Fushata zgjedhore 2009

[Duaje Siveten]

BalkanWeb 07/01/2009

Krisje serioze në pallatin e kristaltë

Nga SELIM BELORTAJA

Këto ditë ndërrimi vitesh, janë njëkohësisht edhe periudhë analizash vjetore. Zyra, agjenci, magazina, ambasada, ministri, të gjithë i ke përmbys mbi raporte. E ndërsa fushata përmbyllëse ka përfshirë tërësisht edhe “tre pushtetet”, qeverinë, ligjbërësit dhe “të pavarurin” gjyqësor, duket se “pushteti i katërt” as që ka ndërmend t’i hyjë asaj pune. Ai ndihet tërësisht në rregull, i realizuar dhe aspak llogaridhënës, para askujt. As para publikut të gjerë, të cilit thotë se e ka të vetmin pol të orientimit të vet. E në se media vetë as që ka ndërmend t’ja bëjë vetes një shqyrtim të tillë llogaridhënës për ç’ka na ka shërbyer por edhe “për ç’ka na ka punuar”, kjo s’na ndalon dot ne, konsumatorëve të saj, që t’i hedhim një vështrim punëve të saj. Vetëm një vështrim, sepse një analizë e thellë kërkon kohë, studim e njohuri. Që ne nuk i kemi. Është përgjegjësi publike që dikush duhet ta bëjë këtë ndonjëherë, t’i hedhë pra ndonjë sy edhe pallatit të kristaltë të këtij pushteti, sepse media është i vetmi “dyqan” që na ndikon dyfish (siç thotë Marshall McLuhan, studiues i njohur i saj): ajo “..e ndikon shoqërinë në të cilën vepron, jo vetëm me përmbajtjen e lëndës që transmeton, por edhe me karakteristikat e veta si medium”. Pra na ndikon edhe me profesionalizmin, interesat, lidhjet dhe moralin e vetvetes si media konkrete. Këtë të gjithë e ndjejmë, përderisa edhe lajmi më i thjeshtë, na vjen përditë e njëkohësisht, në të shtatë ngjyrimet e ylberit.

***

Si vjen pra e si paraqitet ky pushtet i katërt, në këtë kohë bilancesh? Sa për sqarim. Sa më poshtë, nuk duhet marrë si një pamje absolute. Televizione e gazeta të caktuara bëjnë të gjitha përpjekjet për integritet moral e profesional. Me sforco e me shpirt ndër dhëmbë, natyrisht. Por pa mohuar prurjet e dobishme, kryesisht informative edhe të mediave të tjera, në përgjithësi bota e medias shqiptare vjen –sipas meje, me shumë probleme, të cilat e ulin fort grafikun e vlerës reale e dobisë publike të saj. Nuk flasim për kualitetin e fotove e pasurinë e bojërave në gazeta, as për luksin e kolltukëve e llamburitjet e tepërta të disa studiove televizive, as për sforcot ekzibicioniste e veshjet e kushtueshme të disa emision-drejtuesve të dashuruar fort..me vetveten. Ato kanë rritje padyshim. Së paku ..rritje çmimesh e kostosh. Në perceptimin tim, ajo ka një prirje në rënie sa i përket raportit me dobinë publike dhe të vërtetën. Ku e shoh unë këtë. Së pari, e shoh tek marrëdhëniet (marrje-dhëniet do të ishte fjala më e goditur) me pushtetin politik. Këtu ka një ndërveprim me dy drejtime: së pari, presioni i qartë që ushtron pushteti për “ta gdhendur” median dhe vënë në shërbimin e vet. Së dyti, mungesa e integritetit dhe “shitja e shpirtit” nga vetë mediat. Për presionin dhe goditjen mjaftojnë vetëm dy ilustrime për dy vitet e fundit. Gjoba gjigande ndaj Top-Channel-it në 2007 dhe nxjerrja nga zyra e gazetës Tema në 2008. Pavarësisht rrjedhës së ndryshme që patën këto dy sulme (si rezultat i “reagimit” të ndryshëm të dy viktimave), s’ka diskutim që ato janë dëshmi e së njëjtës vijë: vullnetit të pushtetit për “të rreshtuar” mediat. Dyshimet për këtë i fshiu një arritje e re e këtij fillim-viti 2009: djegia e makinës së zotit Baze. Sidoqoftë, me kaq qoftë!

***

Pjesa tjetër, thamë që është “rreshtimi vullnetar”. Natyrisht për Shqipërinë nuk është ndonjë gjë e re që media të mëdha të flirtojnë nga pak, ose nga shumë, me pushtetin. Por disa prej tyre, vitin që shkoi, e bënë baltë fare. Një baltë që për ta duhet të jetë po aq e ëmbël, sa është e hidhur për ne dhe interesin publik. Ato janë vënë në mënyrën më të ulët e më direkt në shërbim të “halleve” që kalon qeveria. Duke ja kaluar për nga zelli e përkushtimi politik edhe vetë gazetës së Partisë. Nuk flas vetëm për shndërrimin e disa studiove në kabina të predikimit të shefave të lartë, pastaj familjarëve të tyre, pastaj pasardhësve, baxhanakërve, kunetërve, dishepujve, servilëve, e me radhë sipas peshës që ata kanë në “kthimin e borxhit” medias vetë. Puna sot ka ardhur deri atje, sa për të mbrojtur një tezë a një siklet të kryeministrit, në skenën e debatit kërcen direkt e pa dorashka vetë ...pronari i medias(!!). E shoh pastaj këtë katandi, edhe në qëndrimin gjithnjë e më vicioz të vetë mediave në komunikimin me publikun. Dihet që komunikimi me zërin e publikut, me përfaqësuesit e segmenteve të tij është jetik për këtë sektor. Ndërsa media jonë i ka hyrë një prirje tjetër. Po flet “me vete”. Drejtorët, menaxherët e moderatorët po ftojnë gjithnjë e më dendur vetëm ..njëri-tjetrin. Gjithnjë e më pak ata po flasin me njohës çështjesh, me përfaqësues të shtresave e interesave dhe gjithnjë e më tepër preferojnë të flasin me kolegun, me të cilin pinë kafenë tre herë në ditë. Sigurisht duke dëshmuar se gjithë dija për botën, tashmë është atje, në ato kthina e studio. Dhe se tani, që ata janë bërë vetë aq të mençur (dhe bosat e tyre aq “të lidhur”) as që ja vlen të ftosh të tjerë, të largët, jashtë rrethit. E kush mund t’i dijë këto punë më mirë se sa ..ne vetë? –pyesin ata gjithnjë retorikisht e gjithnjë më dendur njeri-tjetrin. Preferenca e dytë është bërë inskenimi e moderimi i bisedave-spektakle me njerëz të pushtetshëm. Me tituj që rrëzëllejnë nga transparenca. Kryeministri para gazetarëve! Ja dhe ministrat një nga një. E shikoni si i nxorëm para jush dhe publikut? Pyetini, shkundini, ujë të zi u nxirrni, ...(në se ua jap unë fjalën, sigurisht!). Pakkush kujtohet në ato çaste se përpara kemi thjesht një videoklip shefash të pushtetit dhe një lançim elektoral të personave të caktuar. E si për t’i vënë kapakun “misionit fisnik” të medias sonë, ata më afër pushtetit, i këpusin edhe një ftesë direkt, kryetares së entit më të lartë kombëtar të mediave audio-vizive. Atij që është përgjegjës për mbikëqyrjen dhe barazinë e tyre para rregullave të shtetit. Një bisedë të thellë intelektuale. Këtu rrethi mbyllet fare-fare dhe nuk ka mizë që mund të hyjë pastaj në marrëdhëniet që bota i njeh me termin “favoritizëm”.

