Zhduken në mënyrë të mistershme 3 pakistanezë në Tiranë. Që nga 23 dhjetori, Ghanzafar Abbas, Ehsan Elahi dhe Ahmed Shahzad, anëtarë të një delegacioni të Sindikatës së Trasporteve të Pakistanit janë zhdukur pa asnjë gjurmë në Tiranë. Lajmi bëhet i ditur jo vetëm nga organet e policisë, por edhe nga kryetari i Sindikatave të Pavarura të Shqipërisë, Gëzim Qato, me ftesën e të cilit pakistanezën kanë vizituar Shqipërinë. Tre prej anëtarëve të delegacionit nuk janë parë që prej mbrëmjes së 22 dhjetorit. Pas aktivitetit të organizuar nga sindikata e drejtuar prej Qatos, pakistanezët i janë drejtuar hotelit, por duket se nuk janë parë më as nga kolegët e tyre e as nga personeli i hotelit. Megjithëse tre pakistanezët nën moshën 25 vjeç nuk kanë pasur me vete pasaportat dhe biletat e udhëtimit, duket se ky fakt nuk i ka penguar ata të largohen nga hoteli. Denoncimi për zhdukjen e tyre është bërë në komisariatit numër 3 mëngjesin e 23 dhjetorit.
Zhdukja
Rreth orës 22:00 të mbrëmjes së premte, Ghanzafar Abbas, Ehsan Elahi dhe Ahmed Shahzad, tre të rinjtë pakistanezë kanë dalë nga hoteli prej ku qëndronin që nga data 20 dhjetor, për të mos u kthyer më. Gjatë natës, askush nuk ka vënë re mungesën e anëtarëve të delegacionit, për të cilët nuk ka asnjë informacion që prej 3 ditësh. Sipas denoncuesit të kësaj zhdukjeje, Gëzim Qatos, tre pakistanezët nuk kanë pasur me vete asnjë dokument identifikimi, madje shton se është paralajmëruar për rrezikshmërinë e tyre që në aeroportin e Rinasit. “Një natë më parë, më kërkuan të shtyja edhe një ditë qëndrimin e tyre në Shqipëri. Kjo më bëri që t’iu marr jo vetëm pasaportat, por edhe biletat e udhëtimit”,-thotë Qato i cili sapo ka konstatuar zhdukjen e tyre ka denoncuar në polici. Ndërsa burimet e policisë thonë se deri më tani nuk kanë asnjë të dhënë mbi vendndodhjen e pakistanezëve, por shpresohet që ende të mos kenë kaluar kufirin. Burime të policisë thonë se janë thirrur për të dëshmuar jo vetëm krerët e sindikatës shqiptare, por edhe anëtarët e mbetur të delegacionit pakistanez, të cilët kanë qenë personat e fundit që kanë parë tre të “zhdukurit”.
Kërkimet
Fill pas marrjes së denoncimit, drejtues të komisariatit numër 3 të Tiranës, por edhe agjentë të Antiterrorit dhe SHISH janë vënë në alarm për gjetjen e pakistanezëve. Burime të policisë thonë për “Shekullin” se dyshohet që pakistanezët të kenë përdorur Shqipërinë si vend trazit për të emigruar në shtetet evropiane, ndërkohë që edhe vizita e tyre në Tiranë është e mbuluar me mister. Nuk është lënë jashtë hetimit edhe dyshimi për lidhjen e këtyre personave me elementë terroristë, por asgjë nuk është zbuluar në këtë drejtim. Gjatë dy ditëve të fundit, hetuesit e çështjes kanë ushtruar kontrolle në vende ku dyshohej se mund të ndodheshin pakistanezët, por edhe në pikat e kalimit kufitar. Sipas verifikimeve të kryera tek këto të fundit rezulton se 3 shtetasit nga Pakistani ndodhen ende në vendin tonë. Gjashtë pakistanezëve iu ka mjaftuar vetëm një faks në zyrën e Sindikatës së Pavarur të Trasporteve për të ardhur në Shqipëri. Madje, është vetë Sindikata e cila jo vetëm ka ndërmjetësuar për pajisjen me viza të delegacionit, por ka marrë përsipër edhe të gjitha shpenzimet e vizitës së tyre në Shqipëri.
Përgjigju Duke Cituar
Postuar më parë nga WALCHIRIA
Krijoni Kontakt