Ndahet nga jeta regjisori Gezim Erebara

[krispi]

U nda nga jeta një tjetër emër i madh i kinematografisë shqiptare. Dje në mesditë, në moshën 79- vjeçare, vdiq regjisori i njohur Gëzim Erebara. Realizues i disa filmave që kanë mbetur në fondin e artë të filmave shqiptarë si "Vajzat me kordele të kuqe", apo "Pylli i lirisë", Erebara krijoi një profil të veçantë në kinematografinë shqiptare. Gëzim Erebara lindi në 19 maj të vitit 1929 në Dibër. Mbasi mbaron studimet e mesme, në vitin 1948 shkoi për studime në Çeki, ku nisi studimet për regjisurë në Akademinë FAMU në Pragë, pa arritur t'i përfundojë ato. U kthye në Shqipëri në vitin 1952 dhe për një periudhë të gjatë nuk pati mundësi të firmoste ndonjë film artistik. Në vitin 1957 filloi punë pranë Kinostudios "Shqipëria e re" si regjisor e skenarist. Për rreth 30 vjet punoi në Kinostudio, duke realizuar disa filma artistikë dhe dokumentarë, madje në disa syresh është edhe skenarist njëkohësisht.

Pas një përvoje si asistent regjisor në filmat "Tana", "Furtuna" dhe "Debatik", realizon më në fund filmin e tij të parë në vitin 1967, "Ngadhnjim mbi vdekjen" së bashku me regjisorin Piro Milkani. Një film ky që nuk u prit mirë nga drejtuesit e lartë, gjë që çoi në ndalimin e tij. Më pas realizon edhe dhjetë filma të tjerë, ku filmi i tij i fundit i përket vitit 1986. bëhet fjalë pikërisht për "Një jetë më shumë". Ndër filmat e tij më të mirë numërohen "Në fillim të verës", fitues i disa çmimeve në Festivalin e Filmit, "Vajzat me kordele të kuqe", "Një natë pa dritë", "Pylli i lirisë", "Fushë e blertë-fushë e kuqe", etj., ku ka bashkëpunuar me aktorë të mëdhenj që nga Sandër prosi, Drita Pelinku, Marjeta Ljarja, etj. Filmat e tij dallohen nga thjeshtësia e paraqitjës së subjektit, karakteri popullor, ku nuk mungojnë batutat, që janë ngulitur në mendjen e publikut. Kinoregjisori Gëzim Erebara është edhe autori i mjaft filmave dekumentarë. Ndër ta mund të përmendim "Migjeni" (1961),"Gjirokastra" (1962), "Vangjush Mio" (1965), "Ndre Mjeda" (1962), "Ata quheshin Arbër" (1973), etj. Gëzim Erebara ka dhënë një kontribut të veçantë në fushën e publicistikës. Ai ka botuar me dhjetëra artikuj në organet e shtypit, ku ka dhënë mendimin e tij profesional, duke bërë kritikën dhe njëkohësisht analiza për vepra të veçanta. Gëzim Erebara është vlerësuar me disa çmime, si dhe mban titullin "Artist i Merituar". Veç të tjerash ai do kujtohet edhe në fushën e përkthimit. Falë shqipërimit të tij nga çekishtja, lexuesi shqiptar ka në duar një nga kryeveprat e letërsisë botërore "Ushtari i mirë Shvejk" i autorit Jarosllav Hacek. Gëzim Erebara do të përcillet për në banesën e fundit sot në orën 15.00.

a. mile

Filma artistikë:

1961 "Debatik"

1967: "Ngadhnjim mbi vdekjen",

1970: "Guximtarët",

1975: "Në fillim të verës",

1976: "Pylli i lirisë"

1978: "Vajzat me kordele të kuqe",

1979: "Përtej mureve të gurta",

1980: "Nusja"

1981: "Një natë pa dritë",

1984: "Fushë e blertë-fushë e kuqe",

1986: "Një jetë më shumë", etj.

Dokumentarë:

"Migjeni" (1961),

"Gjirokastra" (1962),

"Vangjush Mio" (1965),

"Ndre Mjeda" (1962),

"Ata quheshin Arbër" (1973), etj.

[Eagle]

i nderuar qofte kujtimi i tij!

kush ka ndonje foto ta sjelle, sepse me shume po shofim e po vajtojme emra si anne nich. smith, sesa njerezit tane te artit. duket dhe nga komentet e shumta ne kete teme.

nuk e dija qe paska perkthyer Shvejkun. dyfish respekt.

falemnderit krispi