***

E shoh këtë degradim të pozitës së medias pastaj edhe në diçka tjetër. Në faktin që interesi material dominon jo më kryesisht, por tashmë totalisht, gjithë fushëpamjen e tyre. Këtë e favorizon sigurisht edhe situata monopol për të cilën kujdesen ligjvënësit dhe qeverisësit tanë. Më konkretisht? Po ja, keni parë ndonjë media, përfshi dhe “gjigandët e medias së lirë shqiptare” që të thotë ndonjë gjysmë fjale për kartelin më të madh që kemi, atë në tregun e telefonisë celulare? Pse, kjo është krejt e kuptueshme. Pothuajse të gjitha emisionet e bukura, e llamburitëse të studiove tona, fillojnë e mbarojnë me logon: “Ky emision mundësohet nga...(!!)”. Ky kartel (ndoshta i paformalizuar) është bërë kështu një realitet që ndikon jo më ekonominë por edhe vetë kulturën shqiptare. Historinë, shkencën, artin, shkollimin, spektaklin, sportin, rininë, ndihmën sociale, çdo aspekt të jetës. Të gjitha fillojnë me shprehjen “ky spektakël mundësohet nga...”. Me këtë ritëm nuk duhet aspak të çuditemi kur shumë shpejt, nëpër fasadat e pallateve tona, në këmbët e urave tona madhështore që po ndërtohen (me kredi tregtare dhe me shtesë fondesh) apo edhe në shpatet e maleve tona krenare të shkruajmë me bojë të kuqe a gurë të bardhë: “Gjithë jeta jonë e lumtur, mundësohet nga....”. Monopoli bëhet kështu jo vetëm një bllokazh gjigand ndaj uljes së tarifave të shërbimit (në masën që i ka gjithë bota). Por edhe një pol i pushtetit kulturor e nesër ndoshta një shkrues direkt i ..historisë së këtij kombi. Proces i cili, siç na e dëshmon më së miri edhe balta e shumtë dhe e hedhur aq zellshëm mbi vetë heroin dhe simbolin e këtij kombi, Skënderbeut, duket se ka filluar të funksionojë.

Pas strategjisë së eksodeve masive, dikush paguan e dikush paguhet mirë, për të na ndarë edhe shpirtërisht nga ky truall e nga historia jonë. Mediat tona pra, në këtë fundvit më duket se vijnë më të “rreshtuara”. Me një rreshtim që devijon pak nga skema e traditës. Kur disa qëndronin majtas e disa djathtas. Tani nuk është kështu. Tani rreshtimi bëhet direkt tek strumbullarët e pushtetit politik apo ekonomik. Shumica e kanë kuptuar. Rreshtimi majtas-djathtas nuk ka dhe aq kuptim. Leverdi jo e jo. Ndërkohë që risku është shumë i madh. Moda e sotme strategjike është ndryshe: lidhje direkt me “të madhin fare”. Si dhe me firma e “mjeshtëra” që “sponsorizohen” dhe që pastaj “sponsorizojnë”.

[RaPSouL]

Partite politike në Shqipëri nisin fushatën elektorale

Tre prej partive parlamentare, LSI, Aleanca Demokratike dhe republikanet kane paraqitur drejtimet e garës së tyre për në Kuvend.
Levizja Socialiste per Integrim nis fushaten per zgjedhjet parlamentare. Boshti i kesaj fushate per kete force politike do te jete lufta ndaj varferise dhe monopoleve. Ilir Meta deklaron se pas dy muajve LSI do te kete gati programin, koalicionin dhe emrat e deputeteve qe sipas tij do te zgjidhen me parimin “nje anetar nje vote”.
"Brenda muajit mars te normalizohet gjithcka qe ka te beje me koalicionin, por edhe me programin i cili do te jete i perbashket. Kam besim te plote se do te jemi forca e pare politike dhe koalicioni fitues i zgjedhjeve te ardhshme, sepse jemi jo vetem me te ndershem se cdo force politike por edhe se jemi me te afte se cdo parti tjeter", deklaroi Meta.
Nderkohe Partia Republikane u kerkon aleateve te saj te djathte te hartojne nje stratregji elektorale. Fatmir Mediu shprehet i gatshem per bashkepunim me PD-ne, megjithe perplasjet per kodin e ri elektoral.
"Me kete rast une iu uroj te gjithe ju, te gjithe republikaneve gezuar 18-vjetorin. I uroj te gjithe shqiptareve ne kete fillimviti, gezuar dhe te jete nje vit plot me suksese. I uroj te djathtes, qeverise, koalcionit qe drejtohet nga zoti Berisha fitore ne zgjedhjet parlamentare te ardhshme", u shpreh Mediu.
Neritan Ceka ende nuk ka vendosur nese do te beje fushate me Ramen apo Berishen ne zgjedhjet e vitit 2009. Ai nuk perjashton edhe LSI-ne si nje aletat te mundshem.
"Natyrisht Aleanca Demokratike ka filluar negociatat, nuk kemi konkluduar akoma dhe natyrisht qe Levizja Socialiste per integrim eshte nje nga partneret qe ne kemi parashikuar ne negociatat tona", tha Ceka.

ALSAT

[RaPSouL]

Zgjedhjet, partitë e vogla zgjedhin shortin për listimin e kandidatëve për deputetë


Partitë e vogla parlamentare po mendojnë të zgjedhin një formulë mjaft interesante përsa i përket renditjes së emrave të kandidatëve të tyre në listat për deputetë në zgjedhjet e ardhshme parlamentare. Për parti të tilla si Partia Republikane, Partia Socialdemokrate, Partia Demokracia Sociale, Partia Demokristiane etj, renditja e emrave në listën e kandidatëve duket se do të bëhet vetëm me anë të hedhjes së shortit. Burime nga disa prej partive në fjalë bëjnë të ditur se përzgjedhja e variantit të shortit për të listuar emrat në listën e kandidatëve për deputetë do të bëhet me qëllimin e vetëm për të sheshuar pakënaqësitë dhe konfliktet e mundshme që mund të lindin brenda gjirit të partive.

