Rrugët, fatura 2 miliardë dollarë
Kjo është shifra që duhet të paguajmë në 4-5 vitet e ardhshme për rrjetin rrugor
Shqipërisë i duhet të sigurojë plot 2 miliardë dollarë në 4 vitet e ardhshme për të ndërtuar më në fund një rrjet kombëtar rrugor të pranueshëm. Qeveria duket se ka vendosur për ta çuar deri në fund projektin, duke qenë e gatshme të paguajë çdo çmim për këtë. Burime konfidenciale nga Ministria e Punëve Publike, Transportit dhe Telekomunikacionit bënë të ditur për "Shqip" se një pjesë dërrmuese e fondeve do të merren nga buxheti i shtetit, ndërsa pjesa tjetër do të sigurohet me financimet e donatorëve përmes kredive tregtare ose të buta. "Me ritmet aktuale të investimeve në infrastrukturë do të duhen 4-5 vjet që të kemi më në fund një rrjet kombëtar rrugor brenda standardeve", u shpreh një prej drejtuesve më të lartë të kësaj ministrie, që nuk ka dashur të identifikohet. Për vitin 2008, qeveria shqiptare vendosi në dispozicion të investimeve në infrastrukturën rrugore 500 milionë dollarë, një rekord ky historik. Një sërë projektesh të rëndësishme janë në zhvillim, por edhe shumë të tjera pritet që të realizohen gjatë viteve të ardhshme. Ajo që mbetet shqetësimi kryesor është fatura e rënduar. Shifra prej 2 miliardë dollarësh është e barabartë me 20 për qind të Produktit të Brendshëm Bruto.
Kostot
Fatkeqësisht Shqipëria trashëgoi një rrjet rrugor inekzistent nga regjimi gati 50-vjeçar i diktaturës. Ky është konsideruar një disavantazh i madh i vendit tonë, jo vetëm kundrejt vendeve të industrializuara të Perëndimit, por edhe karshi fqinjëve tanë të rajonit. Studime dhe përllogaritje të afërta të kryera nga institucionet e specializuara tregojnë se ekonomia shqiptare humbet gati 200 milionë euro në vit, vetëm për shkak të infrastrukturës së dobët. Dëmet janë të gjithanshme. Kosto të larta prodhimi, pamundësi për të lidhur prodhuesit me tregun etj.
Rrugët
Rrjeti ynë kombëtar i rrugëve përbëhet nga disa akse kryesore tashmë të përcaktuara. Ato fillojnë me aksin veri-jug, që nis nga Hani i Hotit deri në Kakavijë me zgjatimet e veta drejt Vlorës dhe aksit Sarandë-Konispol. Në këtë aks, për rrugën Shkodër-Hani i Hotit është përfunduar projekti, është dorëzuar dhe priten vetëm procedurat e tenderimit. Rruga Lushnjë-Fier është duke u ndërtuar dhe qeveria thotë se përfundon këtë vit. Rruga Levan-Vlorë është duke u ndërtuar, ndonëse në këtë rrugë ka pasur një sërë pengesash, që kanë të bëjnë kryesisht me shpronësimet. "By Pass"-i i Fierit është në proces tenderimi. Rruga Levan-Tepelenë, ka mbaruar procedura e prokurimit, është bërë vlerësimi përfundimtar dhe u është dërguar bankave. Sipas qeverisë, me të gjitha këto procedura aksi veri-jug plotësohet brenda afateve kontraktuale. Një tjetër rrugë që po ndërtohet është ajo që njihet me emrin rruga e bregdetit, nga Vlora drejt Sarandës. Segment tjetër bazik është rruga e Kosovës. Po punohet në të gjithë gjatësinë e vet. Ka filluar ndërtimi edhe i asaj që njihet si Rruga e Arbrit, apo rruga e dytë drejt Maqedonisë. Në një segment të saj po punohet pjesa tjetër Bulqizë-Tiranë e tenderuar. Sakaq, janë duke u tenderuar projekte në disa akse të tjera kryesore, sikurse është Boshti Qendror i Jugut, që është rruga Tiranë-Elbasan, Belsh-Kuçovë, Kuçovë-Berat dhe Berat-Tepelenë. Do të futet në projekt zbatimi këtë vit dhe qeveria shpreson që ta financojë shumë shpejt. Po kështu janë edhe një sërë rrugësh që lidhin aksin veri-jug me bregdetin, si rruga e Velipojës, rruga Lezhë-Shëngjin, rrugën e Divjakës, Spillesë etj.
Gazeta Shqip
Krijoni Kontakt