KF Elbasani, "TIGRAT VERDH E BLU"

[episodestory]

Forca Cunat Verdh E Blu Te Elbasanit.
Edhe Kete Here E Treguan Veten E Tyre Duke Fituar Ne Fushen E Tyre Kunder Tiranes Me Rezultati 1-0.
Forca Cuna.

[spajkorrsi_uk]

Kete here Ben Lazes nuk i doli huq arroganca e parandeshjes, shyqyr te pakten. Me sa mora vesh nga komenti i radios e paskemi myt Tiranen me loje e megjithate prape per te deshiruar fakti qe duhej te hynte ne loje i sapoardhuri ne kampionatin tone Kaçi qe te kalonim ne avantazh. Jave mas jave, sulmi yne (Bejzade, Dalipi, Rizvanolli harrova ndonji tjeter ?) me duket se le shume per te deshiruar, sidomos ne ndeshjet percaktuese me ekipet e Tiranes. Ishalla e shtyjme dhe deri ne fund dhe te hapin syte per ndonji perforcim.

Disa here gjate komentit te ndeshjes degjohej kori i stadiumit qe lavderonte nga motra, here Tiranen, here Patushin e here arbitrin. Turp. Njehere bile dhe kur ishim ne avantazh 1-0, pra kur ishim kaluar. Dikush mund te thote qe keshtu behet ne cdo fushe ne Shqiperi, dhe atehere prape turp eshte. Thjesht tregojme qe jemi te pagdhendur. Ndermjet lojtareve dhe tifozeve nqs ndonjanit i lejohet ndonje xhest i teprum jane lojtaret, se vrapojne 90 minuta, ku pulsi vete me raste 200 e ca dhe truni mund te mos punoje ne menyre racionale. Plus qe dmth me sha Tiranen, ekipin e Tiranes ? Ke elbasanllinj ne cdo ekip te Tiranes. Qytetin e Tiranes? Ke kapitenin e ekipit tiranas. Golshenuesi me i mire i Elbasanit ka pas lujt me Partizanin deri para dy sezonesh. Ca kuptimi i ngel pastaj iniciatives me pru femra ne stadium. Nqs do te reagosh kunder nje lojtari, fershelleje mer vlla sa here te kapi top. Nuk po them qe shkallet e stadium te sillen si katedra universiteti po dreqi e mori minimumi i edukates duhet te ekzistoje.

Po mir mer lal ata ne Shqiperi akoma se kan kulturen Angleze apo Evropiane ka edhe kokrra qe bajne ashu me te shajtura.Biles kur kam qene ne Para dy vjetesh ne Elbasan pash nje ndeshje kot per kuriozitet ne stadium isha me nje shokun tim qe kishte ardh nga Gjermania ene qe ti bie shkurt muabetit filluan me sha disa flluam ene ne te tjeret si mbas shumices.Bile biles jo pak po ka ndodhur shume here qe Tifozat e nje ekipi shajne edhe Lojtarin qe eshte rrit ne ate ekip po luan me nje tjeter.Fatkeqesisht kshu eshte gatuar {Rraca} Shqiptare.


Urime Elbasanit per kte fitore me Tiranen.

[Flori]

bravo i lumt elbaxanit

[miko]

Elbasani mban fjalën, shkurorëzon Tiranën


Nr.1


Verdheblutë nuk gabojnë dy herë rresht, duke u shkëputur sërish nga ndjekësi më i afërt


Elbasani - Tirana 1-0

Shënues: A.Kaçi 77'


"Radiografia"

2' Bejzade alarmon mbrojtjen tiranase pas një gjuajtjeje të bukur, por topi kalon fare pranë shtyllës së djathtë pingule të kuadratit të Hidit.
4' Vendësit kundërzbresin bukur, por një mbrojtës mik e devijon topin mjaft bukur jashtë vijës fundore.
11' Qorri kroson saktë për te Bejzade, që gjuan fuqishëm, por Hidi e mbërthen topin pranë shtyllës pingule, pa e lejuar të kalojë vijën fatale.
16' Kësaj radhe është Bejzade që i lëshon një top të saktë Qorrit, i cili e lëshon si "predhë" pranë trekëndeshit të majtë të portës bardheblu.
20' Elbasani këmbëngul me forcat e shumta për të shënuar në portën e Hidit dhe një top i goditur me kokë nga Brahja përplaset në traversë.
23' Miqtë kundërpërgjigjen me anë të Salihit, por gjuajtjen e tij e pret pa vështirësi Kotorri.
37' Abraham shmang dy mbrojtës miq, gjuan, por pa rezultat.
40' Dyshja Qorri-Bejzade kombinojnë disa herë midis tyre dhe ky i fundit gjuan në drejtim të kuadratit, por topi kalon sërish jashtë. 51' Pjesa e dytë nis edhe më e shpejtë për vendësit. Qorri, pasi ka marrë një top nga mbrojtësit verdheblu, me kokë e kalon te Bejzade, që fare pranë portës nuk arrin ta çojë në rrjetë.
57' Vendësit kanë një rast ideal për të kaluar në avantazh, por Bejzade e Qorri vonohen dhe gjuajtja e këtij të fundit nuk ka saktësinë e duhur.
60 75'- Elbasani sundon në fushën e lojës dhe e detyron Tiranën të mbyllet në zonën e vet.
77' Albert Kaçi, pasi ka marrë një top të kthyer nga mbrojtja bardheblu, arrin që me një gjuajtje spektakolare të mposhtë portierin Hidi. 1 0 për Elbasanin.
78' Verdheblutë përpiqen ta dyfishojnë rezultatin, por sulmuesit e tij vonojnë në kombinimet midis tyre në zonën mike.
83' Çapja i ka dhuruar një top të saktë Brahjes, që me shpejtësi ka gjuajtur, por Hidi pret.
86' Qorri gjuan sërish fuqishëm, por Hidi grushton.
90+2'- Andaveris shfaqet rrezikshëm përpara portës së verdhebluve, por Kotorri tregon aftësitë e tij.

