Dashamir Biçaku
Vitore Suçi, 28 vjeçe ka qëlluar me thikë bashkëshortin e saj Marash Doda, 40 vjeç duke e lënë të vdekur në vend. Menjëherë pas krimit, gruaja është vetëdorëzuar në komisariatin nr.3 të policisë, ku ka pranuar krimin e vrasjes gjatë deklarimeve të dhëna para hetuesve. Sipas burimeve nga policia, ngjarja ka ndodhur pas grindjes mes çiftit për 500 lekë reja. Vrasja e 40-vjeçarit nga gruaja e tij ka ndodhur në prani të prindërve të kësaj të fundit, të cilët ishin të pranishëm në shtëpinë e familjes Doda në zonën e Bregut të Lumit në Tiranë. Viktima ishte konfliktuar me prindërit e gruas dhe ka ushtruar dhunë ndaj tyre. E shoqja i ka kërkuar bashkëshortit t’i linte të qetë prindërit e saj, përndryshe do ta vriste. Këmbëngulja e 40-vjeçarit i ka kushtuar jetën atij pasi është qëlluar me thikë në zemër nga Vitore Suçi, e cila ishte martuar me viktimën një muaj më parë.
Krimi në familje
Krimi në familje ndodhi në lagjen e Bregut të Lumi, në zonën e ish-kombinatit “Josif Pashko”. Vitore Suçi, 28 vjeçe qëlloi një herë të vetme në gjoks në krahun e zemrës Marash Dodën, 40 vjeç. Vrasja në familje ndodhi dje në mesditë rreth orës 14:00, kur policia e Tiranës është njoftuar për konfliktin në familjen Doda. Policia është njoftuar për një konflikt në familje mes burrit Marash Doda dhe gruas së tij Vitore Suçi. Sipas lajmërimit të mbërritur në polici, Marash Doda po ushtronte dhunë mbi prindërit e bashkëshortes së tij. Kaq ka mjaftuar që policia të nisej si zakonisht në drejtim të banesës së familjes Doda. Edhe më parë policia kishte ndërhyrë në këtë familje për shkak të konflikteve dhe mosmarrëveshjeve të vazhdueshme mes anëtarëve të saj. Ngjarjet kanë precipituar shpejt dhe policia e ka pasur të pamundur të shmangë ngjarjen e djeshme.
Paratë dhe alkooli
Mosmarrëveshja e djeshme që përfundoi në vrasje, sipas policisë ka pasur si shkak 500 lekë të reja. Këto para Marash Doda i kërkonte t’i shpenzonte në lokalin e lagjes për të pirë raki. Për të njëjtin shkak ai ka pasur konflikt edhe me motrën e tij Luljetën, më 12 korrik 2008 kur në grindje e sipër e kishte goditur atë me sëpatë në kokë. Policia tha se, familja ishte në gjendje jo të mirë ekonomike, për shkak se viktima nuk punonte por për më tepër, konsumonte alkool rregullisht. Për këtë shkak viktima ka nisur të grindet me të shoqen, duke i kërkuar asaj para dhe duke debatuar me të në sy të prindërve të saj që kishin ardhur nga Paskuqani në familjen Doda për vizitë. Kur prindërit e moshuar të Vitore Suçit, kanë dëgjuar konfliktin që po përsëritej brenda një muaji nga martesa e vajzës së tyre, ata kanë vendosur të ndërhyjnë. Babai i Vitores ka debatuar me dhëndrin e tij për mënyrën e sjellje së tij ndaj të bijës. Më pas Marash Doda ka goditur vjehrrin e tij me grushte dhe sende të forta në fytyrë. Konflikti fizik mes dhëndrit dhe vjehrrit ka ndodhur në oborrin e shtëpisë. Vitore Suçi ka marrë një thikë dhe ka kërcënuar të shoqin se do ta vriste nëse i prekte me dorë prindërit e saj. “Do të të vras po e preke më babën”. Kërcënimi i bashkëshortes së tij të re, i është dukur për të qeshur Marash Dodës, por në korridorin e shtëpisë së tij të vogël gruaja nuk është përmbajtur. Ajo ka qëlluar të shoqin me një thikë buke, drejt në gjoks në krahun e zemrës. Viktima ka mbetur i plagosur rëndë në zemër, ndërsa është dërguar në Spitalin Ushtarak ku edhe ka ndërruar jetë pa shpresë shpëtimi nga sasia e gjakut të humbur.
Pan.
Krijoni Kontakt