"Llogari speciale" ilegale jashte buxhetit 2006

[Humdinger]

"Llogari speciale" ilegale jashte buxhetit 2006

Data e Publikimit: 15/12/2006

Autori i Lajmit:
Alban Beqa
Tirane- Kuvendi i Shqipërisë ka miratuar Aktin Normativ antikushtetues "Për disa ndryshime në ligjin Nr.9464, datë 28.12.2005, Për buxhetin e shtetit për vitin 2006, të ndryshuar". Përvecse i konceptuar në kundërshtim me Kushtetutën përsa i përket urgjencës së fondeve që parashikon të përdoren, ai ka dhe një element tjetër antiligjor. Neni 5 i këtij Akti bie në kundërshtim me ligjin organik të buxhetit Nr.8379 datë 29.7.1998 "Për hartimin dhe zbatimin e buxhetit të shtetit të Republikës së Shqipërisë". Në këtë Nen në fund të tij është përfshirë gjoja si pa dashje paragrafi "Shpenzimet e pakryera në fund të vitit buxhetor transferohen në një llogari speciale si transfertë kapitale për t'u përdorur të transferohen në një llogari speciale si transfertë kapitale për t'u përdorur për shpronësimet". Aq e diskutuara Llogari Speciale jashtë buxhetit të shtetit të një viti nuk mund të miratohet sipas specialistëve me një Akt Normativ duke shkelur një ligj që miratohet me 3/5 e Kuvendit pasi ka rëndësinë e një Kodi. Ligji organik i buxhetit i vitit 1998 nuk e parashikon krijimin e një Llogari Speciale të konceptuar si një transfertë kapitale nga një periudhë kohore në një tjetër ose jashtë fondit të konsoliduar të një institucioni të miratuar me ligj. Duket se, qeveria e gjendur në vështirësi për realizimin e shpenzimeve të planifikuara në buxhetin e shtetit për vitin 2006 dhe keqadministrimin e tij në përgjithësi po tenton që gjejë rrugë të reja qoftë edhe antiligjore për të harxhuar fondet e parashikuara për investime. Pardje, qeveria miratoi një vendim në zbatim të këtij Akti Normativ antiligjor megjithëse nuk kanë kaluar 5 ditë nga hyrja në fuqi për shpronësimin e pronarëve që preken nga rruga Milot - Rreshen. Në pikën 4 të këtij vendimi thuhet ndër të tjera se, "320 460 836 (treqind e njëzet milionë e katërqind e gjashtëdhjetë mijë e tetëqind e tridhjetë e gjashtë) lekë, nga "Llogaria speciale", e krijuar si transfertë kapitale, për t'u përdorur për shpronësimet".


Kuvendi miraton Akt Normativ antiligjor

Tirane- Akti Normativ është i konceptuar me element joligjorë dhe keqpërdorues. Kushtetuta në nenin 101 qartëson përdorimin e kufizuar të aktit normative në të gjithë veprimtarinë ligjvënëse të qeverisë dhe aq më shumë të buxhetit të shtetit. Në Nenin 101 të Kushtetutës thuhet: "Këshilli i Ministrave në rast nevoje dhe urgjence, nën përgjegjësinë e tij mund të nxjerrë akte normative që kanë fuqinë e ligjit për marrjen e masave të përkohshme". Në rastin konkret nuk kishte asnjë urgjencë për të rialokuar 5.5 miliardë lekë, ose 4.5 miliardë lekë për investime publike në infrastrukturë për vetëm 30 ditë. Më e keqja është se me anë këtij Akti, qeveria rrit parapagesat për punime të pakryera sic është rasti i rrugës Rreshen Kalimash, merr borxh publik me një kosto të konsiderueshme dhe bëhet kreditore e firmave të ndryshme duke i paguar për punë të pakryera.

Ja vendimi i parë në zbatim të Aktit Normativ antiligjor

1. Shpronësimin, për interes publik, të pronarëve të pasurive të paluajtshme, pronë private, që preken nga ndërtimi i segmentit rrugor Milot-Rrëshen, pjesë e korridorit Durrës-Morinë.
2. Shpronësimi të bëhet në favor të Drejtorisë së Përgjithshme të Rrugëve.
3. Pronarët e pasurive të paluajtshme, që shpronësohen, të kompensohen në vlerë të plotë, sipas masës përkatëse, që paraqitet në tabelën, që i bashkëlidhet këtij vendimi, dhe është pjesë përbërëse e tij, për sipërfaqen 165 911 m2 , tokë arë, të vlerësuar me çmimin 600 lekë/ m2 , për kategorinë e pestë, dhe 900 lekë/ m2 , për kategorinë e tretë dhe të katërt, me vlerë 147 082 500 (njëqind e dyzet e shtatë milionë e tetëdhjetë e dy mijë e pesëqind) lekë, për sipërfaqen 38 952 m2 , tokë truall, me çmimin 1 500 lekë/ m2 , me vlerë 58 428 000 ( pesëdhjetë e tetë milionë e katërqind e njëzet e tetë mijë) lekë, objekte, me vlerë të përgjithshme 174 165 661(njëqind e shtatëdhjetë e katër milionë e njëqind e gjashtëdhjetë e pesë mijë e gjashtëqind e gjashtëdhjetë e një) lekë, kultura bujqësore dhe drufrutorë, me vlerë 20 784 675 (njëzet milionë e shtatëqind e tetëdhjetë e katër mijë e gjashtëqind e shtatëdhjetë e pesë) lekë, me një vlerë të përgjithshme shpronësimi prej 400 460 836 (katër qind milionë e katërqind e gjashtëdhjetë mijë e tetëqind e tridhjetë e gjashtë) lekësh.
4. Vlera e përgjithshme e shpronësimit, prej 400 460 836 (katërqind milionë e katërqind e gjashtëdhjetë mijë e tetëqind e tridhjetë e gjashtë) lekësh, të përballohet:
- 80 000 000 (tetëdhjetë milionë) lekë nga buxheti i vitit 2006, zëri "Shpronësime", i miratuar për Ministrinë e Punëve Publike, Transportit dhe Telekomunikacionit.;
- 320 460 836 (treqind e njëzet milionë e katërqind e gjashtëdhjetë mijë e tetëqind e tridhjetë e gjashtë) lekë, nga "Llogaria speciale", e krijuar si transfertë kapitale, për t'u përdorur për shpronësimet.