Fushata zgjedhore 2009

[RaPSouL]

4 koalicionet që do të formohen në zgjedhjet e vitit 2009


Në më pak se një vit afat nga zhvillimi i zgjedhjeve parlamentare, skena politike shqiptare kristalizon 4 koalicione të mundshme konkurruese. Ndërsa në kampin e majtë, pothuajse është i sigurt kandidimi me dy koalicione, e njëjta gjë pritet të ndodhë edhe në spektrin e djathtë që qeveris aktualisht vendin. Partia Demokratike duket se ka të sigurt mbledhjen rreth vetes në një koalicion të vetëm partitë kryesore të së djathtës, të cilat kanë pasur edhe hapësira në qeverisjen aktuale. Megjithatë, brenda së djathtës pritet krijimi i një tjetër koalicioni konkurrues në zgjedhje, edhe pse modest, që duket se do të përbëhet nga forca politike të djathta, të pakënaqura nga mënyra e qeverisjes dhe menaxhimit të pushtetit nga ana e Partisë Demokratike. Nga ana tjetër, pra në spektrin politik të opozitës përçarjet midis dy partive kryesore, PS dhe LSI, si dhe mosmarrëveshjet për realizimin e Kodit të Ri Zgjedhor duket se e bëjnë të pamundur unifikimin e votës së të majtës në zgjedhjet e ardhshme, duke sjellë praktikisht kandidimin e opozitës me dy koalicione në zgjedhjet e ardhshme parlamentare të vitit 2009.

PD-ja dhe aleatet
Partia Demokratike do të jetë udhëheqëse e koalicionit të djathtë, që do të konkurrojë në zgjedhjet parlamentare të vitit 2009. Partia e drejtuar nga kryeministri Berisha duket se e ka siguruar mbështetjen e partive kryesore të së djathtës dhe do të tentojë rimarrjen e mandatit për të qeverisur vendin në zgjedhjet e ardhshme. Berisha ka sheshuar përçarjen brenda së djathtës dhe do ta ketë më të lehtë për të menaxhuar fushatën zgjedhore dhe objektivin për të siguruar fitoren. Pasi ka mundur të shkrijë PDR-në, duke e bashkuar në strukturat e saj, Partia Demokratike ka arritur gjithashtu që të marrë konfirmimin e Partisë Republikane dhe Partisë Agrare Ambientaliste, për t’i përfshirë në koalicionin e udhëhequr prej saj në zgjedhjet e vitit 2009.

PDK dhe LZHK
Një koalicion modest brenda së djathtës, por që gjithsesi do të përbëjë një alternativë konkurruese në këtë spektër, duket se do të jetë koalicioni i mundshëm që pritet të krijohet nga Partia Demokristiane dhe Lëvizja për Zhvillim Kombëtar. Edhe në periudhën kur ishin të përfshirë në qeverisje, por edhe pas saj, demokristianët kanë qenë gjithmonë kritikë ndaj Partisë Demokratike dhe mënyrës së saj për të qeverisur vendin. Aktualisht PDK-ja po forcon gjithnjë e më shumë pozicionin e saj kritik ndaj partisë kryesore të maxhorancës. Në të njëjtin front, madje menjëherë pas zgjedhjeve të vitit 2005, është rreshtuar edhe Lëvizja për Zhvillim Kombëtar, që sipas të gjitha gjasave, do të jetë aleatja e PDK-së në koalicionin e dytë të së djathtës në zgjedhjet e ardhshme.

PS dhe PSD
Që pas daljes në skenë të mosmarrëveshjeve me ish-aleatët e saj, si LSI, PDS dhe PAD, e vetmja forcë politike që ka mbetur aleate besnike e Partisë Socialiste është Partia Social-Demokrate. Duket se kjo mbështetje do të vijojë deri në zgjedhjet e ardhshme të vitit 2009, ku Partia Socialiste pritet të kandidojë në koalicion me social-demokratët. Socialistët ende nuk po arrijnë të gjejnë gjuhën e përbashkët me partitë e tjera të së majtës. Ndaj selisë rozë ekzistojnë akuzat për një bashkëpunim të ngushtë me Berishën për interesa personale, për ndryshimin e kushtetutës dhe për zvarritje të reformës zgjedhore. Përveç kësaj, lidershipi i PS-së ende nuk i është përgjigjur ftesës për negociata për reformën zgjedhore që i është bërë nga ish-aleati kryesor i të majtës, Lëvizja Socialiste për Integrim.

“E majta për integrim”
“Reforma Zgjedhore është kusht i patjetërsueshëm për normalizimin e këtyre marrëdhënieve dhe kjo nuk ka të bëjë thjesht me interesat e LSI-së apo thjesht të PS-së. Ky është detyrim i të gjitha forcave politike, për të respektuar votën e qytetarëve shqiptarë dhe për t’i dhënë fund diskutimit të zgjedhjeve në Shqipëri dhe të Parlamentit”. Deklarata e liderit të LSI-së Ilir Meta, bërë vetëm pak ditë më parë, shpjegon më së miri qëndrimin e LSI-së përsa i përket mundësisë së një bashkëpunimi të mundshëm me ish-aleatin e saj, Partinë Socialiste. Në mungesë të një konsensusi për reformën zgjedhore dhe në kushtet e thellimit të mosmarrëveshjeve për këtë çështje, duket praktikisht i pamundur kandidimi i së majtës në zgjedhjet e ardhshme me një koalicion të vetëm. Nga ana tjetër, LSI-ja duket se ka marrë masat për krijimin e një koalicioni konkurrues dhe me objektiva fituese në zgjedhjet e ardhshme. LSI do të jetë udhëheqësja e koalicionit “E majta për integrim”, koalicion i cili do të ketë gjithashtu mbështetjen e dy forcave të tjera të së opozitës, si Partia Demokracia Sociale dhe Aleanca Demokratike.