Komenti

Elbasani ka arritur të triumfojë sërish ndaj kampionëve në fuqi, duke e thelluar distancën sërish nga ndjekësi i tij më i afërt, Partizani, i cili nuk ka marrë më shumë se barazim ndaj Vllaznisë. Vendësit e kanë filluar me shumë siguri ndeshjen dhe e kanë vënë në alarm mbrojtjen mike gjatë gjithë kohës. Të mbështetur nga mijëra sportdashës të zjarrtë nga Elbasani, nga rrethinat e tij, por edhe të tjerë të ardhur nga qytetet e tjera të Shqipërisë, verdheblutë kanë treguar se janë një nga ekipet më të mira të superligës. Sulmi i Elbasanit i ka dhënë sinjale të qarta portierit mik se do ta kishte të vështirë dhe të pamundur ta mbante të paprekur kuadratin e Tiranës. Qorri dhe Bejzade shpeshherë provuan ta vinin në shenjestër portën e bardhebluve. Gjuajtjet e tyre nga të gjitha pozicionet nuk arritën ta nxirrnin në dritë golin e avantazhit gjatë pjesës së parë. Niveli i lartë i lojës së zhvilluar nga verdheblutë gjatë pjesës së parë nuk solli ndryshim rezultati dhe ata e nisën mjaft të mobilizuar pjesën e dytë, duke këmbëngulur për shënimin e golit. Futja në lojë e shkodranit Albert Kaçi pati ndikim pozitiv dhe solli një agresivitet edhe më të madh të vendësve ndaj Tiranës. Shpejtësia në veprimet me topin e Kaçit dhe saktësia e Qorrit, Bejzades dhe e futbollistëve të tjerë të Elbasanit paralajmëronin për golin e verdhebluve. Dhe ai ka mbërritur në minutën e 77-të, me autor Albert Kaçin, pas një gjuajtjeje spektakolare në hyrje të zonës. Topi i goditur nga Kaçi ka pushuar pas shpinës së Hidit, ndërsa stadiumi "Ruzhdi Bizhuta" ka shpërthyer si një "vullkan" nga entuziazmi i tifozërisë vendëse. Për fatin e mirë të verdhebluve, ky rezultat është mbrojtur me meritë të plotë prej tyre deri në fund, duke siguruar një kryesim bindës, kur kanë mbetur edhe 10 javë nga mbyllja e aktivitetit. Fundi i ndeshjes është kthyer në një festë të madhe, sepse fitorja me kampionët në fuqi është cilësuar një hap tjetër drejt trofeut të superligës. Kështu, me këtë fitore, Elbasani shkurorëzon përfundimisht Tiranën, duke e lënë nëntë pikë mbrapa një rival të drejtpërdrejtë. Verdheblutë tregojnë se nuk mund të gabojnë dy herë radhazi, duke fituar më meritë përballë kampionëve në fuqi. Ndeshjen e radhës Elbasani do ta luajë në Peqin, ku fitorja është shumë e vështirë të arrihet, pasi dihet që Shkumbini lufton për të mos rënë nga kategoria. Por për fat të mirë të Elbasanit, edhe rivali i tij, Partizani, ka një ndeshje të vështirë, pikërisht me Tiranën, e cila nuk ka se ç'të humbasë më dhe do t'i kërkojë t'i rrëmbejë të paktën vendin e dytë të kuqve. Por para ndeshjes me Shkumbinin, Elbasani do të udhëtojë për në Durrës për kupë, ku edhe këtu nënkampionët kërkojnë trofeun.

Deklarojnë:

Ilir Daja, trajner i Elbasanit: "Arritëm një fitore me mjaft vlera, e cila tregon mbi të gjitha se ekipi ynë është një nga pretendentët kryesorë për titullin e kampionit. Kishim besim të plotë në kalimin me sukses të kësaj ndeshjeje. Luajtëm qartë dhe e dominuam ndeshjen, të cilën mund ta kishim fituar me pak më shumë kujdes edhe më thellë. Përfitoj nga rasti t'i falënderoj lojtarët për suksesin që shënuan në një nga ndeshjet më të rëndësishme të kampionatit. Një falënderim të veçantë do t'u adresoja edhe tifozëve tanë të mrekullueshëm, që na inkurajuan e na mbështetën së tepërmi nga shkallët e stadiumit."

Mirel Josa, trajner i Tiranës: "Kishim ardhur me bindjen se nuk do të dilnim pa pikë nga fusha e stadiumit "Ruzhdi Bizhuta", megjithatë jemi të detyruar ta pranojmë rezultatin. Kemi luajtur mirë, por u ndëshkuam atëherë kur mendonim se do të shënonim ne. Kryesimin e Elbasanit e cilësoj të merituar, por edhe ekipi i Tiranës do të vazhdojë të pretendojë për t'u ngjitur në kreun e renditjes, pasi ka ende mjaft javë për t'u mbyllur kampionati."

Të veçanta:

Më se 11 mijë spektatorë, mes të cilëve 500 nga kryeqyteti dhe 200 femra, e kanë ndjekur ndeshjen nga shkallët e stadiumit "Ruzhdi Bizhuta".
Një flamur gjigant me përmasa 50 x 10 metra me mbishkrimin "Elbasani Kampion" është shpalosur nga ultrasit verdheblu disa herë gjatë ndeshjes në tribunën përballë.
Rikthimi i Albert Kaçit ka qenë me fat, pasi sapo hyri në fushë shënoi golin e fitores për Elbasanin.






