Kujtim Hysenaj, kryetar i ri i SHISH

[Albo]

Shefi i ri i Shërbimit Informativ ka studiuar për frëngjisht dhe ka punuar 30 vjet si diplomat

Një ambasador në krye të SHISH
Moisiu dekreton Hysenajn pas propozimit të Nanos


--------------------------------------------------------------------------------

al.kre

TIRANE

Presidenti Moisiu e dekretoi dje 55-vjeçarin Kujtim Hysenajn kryetar të SHISH-it. Diplomati dhe përfaqësues i dy kompanive- një holandeze dhe një sllovene, tashmë merr zyrtarisht detyrën e shefit të agjentëve sekretë shqiptarë.

Hysenaj është zgje-dhur nga Nano si kandidat dhe aktualisht ai është këshilltar i jashtëm i kryeministrit për diplomacinë. Momenti deri në zgjedhjen e tij ka kaluar në shumë takime dhe diskutime kandidaturash të shumta. Njëra nga këto kandidatura do të bëhet nënkryetar i SHISH-it.
Kryetari i ri i SHISH-it është diplomuar në gjuhën frënge dhe në Juridik. Në vitin 1970 nis karrierën e tij në diplomaci si referent i Ministrisë së Jashtme për OKB-në dhe organizatat ndërkombëtare. Nga 1979 deri në 1992 Kujtim Hysenaj ka shërbyer në përfaqësitë diplomatike jashtë vendit. Ai ka kryesuar disa delegacine të Shqipërisë në konferenca të rëndësishme ndërkombëtare, si dhe për një vit ka qenë këshilltar i Misionit shqiptar në OKB. Për 5 vjet ka kryer detyrën e këshilltarit të ambasadës shqiptare në Paris. Ndërsa Beogradi ka qenë qyteti ku Hysenaj ka punuar për 6 vjet. Nga viti 1986 deri në vitin 1992 Hysenaj ka patur detyrën e ambasadorit në përfaqësinë diplomatike shqiptare në Jugosllavi. Ndërrimi i regjimit në Shqipëri e risjell atë në atdhe, tashmë jo më në shërbimin diplomatik, por me aktivitete private. Në vitin 1992 Kujtim Hysenaj bëhet përfaqësuesi i kompanisë ajrore sllovene "Adria Airways" dhe i kompanisë së ekspresit ajror TNT Global Express. Këtë biznes privat ai e ka vazhduar deri dje kur ka marrë emërimin zyrtarisht në krye të SHISH-it. Ardhja në pushtet e PS-së dhe nisja e luftës në Kosovë bëri që Kujtim Hysenaj, njohës shumë i mirë i çështjeve të ish-Jugosllavisë të bëhej këshilltar special i ministrit të Jashtëm. Hysenaj ka drejtuar edhe Drejtorinë e analizës dhe të prognozës si dhe ka qenë kryetar i grupit të posacëm të punës për Kosovën ngritur nga kryeministri kur atje shpërthyeu lufta. Në 1998 Kujtim Hysenaj rihyn në diplomaci, por këtë herë në shërbim të Mbretërisë së Holandës që e zgjedh atë konsull nderi në Shqipëri. Në vitin 2001 ai emërohet konsull i përgjithshëm nderi i Sllovenisë në Shqipëri. Aktualisht Hysenaj është edhe këshilltar i jashtëm diplomatik i kryeministrit Nano. Ishte ky i fundit që e propozoi Hysenajn për ta emëruar kryetar të SHISH-t. Propozimi i tij u pranua nga ana e presidentit Moisiu. Pas 4 ditësh Hysenaj feston 55- vjetorin e lindjes, por edhe detyrën e tij të re në krye të shërbimit sekret shqiptar. Ai do të zëvendësojë Klosin në këtë detyrë dhe pritet që në ditët e para të punës të marrë vendime për plotësimin e vendeve bosh në këtë shërbim të shkaktuara nga shkarkimet e tjera që bëri kryeministri Nano.

[Albo]

Kompromisi, SHISH me dy zevendesa

Ne ditet e ardhshme pritet edhe emerimi i nenkryetarit te ri te SHISH-it. Burime nga Presidenca bejne te ditur se gjate negociatave mes Presidentit dhe Kryeministrit eshte diskutuar nje formule e re per drejtimin e Sherbimit. Sipas te ciles, Sherbimi sekret do te kete dy nenkryetare. Te njejtat burime thane se shefi i komanduar Petrit Myftari do te kaloje ne pozicionin qe kishte para largimit te Klosit, ne ate te nenkryetarit. Ndersa vendi i nenkryetarit te dyte mendohet t'i jepet kandidatit tjeter per kreun e SHISH, Ylli Allushi, propozim i Presidentit. Ishte pikerisht kjo formule, qe beri te mundur arritjen e kompromisit mes Moisiut dhe Nanos. Por problem gjate bisedimeve ka dale ligji aktual per SHISH, i cili percakton se Sherbimi drejtohet nga kryetari dhe nje nenkryetar. Per kete po shihet mundesia e amendimit te ligjit, qe do t'i hape rruge me pas zbatimit te kesaj formule. Ne fjalen e tij para Kuvendit, Kryeministri Nano u shpreh se qeveria po pergatit permiresimin e ligjit per SHISH, por nuk dihet ende nese kjo ceshtje do te pefshihet ne projektligjin e ri.