Koalicionet e mundshme në zgjedhjet e vitit 2009

Partia Demokratike, Partia Republikane, Partia Demokrate e re, Partia Ambientaliste

Partia Demokristiane, Lëvizja për Zhvillim Kombëtar

Partia Socialiste, Partia Social-Demokrate

Lëvizja Socialiste për Integrim, Partia Demokracia Sociale, Aleanca Demokratike



Rezultati në proporcional në zgjedhjet e 2007-s



Partia Socialiste 305.582
Lëvizja Socialiste për Integrim 121.172
Partia Social Demokrate 52.194
Partia Aleanca Demokratike 49.016
Partia Demokracia Sociale 39. 390



Partia Demokratike 271.705
Partia Republikane 75.730
Partia Demokrate e Re 66.623
Partia Demokristiane 58.484
Partia Agrare Ambientaliste 49.016
Partia Lëvizja e Legalitetit 27.788
Lëvizja për Zhvillim Kombëtar 32.032


Albania

[RaPSouL]

Zgjedhjet, pakti për 28 qershorin

Dy partitë e mëdha, drejt akordit për datën e votimeve të vitit 2009

E diela e fundit e qershorit 2009 pritet të jetë dita kur shqiptarët do të votojnë forcën politike që do të drejtojë qeverinë për katër vitet e ardhshme. Palët janë duke negociuar për të fiksuar datën fikse të zgjedhjeve parlamentare pas deklaratës publike të Kryeministrit Berisha, se ato nuk do të shtyhen, por do të bëhen në avancë, në muajin qershor.

Pasi Kryeministri shpalli qershorin si muajin e zgjedhjeve, nën siglën e PD-së, "Shqipëria po ndryshon", demokratët kanë nisur të lobojnë për datën kur ato do të mbahen. Kodi i ri Zgjedhor do të përcaktojë edhe modalitetet e zgjedhjeve të ardhshme, por edhe datën se kur do të mbahen ato. Do të jetë Presidenti i Republikës që, me të drejtën e tij legjitime, do të shpallë datën se kur do të mbahen zgjedhjet.

Vetëm dhjetë muaj na ndajnë nga zgjedhjet e përgjithshme parlamentare dhe politika ka hedhur shashkat e para, duke përcaktuar fillimisht muajin zgjedhor dhe më pas datën për të vijuar me modalitetet e tjera. "Zgjedhjet e reja do të bëhen në qershor. Mund të shtyheshin në korrik, por kemi vendosur që t‘i bëjmë në qershor", u shpreh Berisha dhjetë ditë më parë në bilancin e punës së tij për vitin 2008.

Zgjedhjet në qershor

Nis ligjshëm fushata e zgjedhjeve parlamentare të vitit 2009. Surpriza e parë, e zbuluar nga goja e Kryeministrit, është fakti se zgjedhjet do të mbahen në muajin qershor. Partia Demokratike është duke punuar dhe shumë shpejt do të zbardhë edhe programin e saj të ri, në të cilin do të bazohet fushata e zgjedhjeve të 2009-ës. Në shtator, pritet të nisë edhe puna më e fuqishme për vitin e fundit të mandatit. Qershori i vitit të ardhshëm do të jetë muaj elektoral në Shqipëri, ndërsa e diela e fundit e tij, pritet të jetë edhe data kur shqiptarët do të drejtohen në kutitë e votimit.

Kushtetuta

Sipas Kushtetutës, Kuvendi zgjidhet për katër vjet dhe mandati i Kuvendit fillon me mbledhjen e parë të tij pas zgjedhjeve dhe përfundon në të njëjtën datë të të njëjtit muaj të vitit të katërt nga data e mbledhjes së parë. Në çdo rast, Kuvendi qëndron në detyrë deri në mbledhjen e parë të Kuvendit të ri të zgjedhur.

Zgjedhjet për Kuvendin e ri zhvillohen në periudhën zgjedhore më të afërt, që i paraprin datës së përfundimit të mandatit të Kuvendit. Periudhat zgjedhore dhe rregullat për thirrjen e zgjedhjeve për Kuvendin përcaktohen në ligjin për zgjedhjet.

Në rast shpërndarjeje të tij para përfundimit të mandatit të plotë, zgjedhjet thirren jo më vonë se 45 ditë pas shpërndarjes së tij. Kuvendi nuk mund të nxjerrë ligje gjatë periudhës 60 ditë para mbarimit të mandatit të tij deri në mbledhjen e parë të Kuvendit të ri, me përjashtim të rasteve të vendosjes së masave të jashtëzakonshme.