Nr.2

Goli i Kaçit shkurorëzon kampionët

Elbasani u lë "targën" kryeqytetasve. Kështu mund ta përmbledhim javën e 26-të të superligës, e cila solli rezultate të papritura, të cilat gjithsesi shkuan në favorin e verdhebluve. Goli i Albert Kaçit i dha tri pikët Elbasanit në një ndeshje me shumë episode, duke bërë që kampionët të dilnin sërish kokulur nga stadiumi "Ruzhdi Bizhuta". Fatal mund të quhet për Partizanin barazimi 2-2 me Vllazninë, skuadër e cila nuk kishte asnjë objektiv në këtë takim, ndërkohë që Teuta bëri dje detyrën përballë Besës në derbin bregdetar, ku golat e Kotes dhe Gegës ishin vendimtarë për durrsakët në fitoren 2-1. Duke shtuar këtu edhe hapin fals të Dinamos të premten me Skënderbeun, çdo gjë në javën që lamë pas foli vetëm për elbasanasit, që tashmë e shohin më pranë se kurrë fitimin e titullit kampion, i cili mungon prej 21 vjetësh në kampin verdheblu.
Mendon Kaçi për të shkurorëzuar kampionët
Ndonëse e nisi ndeshjen nga stoli, shkodrani Albert Kaçi i dhuroi një gol dhe tri pikë Elbasanit në sfidën direkte me Tiranën. Në një përballje shumë të tensionuar, ata që përfituan sërish ishin pikërisht djemtë e trajnerit Ilir Daja, të cilët u bënë dy sezone që po e mposhtin Tiranën kampione. Pas tri fitoreve radhazi, bardheblutë janë ndalur sërish në stadiumin "Ruzhdi Bizhuta", duke e parë tani edhe më larg titullin. Për sa u takon elbasanasve, mund të thuhet se në këtë kampionat nuk mund të gabojnë dy herë radhazi, ku pas humbjes me Partizanin kanë gjetur forca për të reaguar. Me këtë fitore të arritur, por duke parë edhe hapin fals të dy kryeqytetasve të tjerë, Elbasani po shkon i qetë drejt shpalljes kampion, teksa edhe vetë bardheblutë, pas këtij takimi, janë bindur më në fund se objektivi i vetëm që ka mbetur në lojë është Kupa e Shqipërisë.



Marrë nga www.sportishqiptar.com.al


Olele olele ç'na i bëjnë qefin kto çunat kështu

Verdh e blu

[miko]

Mesfushori shkodran i verdhebluve, Safet Osja, thotë se kështu duhet vazhduar


Osja: Ne kampionë, bukuria e Ditës së Verës

Elbasani e ka rritur akoma më shumë diferencën ndaj rivalëve të tij më të afërt, Partizanit dhe Tiranës. Për ekipin e drejtuar nga trajneri Daja tashmë po mendohet për takimin e radhës, atë kundër Teutës në kupë. Optimizmi është tepër i lartë pas fitores me kampionët në fuqi. Në një prononcim për "Sporti shqiptar", mesfushori shkodran Safet Osja thotë se edhe festa e ditës së verës ka më lezet të festohet nga elbasanasit si kryesues dhe si fitues të një ndeshjeje vërtet të rëndësishme. Osja gjithashtu thotë se duhet vazhduar në këtë mënyrë, duke mos toleruar deri në fund, pasi asgjë nuk ka mbaruar.

- Një fitore e vështirë me Tiranën, apo...?

- Takimi ishte si një finale, pasi përballeshin dy skuadrat më të forta të kampionatit tonë. Sa për vështirësinë, mund të them se edhe këtë herë e ulëm në tokë ekipin kampion, pasi loja që zhvilluam ishte e përkryer dhe mund të kishim shënuar edhe dy gola të tjerë. Tani na duhet të punojmë për takimet e radhës.

- Eshtë rikthyer Kaçi, i cili shënoi golin e fitores. Mendoni se i mungonte një futbollist i tillë Elbasanit?

- Duhet të theksoj se këtë sezon te skuadra jonë futbollistët janë nga më të njohurit, të cilët kanë dhënë maksimumin në fushën e lojës. Sa për Kaçin, ai është miku im dhe sinqerisht e meritone një gol me rastin e rikthimit. Kemi qenë edhe vitin e shkuar me Elbasanin bashkë dhe mendoj se rikthimi i tij ka qenë me fat për ekipin dhe ashtu shpresoj të shkojë deri në fund.

- Elbasani tashmë e ka rritur sërish diferencën ndaj rivalëve, meritë e ekipit kjo, apo ishte fat?

- Sigurisht që është për meritë të skuadrës sonë, pasi morëm një fitore me vlera ndaj Tiranës në një ndeshje spektakolare. Nuk besoj se na e kanë bërë dhuratë ndonjë ekip shkëputjen. Sa për rivalët, mund të them se ata deri në fund do të jenë pas nesh. Dua t'i siguroj të gjithë tifozët tanë se skuadra e tyre nuk do ta lëshojë vendin e parë deri në fund. Elbasani është mposhtur nga Partizani tri herë, por nuk e ka lëshuar vendin e parë në asnjë moment. Kjo do të thotë se kemi diçka më shumë se të tjerët, që është vazhdimësia.

- Të mërkurën, ndeshja e kupës me Teutën. Si e parashikoni?

- Do ta vlerësojmë shumë, përderisa jemi në lojë edhe për këtë trofe. Do të ishte e jashtëzakonshme që në fund të këtij sezoni t'i fitonim të dy trofetë. Teuta është një skuadër e fortë në shtëpi, por Elbasani duhet të "hakmerret" jo vetëm për barazimin në kampionat, por edhe sepse Teuta na eliminoi një vit më parë nga ky kompeticion.

- Kur mbeten edhe 10 javë, si e shikoni fitimin e titullit për Elbasanin?

