"Dosja e zezë" e mjekësisë, rastet ku akuzohen bluzat e bardha
Aulona KADILLARI
Kanë si profesion shërimin e pacientëve, por në disa raste jo vetëm e kanë neglizhuar këtë, por kanë bërë të kundërtën. Familjarë, drejtues institucionesh, por edhe gazetarë të ndryshëm kanë hedhur akuza dhe dyshime të paktën në 50 raste kur mjekët janë autorë të një neglizhencë që ka sjellë vdekjen e pacientëve. Por, çuditërisht, rastet kur ata janë shpallur fajtorë janë shumë, shumë të rralla. Gazeta "Tirana Observer" ka publikuar rastet më tipike, të cilat janë denoncuar tek Urdhri i Mjekut, në media dhe në prokurori, por që as Ministria e Shëndetësisë dhe as institucionet e tjera nuk kanë qenë aktive në këtë drejtim. Aktualisht kemi vetëm një akuzë që është shënuar në kapitujt e Kodit Penal, ku thuhet shprehimisht, "mjekim i pakujdesshëm me pasojë vdekjen e pacientit rrezikon nga gjobë deri në pesë vjet burg".
Mjekët e dënuar
Deri më sot ne kemi të dënuar vetëm një mjek të spitalit të Elbasanit me gjobë prej 1500 lekë të rinj. Një ironi ndryshe nga ajo që është në realitet në spitalet tona, ku mjekimi në vend të shërojë, është kthyer në një vrasës. Një vrasës që mund të quhet i veshur me bluzë të bardhë. Me dashje apo pa dashje, një pakujdesi e vogël e mjekut kundrejt pacientit iu ka marrë jetën njëherësh dy personave. Njërit prej tyre edhe pa ardhur mirë në jetë, pa e shijuar sado pak dritën e diellit. E, për ironi të fatit, foshnjën nuk e ka lënë vetëm as nëna, e cila nga një neglizhencë e mjekut ka gjetur vdekjen. Edhe pse dosjet në prokurori janë hapur, një ekspertizë e po një tjetër mjeku nuk nxjerr asnjëherë fajtor kolegun e tij.
Rastet
Në pamje të parë duken të rralla dhe se kanë ndodhur në vite të ndryshme, por të gjitha kanë marrë një ose dy jetë. Për një gabim njerëzor apo për një neglizhencë kohore nga mjeku ka sjellë pasojën e vdekjes së pacientit, pse jo edhe të fëmijës. Këto raste nuk kanë moshë, por nëse do të shikojmë me vëmendje, numrin më të madh e zënë nënat shtatzëna. Duke filluar nga prilli i vitit 1998, ku drejtues të maternitetit të Tiranës do të dërgonin në varreza tetë arkivole, të cilët kishin në brendësi fëmijë që kishin vdekur. Por gjatë transportit për në varreza është zbuluar se arkivolet nuk kishin asnjë trup dhe se fëmijët që mendoheshin të vdekur janë trafikuar për transplantim organesh. Për këtë arsye, Prokuroria e Tiranës fillon hetimin ndaj mjekëve se ku ka kanë shkuar tetë foshnje të sapolindura. E vazhdon, duke ardhur në ditët e sotme të vdekjeve të nënave shtatzëna apo edhe të personave me poste në shoqëri.
Mjekësia Ligjore, vendi që tregon arsyet e vdekjes së pacientit
"Këtu është vendi ku vdekja punon për jetën". Ky është postulati që është vendosur në godinën e Mjekësisë Ligjore. Mund të duket i çuditshëm, por nëse do të mendojmë mirë, kjo është e vërtetë. Pasi është pikërisht autopsia e kufomave që ai ka nxjerrë në dritë faktet dhe që vë në pranga autorë vrasjesh, porse ende nuk ka vënë përpara përgjegjësive bluzat e bardha, të cilat kanë një mal me akuza mbi supe për vdekje pacientësh. Në këtë institucion punojnë një numër i konsiderueshëm mjekësh ligjorë, të cilët bëjnë ekzaminime kufomash. Kështu, përfundimi i ekspertizës tregon arsyen e vërtetë të vdekjes, ku më pas kjo sjell edhe motivin e saktë që mund të ketë shkaktuar vdekjen. Kështu, rezultati i autopsisë tregon se cili është shkaku i vdekjes së një personi.