Kodi i ri Elektoral

Në shtator, duket se forcat politike do të gjejnë gjuhën e përbashkët për të konkretizuar Kodin e ri Elektoral. Ai, sipas Partisë Demokratike, do të përcaktohet në muajin shtator dhe së bashku me ndihmën e opozitës, PD-ja ka premtuar se do të përcaktojnë edhe modalitetet për kartat e identitetit. Në vjeshtë, politika do të mbulohet nga një debat i ashpër, ku në thelb ka përcaktimin e reformës zgjedhore, çka do të detyrojë edhe partitë e vogla të mos kushtëzojnë numrat pas 2009-ës në Kuvend. Deri në këto momente, në gjirin e PD-së është hedhur ideja për bashkimin e së djathtës dhe krijimin e një federate të djathtë. Të gjitha këto çështje priten të diskutohen më parë në Kryesinë e PD-së dhe më pas të nisë shqyrtimi i tyre.



Shqip

[RaPSouL]

Berisha: Reforma zgjedhore bashkë me opozitën


Kryeministri Sali Berisha, duke folur përpara Grupit Parlamentar të Partitë Demokratike, deklaroi se reforma zgjedhore është një nga çështjet më të rëndësishme në vend, për këtë ai kërkoi bashkëpunimin dhe konsensusin e opozitës.

Berisha tha se Kodi i ri zgjedhor do të bëhet në bashkëpunim me opozitën. Për këtë, komisioni në fjalë i krijuar në nivel ekspertësh ka punuar edhe gjatë verës.

Sesioni i ri parlamentar, ka një sërë ligjesh të rëndësishme për të miratuar, siç është reforma në drejtësi, apo ligji për Prokurorinë, ku Berisha theksoi se opozita duhet të jap konsensusin për ligje të tilla.

Shefi i kabinetit, ftoi Edi Ramën që të angazhohet në konsensus për ligjet bazë që pritet të miratohen, ndërsa kërkoi që opozita të mos bëhet gardiane, siç ka ndodhur në të shkuarën.


/start/

[Duaje Siveten]

Koha Jone E Enjte, 04 Shtator 2008

Shoqatat: Spiunet te largohen nga postet drejtuese

Rozeta Rapushi


TIRANE - Shoqatat per te drejtat e njeriut si dhe te traumes ne vend, kerkojne largimin e menjehershem nga postet drejtuese te ish bashkepunetoreve te sigurimit te shtetit. Gjate dhenies se mendimit ne Komisionin Parlamentar te Ligjeve per projektin e hapjes se dosjeve te "spiuneve", kreret e ketyre shoqatave u shprehen pesimist per zbatimin e nje ligji te tille dhe kerkuan nga ligjvenesit qe te denojne nje here e mire krimet e komunizmit ne vend. "Dyshoj se nje ligj i tille mund te funksionoje kur problemet e se shkuares nuk jane zgjidhur ende. Nje projekt i tille kerkon me shume kohe dhe keshtu si po kerkoni ta kaloni ju, jam pesimiste per zbatimin", tha perfaqesuesja e Grupit Shqiptar per te Drejtat e Njeriut, Elsa Ballauri. Ajo u ankua dhe mbi menyren e fteses per te dhene nje mendim ne kete komision, e cila u be ne minutat e fundit dhe pa pare projektin e partive politike. Ndersa kryetari i shoqates se traumave ne vend, Ardian Kati duke zgjeruar kerkoi qe ne kete ligj, te percaktohet nje here e mire denimi i krimeve te komunizmit. Sipas tij, perndjekja politike ne Shqiperi vazhdon dhe sot e kesaj dite nuk jane rehabilituar ende viktimat e traumave. "Shume personave nuk u jepet demshperblimi qe u takon nga statusi" u shpreh Kati duke permendur nje shprehje se "Ne duam ti largohemi komunizmit, por eshte ai qe nuk do te na largohet ne".

Ndersa perfaqesuesit e te perndjekurve politike, ne menyre te prere kerkuan qe ish bashkepunetoret e sigurimit te shtetit te largohen nga postet drejtuese. Sipas tyre, politika duhet te veje doren ne zemer e te mos lejoje njerez te tille ne administrate. Pa permendur emra, ndonese deklaruan hapur se administrata eshte e mbushur me njerez te tille, perfaqesuesit e te perndjekurve politike theksuan se njerez te tille nuk mund te rrine ne poste drejtuese. Duke theksuar se kjo kerkese e tyre nuk eshte hakmarrje, ata permenden se nje nisme e tille eshte vetem denim i krimeve te komunizmit. Perpos ketyre kerkesa, te gjithe permenden si te domosdoshme rishikimin me kujdes nga politika te projektit ne fjale dhe nevojen e konsultave te gjera para se te marrin nje vendim.

Pergatitja

Perfaqesuesit e shoqatave ne vend u thirren dje per te marre pjese e dhene mendimin e tyre ne Komisionin e ligjeve mbi projektin e dosjeve, pa u lene kohe per pergatitje. Mbi te gjitha pa u njohur nga afer me projektin e politikes per nje nisme te tille.



Kerkohet me shume kohe per te debatuar

Grupi Shqiptar per te Drejtat e Njeriut kerkon me shume kohe nga politika per te studiuar e debatuar mbi projektligjin per hapjen e dosjeve te ish bashkepunetoreve te sigurimit te shtetit. Elsa Ballauri tha dje ne Komisionin e Ligjeve se nje projekt i tille ka nevoje per debate te gjera e mbi te gjitha per marrjen parasysh dhe te eksperiencave nderkombetare. Ne te kunder, sipas saj do te ishte shume i veshtire zbatimi i ligjit ne praktike.

