin ndaj politikave të gabuara të Ramës në krye të PS-së e artikuluan madje edhe në një qëndrim politik, siç ishte edhe Lëvizja për Politike Institucionale. E pra, nuk ishte as grindje e tepruar dhe as faji i Gjergj Kojës pse Rama nuk bëri asnjëherë deri më tani as analizën e humbjes së zgjedhjeve të 3 Korrikut 2005, as analizën e humbjes së zgjedhjeve të pjesshme parlamentare në Tiranë, Pogradec, Shijak etj., as pse PS humbi në zgjedhjet lokale të vitit 2007 pothujse të gjitha këshillat e qarqeve e këshillat bashkiake, dhe asnjë analizë tjetër. Përse nuk qëndroni brenda PS-së dhe të vazhdoni oponencën ndaj lidershipit me Lëvizjen tuaj Institucionale? Sepse lidershipi i PS-së, në mënyrë tepër asfiksuese nuk lejoi as edhe një hapësirë sado të vogël për të mundësuar debatin konstruktiv dhe mendimin ndryshe në PS. Këta dy faktorë, jo vetëm që e kanë mbajtur gjallë PS-në ndër vite, por edhe e kanë emancipuar atë dhe kanë bërë të mundur që PS të qëndrojë në pushtet për 8 vjet, duke bërë punë të mira për Shqipërinë. Më vjen keq që Edi Rama e shkelmoi vetë alternativën me të cilën ai erdhi në krye në PS: fraksionet apo mendimi ndryshe. Madje, në një nga Kongreset që ai drejtoi diku nga Qershori 2006, ai deklaroi jo pak i nxehur, se do të bënte ndryshime radikale në PS dhe se, kush nuk ishte dakord me të, të ikte nga Partia (dhe në fakt ndryshimet radikale për keq ai i bëri vërtet në PS). A mund të mbahej më PS e bashkuar me këtë lloj politike??!! Ka shumë ditë që keni shpallur krijimin e partisë së re. Për interes të lexuesit, a mund të na flisni pak se çfarë përfaqëson politikisht ky subjekt? Shumë thjesht dhe qartë: Partia Socialiste e re që po zyrtarizohet këto ditë është, në fakt, Partia që po formohet nga socialistët e vjetër të vitit 1991 dhe 1992, paçka se Rama ata i quan politikë e vjetër. Në këtë kontekst, ajo është Partia Socialiste reale, që synon t’u kthehet vlerave të vërteta të socialistëve dhe të socialdemokracisë në Shqipëri, në program dhe në aktivitet politik. Më lejoni, t’iu bëj të qartë lexuesve se kjo Parti e re Socialiste: Së pari, nuk po lind për inat të Edi Ramës, por sepse PS nuk po bën opozitë; së dyti, ka për mision kryesor të rikthejë të majtën në pushtet në vitin 2009, duke mos lejuar rrjedhjen e asnjë vote të majtë; së treti, jo vetëm që nuk po e përçan PS-në, por po i bën një shërbim shumë të madh të majtës në vend, sepse do të synojë të meritojë votat e socialistëve që nuk do të votojnë as për Ramën e as për LSI-në. Dhe iu siguroj që të tillë ka shumë. Që të kuptojmë shtrirjen dhe mbështetjen e partisë suaj të sapoformuar, a mund të na thoni se cila është mbështetja gëzon lëvizja juaj në Durrës në raport strukturat e PS-së? Ju garantoj që kjo Parti do të ketë mbështetje domethënëse nga elektorati në zgjedhjet e vitit të ardhshëm, jo vetëm në Durrës, por në shumë rrethe. Cila është taktika juaj elektorale? A do të bashkoheni me ndonjë koalicion apo do të garoni të vetëm? Koalicioni “E majta për integrim” përbën në të vërtetë një mundësi reale (dhe të vetme) për ta sjellë të majtën në pushtet. Ne e shohim veten pikërisht në një bashkëpunim të frytshëm me LSI-në dhe forcat e tjera politike në këtë koalicion. Mandej, edhe vetë PD e PS, janë shprehur në favor të koalicioneve të përbëra, çka e kushtëzon çdo taktike elektorale në kuadrin e koalicioneve. Sipas pikëpamjes suaj, a fiton PS pa LSI dhe aleatët e tjerë? Si mund të bashkohet e majta? Tanimë është e qartë për cilindo se, në vitin 2009 asnjë parti nuk do të mund të ketë e vetme monopolin e shumicës së votave për të qeverisur, aq më pak PS pa LSI–në dhe Partine Socialiste që po krijohet . Besoj se zgjedhjet lokale të vitit 2007 e dëshmuan këtë. Edhe testimet elektorale, zyrtare apo jo zyrtare, po e dëshmojnë këtë. Zoti Rama ka ftuar qytetarët në një miting proteste ditën e premte. Madje për këtë ai ka ftuar edhe Zotin Meta në një tryezë. Cili është komenti juaj? Një iniciativë politike shumë e mirë, por shumë e vonuar. Nuk e kuptoj pse lidershipi i PS-së ka afro 6 muaj që ka mbajtur pozicionin e shurdhmemecit për tragjedinë e Gërdecit, që tani ka marrë përmasa ndërkombëtare. Shpresoj të mos jetë iniciativa e fundit.

[Qyfyre]

Kanë një të mirë këto partitë e reja se shtojnë vende pune.

[drenicaku]

A pak po ju dalin keto parti socialiste qe keni veq formoni tjera
Sido qe te jet socialiste eshte prandaj eshte e dedikuar te deshtoi.