Zbulohet drogë në "Internet-Kafe"

[biligoa]

Policia e Tiranës arreston një 20-vjeçar: E shpërndante për adoleshentët

Antidroga e Tiranës ka realizuar një tjetër operacion, ku ka prangosur një të ri për shpërndarje të lëndëve narkotike. I arrestuari Aldo Muça kishte zgjedhur një rrugë të veçantë për shpërndarjen e drogës, duke e shitur atë në ambientin e punës. Pak kohë më parë, ai kishte filluar punë në një Internet-Kafe, ku kishte zgjedhur edhe klientelën e tij për të shitur drogë. Grupi hetimor i antidrogës bëri të ditur se 20-vjeçari dyshohet se kishte kohë që merrej me këtë aktivitet të paligjshëm. Prej më se një muaji, agjentët e antidrogës i ishin vënë pas për të hetuar mbi aktivitetin e tij. Ai ndiqej nga policia, por asnjëherë nuk kishin mundur ta kapnin. Blerësit e porosisnin mallin te qendra "Internet-Kafe" dhe më pas largoheshin nga aty. Pak kohë më vonë, shitësi Muça ua dërgonte "mallin" atyre nëpërmjet një personi tjetër, duke i shpëtuar përgjegjësisë së tij. Megjithatë, mekanizmi ka qenë tejet i vështirë për t‘u dokumentuar, kështu që agjentëve të policisë u është dashur një kohë e gjatë për të realizuar operacionin. Dy net më parë, policia është vënë në dijeni se i riu e kishte dërguar lëndën narkotike në qendrën "Internet-Kafe", kështu që është kërkuar urdhri i prokurorit për të ndërhyrë dhe për të arrestuar shpërndarësin. Burimet zyrtare të Drejtorisë së Policisë së Tiranës bënë të ditur se nga seksioni i luftës kundër drogës u krye arrestimi në flagrancë i shtetasit Aldo Albert Muça, banues në Tiranë. "Ky shtetas u kap në flagrancë në afërsi të Xhamllikut, në rrugën "Arkitekt Sinani", brenda në një dyqan lojërash kompjuterike ku ishte i punësuar. Gjatë kontrollit të ushtruar nga oficerët e seksionit antidrogë atij iu gjetën 14 gramë lëndë narkotike, e llojit kanabis sativa", shpjegoi zyrtarisht policia e Tiranës. Më tej, uniformat blu thanë se u kryen veprimet procedurale, ndërsa në cilësinë e provës materiale u sekuestruan lënda narkotike dhe një celular. Gjithashtu, po punohet për zbulimin e autorëve të tjerë të implikuar në këtë veprimtari kriminale. Megjithatë, policia tha se ka edhe raste të tjera ku shpërndarësit e drogës përdorin "Internet-Kafe" për të kryer aktivitetin e tyre.

[[Perla]]

hew i zgjuar djali,e shperndante drogen ne menyre qe askujt mos i shkonte ndermend apo te dyshonte! Nuk mendojne keta njeres se cfare pasojash sjell droga,mendojne si e si te pasurohen pa iu lodhur shume kurrizi.Uqer te parase,shkaterrojne jete.Per mendimin tim edhe pronari i net kafese ku ky punonte duhet te gjobitet apo ti mbyllet aktiviteti,sepse duhet te kete nje kontrollim me te madh dhe jo puneso lloj e lloj individesh,sepse eshte e ditur qe qendra do te frekuentohet nga te rinjte dhe keto lloj fenomenesh mund te ndodhin jo ne nje qender intereneti por ne shume.