Takimi i Tretë i Institutit Alb-Shkenca
Tiranë, 1-3 Shtator 2008
SHKENCA NË SHËRBIM TË SHOQËRISË SHQIPTARE
– Thirrje për ligjërata dhe kumtesa –
Të nderuar anëtarë të Institutit Alb-Shkenca,
Të nderuar Zonja dhe Zotërinj,
jeni të ftuar të merrni pjesë në Takimin e Tretë të Institutit Alb-Shkenca, i cili do t’i zhvillojë punimet në Tiranë, në datat 1, 2 dhe 3 shtator 2008.
Tema-bosht e Takimit është: “Shkenca në shërbim të shoqërisë shqiptare”.
Do të mbahen tetë konferenca shkencore (një për secilin seksion shkencor të IASH-it) dhe një konferencë informuese mbi mundësitë e aplikimeve dhe bashkëpunimeve në projekte ndërkombëtare.
Do t’i prijë Takimit një seancë e veçantë me temë: “Institucionet shkencore: Përvojat e Shqipërisë, Kosovës dhe Maqedonisë”.
Në kuadër të çdonjërës konferencë do të organizohen disa simpoziume. Në disa seksione temat e simpoziumeve janë paramenduar të gjera në mënyrë që të mund të marrin pjesë në to sa më shumë anëtarë të Institutit dhe studiues të tjerë.
Në mbyllje të Takimit do të organizohet një seancë diskutimesh të lira.
Kumtesat dhe ligjëratat mund të mbahen në gjuhën shqipe ose atë angleze.
Konferencat shkencore në kuader të Takimit të Tretë:
I. Konferenca e Seksionit të Shkencave Albanologjike
II. Konferenca e Seksionit të Shkencave të Drejtësisë
III. Konferenca e Seksionit të Shkencave të Bujqësisë dhe Mjedisit
IV. Konferenca e Seksionit të Shkencave Ekonomike
V. Konferenca e Seksionit të Shkencave të Natyrës
VI. Konferenca e Seksionit të Shkencave Mjekësore
VII. Konferenca e Seksionit të Teknologjisë dhe Shkencave Inxhinierike
VIII. Konferenca e Seksionit të Shkencave Shoqërore
IX. Konferenca e projekteve ndërkombëtare
Data me rëndësi:
Dërgimi i përmbledhjes së prezantimit: 30.04.2008
Lajmërimi i autorëve: 31.05.2008
Regjistrimi: 01.06 – 01.09.2008
INFORMACIONE PËR TË INTERESUARIT
• Të interesuarit janë të ftuar të paraqiten me arritjet më të reja nga lëmija e angazhimeve të tyre profesionale-shkencore.
• Kumtesat/ligjëratat duhet të jenë origjinale, të pabotuara dhe jo në proces vlerësimi për botim në ndonjë periodik shkencor.
• Që kontributi të mund të pranohet për prezantim dhe të botohet në Aktet e Takimit, të paktën njeri nga autorët do të duhet të marrë pjesë në konferencë.
• Të interesuarit duhet të dërgojnë deri më 30 prill 2008 në adresën e seksionit përkatës, në formatin tip të Institutit, titullin e kumtesës/ligjëratës bashkë me përmbledhjen (abstraktin) [150-250 fjalë], emrat e plotë të autorëve dhe vendet e tyre të punës.
• Përmbledhjes së kumtesës/ligjëratës suaj duhet t’i prijë shënimi se në cilin simpozium dëshironi që ta paraqisni.
• Secili është i lirë të përfaqësohet me më shumë se një kontribut (në konferenca/simpoziume të ndryshme).
• Varianti për botim i kumtesave/ligjëratave duhet të jetë në gjuhën shqipe ose angleze, i formatuar sipas rregullave të formatit të IASH-së.
• Të interesuarit mund të kontaktojnë gjithashtu me përgjegjësit për organizimin e konferencave të veçanta shkencore.
• Në qoftë se dëshironi të ndihmoni në organizimin e simpoziumeve dhe nëse kërkoni informacion shtesë rreth IASH-2008 ju lutemi të na shkruani në adresën: tv2008@alb-shkenca.org
Informacion te plote mbi aktivitetin do te gjeni ne:
http://www.alb-shkenca.org/index.php...=details&did=3
Mund te shkarkoni ne kete lidhje posterin e takimit si dhe shabllonin per dergimin e permbledhjeve.
Krijoni Kontakt