Propozimet e shoqatave

Te largohen nga postet drejtuese dhe administrata ish bashkepunetoret e sigurimit te shtetit

Te demshperblehen deri ne fund te denuarit politik

Ne ligjin per hapjen e dosjeve te shtohet nje nen i posacem ku te denohen nje here e mire krimet e sistemit komunist

Te merren parasysh eksperiencat nderkombetare per projekte te tilla te ngjashme

Te rehabilitohen viktimat e traumave

Te zbatohet ligji

[RaPSouL]

“Do të fitojmë, sepse kemi alternativën më të mirë”

Sekretari i Programit Politik thotë se drafti i programit do të jetë gati në janar-shkurt 2009

Andis Harasani as që e vë në dyshim fitoren e së majtës në zgjedhjet e 2009-ës. Madje, në një intervistën e tij për “Korrierin” ai tha: “Oferta që PS-ja po përgatit është shumë më e mirë, është shumë më reale sesa gënjeshtrat e vazhdueshme të qeverisë “Berisha”. Jemi të bindur që do të fitojmë zgjedhjet, sepse ne kemi alternativën më të mirë, dhe jo se Berisha do të humbë zgjedhjet”. Deputeti i PS-së shtoi se një tjetër arsye pse Berisha nuk mund të marrë më vota. Kjo për vetë faktin se ai shpërdoroi votën e marrë më 3 korrik. Lidhur me marrëdhëniet brenda së majtës, Harasani mendon se socialistët duhet të punojnë brenda bazës së PS-së për të marrë votat e tyre, ndërsa më pas të flitet për aleancat e mundshme. Ai kërkon që të mos vazhdojnë më kritikat brenda partive të majta dhe e shton se Meta ka politikën e vet dhe se vazhdon politikën e vet. Sekretari i Programit Politik në PS thotë se drafti i programit do të jetë gati brenda janar-shkurtit 2009


-Ç’po bëhet me programin e ri të PS-së?

Andis Harasani: “Ka filluar pjesa e dytë e turit. Në qoftë se në pjesën e parë morëm mendimet nga të gjithë rrethet, shkuam fshat më fshat për të marrë mendimet e njerëzve, gjatë verës këto mendime u përpunuan nga grupi i ekspertëve brenda PS-së, nga të gjithë ekspertët e huaj që po punojnë pranë PS-së e me PS-në. Kemi ekspertë hungarezë, bullgarë, çekë, kemi ekspertë në Itali, në Francë e Gjermani. Kemi përpunuar një bazë shumë të madhe të dhënash. Ka filluar tani pjesa e dytë e turit, ku kryetari i partisë së bashku me sekretariatin e programit dhe me gjithë kryesinë e partisë po shkon përsëri në të gjithë vendet ku ka pasur takimet e pjesës së parë të turit dhe po u kërkon mendim qytetarëve dhe fshatarëve, për mënyrën sesi ne i kemi “lexuar” shqetësimet e tyre”.

-Kur do të nisë shpallja e programit?

“Kjo pjesë e turit besoj se do të mbarojë brenda dhjetorit të vitit 2008 dhe në janar-shkurt ne do të nxjerrim draftin e parë të programit. Dua të ritheksoj përsëri, që do të jetë një program ndryshe nga programet e tjerë. Këtë e tregon edhe fakti që ka rreth dy vjet, apo më saktë dy vjet e gjysmë që punohet për këtë program. Pra, nuk është një program i minutës së fundit. Nuk është një program i marrë nga interneti dhe i përfshirë, por është një program real, që ka kosto me faturë financiare dhe me burimet e financimit të secilit projekt. Është një program 8-vjeçar, sepse jemi të bindur që problemet e mëdha që ka pasur ky vend në 18 vite tranzicion, nuk janë probleme që zgjidhen me 6 muaj dhe me 100 ditë. Këtë muaj ne do të fillojmë përsëri takimet me të gjithë ekspertët brenda dhe jashtë Shqipërisë, me gjithë ekspertët e huaj po ashtu, në mënyrë që në janar-shkurt të kemi gati draftin e programit, i cili do të hidhet pastaj në popull. Dua të theksoj faktin, që jam shumë optimist për programin, për arsyen sepse nuk janë vetëm anëtarët socialistë ata që kanë kontribuar gjithmonë, por kemi kontribute nga të gjitha shtresat e shoqërisë, kemi kontribute nga njerëz politikë dhe jopolitikë. Kemi kontribute shumë të vyera edhe nga specialistë të djathtë, të cilët kuptohet, në kushtet ku jetojmë nuk kanë dashur të identifikohen, por kemi shumë-shumë njerëz të cilët aktualisht punojnë nëpër ministri dhe që na kanë ndihmuar shumë me sugjerimet e tyre dhe me idetë e tyre”.

-Cili ka qenë reagimi i qytetarëve në fillim të turit të dytë?

“Është ende herët për të folur. Nuk duam që të na kapë optimizmi më shpejt seç duhet. Duam të qëndrojmë me këmbë në tokë, çka është dhe këshilla numër një e kryesisë së partisë për bërjen e programit, por mendoj që qytetarët dhe fshatarët kanë qenë të kënaqur me mënyrën sesi i kemi shoqëruar dhe ajo çka është pozitive për mendimin tim, është fakti që ka një kërkesë të lartë llogarie, dhe gjithashtu ka një kërkesë të lartë sugjerimesh e idesh. Pritshmëria për këtë program është shumë e madhe, çka vë edhe detyra përpara nesh”.

-Më konkretisht, mund të më sqaroni dy-tri pikat kryesore të programit?