Vdes studentja në rrethana misterioze, akuza mjekëve
Vdes në rrethana misterioze studentja nga Vlora, prindërit akuzojnë mjekët. Dajena Sharkaj ka gjetur vdekjen në maternitetin "Koço Gliozheni" në Tiranë, në fund të marsit. Pasi ka marrë mjekimin e parë në spitalin e Vlorës, mjekët e këtij institucioni duke parë gjendjen e rënduar të 21-vjeçares shtatzënë e kanë dërguar në kryeqytet. Por mesa duket studentja e vitit të tretë nuk ka mundur që të mbijetojë së bashku me fëmijën disa muajsh. Por menjëherë pas kësaj tragjedie, prindërit kanë përpiluar një kallëzim penal, duke akuzuar mjekët për mjekim të pakujdesshëm. Burime nga Prokuroria e Përgjithshme bënë të ditur për gazetën "Tirana Observer" se, vdekja e studentes nga qyteti bregdetar ka vënë sërish në akuzë bluzat e bardha. Të njëjtat burime bënë të ditur se, babai i 21-vjeçares ka denoncuar në Prokurorinë e Tiranës mjekët të cilët kanë çuar në vdekje vajzën e tij të vetme. Ndërkohë, sipas organit të akuzës, kjo dosje do të transferohet në Prokurorinë e Vlorës, pasi kanë qenë mjekët e këtij qyteti ata që kanë bërë mjekimin e vajzës shtatzënë.
Denoncimi
Për familjen Sharkaj nga Vlora, Dajena ishte fëmija i vetëm i familjes, pasi dy fëmijët e tjerë kishin vdekur vite më parë. 21-vjeçarja, studente e vitit të tretë në fakultetin e qytetit bregdetar, kishte disa kohë që ishte fejuar. Fryti i dashurisë ishte kurorëzuar me një fëmijë, i cili do të vinte në jetë prej disa muajsh. Kështu, shqetësimet e para të shtatzënisë së vajzës kanë bërë që kjo e fundit të shkojë në një klinikë private për të bërë analizat dhe për t'u vizituar. Sipas organit qendror të akuzës, 21-vjeçarja kishte shkuar disa herë në këtë klinikë private, ku mjekja që e kishte nën vëzhgim i kishte thënë se gjithçka ishte në rregull, por duhet të shikonte edhe gjendjen e fëmijës. Të njëjtat burime pohojnë se, pasi mjekja e kishte vizituar duhet që të merrte nga barku i nënës me shiringë për të bërë më pas analizat të cilat do të tregonin gjendjen e fëmijës. Por pas vizitës studentja ishte ndjerë keq dhe familjarët e kishin dërguar menjëherë në spitalin e Vlorës. Mjekët e këtij institucioni duke parë gjendjen e rënduar të vajzës shtatzënë vendosën ta dërgonin për në spitalin e Tiranës. Por mundimi ka qenë i kot, pasi kur Sharkaj ka mbërritur në maternitetin "Koço Gliozheni" ka gjetur vdekjen e menjëhershme.
Misteri
Përveç vdekjes, asnjë gjë nuk është e sigurt për familjarët e Dajena Sharkaj. Gjithçka që ka kaluar dhe ajo që vjen për ta është mister. Këtë mister ata kanë dashur që ta zgjidhin duke denoncuar në prokurori mjekët që kanë kuruar vajzën e tyre shtatzënë. Por do të jetë prokuroria ajo që do të vendosë fajtorin e vdekjes së 21-vjeçares, studente e vitit të tretë.