- Për mua, ky është sezoni i dytë në Elbasan dhe dëshira është e madhe për t'u shpallur kampionë. Të them të drejtën, fitorja me Tiranën na ka dhënë një tjetër titull pas kampiones së dimrit. Tashmë jemi kampionë edhe në Ditën e Verës. Këta tituj kanë një domethënie të madhe për ecurinë tonë, për t'u shpallur në fund kampionë të Shqipërisë.



Laze: Kolegë presidentë, ju pres sot në Elbasan!

Presidenti i Elbasanit, Arben Laze, edhe një herë u ka bërë të ditur të gjithë presidentëve dhe sekretarëve të klubeve shqiptare ftesën e tij në Ditën e Verës, që tradicionalisht festohet në Elbasan, aty ku Laze dhe ekipi i tij kanë fituar një përkrahje shumë të madhe. "Nëpërmjet gazetës "Sporti shqiptar", i ftoj të gjithë presidentët dhe sekretarët e klubeve që Ditën e Verës të vijnë ta festojnë në Elbasan. Janë të mirëpritur të gjithë. Do të ishte një nder për mua të prisja të gjithë përfaqësuesit e futbollit shqiptar, ata të cilët po investojnë kaq shumë për këtë sport popullor," - ka thënë presidenti Laze në ftesën e tij. Kujtojmë që Laze këtë ftesë e kishte bërë që një javë më parë, në mënyrë që të gjithë ta programonin këtë festë në Elbasan. Në Ditën e Verës, sot në Elbasan, nuk ka se si të mos përshëndetet edhe ecuria e mirë e ekipit verdheblu, i cili është shumë pranë shpalljes kampion për të dytën herë. Për të treguar një "fair-play" të vërtetë, Laze ka ftuar të gjithë përfaqësuesit e futbollit. Në fund të prononcimit të tij, ai thotë: "Jemi shpallur kampionë të dimrit, tani jemi kampion pranvere, atëherë, sipas rregullit, duhet të jemi edhe kampionë vere. Më shumë se për vete, këtë titull e dua për qytetin e Elbasanit, pasi e meriton vërtet."


Daja: Tani verdheblutë më të qetë

Ai që ka festuar më gjatë se ndojë tjetër ka qenë vetë numri një i stolit verdheblu, Ilir Daja, i cili gjatë gjithë takimit ka qenë i shoqëruar nga tensioni i madh i lojës, por i mbushur me gëzimin e golit të shënuar nga Kaçi, ai ka festuar shumë në fund. "Skuadra do të vazhdojë e qetë punën deri në fund për të fituar titullin kampion. Ishte një fitore shumë e rëndësishme ndaj Tiranës, sepse skuadra luajti shumë mirë, madje mund edhe të kishim shënuar më shumë se një gol. Ekipi në fushë tregoi rritje në nivelin e saj fizik dhe taktik, çka do të thotë se humbja e pësuar nga Partizani një javë më parë është kaluar. Elbasani çdo ndeshje e konsideron si një finale. Jemi në rrugë të mbarë, por kemi përballë edhe 10 javë, kështu që na duhet të punojmë shumë për të marrë maksimumin e pikëve, duke filluar që nga kjo javë me Shkumbinin. I bëj thirrje ekipit që të jetë më i matur në takimet e tjera dhe të mobilizohet si në kupë, ashtu edhe në kampionat. Jemi të qetë, prandaj duhet ta administrojmë këtë qetësi, duke mos kaluar asnjëherë në eufori," - është shprehur trajneri i Elbasanit, Ilir Daja.



www.sportishqiptar.com.al




Koment

Më pëlqeu shumë deklarata e Ilirit,por dhe iniciativa e Benit.

[ClaY_MorE]

Neper fushën krejt jeshil
Dalin djemtë portokalli
Qe te gjithë jemi me ju
Forca djema verdh e blu.

Lulet tona janë për ju
Elbasani verdh e blu
Ne s'na tremb dot askerkush
Zemrat tona janë ne fushe.

Ne prej jush duam fitore
Duam fitore veç fitore
Para djema me koken lartë
Si selvite e Namazgjase.

Refreni:

Duam gol ne duam gol
Elbasani loz futboll
Duam fitore , ju mos ju ndani
Ne thërrasim Elbasani.

[episodestory]

Para Elbasaniiiiii.
Kampionati Dhe Kupa E Shqiperise Eshte E Jona.

[miko]