“Ne akoma jemi duke punuar. Ne akoma jemi duke nxjerrë se kush janë prioritetet. Sigurisht që janë fiksuar tre-katër prioritete. Është arsimi, është bujqësia..., por më konkretisht besoj do të jetë kryetari i partisë, i cili do të dalë me pikat dhe me mënyrat sesi do t’i zgjidhim këto pika”.

-Si i shikoni shanset e së majtës për të triumfuar në zgjedhjet e 2009-ës?

“Besoj që është evidente për këdo, duke filluar nga kryeministri aktual, profesor doktor Sali Berisha, deri tek qytetari shqiptar më i thjeshtë, që koha e qeverisjes së PD-së ka mbaruar. Ka mbaruar për dy arsye: në radhë të parë sepse ka shpërdoruar në mënyrë masive votën e shqiptarëve të 2005-ës dhe, në radhë të dytë, oferta që PS-ja po përgatit është shumë më e mirë, është shumë më reale sesa gënjeshtrat e vazhdueshme të qeverisë “Berisha”. Jemi të bindur që do të fitojmë zgjedhjet, sepse kemi alternativën më të mirë, dhe jo se Berisha do të humbë zgjedhjet. Kjo është ajo që ne do të synojmë. Zhvillimet brenda kampit të majtë vazhdojnë të jenë ato zhvillime që i dinë të gjithë, por detyra kryesore e PS-së dhe armiku kryesor i PS-së është vetë Partia Socialiste. Ne kemi mjaftueshmërisht vota për të ardhur në pushtet. Dhe mendoj që mjafton të punojmë brenda bazës së PS-së, që të marrim çdo votë, që është vota jonë dhe pastaj në 2009-ën do të flitet për aleanca të mundshme”.

-A ka më kuptim vazhdimi i së njëjtës logjikë nga zoti Meta?

“Zoti Meta është parti më vete. Është një parti e spektrit opozitar. Çdo parti ndjek politikën e vet dhe unë mendoj që nuk është e arsyeshme që ne merremi me “cic-micet” e tranzicionit, ku fillojmë e kritikojmë njëri-tjetrit. Zoti Meta ka politikën e vet dhe vazhdon politikën e vet”.

-Fushata e 2009-ës a duhet të jetë e ngjashme me atë të 2005-ës?

“Unë nuk mund të flas për partitë e tjera, unë mund të flas vetëm për PS-në”.

-Që do të thotë...

“Që do të thotë se PS-ja do të vazhdojë punën me elektoratin e saj, për të shënuar fitoren në zgjedhjet e 2009-ës”.


Korrieri

[RaPSouL]

Dëgjesa e parë në Parlament për votën e emigrantëve në zgjedhjet e 2009

Komisioni Parlamentar i Reformës Zgjedhore dëgjoi sot një propozim për të mundësuar votën e shqiptarëve jashtë atdheut, me bashkëpunimin e të dy bashkëkryetarëve Ilir Rusmajli dhe Fatmir Xhafaj.

Anëtarët e Komisionit dëgjuan nga dy drejtues të G99, Erion Veliaj dhe Arbjan Mazniku një përmbledhje arsyesh që argumentojnë rëndësinë e votës së emigrantëve dhe nga një prezantim të detajuar të mënyrës që ky propozim ofron për të realizuar këtë nisëm.

“Sot vijmë përpara jush me një propozim që synon të të afrojë europianët shqiptarë pranë kombit të tyre, nëpërmjet një platforme konkrete që do të mundësonte votimin për shqiptarët jashtë atdheut. Jemi të inkurajuar që edhe kryeministri i Shqipërisë është shprehur publikisht në favor të garantimit të kësaj të drejte kushtetuese të shqiptarëve kudo që ata janë. Koha për ta marrë këtë vendim historik është tani,” –tha Veliaj.

Komisioni i Reformës Zgjedhore vlerësoi propozimin dhe tregoi interes duke bërë disa pyetje propozuesve të paketës duke e zgjatur dëgjesën deri në 1 orë e 45 minuta. Komisioni do të shqyrtojë mundësinë e përfshirjes së propozimit në parim, duke vlerësuar dhe vështirësitë teknike të realizimit të tij në zgjedhjet e ardhshme.

G99 e ka dorëzuar propozimin për të mundësuar votën e jashtme në parlament në datë 9 korrik të 2008. Ky propozim parashikon mënyrën e votimit me postë të vecantë me elemente sigurie.

***

“Duke jetuar prej vitesh kryesisht në vende me demokraci liberale të konsoliduar, vota dhe komunikimi politik me ta do të sjellë, pashmangshmërisht, ndikim pozitiv në proceset dhe kulturën politike shqiptare në përgjithësi. Votimi i tyre do të ndihmonte në zbatimin e një strategjie më të mirë kombëtare për emigracionin; mbrojtja e të drejtave, arsimimi në Gjuhën Shqipe, integrimi në vendet pritëse, konservimi dhe forcimi i lidhjeve me Shqipërinë, - tha Veliaj në një prononcim për mediat pas takimit.

