Studimi, mbi 50% e ushqimeve, të ndotura mikrobiologjikisht

[iliria e para]

Produkte ushqimore aspak të sigurta, madje tepër të rrezikshme për shëndetin, për shkak të ndotjes tej normave të lejuara nga ana mikrobiologjike. Ky është rezultati i studimit të fundit nga Instituti i Shëndetit Publik, që kanë marrë në analizë rreth 850 mostra nga ushqime dhe lëngje të ndryshme. Sipas specialistëve, shumë produkte, nga rezultatet e kontrollit mikrobiologjik, rezultojnë të ndotura mbi 50 për qind mbi normën e lejuar.

Kontrolli

Qumështi, mielli me nënproduktet e tij, mishi dhe uji, kanë qenë në shënjestër të kontrollit nga specialistët e Shëndetit Publik. Kështu, nga rezultatet e kontrollit mikrobiologjik, qumështi ka rezultuar i ndotur mbi normën e lejuar, në rreth 49 për qind të rasteve. Ndërsa kontrolli ka treguar se kosi është akoma më problematik, pasi në mostrat e marra në analizë, ndotja mikrobiologjike ka qenë 60 për qind. "Kjo tregon se situata është shumë problematike, pasi qumështi dhe kosi janë produkte që konsumohen shumë nga popullata dhe rreziku është i pranishëm, nëse vetë konsumatori nuk tregon kujdes",- theksojnë specialistët, duke shtuar se këto produkte duhet të blihen vetëm pranë subjekteve, që janë të licencuar për ta tregtuar atë dhe që janë në vëzhgim të vazhdueshëm nga Inspektorati. Ndërkohë problematik, sipas kontrollit, ka rezultuar edhe mielli me nënproduktet e tij, pasi në mostrat e analizuara, ndotja mikrobiologjike ka rezultuar në masën 30 për qind. Jo më pak shqetësuese ka rezultuar nga analizat edhe sallami, në të cilin përqindja e ndotjes mikrobiologjike ka qenë më e vogël, vetëm në 7 për qind të mostrave të analizuara. Por, pavarësisht kësaj, specialistët pohojnë se kjo nuk do të thotë se shëndeti i konsumatorëve nuk është në rrezik. "Salmonela, E.Coli tek uji, myqet dhe Shigelat, janë disa nga mikrobet e gjetura dendur në shumicën e produkteve",- theksojnë specialistët.

Alarm, uji i ambalazhuar

Të shpenzosh më shumë, me shpresën se do të konsumosh një produkt më të sigurt, por në realitet "përfitimi" është vetëm grumbull mikrobesh që notojnë në organizmin e njeriut. Sipas studimit, uji i ambalazhuar është produkti më i ndotur dhe fatkeqësisht edhe më i konsumuari nga popullata. Kështu, niveli i ndotjes mikrobiologjike në këtë produkt është në masën rreth 75 për qind të mostrave të analizuara, ç'ka përbën sipas specialistëve, një situatë më shumë se problematike. "Uji është produkti që konsumohet në masë nga njerëzit, ndaj dhe problemi është gjithnjë evident për të gjithë",- pohojnë specialistët. Ndërkohë, po sipas kontrollit, edhe lëngjet e frutave kanë rezultuar të ndotura mikrobiologjikisht, në rreth 20 për qind të mostrave të analizuara.

Sëmundjet

Bruceloza e Hepatiti, rëndom edhe verdhëza, për shkak të ujit të ndotur, janë sëmundje të tjera që pasqyrojnë shifra të larta të rasteve të raportuara dhe kjo, falë produkteve të ndotura tej normave të lejuara. Sipas specialistëve, sëmundjet me origjinë ushqimore janë një nga shkaqet kryesore të sëmundshmërisë në vendet e zhvilluara dhe në ato në zhvillim, ku përveç globalizimit të tregut, ka ndikuar edhe rritja e konsumit jashtë shtëpisë. Kështu, helmime nga ushqimet, sipas mjekëve, shënohen çdo ditë. Por krahas këtyre, specialistët theksojnë se një varg tjetër sëmundjesh, si tifo, salmonelë, brucelozë e të tjera,, janë shfaqur nga produktet ushqimore apo uji, cilësuar prej tyre larg normave të lejuara për konsumim. Të njëjtat burime, pohojnë se helmimet ushqimore me natyrë mikrobike kanë qenë shpesh si pasojë e mungesës së respektimit të normave higjienike të mbrojtjes së produkteve ushqimore. "Bruceloza e Hepatiti, rëndom verdhëza, janë sëmundje të tjera, që pasqyrojnë shifra të larta të rasteve të raportuara".

45%

të mostrave të analizuara të qumështit, kanë rezultuar të ndotura mikrobiologjikisht tej normave të lejuara

60%

të mostrave të analizuara të kosit, kanë rezultuar të ndotura mikrobiologjikisht tej normave të lejuara

30%

të mostrave të analizuar atë miellit kanë rezultuara të ndotura mikrobiologjikisht tej normave të lejuara

75%

të mostrave të analizuara të ujit të ambalazhuar, kanë rezultuar të ndotura mikrobiologjikisht tej normave

Toksikologjia, rreth 15 të helmuar në ditë

Shërbimi i Toksikologjisë pranë Spitalit Ushtarak, është njëri nga shërbimet spitalore që pret çdo ditë, mesatarisht 15 persona të helmuar nga produktet ushqimore. Sipas mjekëve të këtij shërbimi, në shumë raste, pacientët janë paraqitur për ndihmë mjekësore në gjendje shumë të rëndë shëndetësore, ku është dashur ndërhyrja e mjekëve specialistë, për të bërë të mundur shpëtimin e tyre. Ndërkohë, mjekët e Ushtarakut pohojnë se situata bëhet akoma më problematike në raste festash, pasi pacientët ushqimet e konsumuara nëpër lokale të ndryshme, nuk janë brenda standardeve. "Ajo ç'ka është vërtet shqetësuese, është fakti se mjekët këtu përballen edhe me persona që kanë pësuar dëme të rënda shëndetësore, për shkak të pijeve alkoolike. Një fatkeqësi e tillë ndodh, jo vetëm nga cilësia e keqe e pijeve që konsumojnë, por edhe nga sasi e madhe e këtyre pijeve",- theksojnë mjekët. Megjithatë, ata pohojnë se përveç shifrave të deklaruara të helmuarish nga konsumimi i ushqimeve jashtë standardit, mbeten edhe shumë raste që kalohen në kushte shtëpiake apo nuk raportohen. E këto, sipas tyre, mund të jenë pafundësisht shumë. "Sëmundjet e shkaktuara nga ndotja mikrobiologjike e ushqimeve, mbeten ndër problemet më të rëndësishme të Shëndetit Publik",- pohojnë mjekët.

Shekulli
Eglantina Bardhi
25-01-2007

[YaSmiN]

Sa do hapja nje teme per kete.Ketu ne Greqi eshte hapur nje teme e madhe per kete gje qe i cojne ushqime te tilla neper spitale edhe anije turistike.Mendo ne Shqiperi qe kontrolli nuk eshte aq i mundesishem.Thjesht doja te beja nje pyetje kush e merr persiper kete ceshtje?Kush organizat shteterore duhet te beji nje kontroll te plote neper dyqane.