Shorti
Ndërthurja në Kod e dy formulave të ndryshme për shpërndarjen e mandateve, D’Hont dhe Saint Laguë rrit ndjeshëm shanset e partive të vogla parlamentare aleate të PS-së dhe PD-së për fitimin e mandateve të deputetit në zgjedhjet e ardhshme. Por nga ana tjetër rrit edhe pretendimet e anëtarëve të strukturave drejtuese të këtyre partive për të qenë në vendet e para të listës së kandidatëve për deputetë. Por ndërsa partitë në fjalë mund të kenë zgjidhur vetëm emrat që do të udhëheqin të parët listat e kandidatëve në 12 qarqet ku do të konkurrohet, renditja e mëtejshme e emrave nuk e përjashton krijimin e pakënaqësive dhe xhelozive në radhët e anëtarëve të strukturave drejtuese, të cilët synojnë të kandidojnë për mandatin e deputetit. Për këtë arsye, zgjidhja është parë te hedhja e shortit. Partitë e vogla parlamentare do të aplikojnë hedhjen e shortit për të renditur emrat e kandidatëve për deputetë në listën zyrtare që do t’i depozitohet Komisionit Qendror të Zgjedhjeve 45 ditë përpara fillimit të fushatës elektorale. Aplikimi i shortit do të shmangë jo vetëm pakënaqësitë midis emrave që duan të kandidojnë për deputetë, por do të evitojë edhe çdo pasojë të mundshme që mund të arrijë deri edhe në mosangazhim të tyre gjatë fushatës elektorale dhe procesit zgjedhor.

Koalicionet
Shumica e partive të vogla parlamentare kanë deklaruar tashmë koalicionet, përkrah të cilave do të garojnë në zgjedhjet e ardhshme parlamentare. Kështu Partia Republikane, PDR dhe Partia Agrare kanë zgjedhur koalicionin e Partisë Demokratike, ndërkohë që Partia Socialdemokrate dhe Partia Demokracia Sociale i janë bashkuar koalicionit të Partisë Socialiste. PBDNJ dhe PAD ende nuk e kanë përcaktuar koalicionin që do të bashkohen, ndërkohë që LSI-ja do të udhëheqë koalicionin “E Majta për Integrim”, ndërsa PDK do të garojë në koalicion më vete, së bashku me Lëvizjen për Zhvillim Kombëtar. Dy janë arsyet kryesore, të cilat partitë e vogla parlamentare kanë zgjedhur t’u bashkohen koalicioneve të dy partive të mëdha PS e PD. Avantazhi kryesor i tyre për futjen në këto koalicione është i lidhur ngushtësisht me ndërthurjen në Kodin Zgjedhor të dy formulave për shpërndarjen e mandateve, formula D’hondt dhe formula Saint Laguë. Partitë në fjalë avantazhohen nga ky fakt, pasi ato do të kenë mundësi që të përfitojnë mandate deputeti, edhe pse mund të kenë më pak vota se partitë kryesore të koalicioneve të tjera, që garojnë përballë koalicionit të PD-së dhe koalicionit të PS-së. Avantazhi tjetër kryesor lidhet edhe me hapësirat qeverisëse që ato mund të përfitojnë në rast të fitores së koalicioneve në të cilat ato bëjnë pjesë.

Albania

[RaPSouL]

Zgjedhjet, Meta: Në mars do shpallim koalicionin

Kryetari i LSI: Kandidatët tanë, sipas "një anëtar, një votë"

Zyrtarisht, objekti i Lëvizjes Socialiste për Integrim deklarohet fitorja e zgjedhjeve parlamentare të muajit qershor. Ky vendim u bë publik dje nga Ilir Meta në mbledhjen e Komitetit Drejtues Kombëtar të partisë. Kryesia e LSI-së kthehet në Shtab Qendror Elektoral, ndërsa kryesitë e LSI në rrethe kthehen në shtabe vendore elektorale. "Është detyra jonë që të udhëheqim ndryshimin që shqiptarët kërkojnë, duke qenë i bindur se është dhe detyra ime që t‘u jap shqiptarëve një program konkret qeverisës, në emrin tuaj dhe të alternativës sonë, unë nuk do të merrem me vitin 2008, por do të merrem gjatë këtij viti, jo vetëm me vitin 2009, por edhe deri në vitin 2013", nënvizoi Meta. Sipas tij, duke nisur që nga kjo mbledhje deri në mars duhet të tërhiqet mendimi i çdo anëtari të LSI-së për kandidatët për deputetë, sipas zonave, rretheve dhe qarqeve, me procedura transparente, sipas parimit "Një anëtar, një votë". Po kështu, vijoi Meta, brenda këtij muaji ne do të lançojmë disa nga idetë kryesore të projekt-programit tonë elektoral dhe qeverisës për zgjedhjet e ardhshme, i cili është diskutuar dhe draftuar në një gjendje, e cila tani pret verifikim, ballafaqim me opinionin publik. "Ne sot kërkojmë si Kryesi nga ju si Komitet Drejtues Kombëtar mandatin për të ndërtuar dhe formalizuar koalicionin fitues të zgjedhjeve të ardhshme, në mënyrë që brenda muajit mars të formalizohet gjithçka që ka të bëjë me koalicionin, por edhe me programin, i cili do të jetë i përbashkët", u shpreh Meta. Në këndvështrimin e të cilit, thelbi i programit është rritja e mirëqenies për çdo qytetar shqiptar, e cila nis në radhë të parë nga lufta me program konkret kundër varfërisë dhe kundër monopoleve, që janë një nga arsyet themelore të rritjes së kësaj varfërie dhe polarizimit të frikshëm social në vend. Në këtë drejtim, tha Meta, në programin tonë në luftën kundër varfërisë, e cila prek në mënyrë tepër të rëndë dhe stresante gati 1/3 e shqiptarëve do të jenë bonusi jetik dhe punësimi jetik. LSI në reformën e asistencës sociale do të institucionalizojë modelin e "punësimit jetik", i cili kushtëzon përftimin e ndihmës ekonomike kryesisht me punësimin në sektorin publik dhe sferën komunitare. Ky model do të përfshijë punësimin në shërbimet komunitare, si ato të mjedisit dhe ambientit, në shërbimet publike që lidhen me qendrat spitalore, rehabilituese, azileve të moshës së tretë. "Duke qenë një forcë politike, e cila në themel të saj ka solidaritetin social, ne jemi të bindur se nuk mund të ketë zhvillim dhe mirëqenie për të gjithë vendin në rast se ne nuk luftojmë me devotshmëri, jo vetëm politike, por dhe sociale e njerëzore, pikërisht pra varfërinë", insistoi Meta. Teksa e cilësoi kundërshtarin më të madh dhe më të frikshëm jo vetëm për 1/3 e shqiptarëve sot, që e vuajnë dhe e përjetojnë çdo ditë, por edhe për stabilitetin social për vendin, edhe për sigurinë e cila tronditet gjithnjë e më shumë nga krimi që vjen për shkak të gjendjes së rëndë ekonomike. "Do t‘ju ftoja që të diskutonim, duke e ndier veten të gjithë anëtarët e këtij Komiteti si pjesë e një Komiteti Drejtues elektoral gjatë gjithë këtyre ditëve që kanë mbetur deri në qershor të këtij viti", u shpreh kreu i LSI-së. Ai shprehu besim të plotë se LSI do të jetë forca e parë politike dhe koalicioni fitues i zgjedhjeve të ardhshme. Sepse, sqaroi Meta, jemi jo vetëm më të ndershëm në raport me shqiptarët se çdo forcë tjetër politike, jo vetëm se jemi më të drejtë në raport me shqiptarët se çdo forcë politike, jo vetëm se jemi më atdhetarë dhe më kombëtarë në raport me interesat e vendit dhe të kombit, se çdo forcë tjetër politike, por edhe sepse jemi më të aftë se kushdo tjetër.