Sulmuesi i verdhebluve, Erion Rizvanolli, thotë se ekipi është shumë i karikuar


Elbasani tashmë e ka përqendruar vëmendjen te ndeshja derbi me Shkumbinin për kampionat në fushën sportive të Peqinit. Pas barazimit me Teutën në ndeshjen e parë çerekfinale të Kupës së Shqipërisë, skuadra e Ilir Dajës i është kthyer stërvitjes intensive për t'u përgatitur për derbin e prefekturës. Në një prononcim për "Sportin shqiptar", sulmuesi kryesor i Elbasanit, tiranasi Erion Rizvanolli, është shprehur tepër optimist për takimin me Shkumbinin. Ndërkohë, Rizvanolli ka shtuar se ky takim është tepër i rëndësishëm për ecurinë e skuadrës së tij. "Mund të them se skuadra e Elbasanit do ta vlerësojnë në maksimum ekipin kundërshtar, por për më tepër tashmë jemi të gjithë koshientë se kjo ndeshje do të jetë një spektakël, pasi ashtu si ne, edhe Shkumbini do të kërkojë fitoren. Për ne nuk ka rrugë tjetër përveç fitores. Do të kemi përballë një kundërshtar me shumë kualitete. Unë e njoh mirë këtë skuadër, pasi kam luajtur dhe kam kujtime të bukura nga Peqini. Mund t'ju them se Shkumbini ka një skuadër simpatike, që në fushën e vet luan mjaft mirë dhe është e pagabueshme," - shprehet sulmuesi Rizvanolli, i cili erdhi tek Elbasani në merkaton e janarit. Më poshtë, në prononcimin e tij, Rizvanolli, që nuk ka luajtur kundër Tiranës për shkak kartonësh dhe është lënë pushim në takimin me Teutën për kupë, thekson se gëzon një formë të mirë dhe shprehet se, nëse do të luajë që nga minuta e parë, do të japë maksimumin e tij. "Kampionati ka hyrë në një fazë tepër interesante. Tashmë jemi pesë pikë larg, kemi mundësi që të largohemi akoma më shumë, por unë shpreh bindjen se skuadra e Elbasanit këtë sezon është më e fortë se çdo ekip tjetër. Jo më kot kam zgjedhur Elbasanin për të luajtur këtë sezon," - ka shtuar Rizvanolli. Në fund të prononcimit të tij, sulmuesi Erion Rizvanolli thekson se skuadra e tij nuk do të lëshojë terren në asnjë takim dhe do të luftojë në çdo takim për të marrë maksimumin, madje duke filluar nga kjo javë. "Për Elbasanin, pak rëndësi kanë se çfarë bëjnë kundërshtarët. Këtu e kam fjalën për rivalët më të afërt të ekipit, ndërkohë që do të luftojmë për të fituar edhe kupën. Mendoj se skuadra ka bërë një hap përpara në kupë, por na duhet të fitojmë në takimin e kthimit. Mund të them se Elbasani me grupin që ka është i aftë t'i fitojë të dy trofetë e këtij sezoni. Takimi me Shkumbinin do të jetë një ndeshje tepër emocionuese, pasi ky takim është edhe derbi midis këtyre dy skuadrave. Në fushë le të fitojë më i miri," - përfundon Erion Rizvanolli, sulmuesi i Elbasanit.


2000 stola për stadiumin "Ruzhdi Bizhuta"

Një emigrant nga qyteti i Elbasanit do të bëjë dhuratë 2000 stola për stadiumin e Elbasanit. Këtë gjë e kanë pohuar drejtuesit e klubit verdheblu. Ndërkohë, burime brenda ekipit të verdhebluve kanë shtuar se emigranti në fjalë nga Elbasani ka shprehur dëshirën për të dhuruar 2000 stola për stadiumin e qytetit, duke shprehur kështu një mbështetje tepër të madhe për ekipin, që gjatë këtij sezoni ka afruar pranë vetes mijëra sportdashës elbasanas.


Nora dhe Vrapi, mungesat ndaj Shkumbinit

Sulmuesi Arlind Nora dhe mbrojtësi Endri Vrapi janë mungesat e radhës për ekipin e Elbasanit në kampionat. Të dy futbollistët kanë luajtur 90 minuta në takimin e kupës, pasi ditën e diel do të jenë në tribunë në fushën sportive të Peqinit, pasi kanë plotësuar numrin e kartonëve. I pari është ndëshkuar me karton të kuq, ndërsa Vrapi me Tiranën ka marrë kartonin e tretë të verdhë.



Marrë nga www.sportishqiptar.com.al

[miko]

Elbasani shkëputet edhe një pikë nga ndjekësi, ndërsa Shkumbini i afrohet Teutës



Shkumbini - Elbasani 0-0




Komenti

Me barazimin pa gola që u arrit dje në Peqin midis ekipit vendës dhe Elbasanit, ekipi i Shkumbinit ka humbur dy pikë tepër të vlefshme për momentin, ndërsa Elbasani ka ditur të përfitojë nga ky barazim. Falë edhe humbjes së Partizanit, ndjekësit më të afërt, elbasanasit kanë konsoliduar pozitat e tyre në krye, në pritje të kurorëzimit zyrtar. Përballja e djeshme midis këtyre dy ekipeve u ndoq me interes dhe mund të thuhet se barazimi është rezultati më i drejtë, nisur nga ato që dhanë ekipet në fushën e lojës. Vërtet që Shkumbini ishte më ngulmues dhe meritonte më tepër. Mbi të gjitha në këtë derbi fitoi futbolli, nëpërmjet lojës korrekte nga të dy ekipet. Episode të veçanta të tensionimit të lojës nga ndonjë futbollist i veçantë mik nuk ndikuan aspak në prishjen e atmosferës sportive. Eshtë fakt që vendësit ishin më tepër ngulmues gjatë 90 minutave, duke pasur edhe raste të pastra në portën mike, por këto nuk mjaftuan për të gjetur golin aq shumë të dëshiruar. Eshtë meritë e Kotorrit dhe e mbrojtjes së Elbasanit, të drejtuar nga kapiteni Dede, që nuk lejuan prekjen e rrjetës. Vëmendja e Elbasanit ishte përqendruar në këtë repart, që luajti shpesh edhe me futbollistët e tjerë, veç Dedes, Vrapit, Brahjes e Çapjes, sepse në ndeshje të tilla goli mund të ndikonte në fatin e ndeshjes, sepse ai që do të shënonte i pari mund edhe ta fitonte takimin. Dëshirën e tij Shkumbini e shfaqi që në fillim, duke rrezikuar me sulmuesin Abazaj dy herë dhe më pas me Ishkën. Këto ngacmime i mjaftojnë Elbasanit që të kundërpërgjigjet me Osjen e Stojkun, që vunë në provë portierin. Vërtet që portierët Kotorri e më pak Llani nuk patën shumë punë. Ishte e vështirë të dalloje në fushën e lojës se po luanin dy ekipe me objektiva të kundërta, Shkumbini për mbijetesë në vendin e parafundit dhe Elbasani që kryeson kampionatin që nga java e parë. Merita më shumë u takon vendësve, që luajtën me dëshirë dhe me grintë, duke i kërkuar më shumë se kundërshtari golin dhe rezultatin pozitiv. Nëse nuk u gjet goli, veç meritës së Kotorrit, duhet përmendur edhe organizimi i mirë nga mbrojtësi Dede, pa harruar edhe mungesën e qetësisë, apo nxitimin e sulmuesve Abazaj, Stafa dhe R.Dervishi. Loja në përgjithësi u luajt në sektorët e mesfushës dhe në zonën e Elbasanit, duke lënë të avancuar vetëm Bejzaden dhe K.Dalipin, që e patën të vështirë të gjejnë hapësirë në mbrojtjen vendëse të drejtuar nga Magani. Krahasuar me pjesën e dytë, pati më tepër ritëm nga të dy ekipet, që arritën t'i shfaqnin hapur synimet e tyre. Në pjesën e dytë, në fakt, ritmi ra dhe ndikoi edhe terreni i fushës, që ua vështirësoi shumë futbollistëve qarkullimin e topit dhe ndërtimin e aksioneve. Zëvendësimet e dy trajnerëve nuk ndryshuan asgjë në fushë, ku Shkumbini vazhdonte të ishte më ngulmues me sulmet nga krahët, ndërsa miqtë nga Elbasani mendonin më tepër për mbrojtjen, duke përdorur armën e kundërsulmit me Rizvanollin dhe Stojkun. Duke ndarë në fund nga një pikë, të dy ekipet në pozicione të ndryshme në tabelë e me objektiva të kundërta do të mendojmë për ndeshjet e radhës. Shkumbini, të shtunën, ka një tjetër provë të vështirë, kur do të presë Partizanin në Peqin, ndërsa Elbasanit do t'i duhet të udhëtojë drejt Kavajës në një takim tjetër të vështirë.



