Kuvendi i Shqipërisë përkujton 60 vjetorin e ekzekutimit të deputetëve opozitarë

[Albo]

Kuvendi përkujton deputetët e ekzekutuar

Kuvendi zhvilloi dje një seancë plenare përkujtimore në 60-vjetorin e ekzekutimit të deputetëve nga regjimi komunist më 1947. Kryetarja e Kuvendit, Jozefina Topalli, ka folur në nder të tyre, duke e konsideruar të kaluarën si një mësim për të ardhmen. “Deputetët e ekzekutuar punuan me pasion, për të mos e ndarë Shqipërinë nga perëndimi, nga vlerat që vendi ynë ndante me botën e lirë të pas Luftës së Dytë Botërore. Kjo nuk është një ngjarje aq e largët sa mos të na bëjë të mendojmë kthjellët”, - u shpreh më tej Topalli.


Të dënuarit me vdekje:

Shefqet Beja (me varje në litar)

Riza Alizoti (me varje në litar)

Sulo Klosi (me varje në litar)

Selaudin Toto (me varje në litar)

Sheh Ibrahim Karbunara

Paolo Saggioti

Agathokli Xhitoni

Mehmet Prishtina

Abdul Kokoshi

Beqir Çela

Salim Kokalari (me varje në litar)

Tefik Deliallisi

Irfan Majuni (me varje në litar)

Pertef Karagjozi

Enver Sazani (me varje në litar)

Hysen Shehu


Me privim të përjetshëm lirie u dënuan:

Foto Bala

Ramazan Tabaku

Ram Marku

Gjovalin Vlashi


Me nga 20 vjet privim lirie u dënuan:

Shefki Minarolli

Rustem Sharra

Xhevat Xhafa


Me 15 vjet privim lirie u dënua:

Sulo Konjari


Nga Tema

[Albo]

Kuvendi përkujton 60-vjetorin e ekzekutimit të grupit të deputetëve

Kuvendi i Shqipërisë ka përkujtuar dje, nën nismën e kryetares Jozefina Topalli, pushkatimin e 16 prej deputetëve që e kanë përfaqësuar atë në vitin 1947. Me një minutë heshtje, deputetët shqiptarë kanë mbajtur një qëndrim etik ndaj kësaj ngjarjeje të errët, e cila vuri para togës së ekzekutimit opozitën e parë të mirëfilltë politike kundër pushtetit të Enver Hoxhës.
Në fjalën e mbajtur me këtë rast, kryetarja Topalli u shpreh me tone emocionale duke nënvizuar se ngjarje të tilla janë një leksion për të ardhmen. “Këto ngjarje të mallkuara na kujtojnë, duke na kapur prej mënge, se është mëse e nevojshme t’i shohim në sy, të reflektojmë, të mësojmë e t’ia tregojmë me zë të lartë brezit të sotëm, por edhe xhelatëve ende të gjallë, se “istoria maestra vitae” (se “historia është mësuese e jetës”)”, - tha ajo. Duke kujtuar arsyet që i çuan këta njerëz drejt një fati tragjik, kryetarja e Kuvendit vuri në dukje se grupi i deputetëve doli hapur si grup i organizuar në mbrojtje të parimeve të demokracisë perëndimore dhe mori përsipër të bënte opozitën në Parlamentin e parë të Shqipërisë komuniste.

11 Tetor 2007
Albania