Shqip

[RaPSouL]

Zgjedhjet parlamentare në Shqipëri më 28 qershor

Presidenti i Republikës së Shqipërisë, Bamir Topi ka dekretuar sot datën e zgjedhjeve të përgjithshme për Kuvendin e Shqipërisë.
Bazuar në nenin 92, pika “gj” e Kushtetutës dhe nenin 184 të Kodit Zgjedhor të miratuar nga Kuvendi, presidenti i Republikës vendosi që zgjedhjet e përgjithshme për Kuvendin e Republikës së Shqipërisë të mbahen ditën e diel, në datë 28 qershor 2009.
Sipas Kodit të ri Zgjedhor, fushata elektorale për zgjedhjet parlamentare do të nisë më 28 maj.

Alsat

[RaPSouL]

Zgjedhjet, si do të shpërndahen mandatet brenda koalicioneve

Sistemi proporcional rajonal, votimi me një fletë të vetme, si dhe formulat për shpërndarjen e mandateve do të bëjnë që në zgjedhjet e ardhshme parlamentare të konkurrohet jo vetëm midis koalicioneve, por edhe midis partive që garojnë brenda të njëjtit koalicion. Garimi brenda koalicionit pritet të jetë më i ashpër midis partive dytësore të të njëjtit koalicion, të cilat do të konkurrojnë me njëra-tjetrën për të përfituar mandatet që mbeten nga partia kryesore. Thënë më qartësisht, në koalicionin e drejtuar nga Partia Socialiste do të ketë një rivalitet midis dy aleateve, Partia Social-Demokrate dhe Partia Demokracia Sociale, për të përfituar mandatet e mbetura nga numri në total i mandateve të fituara brenda koalicionit. Ky rivalitet sigurisht do të bëhet edhe më i ashpër nëse në koalicionin e Partisë Socialiste bashkohet edhe PBDNJ-ja apo parti të tjera. E njëjta gjë mund të thuhet edhe për koalicionin e Partisë Demokratike, për rivalitet midis partive aleate, Partia Republikane, Partia Agrare Ambientaliste, Partia Lëvizja e Legalitetit etj.

Formulat
Në Kodin e ri Zgjedhor është sanksionuar formula “D’Hondt” për shpërndarjen e mandateve midis koalicioneve, ndërkohë që formula “Saint Laguë” do të përdoret për shpërndarjen e mandateve brenda të njëjtit koalicion. Është kjo formulë ajo që nxit rivalitetin midis partive të të njëjtit koalicion. Për ta ilustruar po japim shembullin e mëposhtëm. Në një qark të caktuar janë 50 mijë vota dhe konkurrohet për 5 mandate deputetësh. Koalicioni i Partisë Socialiste merr 30 mijë vota, çka nënkupton 3 mandate deputetësh, ndërkohë që koalicioni i Partisë Demokratike merr 20 mijë vota, çka nënkupton dy mandate deputetësh. Për të vijuar më tej me ilustrimin po përcaktojmë rezultatin e votave që kanë marrë partitë brenda koalicionit, p.sh.: Partia Socialiste ka marrë 22 mijë vota, duke siguruar dy mandate, PSD-ja 6 mijë vota dhe PDS-ja 2 mijë vota. Pra diskutohet se cila prej forcave të koalicionit do të marrë mandatin e tretë të fituar. Në këtë rast mandatin e tretë e merr Partia Social-Demokrate, duke qenë se ka numrin më të madh të votave në krahasim me partitë e tjera të koalicionit.

Koalicionet e tjera

Në koalicionin e Lëvizjes Socialiste për Integrim rivaliteti për mandatet e mbetura, edhe pse me mundësi më të pakta, mund të jetë midis Partisë PS ‘91 dhe aleates së mundshme të këtij koalicioni, Partisë Aleanca Demokratike. Rivalitetit nuk do t’i shpëtojnë edhe dy partitë aleate të së djathtës, të cilat do të formojnë koalicionin e katërt, pra midis Partisë Demokristiane dhe Lëvizjes për Zhvillim Kombëtar. Mandatet që do të përfitojë ky koalicion do t’i jepen pikërisht forcës politike që ka marrë numrin më të madh të votave.



Tabela ilustruese

Qarku X
Numri i votave të vlefshme: 50 000
Numri i mandateve që konkurrohet: 5
Numri i votave të koalicionit 1: 30 000
Numri i mandateve të koalicionit 1: 3
Votat e partisë A në koalicionin 1: 22 000
Mandatet e partisë A në koalicionin 1: 2
Votat e partisë B në koalicionin 1: 6 000
Votat e partisë C në koalicionin 1: 2 000
Mandati i tretë i jepet partisë B


Albania

[RaPSouL]

Firmos Presidenti, Zgjedhjet Parlamentare më 28 qershor

TIRANE- Presidenti i Republikës Bamir Topi ka dekretuar sot datën e zgjedhjeve. Më 28 qershor 2009, shqiptarët mbi 18- vjeç do të shkojnë para kutive të votimit për të zgjedhur deputetët e rinj të Kuvendit. Topi ka vendosur që të dielën e fundit të qershorit të zhvillohen zgjedhjet parlamentare në Shqipëri. Lajmi u bë i ditur nga zyra e shtypit e Presidencës.

Dekreti i Presidentit mbështetet në nenin nr.92 të Kushtetutës dhe në nenin nr.184 të Kodit Zgjedhor. Topi ka firmosur sot paradite datën e zgjedhjeve, ndërkohë që ka hyrë në fuqi Kodi i ri Zgjedhor. Që nga dita e sotme mund të mblidhet Komisioni i ri zgjedhor.

Në bazë të ligjit, Parlamenti i Shqipërisë duhet të shpërndahet pas katër muajsh nis nga sot, për t'i hapur rrugën fushatës zgjedhore dhe më tej zgjedhjes së deputetëve të rinj të Kuvendit.

Shekulli

[Duaje Siveten]

Gazeta Shqiptare, 18/01/2009

Zgjedhjet në fall e në kaleidoskop

Kiço Blushi

Nuk besoj që ka shqiptar sot, në Veri e në Jug, në trojet shqiptare a në diasporë, që të mos mëdyshet (disa me frikë e disa me ngazëllim), se edhe në zgjedhjet e pritshme të 28 qershorit, Berisha, ky mjeshtër i pakonkurrueshëm i manipulimit, nuk do të bëjë marifete, prapësi dhe hilera të paparashikueshme e të pashembullta, në dobi të fatit të tij politik. Është e qartë, NATO-ja, MSA-ja dhe rruga “patriotike” Durrës-Kukës, të privatizuara tashmë tërësisht, do të na paraqiten si suksese historike të tij, do të jenë refreni shungullonjës e buçimtar i kësaj fushate zgjedhore, si asnjëherë megalomane, vetëlavdëruese dhe ballkanërisht populiste!