Deklarojnë:

Faruk Sejdini, trajner i Shkumbinit: "Duhet të pranoj se jemi të kënaqur edhe me barazimin, edhe pse ndoshta meritonim më shumë. Loja pati nivel të kënaqshëm dhe në këtë takim përballë kryesuesve ne bëmë një hap të vogël. Ekipi tregoi dëshirë në fushë dhe më pak kujdes mund të fitonim takimin. Nuk mjafton vetëm dëshira nëse ajo nuk konkretizohet me finalizimin e rasteve. Javën e ardhshme duhet të bëjmë diçka më shumë, për të mos u përsëritur barazimi i sotëm."

Ilir Daja, trajner i Elbasanit: "E patëm parashikuar të vështirë këtë takim, sepse e njihnim mirë forcën e Shkumbinit, sidomos fushën e vet. Ekipi diti të mbrohej mirë për të mos pësuar gola. Pengesë për mua ishte dhe vështirësia e terrenit, që ndikoi në lojën e dy ekipeve, sidomos të sulmuesve. Barazimi për mua ishte rezultati më i drejtë. Për të ardhmen them se Elbasani do të ngulmojë deri në fund, pa parë kundërshtarët e tjerë dhe ndjekësit nga pas. Javën tjetër na pret një transfertë e vështirë, kur do të luajmë përballë Besës."


Të veçanta:

Interesim i madh për takimin derbi të prefekturës Shkumbini Elbasani, ku kishte edhe shumë spektatorë elbasanas.
Tribuna "VIP" ishte e mbipopulluar nga specialistët vendës e nga Elbasani, ku në mes tyre ishte edhe kryebashkiaku Ardian Turku, dikur futbollist i Shkumbinit.
Entuziazëm i madh në stadium nga sportdashësit elbasanas, kur ndërmjet Radio +2 u njoftua goli i Tiranës përballë Partizanit.
Dy vëllezërit Dalipi, Klevisi i Elbasanit dhe Endri i Shkumbinit, ishin dje kundërshtarë përballë njëri tjetrit, duke u përpjekur të dy të japin maksimumin.
Eshtë duartrokitur futja në fushë e Erion Rizvanollit të Elbasanit në pjesën e dytë, ish-futbollistit të Shkumbinit.



Marrë nga www.sportishqiptar.com.al



Koment personal

Mbas barazimit të bardhë në Peqin dhe mbas mposhtjes të së kuqve kemi mundur jo vetëm të ruajmë distancën por madje dhe ta shtojmë atë më 1 pikë nga vendi i dytë.Kështu që jemi 6 nga Partizani,dhe të shtunën na pret një transferë tepër e vështirë në Kavajë ndaj Besës.Besa një ekip i mirkonsoliduar dhe që ndeshjet e fundit po merr ca rezultate bindëse,kështu që duhet akorduar kujdes në max nga çunat për të dalë nga ndeshja e të shtunës me 3 pikshin.Etapat në vazhdim janë përcaktuese për objektivin tonë,por jo vendimtare kështu që çunat duhet të mos harrojnë për asnjë moment për çfarë hyjnë në fushën e lojës.Edhe kësaj rradhe pritet dyndje e madhe tifozësh verdh e blu në stadiumin e Besës së Kavajës.Shpresoj që të shtunën të zhvillohet një ndeshje e bukur duke i dhuruar publikut të pranishëm 90 minuta spektakël (pasi e kanë këtë mundësi të dyja ekipet) dhe Elbasanit,3 pikshin e domosdoshëm.

Ps.Një lajm senzacional dhe në eksluvitet për lexuesit e temës sonë,dhe për gjithë ata verdh e blu kudo qofshin.Sipas burimeve të besueshme personale,ka shumë mundësi që dy çunat tanë,Dorian Bylykbashi dhe Klodian Duro ti bashkohen ekipit mëmë për ndeshjet që do zhvillojë Kampionja e Shqipërisë në ndeshjet e Ch.L. dhe madje po shikohet mundësia për të dy të vishen me fanellën verdh e blu për sezonin e ardhshëm.