Shekulli

[deshmuesi]

Ti thua per saliun , nomenklature. Nje sekretar partie ne nje dnermarje, nuk eshte nomeklature shume e rendesishme. Ne ndermarje zakonisht me leshat ishin sekretare. Te pakten me Saliun nuk ishte keshtu. Ai ishte nje mjek i zoti dhe cdo gje qe ka arritur ne rrugen e profesionit nuk e ka arritur nga te qenit sekretar i partise. Mund ta kesh inat, mund te thuash cfar te duash, por kur ai foli para Ramizit ne mbledhejn me intelektualet, te tere ate qe per ty ishin josekretare, heshten dhe u struken ne karige. Vetem Berisha dhe Kadare folen, edhe pse Kadare nuk foli shume. Tani a eshte i dnershem apo jo, kjo eshte tjere gje. Une them se persa kohe qe ne ekmi nje opozite te drejtuar nga komunsitet, si gjinushi, Ruci, dokle, Ramuli, braculi, metuli e compani, Sala do te qendroje ne krye te se djathes.

[RaPSouL]

Deputetët e PS përjashtohen nga aktivizimi në fushatë elektorale

Deputetët e PS nuk do të jenë pjesë e asnjë shtabi elektoral, as në qendër, në rajon apo në rreth. Ata e kanë “lexuar” këtë përjashtim nga aktivizimi në fushatë si një përjashtim nga lista e kandidimit për deputetë. I njëjti penalizim është edhe për anëtarët e Asamblesë Kombëtare të PS, të cilët gjithashtu nuk do të jenë pjesë e shtabeve elektorale. Ky vendim është publikuar dje në mbledhjet e organizuara nga shtabi qendror elektoral me shtabet e qarqeve dhe rretheve. Kryetari i Asamblesë Kombëtare të PS ka shpërndarë dje manualet me mënyrën se si do të organizohet fushata elektorale. Në manual komunikohet vendimi, i cili përjashton nga angazhimi konkret deputetët socialistë dhe anëtarët e Asamblesë Kombëtare, jo vetëm në zonat e tyre, por edhe në qarqe të tjera. Deputetët socialistë dhe anëtarët e Asamblesë do të jenë në dispozicion të shtabit të qarkut për të dhënë ndihmë sikur të ishin anëtarë të thjeshtë të partisë, pasi nuk do të kenë asnjë funksion konkret në fushatën elektorale. Në shtabet elektorale të rajoneve dhe rretheve janë të përfshirë vetëm anëtarët e kryesisë dhe sekretarët rajonalë, të cilëve iu bashkëngjiten edhe koordinatorë të ndryshëm, të cilët kryesisht vijnë nga qendra. Bashkë me ta do të jenë të përfshirë në shtabin elektoral edhe anëtarë të shoqërisë civile në qarqe. Ndërsa në qarqet e rretheve do të bëjnë pjesë të zgjedhurit vendorë. Shtabet e rretheve koordinohen dhe drejtohen nga shtabet e qarqeve.


Përbërja e shtabeve rajonale


Drejtuesit e PS në qarqe kanë marrë dje në dorë skemën, sipas të cilës do të organizohet shtabi elektoral i PS, në qarqe dhe rrethe. Atje mungojnë deputetët, ndërsa pjesë aktive e fushatës do të jenë koordinatorët dhe përfaqësuesit e shoqërisë civile. Edhe anëtarët e Asamblesë Kombëtare të PS nuk do të jenë pjesë e shtabeve elektorale. Në shtabet elektorale të qarqeve ose rajoneve do të jenë të përfshirë sekretari rajonal, kujdestari politik që është anëtari i Kryesisë, një numër koordinatorësh politikë, elektoralë, ku përfshihen koordinatori për gruan, për FRESH, si dhe një koordinator influence, emër i cili do të vijë nga Tirana. Është pikërisht koordinatori i përgjithshëm ai që do të kontrollojë mbarëvajtjen e punës në shtabin rajonal elektoral dhe më pas raporton në shtabin qendror në Tiranë, hap pas hapi gjatë fushatës. Anëtari i Kryesisë, i cili do të jetë në rolin e kujdestarit politik, koordinon pjesën më të madhe të punës, i mbështetur edhe nga sekretari i qarkut. Rolin kryesor në fushatë do ta ketë pikërisht koordinatori, i dërguari i kryetarit nga qendra në shtabet rajonale. Në këtë mënyrë, koordinatori i përgjithshëm i fushatës, i cili vjen nga Tirana në çdo rajon, kontrollon punën në tërësi, duke shmangur çdo mundësi të atyre anëtarëve të Kryesisë së PS për të devijuar nga çfarë është e përcaktuar në skemën e Ramës për fushatën elektorale. Pjesëtarët e shtabeve elektorale në qendër, rajon dhe rreth, do të jenë pjesa me të cilën Rama përfaqësohet në këtë fushatë, dhe për pasojë prej këtij ekipi do të dalë edhe lista e kandidatëve për deputetë të PS, gjithnjë në bazë të kontributeve të secilit.