Për të fashitur këtë tymnajë demagogjike, kartat e identitetit dhe ndryshimi i ligjit zgjedhor u hodhën në pazarin mediatik për të na bindur se do të kemi cilësi e dukuri të reja në këto zgjedhje. Kështu, nga shumëkush besohet e pranohet se kësaj here nuk do të ketë më Dushk! Pra, nuk do të ketë përfaqësues të emëruar apo të dalë “nga (nën) tryezat partiake”, qofshin këta edhe kryetarë partish, d.m.th nuk do të ketë më deputetë të sajuar, pa mandat real përfaqësimi nga populli. Por ama, kjo nuk do të thotë se kësaj here nuk do të dalin të tjerë anonimë, rioshë e kodoshë e gra të urta e të bindura, sejmenë të futur në listat për deputetë, të emëruar nga kryetarët e partive, natyrisht pasi rishtarët të kenë dhënë prova publike se kanë për të qenë besnikë deri në vdekje të kryetarit të partisë!

Hamendësohet që partitë kësaj here do të marrin ato vota që meritojnë, por kjo nuk do të thotë që nëpërmjet “aleancave të kryetarëve” të mos dalin sërish parti, si ajo e PR-së, që edhe pse në 2005-ën nuk fitoi as edhe një deputet direkt, siguroi një grup të qenësishëm parlamentar, pasi futi duart e “aleancës” në thesin e PD-së, apo si partia e Xhuvelit, që edhe pse mori deputetë borxh nga PS-ja, kaloi më pas në të djathtë…Pas zgjedhjeve me siguri do të ketë përsëri shitblerje deputetësh, natyrisht me çmim edhe më të shtrenjtë se ata që u shitën në mandatin që po skadon!...Meqë asnjë parti zor se do të marrë vota absolute, aleancat para, e sidomos ato paszgjedhore kanë për të qenë më spektakolare në 2009-ën se sa “martesa e çuditshme “e Xhuvelit, apo e Ndokës me Berishën në 2005-ën, apo edhe se votat e trafikuara të socialistëve për zgjedhjen e Presidentit të Republikës!

Kështu, nëse LSI-ja do të ketë në dorë numrin e mjaftueshëm të deputetëve që do t’i lipsen PS-së të formojë qeverinë e re, kush mund të parashikojë se çfarë kushtesh do t’i vihen nesër PS-së së Edi Ramës? Kush pra, do të jetë kryeministri? A do të ketë aleanca dhe qeveri të qëndrueshme? Prova që u dha në Bashkinë e Tiranës për buxhetin ishte një paralajmërim serioz që synon të përcjellë pikërisht këtë mesazh kërcënues brenda së majtës!

Në këto zgjedhje nuk do të ketë më votime me certifikata, por ama zor të mos ketë votime rurale në tufë, “me familje”, “me besa besë”, me “thasë me miell”, apo edhe me para nën e mbi dorë…Kandidatët për deputetë vërtet nuk do të ndeshen ballë për ballë me të fortët e lagjeve, pasi emrat e tyre kësaj here do të jenë në listat rajonale, por kjo ama nuk do të thotë që kësaj here nuk do të ketë kandidatë “të fortë” në muskuj dhe në para (tani këta quhen biznesmenë), që do t’i japin tonin edhe kësaj fushate!…

Pra, a do të thotë që këto ndryshime, edhe pse duken të rëndësishme, do të sjellin ndryshimin e shumëpritur?A ka garanci që votimi dhe sidomos numërimi i votave do të jetë, si rrallëherë, i pastër, i ndershëm dhe i drejtë? Që kësaj here do të fitojë ai që e meriton dhe ne do të kemi, më në fund, një përfaqësim më të mirë e më të denjë?...A do të ketë më shumë apo më pak stabilitet? Kush beson se gara zgjedhore mes partive konkurrente do të jetë normale, brenda standardeve demokratike, ku qytetari do të mund të dallojë dhe pastaj të zgjedhë alternativat e dëshiruara, edhe pse është bombarduar nga gënjeshtrat dhe shpifjet? A do të bëhet e mundur që humbësi të pranojë publikisht humbjen, pra, ai që ka sot pushtetin, nesër, pas humbjes, do të dorëzojë pushtetin dhe demokratikisht të urojë kundërshtarin që e ka pas mallkuar aq shumë gjatë fushatës?!...

Të gjitha këto pyetje kanë mbetur pezull, pa përgjigje nga politika. Por, kjo nuk do të thotë që qytetarët të mos japin vetë një përgjigje të saktë e të merituar më 28 qershor!...Vetëm se dilemat në këto zgjedhje nuk do të mund të sjellin ndryshimin e kërkuar, ashtu si edhe eksperimentet e përbetimet e analistëve për ndryshim në kokat e udhëheqësve, të atyre që u vete prapa historia me që janë provuar në këto 18 vjet, besoj se nuk ka për t’i ngrënë kush në qershorin që po vjen!

***

Kam përshtypjen se zgjedhjet e ardhshme nuk kanë për të qenë aq rozë sa po na thuhet, ndonëse lufta politike do të ketë veçori kryekrejt të tjera! Një gjë do të jetë e sigurt: këto zgjedhje kanë për të qenë më të shtrenjtat në historinë e pluralizmit! Kanë për t’u derdhur paratë lumë, para të padeklaruara, të pista apo të lara, ashtu si premtimet dhe shiritat e prerë do të na çorodisin sytë dhe trutë natë e ditë…

Kryekëput, në ndryshim nga zgjedhjet e kaluara, lufta brenda llojit ka për të qenë, si asnjëherë tjetër, më e egër dhe më e paskrupullt edhe se lufta tradicionale mes pozitës dhe opozitës, e cila, edhe kjo, nuk ka për të qenë më e qetë se në zgjedhjet e tjera, pavarësisht nga ndryshimet e kodit zgjedhor! Ne do të dëgjojmë akuza dhe sharje të hatashme jo vetëm brenda së majtës, mes PS-së dhe LSI-së, mes PSD-së dhe LSI-së, sepse mes tyre do të luftohet “për jetë a për vdekje”, po edhe brenda së djathtës, që është shfaqur unike, pra mes PD-së dhe koalicionit të djathtë, polit të djathtë që po ravijëzohet këto ditë. Nuk ka dyshim që edhe në këtë krah, ashtu si mes LSI dhe PS, edhe PDK, LZHK, dhe partia e re e Ngjelës, PLD, kanë për të ndezur një luftë e cila ka për të sjellë rrjedhje të pandalshme të votave, bashkë me rrezikun për të mos marrë pushtetin kollaj asnjë prej dy rinocerontëve…Vetëkuptohet që në këtë situatë, edhe dy partitë e mëdha dhe dy liderët e tyre karizmatikë, që synojnë karrigen e kryeministrit, kanë për t’iu përgjigjur zjarrit me zjarr, heshtës me heshtë, sulmit me sulm në të gjitha drejtimet!