Forca çuna


Verdh e Blu

[miko]

Drejtori teknik i verdhebluve, Artin Kovaçi, reagon pas fjalëve dashakeqe ndaj klubit



Elbasani vazhdon të jetë në krye të superligës edhe pas përfundimit të fazës së tretë të sezonit. Ndërkohë, në drejtim të ekipit verdheblu, gjatë këtij sezoni nuk kanë munguar akuzat, madje presioni mediatik ndaj ekipit të Elbasanit është shtuar së tepërmi, sidomos tashmë kur kampinati është në fundin e tij. Por në një prononcim për "Sportin shqiptar", drejtori teknik i Elbasanit, Artin Kovaçi, tepër i indinjuar ndaj disa pseudospecialistëve të futbollit, të cilët çdo javë në mediat sportive kanë ulur poshtë meritat dhe vlerat e ekipit verdheblu, ka thënë.

"Më lejoni t'u bëjë të ditur të gjithë atyre të ashtuquajtur specialistë, të cilët të kollarisur mbajnë në gojë ekipin e Elbasanit, madje kanë shkuar deri atje sa pas çdo ndeshjeje na kanë kryqëzuar, që ekipit tonë nuk mund t'ia ulin dot meritat dhe vlerat. Duan apo s'duan disa, Elbasani e meriton vendin e parë. Gjithçka deri tani e kemi fituar me punë dhe djersë në çdo fushë të superligës," - thekson Kovaçi.

Por drejtori teknik i verdhebluve shprehet se Elbasani këtë sezon gjithçka e ka me meritë, madje ai thekson se është ndier tërësisht i fyer nga disa deklarata të dhënë në një emision sportiv nga një i ashtquajtur specialist futbolli, duke theksuar se Elbasani është favorizuar nga FSHF-ja gjatë këtij sezoni edhe në takimin me Shkumbinin, që u zhvillua ditën e diel dhe jo të shtunën. Kovaçi shprehet se FSHF nuk është palë me ekipin e Elbasanit, duke theksuar se skuadra e tij nuk ka shkelur ndonjë rregullore pse ka luajtur ditën e diel.

"Kemi rënë dakord të dy klubet, si Shkumbini, ashtu edhe klubi ynë, që të luajmë ditën e diel, kjo jo për të parashikuar takimin që u luajt në Tiranë, por duke parë që ishte një transfertë tepër e vështirë për ekipin tonë dhe mbi të gjitha skuadra nuk mund të luante brenda tri ditësh pas takimit të kupës përsëri," - komenton Kovaçi.

Madje drejtori i verdhebluve shprehet se takimi i zhvilluar në fushën sportive të Peqinit ka filluar më përpara se ndeshja e zhvilluar në Tiranë dhe ka përfunduar disa minuta para takimit të Tiranës.

"Ne si staf e gjykojmë se ndeshja e zhvilluar të dielën nga ana jonë është brenda gjykimit profesional, sepse nuk ka asgjë e cila e kundërshton këtë aspekt. U bëj thirrje atyre që flasin në emër të futbollit shqiptar se duhet të jenë më të matur kur të flasin për ecurinë e Elbasanit dhe nuk duhet të merren me punët tona, pasi kjo skuadër ka merita dhe jo më kot ndodhet në vendin e parë. Prandaj nuk duhet të gjykojnë për ekipin tonë. Edhe federimi i Kaçit na qenka i trukuar, sipas disave. Mund të them se federimi i Kaçit është kryer që në merkaton e janarit dhe nuk e kuptoj pse duhet të merren me këto gjëra. Para se të flasin lart e poshtë, të marrin dokumentet dhe t'i shfletojnë. Specialistë të tillë nuk duhet të flasin në tym nëpër media vizive dhe të shkruara, por të përballen me realitetin. Unë jam plotësisht i gatshëm për të gjitha mediat, qofshin këto elektronike dhe të shkruara, për t'u mbyllur gojën këtyre njerëzve që flasin pa të drejtë ndaj Elbasanit. Ekipi nuk tkurret nga këto presione amatoreske, pasi deri tani është duke kryesuar me meritë dhe të gjithë duhet të jenë krenarë për këtë skuadër, e cila i ka sjellë këtë sezon publikun nëpër shumë stadiume futbollit shqiptar," - ka përfunduar drejtori teknik i verdhebluve, Artin Kovaçi.



Dje pushim, sot stërvitje e parë

Pas një dite pushim, skuadra e Elbasanit sot pasdite, në kompleksin sportiv "Shefqet Lamçe", do t'i kthehet stërvitjes së parë për takimin anti-Besa. Pas barazimit me Shkumbinin në derbi, ku Daja ka pasur mungesën e Qorrit dhe të Norës, tashmë i ka të gjithë futbollistët në dispozicion. Pra, ekipi i Elbasanit do të luajë me formacionin më të mirë të mundshëm përballë Besës, një transfertë shumë e vështirë për kryesuesit.


Marrë nga www.sportishqiptar.com.al



Koment personal

I ka thënë të gjitha që duheshin thënë z.Kovaçi e u ka dhënë përgjigjen e merituar gjithë atyre që nuk po binden dot me idenë e Elbasanit Kampion.


Verdh e Blu

[partizani]

ate per blerjen e ndeshjesh se paskeni ven ?

