Gazeta Shqiptare, 17 shtator 2007
BB: Investitorët po ikin nga Shqipëria
Banka Botërore vlerëson se në Shqipëri ka rënie të ritmeve të rritjes së ekonomisë. Vlerësimi erdhi nga kreu i zyrës së Bankës Botërore në Shqipëri, Camille Nuamah, gjatë samitit të dytë për Investimin dhe Biznesin në Shqipëri, organizuar në datat 14 dhe 15 shtator nga Konventa e Financave Evropiane.
"Ritmet e produktivitetit, (rendimentit) në ekonominë shqiptare janë në rënie. Ndërkohë që vihet re se investimet nga privatët janë në nivele të ulta" tha gjatë fjalës së saj shefja e zyrës së BB, Camille Nuamah gjatë takimit. "Eshtë bërë shumë pak punë që të thitheshin në drejtim të atdheut edhe investime nga diaspora e madhe dhe e fuqishme ekonomikisht e shqiptarëve në botë. Investitorët potencialë vazhdojnë të largohen nga Shqipëria edhe për shkak të paqartësisë së përhershme në të drejtën e pronësisë mbi të patundshmet, që nuk po gjen ende zgjidhje nga organet e shtetit shqiptar" ishte vlerësimi për investimet në Shqipëri nga shefja e zyrës së BB.
Pengesat
Në vlerësimin e shefes së BB në Shqipëri, një tjetër problem serioz që pengon çështjen e investimeve dhe ardhjen e investitorëve të rinj në Shqipëri, ka të bëjë edhe me infrastrukturën e dobët. "Një tjetër faktor është edhe problematika që ende haset në kuadrin rregullator të ekonomisë, së bashku me atë që paraqesin shërbimet bazë publike të cilat ofrohen nga gjyqësori, organet e regjistrimit dhe Menaxhimit të Tokës, etj", tha Nuamah.
Faktori i tretë, por jo më pak i rëndësishëm sipas shefes së BB, është edhe vështirësia që krijohet për bizneset e ndryshme nga mungesa e rregullt me energji elektrike, por edhe me ujë të pijshëm e industrial.
Ndërkohë që ka përshëndetur rritjen në vlerë të eksporteve, përfaqësuesja e BB në Tiranë nuk ka lënë pa theksuar faktin negativ se ato përqendrohen, në masë të madhe, mbi punën e pakualifikuar dhe produktet e shfrytëzimit intensiv të burimeve natyrore të vendit. Njëkohësisht, Nuamah nuk ka vënë në dukje se qeveria duhet të marrë masa që sektori i turizmit, i cili përfaqëson një potencial të fuqishëm për vendin, të mos cënojë pasuritë natyrore dhe kulturore të Shqipërisë.
"Shqipëria hyn ndër vendet me papunësi të lartë, ndërkohë që taksat ende të larta mbi punonjësit frenojnë zhvillimin me ritme më të shpejta të biznesit. Shpesh cilësia e reformave dëmtohet nga politizimi i tyre, po aq sa edhe nga mungesa e aftësive. Megjithë këto sfida, Shqipëria dekadën e fundit ka bërë shumë për të rritur të ardhurat dhe për të ulur varfërinë" deklaroi shefja e misionit të Bankës Botërore.
Deklaratat e zyrës së BB në Tiranë vijnë në një moment kur statistikat "rozë" të qeverisë, publikohen me mburrje nga ministra të ndryshëm, duke filluar që nga infrastruktura, turizmi dhe deri tek eksportet.
Përgjigju Duke Cituar
Postuar më parë nga 2043
Krijoni Kontakt