Por, çuditërisht, ky acar zgjedhor i qershorit, edhe nga opozita, edhe nga ajo që quhet shoqëri civile, edhe nga ndërkombëtarët, nuk vështrohet me sy kritik. Sepse, zgjedhjet qëllimisht janë futur qysh tani në një kaleidoskop shumëngjyrësh, ku të gjithë, me sa duket, kanë filluar të ngazëllohen prej vezullimit të efekteve të një drite të rreme në kaleidoskopin zgjedhor!…Të gjithë, pra, po japin përshtypjen se kësaj here do të ketë standarde të larta, se fitorja ka për të qenë e tyre, paçka se privatizimin dhe legalizimin e votimeve, “sukseset e papara”, antikorrupsionin, kartat e identitetit, antikrimin, institucionet e varura e të pavarura, RTSH, INSTAT, KQZ, dritat dhe ujin, shiritat e rrugëve, punësimin, tenderat dhe si dhe “vendin e parë” në çdo arritje i ka zaptuar totalisht Berisha!

Askush deri tani nuk ka pushtuar hapësirat mediatike si Berisha dhe rrallë mund të gjendet në rruzull një të dytë me fuqi të tillë për të përballuar mitingjet! Fushatat e tij zëngjiruara e me klithma, përherë në turravrap, paçka se në thelb nuk thonë asgjë për t’ua vënë veshin, do të krijojnë edhe kësaj here, madje më shumë edhe se herët e tjera, përshtypjen se ai është jo vetëm i papërballueshëm, por edhe i pakonkurrueshëm! Natyrisht, edhe i pathyeshëm, edhe i pazëvendësueshëm, edhe i frikshëm si kundërshtar! A është kjo një meritë?

E vërteta është se askush deri tani nuk ka mundur të neutralizojë këtë uragan populist, që djeg e shkreton opinionin publik shqiptar ditë e natë si një flakëhedhës e që, megjithatë, mbetet përherë në pushtet! Vini re, ai tani ka filluar të tallet! Kësaj here Berisha nuk mban pranë vetes njerëz të tjerë nëpër mitingje, as kopistë, as ish-kopistë, as Topallin e ngrefur e as Bashën e buzëqeshur, dhe këtë e bën qëllimisht, natyrisht jo vetëm për të personalizuar fushatën, por për të krijuar bindjen se ai nuk ka e nuk mund të ketë pasardhës, pra ai nuk mund të zëvendësohet as në parti, as në qeveri, madje as në Shqipëri!

Për të krijuar këtë bindje, ai jo vetëm që derdh lumë dyshifrorë dhe përqindje krahasuese, por të paverifikuara as nga FMN, por në Durrës ai deklaroi se në katër vitet e ardhshme ne kemi për t’u barazuar në paga dhe në mirëqenie edhe me Poloninë e Çekinë; se nën udhëheqjen e tij ne do të bëhemi anëtarë të BE-së e të NATO-s, se do të qarkullojmë nëpër botë pa viza; me një fjalë ne do të jemi më të lumturit e Europës, sigurisht nën udhëheqjen e ndritur të “përfaqësuesit tonë më dinjitoz”, si deklaroi Berisha për Berishën në Durrës!

***

Nuk gaboj po të them se, duke qenë një kryeministër fuqiplotë, duke prodhuar një qeverisje me demek të fortë (që nuk pyet as për vërejtjet e SHBA-së e as për ato të BE-se e KE-së), me pushtet të centralizuar në një dorë, pas pastrimit të të gjitha institucioneve të varura e të pavarura nga të padëshiruarit dhe të dyshimtët, Berisha nuk ka për të pranuar humbjen dhe dorëzimin paqësor të pushtetit as kësaj radhe. Ndoshta, më saktë duhet thënë: sidomos kësaj here, ai nuk ka për ta dorëzuar pushtetin!

Sepse, mbi të dhe mbi familjen e tij, si mbi asnjë lider tjetër, rëndojnë akuza të frikshme. Sepse, proceset dhe hetimet janë ende të hapura, pavarësisht nga terrori mbi Prokurorinë dhe gjykatat. Sepse, tefterët e privatizimeve dhe përvetësimeve nuk janë kopsitur as plotësisht dhe as përfundimisht! Sepse, Berisha e di më mirë se kushdo, se kësaj here, po iku nga pushteti, si iku qoftëlarg Nanoja, nuk ka për të pasur më “një herë të tretë” për të! Pra, nuk ka më rikthim në pushtet si në 2005-n! Ai e di se po iku kësaj here nga pushteti nuk ka për të pasur më prokurorë e gjykatës që të japin dorëheqje për shkak të trysnisë dhe frikës prej tij! Ja përse lufta totale dhe jo pa sukses që ai i ka bërë Prokurorisë së Përgjithshme, së fundi, edhe pse u kritikua nga Këshilli i Europës, edhe Gjykatës Kushtetuese, aq sa mund të thuhet se i ka paralizuar, dëshmojnë se kryeministri në fjalë, jo vetëm që ka frikë e panik të papërmbajtur të humbasë, d.m.th të dorëzojë paqësisht pushtetin, por do të bëjë të pabërën që të mos e lëshojë pushtetin në qershor.

Edhe pse është krejt një tjetër situatë krahasuar me vitin 1997, kur dorëzoi pushtetin, Berisha sot ka më shumë frikë të largohet nga pushteti, edhe se në atë vit të mbrapshtë kur Shqipëria gati sa nuk ra në luftë civile! Populli thotë: ruaju nga frikacaku, por mos ki frikë nga trimi! Berisha bën trimin nëpër fushata dhe ekrane se ka frikë! Ndaj sot për sot, nuk dihet se si do të shpëtojmë jo vetëm nga ai, po edhe ne nga frika e pakontrolluar e tij! Por, le të shpresojmë që të jetë këmbëmbarë ky qershor!

[Brari]

mo ke qen dhe ti o josif me kicon blush ne ate mitingun e famshem ramizoist anti-ambasad-iksave ahere mo.. se shum po i don si vehten keta kicot e koplikat..
nejse..

ja cna thote kjo shoqja nga bashkia e kombinatit ish josif stalin..



Agjensia e Lajmeve "SOT"