Reagimi


Të njëjtin fat pësojnë edhe anëtarët e Asamblesë Kombëtare, për të cilët ishte rasti më i mirë për t’u familjarizuar me elektoratin socialist. Anëtarët e Asamblesë Kombëtare të PS, prej nga dhe mendohej të vinte një pjesë e mirë e listës së kandidimit, duket se do të shfaqin pakënaqësitë e tyre për shmangien që iu bëhet në fushatë. Deputetët e PS, të cilët që tani ndjehen të përjashtuar nga aktivizimi dhe shumë të rrezikuar për të qenë pjesë e listës së kandidatëve për deputetë, kanë ende mundësi të rishikojnë pozicionin e tyre, ndoshta për të marrë rrugën drejt ndonjë strehe tjetër larg Ramës. Burimet pranë grupit parlamentar thanë dje se brenda grupit të deputetëve janë shfaqur reagime të forta për vendimin që i përjashton ata nga shtabi elektoral dhe aktivizimi në fushatë elektorale. Deputetët e PS, jo vetëm që janë të përjashtuar nga shtabet elektorale, por janë gjithashtu të urdhëruar të sillen me zonat e tyre sikur nuk janë deputetë të këtyre zonave, por do të duhet të merren me punët e partisë në të gjithë qarkun dhe jo vetëm me zonën e tyre, por ata do të jenë gjithnjë pjesë e fundit e lojës, vetëm nëse do të duhet aktivizimi i tyre. Ky funksion është i vlefshëm për çdo anëtar partie.

Përbërja e shtabeve elektorale dhe përjashtimi i deputetëve pritet të sjellë edhe reagimin e bazës së PS. Burime pranë grupit parlamentar thanë dje se emrat që Rama ka zgjedhur të delegojë në bazë për organizimin e fushatës elektorale, nuk do të mund të “miqësohen” me bazën e partisë deri në atë pikë sa të garantojnë fitoren në zgjedhje. Kjo duket se nënkupton edhe një kërcënim të deputetëve socialistë, (ata që kanë pak shpresa për të qenë pjesë e listës së kandidimit) ndaj kryetarit Rama, për mundësinë e sabotimit të fushatës në zonat ku ata janë deputetë dhe kanë ende influencë. Sapo të bëhet e njohur lista e të përjashtuarve dhe të angazhuarve, pritet që të shfaqen edhe reagimet e para publike të deputetëve, prej nga dhe nis pikërisht misioni i tyre sabotues, për shkak të përjashtimit nga angazhimi dhe për pasojë edhe nga kandidimi.


Tema

[Duaje Siveten]

TemA

Trushpëlarësit e Trushpëlarët!
Nga Inida Gjata ZHAKU

Nga Kuvendi, jo vetëm asnjë e re rreth Kodit Zgjedhor, por është shtyrë edhe afati i përfundimit të hartimit të tij.

Partitë politike, sidomos 2 më të mëdhatë, e shfrytëzojnë këtë vakuum ligjor për të shpërdoruar paratë e taksapaguesve në fushata elektorale, gati një vit përpara zgjedhjeve.

Kryeministri prodhon spote, sikurse edhe qeveria, nëpërmjet të cilave “bëjnë me dije” publikun votues rreth arritjeve gjatë këtij mandati.

Kryetari i bashkisë, gjithashtu.

Kryetari i Bashkisë së Tiranës, meqë është edhe kryetar i opozitës, shfrytëzon fondet e bashkisë për të arritur qëllimin e tij si pretendent për Kryeministër i ardhshëm i Shqipërisë.

Kryetari i Partisë Demokratike, njëkohësisht edhe kryeministër, me paratë e buxhetit të shtetit, turret nga qyteti në qytet e nga katundi në katund, duke shpëlarë tru “varfanjakësh” me parulla politike.

Kryetari i opozitës, njëkohësisht edhe luftues i politikës së vjetër e përkrahës i politikës së re, rend e iu thotë fshatarëve se do t’i bëjë qytetarë, pa asnjë plan konkret. Siç do t’i kishte hije një politikani të ri.

Kryetari i mazhorancës, njëkohësisht i konsideruar nga përkrahësit e politikës së re si përfaqësues i demagogjisë së vjetër, premton, siç ka bërë gjatë gjithë ekzistencës së tij, se do ta ndryshojë realitetin. Dhe për këtë do shfrytëzojë paratë e grumbulluara gjatë mandatit të vjetër. Pra, kërkon një mandat të ri për ndryshimin e premtuar që në mandatin e vjetër.

Kryetari i opozitës gjithashtu premton se do ta shpëtojë Shqipërinë nga bataku i vjetër, por nuk ndjek asnjë strategji të re për të arritur këtë qëllim.

Ndërkohë, Kodi Zgjedhor nuk është hartuar ende.

Në Kodin Zgjedhor, i cili ndryshon sa herë që ka zgjedhje, përveç logjistikës së bërjes së fushatës elektorale, e cila nuk duhet të kish nisur ende përpara mbërritjes së Vitit të ri, do të përcaktohet edhe buxheti që do t’iu vihet në dispozicion partive politike për realizimin e fushatës.

Megjithatë, fushata ka kohë që ka nisur. Me paratë e rrugëve, të shkollave, të reformave, të qytetarëve, politikanët tregojnë arritjet e tyre nëpërmjet disa spoteve publicitare, të cilat, megjithëse presupozohet të jenë ndryshe nga njëri-tjetri, janë identike.

Ai që pretendon një politikë të re, ndjek strategjinë e atij që prej kryetarit të opozitës konsiderohet si përfaqësues i mendësisë së vjetër politikëbërëse.

Kryetari i mazhorancës fushatën që po bën, e konsideron si Njoftim! Për qytetarët.

Kryetari i bashkisë, i cili prej kohësh prej angazhimeve si kryetar i opozitës e kish braktisur punën e tij të vjetër në emër të detyrës së re, e konsideron fushatën që ka nisur të bëjë si Detyrim (!) ndaj qytetarëve.

Kryetari i mazhorancës flet me shifra të mëdha. U premton shqiptarëve se në mandatin tjetër do të shpenzojë miliarda.

