Takimi ndermjet Papa Benedikti XVI dhe kryepeshkopit te Greqise Kristodulos

[NoName]

Sot paradite në Vatikan - takimi historik ndërmjet Benediktit XVI dhe kryepeshkopit ortodoks të Athinës dhe gjithë Greqisë, Kristodulos

(14.12.2006)

Benedikti XVI e priti me gëzim të madh Kryepeshkopin Kristodulos, i cili iu përgjigj me të njëjtat ndjenja, për të shkëmbyer më pas “puthjen vëllazërore të dashurisë së krishterë”, duke nisur kështu një etapë të re në rrugën e përbashkët për përballimin e problemeve të botës së sotme. Para se të hynin në sallën e bibliotekës të Pallatit Apostolik, Benedikti XVI dhe Kryepeshkopi Kristodulos shkëmbyen një përqafim dhe i shtrënguan fort duart njëri-tjetrit:

“Sot marrëdhëniet tona rifillojnë me ngadalë, duke pasur thellësisht kujdes për vërtetësi – tha Papa – dhe në vijim kujtoi vizitën e paharrueshme të Gjon Palit II në Athinë, gjatë shtegtimit të tij ndër gjurmët e Shën Palit në maj të vitit 2001, gjë që shënoi një etapë themelore për bashkëpunimin progresiv kulturor e baritor.
Më pas Benedikti XVI u bëri thirrje katolikëve dhe ortodoksëve të japin kontributin e tyre kulturor e sidomos shpirtëror për të mbrojtur rrënjët e krishtera të Evropës:

“Rrënjë që e kanë formuar Evropën në rrjedhë shekujsh, duke i krijuar traditës së krishterë kushtet e nevojshme për të mbrojtur njeriun e për të respektuar pakicat e duke shmangur homologimin kulturor, që do të krijonte rrezikun për humbjen e pasurive të mëdha të qytetërimit. Evropa nuk mund të jetë vetëm realitet ekonomik – tha Papa. Të krishterët e vendeve të Bashkimit Evropian duhet t’i përballojnë së bashku rreziqet e reja: shekullarizimin në rritje, relativizmin e nihilizmin, që i hapin rrugën sjelljeve e deri ligjeve të cilat kërcënojnë dinjitetin e paprekshëm të njerëzve dhe venë në diskutim institucione themelore, siç është ai i martesës.

Shumë i shqetësuar edhe kryepeshkopi Kristodulos nga gjithçka kërcënon vlerat dhe strukturat e qytetërimit evropian, të frymëzuar thellësisht nga feja e krishterë e posaçërisht nga:

…rryma që kërkon çkrishterizimin e Kontinentit evropian, që synon përjashtimin e Kishës nga jeta publike dhe mënjanimin e saj të plotë shoqëror”. Pas dy fjalimeve, çasti emocionant, në të cilin Benedikti XVI dhe Kryepeshkopi Kristodulos vunë firmat në fund të Deklaratës së përbashkët, përmes së cilës impenjohen t’i kapërcejnë me dashuri vështirësitë e shumta dhe përvojat e dhimbshme të së kaluarës, të vetëdijshëm për detyrën e përbashkët të ecjes në rrugën e dialogut në vertetësi, për të rivendosur kështu bashkimin e plotë të të krishterëve. Që këtu lind nevoja për thellimin e dialogut teologjik ndërtimtar, por edhe për forcimin e dialogut ndërfetar. Ndërmjet 12 pikave të Deklaratës, theksohet edhe urgjenca për t’iu përgjigjur sfidave të kohës, posaçërisht sfidave etike të krijuara nga përparimi i shkencave dhe sfidës që ka të bëjë me respektimin e karakterit të shenjtë të njeriut në të gjitha fazat e jetës. Vihet, pastaj, theksi, mbi mbrojtjen e të drejtave themelore në Evropë e në Botë, mbi detyrën e solidaritetit ndaj më të varfërve dhe të afirmimit të paqes. Benedikti XVI e Kryepeshkopi Kristodulos shprehin, në fund, dëshirën të bashkëpunojnë për zhvillimin e shoqërisë, në shërbim të njeriut e të popujve, duke dhënë dëshmi feje e shprese.