Rama shpërthen në fyerje kundrejt banorëve të Kombinatit

Rama SMS Abazajt për banorët: Injorantët të mos hanë m.ut kot

Edukata e kryebashkiakut Edi Rama lë për të dëshiruar?! Në fakt nuk është aspak për t’u çuditur sepse tashmë njihet mirë për fjalorin e tij me gazetarët, qytetarët por edhe me drejtues apo edhe figura politike dhe të jetës shoqërore në vend. Ai tashmë njihet më së miri që nuk e kontrollon aspak fjalorin, pavarësisht se me kë flet, pavarësisht se bashkëdialoguesi i tij mund të jetë edhe femër. Këtë, kryebashkiaku Rama na e ka treguar së fundmi edhe nëpërmjet një mesazhi elektronik, të cilin e ka dërguar në adresë të numrit celuar të kryetares së njësisë bashkiake nr.6, Luzhiana Abazaj, e cila e ka ruajtur për ta publikuar në momentin e përshtatshëm. Duke harruar respektin por edhe përmbajtjen si drejtues bashkie ai u kthen përgjigje banorëve të Kombinatit, në mënyrë tepër fyese, nëpërmjet telefonit të zonjës Abazi. "Thuaj atyre injorantëve të shohin piacat e lagjeve të Italisë dhe të Spanjës e të mos hanë *** kot". Është ky mesazhi i mbërritur në telefonin celular të zonjës Abazaj, e cila ka mbetur e shokuar përballë përgjigjes së kryebashkiakut Edi Rama, por jo “risisë” në këtë mes. Kështu, teksa në dialog me komunitetin dhe në bredhje lart e poshtë dhe me pretendimin se u qan hallet banorëve të lagjeve të ndryshme, në të vërtetë kryebashkiaku Rama duket se u ka treguar diçka tjetër në realitet banorëve të njësisë bashkiake nr.6 në Kombinat. Ai në fakt u ka treguar atyre, mënyrën se si ai i vlerëson dhe atë që ai ndjen për ta.
Denoncimi i Luzhiana Abazajt
E ndikuar nga fjalët boshe të kreut të bashkisë së Tiranës, Edi Rama dhe demagogjisë në emër të qytetarëve, kryetarja e njësisë bashkiake nr.6, Luzhjana Abazaj, për herë të parë ka bërë të ditur publikisht se sa e vlerëson në të vërtetë kryebashkiaku Rama fjalën dhe mendimin e komunitetit. Në një mesazh telefonik, Rama përbalt shqetësimin e komunitetit të Kombinatit lidhur me çështjen e sheshit "Garibaldi", të cilin ata nuk pranuan ta betonizojnë. Duke i referuar shprehjeve të shumta të kryetarit të bashkisë së Tiranës se po bllokohet jeta dhe zhvillimi i kryeqytetit, po mbeten peng shumë çështje që kërkojnë zgjidhje, kryetarja e njësisë nr. 6, Luzhjana Abazaj, ka pohuar faktin se në të vërtetë kreu i bashkisë, Rama shqetësohet për fondet që iu ka premtuar të tjerëve për tua dhënë, sesa për këtë komunitet. “Në vend që të merrnin një përgjigje vlerësuese për shqetësimin e komunitetit jo pak herë kemi marrë fjalë fyese për këtë komunitetit dhe jetën e tij. Është paradoksale që të dëgjosh nga goja e një njeriu të tillë si Edi Rama se i dhimbset jeta dhe problemet e këtij komuniteti. Si ka mundësi që ky kryetar bashkie del edhe flet në emër të komunitetit kur ai nuk ka përtuar t'i fyejë ata edhe me fjalën e fundit”, ka deklaruar Abazaj, e cila, nga celulari i saj, ka nxjerrë një kthim përgjigje të kreut të bashkisë, Edi Rama, në lidhje me shqetësimin e komunitetit për mos betonimin e sheshit "Garibaldi". Në tabulatin e telefonit celular të Luzhjana Abazajt, në mesazhin përgjigje të kreut të bashkisë, Edi Rama, të datës 6 tetor 2008 lexohej: "Thuaj atyre injorantëve të shohin piacat e lagjeve të Italisë dhe të Spanjës e të mos hanë *** kot".
Pikërisht kjo ka qenë përgjigja e Ramës për komunitetin e Kombinatit që kanë kundërshtuar mosbetonimin e sheshit të tyre që iu mbush mushkëritë me oksigjen. Por sipas Abazajt, në çdo kohë Rama e ka shkelur me këmbë dinjitetin e këtij komuniteti.



************************************************** ************************

Luzhjana Abazaj: Ja investimet në projektbuxhetin rrumpallë të Ramës
Krerët e njësive bashkiake duken të vendosur në qëndrimin e tyre kundër projektbuxhetit të kryebashkiakut të Tiranës, Edi Rama. Duke e cilësuar “projektbuxheti i rrumpallës”, kryetarja e njësisë bashkiake nr. 6 në kryeqytet, Luzhjana Abazaj, i ka bërë thirrje edhe një herë kreut të bashkisë së Tiranës, Edi Rama, që të reflektojë sa më parë në drejtim të hartimit të projektbuxhetit të bashkisë së kryeqytetit. Sipas kryetares së kësaj njësie, janë fakte të shumta të cilat po zbardhen dita ditës nga të gjithë drejtuesit e njësive bashkiake në kryeqytet, që flasin për faktin se ka një mungesë transparence të theksuar në drejtim të realizmit të investimeve të parashikuara për vitin e kaluar. Ndërkohë që, po sipas kryetares së njësisë së minibashkisë nr. 6 në kryeqytet, Luzhjana Abazaj, përsëri në projektbuxhetin e këtij viti që është rrëzuar nga votat e këshilltarëve kjo transparencë është përsëri e munguar. Abazaj e ka ribërë kërkesën e saj drejtuar Edi Ramës për një rishikim të transparencës gjatë ditës së djeshme, kur ajo ka treguar me fakte konkrete se në projektbuxhetin e këtij viti janë përfshirë edhe tri rrugë, të cilat janë të investuar që në vitin 2003 nga kooperacioni italian. Ndërkohë që, sipas Abazajt, në këtë projektbuxhet janë parashikuar edhe investime, të cilat kjo njësi bashkiake i ka të mbyllura në investime nga bashkëpunimi me Fondin Shqiptar të Zhvillimit.
Ja mashtrimet e Ramës me buxhetin
Duke iu referuar buxhetit të bashkisë së Tiranës për vitin e kaluar dhe projektbuxhetit të këtij viti, kryetarja e minibashkisë nr. 6, Luzhjana Abazaj, në mënyrë konkrete ka treguar në rrugët e kësaj njësie situatën e tyre reale dhe nevojat për këtë vit. Abazaj ka pohuar gjatë prononcimit të saj mediatik se aktualisht në këtë njësi janë të investuara segmente rrugore "Llazi Miho", "Llambi Bonati" "Hamdi Cenoimeri". Duke qenë pranë rrugës Llazi Miho, kryetarja e njësisë nr.6, Abazaj, ka pohuar: "Siç e shikoni kjo është një ndër rrugët që Rama e ka parashikuar në projektbuxhetin e tij, të rrumpallës do ta quaja, të cilën e ka vënë për sistemim dhe asfaltim. Si kjo rrugë që quhet "Llazi Miho", ai ka vënë në "Thuaje fjalën tënde" në projektbuxhetin, që e ka paraqitur në takim me popullin, jo vetëm këtë rrugë, por edhe dy rrugë të tjera "Llambi Bonati" dhe "Hamdi Cenoimeri", të cilat janë kryer nga kooperacioni italian në vitin 2003. Unë shtroj pyetjen se çfarë do t'iu bëjë këtyre rrugëve më zoti Rama me projektbuxhetin e vitit 2009-të? Po të shikojmë prioritetet që ai ka vënë si bashki, ai ka vënë për 2009-ën edhe dy rrugë "Shaban Bardhoshi" dhe Hamdi Pepa" që unë i kam planifikuar me FSHZH për rikonstruksion".
Sipas kryetares së njësisë bashkiake nr. 6 në kryeqytet, Luzhjana Abazaj, këto rrugë kërkojnë ndërhyrje të thellë dhe jo sa për të shpëlarë gojën dhe dhënë një lustër nga sipër.
Ndërkohë që, duke mbetur në faktin e investimeve të përfunduara dhe të cilat nuk kanë përse të jenë në plan investimesh këtë këtij viti, kryetarja e njësisë bashkiake nr. 6, Luzhjana Abazaj, ka pohuar se po ndodh e njëjta gjë me rrugët si dhe me shumë shkolla, të cilat edhe pse vetë Rama i ka inauguruar në vitin 2008-të, i rivë në projektbuxhetin e këtij viti. Abazaj ka shprehur shqetësimin e saj edhe për kërkesën e bërë nga banorët e Kombinatit për hapjen e një pusi për të vaditur gjelbërimin e kësaj zone, por që kryebashkiaku Edi Rama ka preferuar ta hapë në Pezë. “Nuk e di arsyen me gjithë shkresat e shumta që i kemi dërguar kryetarit Rama. Dhe ky pus që ndoshta mund të ishte për Kombinatin, sot është hapur në hyrje të komunës së Pezës nga punëtorët e bashkisë. Me ç’të drejtë dhe ç'lidhje ka bashkia e Tiranës me komunën e Pezës". Ajo ka ftuar gazetarët që për të vërtetuar gjithçka në fjalën e saj, të preken më nga afër dhe në mënyrë konkrete investimet e kryera në këtë njësi dhe që çuditërisht rifuten në projektbuxhet në mënyrë të padrejtë dhe që lënë shumë për të dyshuar për abuzime të fondeve publike. Kryetarja e njësisë nr. 6, Luzhjana Abazaj ka ftuar edhe kolegët e saj në njësite e tjera bashkiake të realizojnë transparencën reale të munguar nga bashkia e Tiranës lidhur me përdorimin e fondeve dhe investimeve.