Kryetari i opozitës flet me përbuzje rreth udhëheqjes së deritanishme, duke premtuar se do të ndryshojë çdo gjë! Edhe majat e flokëve. Edhe të thonjve.

Askush nuk dëgjon prej askujt, se nga, e si, e qysh, e tek do të vijë ky ndryshim?!

Plane?!

Projekte konkrete?!

Arsimin si do ta ndreqë?! Si?! Konkretisht?!

Punësimin?! Si?!

Pagat, infrastrukturën?!!

Të gjithë premtojnë se do të jetë ndryshe, por askush nuk ndjen asnjë detyrim t’iu japë llogari votuesve për dështimet e deritanishme e për projektet e mëtejshme.

Votuesit janë nga më të ndryshmit. Të gjithë kanë halle nga më të ndryshmet, ama taksat përpiqen t’i paguajnë një më një për hir të një jete më të mirë. Por, demagogjinë pas gjithë këtyre viteve eksperiencë si trushpëlarë janë në gjendje ta dallojnë nga një projekt konkret, të cilin, edhe pse nuk e kanë parë ndonjëherë me sy, apo dëgjuar ndonjëherë me veshë prej politikanëve të rinj apo të vjetër, e imagjinojnë se si mund të jetë. Të paktën e dinë se ka shumë pak fjalë e shumë konkretësi.

Demagogjia ka prodhuar një kryetar mazhorance, i cili është njëkohësisht edhe kryetar i një qeverie që dështimet e saj i fsheh pas reklamimit të “shpatullave heroike” të Luftës kundër Korrupsionit

Demagogjia gjithashtu ka prodhuar një kryetar opozite, i cili reklamon si sukses gjelbërimin e një kryeqyteti të pistë e të zaptuar nga kaosi urban!

Kod Zgjedhor nuk ka ende.

Kur të ketë Kod Zgjedhor, fushata që deri më tani është krejtësisht e jashtëligjshme dhe abuzive, do të shndërrohet në një betejë të vërtetë.

Beteja do të kushtojë miliona të tjerë, por atëherë do të jenë të ligjshme.

Diferenca midis politikës së vjetër edhe asaj të re as me këto milionat ekstra (në valutë) nuk do të kuptohet.

Kryetarët e partive do të ndjekin të njëjtat rrugë të vjetra, duke përfituar nga strapacimi i votuesve për të paguar çdo taksë që iu vë shteti e që për pjesën më të madhe të popullsisë janë shumë më të larta se burimet financiare të familjeve të tyre.

Kryetarët e partive, pa asnjë projekt të qartë, të saktë e bindës do të luftojnë njëri-tjetrin me fjalë e do të përfitojnë sërish nga ky popull!

Populli ndërkohë, një pjesë e madhe e të cilit për të paguar fushatat elektorale, ngel në fund të pesëmbëdhjetëditëshit pa asnjë kacidhe, do të votojë për të keqen më të vogël, siç ka bërë gjithmonë.

E kështu do të vijojë historia tragjikomike e një populli trushpëlarë si ky i yni, i cili, sa më shumë kalon koha, harron se ajo çfarë i takon me LIGJ është SHQIPËRIA!

[Edvin83]

Zihen për politikë, i kafshon veshin mikut

Hasan Selmani sulmon 22-vjeçarin Jovalin Boçi, teksa po shikonin një emision televiziv

Një sherr banal i ka kushtuar
shumë një 22-vjeçari, të
cilit i kanë kafshuar veshin
dhe ka përfunduar në spital në
gjendje të rëndë. Ngjarja e rrallë ka
ndodhur gjatë ndjekjes së një debati
politik në një emision televiziv,
ku dy protagonistët ishin pozicionuar
në kahe të ndryshme. Burimet
zyrtare të policisë bënë të
ditur se ngjarja ka ndodhur mesnatën
e së enjtes, ndërkohë që
arrestimi i agresorit është bërë
pasditen e djeshme. Sipas informacioneve
nga policia, ditën e
djeshme, në orën 17.00, u bë arrestimi
në flagrancë i shtetasit
Hasan Sinan Selmani, 38 vjeç, lindur
në Prizren dhe banues me
qira, në rrugën "Jordan Misja". Policia
shpjegoi se arrestimi i tij u bë
pasi në orën 24.00 të dy netëve më
parë, në banesën ku jeton me qira,
gjatë një debati banal për një emision
televiziv, ka kafshuar me
dhëmbë veshin e majtë të Jovalin
Boçit, 22 vjeç, lindur në Lushnjë
dhe banues në të njëjtën shtëpi.
Nga kafshimi, 22-vjeçari lushnjar
është dëmtuar dhe ka humbur
shumë gjak. Menjëherë, ai është
dërguar në spital, por mësohet se
ndodhet në gjendje të rëndë shëndetësore.
Policia tha se protagonistët
e kësaj ngjarjeje ishin shokë
prej kohësh, por gjatë debatit politik
në emisionin televiziv ishin pozicionuar
në kahe të ndryshme. Gjatë
debatit ka ardhur edhe sulmi ndaj
të riut, të cilit tifozllëku për politikën
për pak i ka kushtuar me jetë. Policia
tha mbrëmë se pritet përmirësimi
i gjendjes shëndetësore të djalit
të dëmtuar, për të sqaruar plotësisht
rrethanat e ngjarjes.

Fushata ka dhe viktimat e saj