[NoName]

Vizita historike e kryepeshkopit të Athinës dhe gjithë Greqisë tek Papa


Sot pasdite arriti në Romë Primati i Kishës Ortodokse të Greqisë, kryepeshkopi i Athinës, Kristodulos. Nesër, takimi i shumpritur me Benediktin XVI dhe nënshkrimi i Deklaratës së përbashkët.

Është vizita e parë zyrtare që Fortlumturia e Tij Kristodulos i bën Papës dhe Kishës së Romës, që nga koha e skizmës së Lindjes.

Kryepeshkopi – paralajmëroi pak ditë më parë Salla vatikanase e Shtypit – do të pritet me dashuri vëllazërore kishtare e me nderimet që i takojnë rangut të tij si Primat i Kishës Ortodokse të Greqisë.

Kryepeshkopi grek ka qenë në Romë më 8 prill 2005 për salikimet e Gjon Palit II, me të cilin qe takuar në atdhe më 4 maj 2001, gjatë shtegtimit apostolik të Papës në gjurmët e Shën Palit. Asokohe Gjon Pali II pati shkuar në Aeropagun e Athinës ku, pas një kremtimi solemn, nënshkroi një Deklaratë të përbashkët me kryepeshkopin Kristodulos. Papa Vojtila qe pritur edhe në selinë e Sinodit të Shenjtë të Kishës Ortodokse të Greqisë.

Pastaj, tri vjet më vonë, me vendim të Sinodit ortodoks, kryepeshkopi Kristodulos e shtyu udhëtimin që do të bënte në Romë në vitin 2004, për t’i kthyer vizitën Gjon Palit II. Por megjithatë nuk munguan shkëmbimet e vizitave ndërmjet Sinodit të Shenjtë të Kishës Ortodokse të Greqisë dhe Këshillit Papnor për nxitjen e bashkimit të të krishterëve si dhe takime të tjera vëllazërore ndërmjet Kishës së Romës e Kishës Ortodokse të Greqisë. E tani, takimi i Papës me kryepeshkopin Kristodulos, vetëm dy javë pas përqafimit vëllazëror të Benediktit XVI me Patrikun Ekumenik Bartolomeun I në Turqi.

Menjëherë pas arritjes në Romë, Fortlumturia e Tij, kryepeshkopi Kristodulos mori pjesë në një drekë zyrtare, shtruar për t’i uruar mirëseardhjen nga Këshilli Papnor për nxitjen e bashkimit të të krishterëve. Më pas mori pjesë në kremtimin solemn në Bazilikën e Shën Palit jashtë Mureve të Romës, ku iu dorëzua një pjesë e zinxhirit të çmuar, me të cilin qe lidhur Apostulli i Popujve në burg, që ruhet në këtë Bazilikë.

Ndërsa nesër, takimi i shumpritur me Benediktin XVI dhe Deklarata e përbashkët.
Kryepeshkopi Kristodulos do të qëndrojë në Romë deri të shtunën e ardhshme më 16 dhjetor. Gjatë këtyre ditëve do të ketë takime të ndryshme në Vatikan dhe do të vizitojë qëndra të tjera fetare, ndërmjet të cilave, Kishën e Shën Teodorit Megalomartire, ku kremtohet liturgjia për bashkësinë greko-ortodokse të Romës dhe Varrin e Shën Qirilit në bazilikën e Shën Klementit. Të premten paradite kryepeshkopi Kristodulos do të marrë nga rektori i Universitetit Papnor Lateranens, imzot Rino Fizikela, një doktoratë honoris causa në të drejtën civile e kanonike.