Krerët e minibashkive:
Projektbuxheti i Ramës, kopje e investimeve të parealizuara të vitit 2008
Armond Halebi, kryetar i Njësisë Bashkiake nr. 9
Me keqardhje dëgjuam dje deklaratën e Kryetarit të Bashkisë, z. Edi Rama ku theksoi se buxheti i vitit 2009 u hodh poshtë për arsye politike, kur në të vërtetë është e kundërta dhe për këtë, ne si Shoqatë e Njësive Bashkiake jemi shprehur qartë përpara se ky projekt të kalonte në Këshillin Bashkiak të Tiranës. Ne i jemi drejtuar këshillit në emër të qytetarëve dhe qytetareve të Tiranës për të bërë ndryshime në këtë buxhet bazuar në kërkesat e tyre dhe jo për të shprehur mllef politik. z. Rama u shpreh se ky buxhet është më i miri që administrata e Bashkisë ka hartuar deri më sot, por i kujtojmë z. Rama se ky buxhet është një kopje buxhetit të investimeve apo projekteve të parealizuara për vitin 2008. Ne jemi sot këtu si shprehës të vullnetit të komuniteteve që përfaqësojmë dhe si mbrojtës të interesave të tyre jashtë përkatësive politike për ti kërkuar z. Rama, të marrë në konsideratë prioritetet e kërkuara nga Njësite Bashkiake, Këshillat Bashkiake dhe banorët e tyre, ti pasqyrojë ato në projekt buxhet dhe të mos bëhet pengesë për realizimim e investimeve që ky buxhet të jetë realisht për qytetarët e Tiranës.

Luzhiana Abazi, kryetare e Njësisë Bashkiake nr. 6
Realisht ne më të vërtetë kemi hyrë së bashku për të ardhmen dhe për këtë janë vendosur prioritet në buxhetin e vitit 2008, por në fund të këtij vitit janë investime apo premtime, të cilat nuk u kryen nga bashkia e madhe. Kjo nuk ka lidhje politikën, sepse ne jemi çdo ditë pranë komunitetit dhe unë këtu i shtroj pyetjen zotit Rama: “A ka provuar ndonjëherë zoti Rama, t’i vijnë qytetarët përditë në zyrë, t’i qajnë hallet çdo ditë dhe të gjenden pranë tyre, për të zgjidhur këto shqetësime, për të zbatuar ato prioritete, që ne kemi vënë të gjithë bashkërisht”? Këtu nuk ka më politikë.

Ilir Kokona, kryetar i Njësisë Bashkiake nr. 3
Që nuk është politike, kjo kuptohet shumë mirë, për shkak se në i kemi miratuar këto edhe në këshillat e njësive bashkiake, ku janë të gjitha forcat politike të përfshira. Pra, nuk duhet të ngatërrohen problemet teknike me problemet politike. Kurse, në qoftë se do të shkojmë në zgjedhje, nëse miratohet apo jo buxheti, kjo tashmë është në dorë të kryetarit të bashkisë, për shkak se ai i di të gjitha propozimet e bëra nga ne, nga këshilltarët dhe është në dorë të tij për t’i reflektuar këto në projektbuxhet.
Haki Mustafaj, kryetar i Njësisë Bashkiake nr.11
Unë do të shtoja edhe diçka në lidhje me zotin Edi. Ai ka gjetur kohë, për t’u takuar me 10-15 banorë në lagjet tona dhe nuk ka gjetur kohën deri sot, për t’u takuar me 11 kryetarë të njësive bashkiake, për t’i dëgjuar ato, qoftë edhe nëse nuk i merr parasysh konsideratat dhe propozimet që kanë. Së dyti, ne këtu nuk përfaqësojmë thjesht vetveten. Unë dhe kolegët kemi mbi 20 këshilltarë, ku janë të gjitha forcat politike, por nuk është marrë asnjë konsideratë e tyre. Ju duhet të kuptoni, që nuk kemi dalë këtu për t’iu kundërvënë Edit, por ne kemi dalë për të mbrojtur komunitetin dhe për të kërkuar atë që i kanë premtuar këshilltarëve dhe ne, dhe ato për të cilat zonat tona kanë nevojë dhe e dinë më mirë ato se vetë Edi.

[marangozi]

Edukata e kryebashkiakut Edi Rama lë për të dëshiruar?!

Luzhjana Abazaj: Ja investimet në projektbuxhetin rrumpallë të Ramës
.

O Zot,

Kjo thote se atij i mungon edukata.
Goxha grua dhe shtetare, perdor terma si "rrumpalle" per te pershkruaj nje projekt te shtetit.

Njeri i bie SMS me fjalor rrugaces, tjetra shkon ne gazete me fjalor te njejte.

O e mjera Shqiperi ke ke ne krye..........


Kur do u bjere nje rrufe te gjithe ketyre "politkaneve" Shqiptare?

Po ama dhe po u ra, kush do ua zere vendin, ne qe vetem shahemi ne forume.
Kjo eshte Shqiperia e sotme dhe ky eshte Njeriu i Ri i Enver Hoxhes, Fatos Nanos, Sali Berishes e Edi Rames.


O Obama, na boj i cop ven ne Amerike, ke orkestra jote, se do i bim mire fizarmonikes, se vendi yne na ka sikterisur...