Kodi Penal, Neni 96 Mjekimi i pakujdesshëm
Mjekimi i pakujdesshëm i të sëmurëve nga ana e mjekut ose e personelit tjetër mjekësor, si dhe moszbatimi i terapisë ose i porosive të mjekut nga personeli mjekësor apo farmacist, kur ka shkaktuar dëmtimin e rëndë të shëndetit, ka rrezikuar jetën e personit ose ka shkaktuar vdekjen e tij, dënohet me gjobë ose me burgim gjer në pesë vjet. Po kjo vepër, kur ka shkaktuar infektimin e të sëmurëve me infeksionin HIV/AIDS, dënohet me burgim nga tre gjer në shtatë vjet.
Specialistët: Ku gabojnë mjekët
Diagnostikimi dhe mjekimi janë dy fazat kryesore në të cilat vihen re pasojat e pakujdesisë së mjekëve. Ato shprehen në formën e vetëbesimit të tepruar ose të neglizhencës. Sipas ekspertëve, në fazën e diagnostikimit, duke filluar nga anamneza, janë konstatuar shkelje në drejtim të marrjes dhe të pasqyrimit të saj. Ekzaminimi objektiv në mjaft raste ka qenë i përciptë dhe nuk është kryer në mënyrë sistematike. Kështu, në përshkrimet e kartelave kanë munguar shumë të dhëna apo nuk janë regjistruar fare tensioni arterial, as pulsi, shpeshtësia e frymëmarrjes, etj. Sipas ekspertëve, disa herë nuk janë kryer analizat e ndryshme laboratorike më të domosdoshmet si ajo e urinës, gjak, glicemia. Madje nuk janë kryer edhe analiza të tjera si EKG në sëmundjet e zemrës dhe EEG në patologjitë cerebrale.
Fakte nga ngjarja
¨ Dajena Sharkaj ishte 21 vjeç dhe banonte në qytetin e Vlorës.
¨ Ajo jetonte me familjen e saj në një nga lagjet e qytetit bregdetar.
¨ Ajo studionte në Universitetin e Vlorës në vitin e tretë.
¨ Studentja 21-vjeçare ishte e fejuar.
¨ Dajena Sharkaj pas disa muajsh do të bëhej nënë e një fëmije.
¨ Shqetësimet në muajin e parë të shtatëzanisë "detyrojnë" atë të bëjë analiza.
¨ 21-vjeçarja shkon në një klinikë private në qytetin e Vlorës për të bërë analizat.
¨ Pas vizitës mjekja e klinikës i thotë se gjithçka është në rregull, por duhet të shohë edhe shëndetin e fëmijës.
¨ Sezoni i provimeve bëri që Dajena t'i kushtojë më shumë rëndësi mësimeve dhe të shkojë disa kohë më vonë te mjekja.
¨ Mjekja me anë të një shiringe duhet të shohë fëmijën, por pasi e ka shpuar 21-vjeçaren katër herë, nuk ka arritur të marrë pjesën e duhur për të parë gjendjen e fëmijës.
¨ Studentja e vitit të tretë shkon në shtëpi dhe në orët e vona të darkës gjendja e saj shëndetësore përkeqësohet .
¨ Familjarët e çojnë në spitalin e Vlorës, por mjekët e këtij spitali duke parë gjendjen e rëndë të vajzës e sjellin në Tiranë në maternitetin "Koço Gliozheni".
¨ Në maternitetin "Koço Gliozheni" në Tiranë 21-vjeçarja nga Vlora, pas disa orësh që ka mbërritur gjen vdekjen.
¨ Në maternitetin e kryeqytetit studentes i bëhet ekspertiza, nga mjekë të këtij spitali.
¨ Prindërit e saj denoncojnë në prokurori mjekët që kanë kuruar vajzën e tyre.
¨ Akuza që është shkruar në kallëzim është "mjekim i pakujdesshëm".
Tirana Observer
Krijoni Kontakt