[Dr Rieux]

Ja po e vej une qe mos ti ngelet hatri ketij me lart.
____________________________________

Sporti Shqiptar, 22-03-2006

Presidenti i Besës, Nexhat Bizhdili, lëshon bombën: Kryesuesit po u telefonojnë lojtarëve të mi për kompromis

Bizhdili: Elbasani tenton të blejë ndeshjen
Feriz Ferizaj

Duket se 9 ndeshjet e mbetura të superligës do të jenë vërtet "intrigë dhe dashuri", siç paralajmëronte dje në një shkrim të saj gazeta "Sporti shqiptar". Pra, duket se na pret një fazë e katërt me "luftë" shumëplanëshe të skuadrave për të arritur objektivat e sezonit. Me të gjitha mënyrat, në fushën e blertë, por edhe jashtë saj, pas kuintave, ndeshjet e mbetura të kampionatit duket se do të jenë pa dyshim një lojë stërkëmbëshash. Dhe këtë e ka provuar i pari presidenti i Besës së Kavajës, Nexhat Bizhdili, i cili publikisht kërkon t'i dalë së keqes përpara. I porsakthyer nga një vizitë jashtë shtetit, Bizhdili thotë se është përballur me një shqetësim të pazakontë të futbollistëve të tij. Disa nga titullarët e Besës, sapo është kthyer pranë ekipit, e kanë vënë në dijeni për tentativat e Elbasanit për të blerë ndeshjen e radhës në kampionat, që do të luhet në fundjavë në Kavajë. Një fakt i tillë e ka detyruar presidentin Bizhdili t'u bëjë thirrje publike drejtuesve dhe lojtarëve të Elbasanit që të mos merren me të tilla gjëra, pasi ato nuk pinë ujë te Besa. Madje Bizhdili shton më tej, duke thënë se skuadra që financon nuk shitet kurrsesi, siç mund të mendojë ndokush. Duke dashur ta përcjellë këtë shqetësim të tij përmes gazetës më të madhe sportive në Shqipëri, "Sporti shqiptar", presidenti i Besës, Nexhat Bizhdili, shprehet: "Ç'është e vërteta, sapo jam kthyer nga një vizitë që bëra jashtë shtetit dhe kërkova të takohem me drejtuesit dhe futbollistët e skuadrës sime. Por, para se të më flisnin për fitoren e thellë 6-0 ndaj Lushnjës, apo për ndonjë problem që mund t'u ketë dalë rrugës, lojtarë dhe drejtues të skuadrës më vunë në dijeni për telefonatat dhe kërkesat e disa futbollistëve të Elbasanit, të cilët kishin kërkuar marrëveshje paraprake për t'u lënë ndeshjen e radhës. Futbollistët e mi më thanë se disa titullarë të Elbasanit, emrat e të cilëve nuk po i bëj publikë për arsye etike, u kanë telefonuar, duke u kërkuar lënien e ndeshjes në këmbim të përfitimeve financiare, shuma të cilat janë vërtet të konsiderueshme, sipas premtimeve. Natyrisht, kjo më erdhi si bombë, prandaj vendosa që përmes gazetës suaj t'u bëj thirrje publike drejtuesve të Elbasanit, që patjetër qëndrojnë pas futbollistëve të tyre, që kanë bërë rolin e ndërmjetësit në këtë tentativë për të blerë ndeshjen me Besën, se e kanë të kotë. U them drejtuesve dhe futbollistëve të Elbasanit se Besa nuk shitet kurrsesi. I paralajmëroj të mos merren më këto gjëra, pasi nuk do t'u ecë me Besën. Të tilla mënyra për ta fituar ndeshjen jashtë fushës së blertë nuk shkojnë në Kavajë, sepse Besa nuk është ekip lagjesh, por e denjë për të mundur çdo kundërshtar të superligës, ashtu siç e ka bërë në këtë sezon. I këshilloj kolegët e mi të Elbasanit t'i bëjnë llogaritë për të fituar në fushën e lojës, nëse kanë mundësi, ndryshe do të dalin duarbosh nga ndeshja me Besën."
I pyetur se kujt i janë bërë ofertat financiare në këmbim të shitjes së ndeshjes, apo nga kush janë bërë, presidenti i Besës, Nexhat Bizhdili shton: "Me sa u informova nga stafi drejtues i skuadrës sime dhe nga futbollistët, pothuajse të gjithëve u kanë mbërritur në telefon apo ndonjërit edhe drejtpërdrejt oferta të tilla, të cilat janë bërë nga lojtarë të Elbasanit." Interesimit tonë, nëse këto oferta janë bërë nga drejtues apo lojtarë të Elbasanit, Bizhdili i përgjigjet: "Presidenca e Elbasanit nuk del vetë në skenë, sepse nuk ka arsye ta bëjë këtë, pasi po ta bëjë, e shkrij fare, filloj investigimin pastaj. Ata kanë dërguar sportistët e vet për t'u bërë oferta kolegëve të tyre të Besës. Nuk po përmend emra, sepse nuk është etike për mua, por, e përsëris, po ua them publikisht drejtuesve dhe futbollistëve të Elbasanit se këto gjëra nuk shkojnë te Besa. Ata të mos tentojnë më, siç kanë bërë këto dy ditë, që të blejnë lojtarë të Besës, me qëllim që të arrijnë objektivin e tyre në Kavajë, pasi çdo gjë do t'u shkojë dëm. Për sa u takon shumave financiare që u janë afruar futbollistëve të mi, nuk mund të flas me siguri, por mund të them se bëhet fjalë për shuma të konsiderueshme." Më tej, i pyetur nëse do të jetë në gjendje t'i kontrollojë futbollistët e Besës, që të mos joshen nga të tilla oferta financiare, që, sipas tij, vijnë nga kampi elbasanas, Bizhdili nënvizon: "Absolutisht jam i bindur dhe i sigurt që nuk do të arrijë njeri t'i blejë futbollistët e Besës, pasi ata i paguaj unë. Për këtë flas me 1000 për qind. Shitjen e lojtarëve të Besës as e çoj nëpër mend. Elbasani të gjejë ndonjë ekip tjetër për ta blerë, por Kavajën absolutisht jo. Nuk është puna se do t'i kontrolloj unë për të mos u bërë pjesë e të tilla lojërave, por besimi që kam tek i gjithë stafi i Besës dhe te lojtarët e mi më bën të them se Elbasani nuk do të çajë dot në Kavajë në këtë mënyrë. Me këtë rast, i them Elbasanit që do ta ketë shumë të vështirë të marrë pikë në Kavajë, pasi ne kemi synimet tona. Besa është një skuadër që luan futboll vetëm në fushën e lojës dhe pikërisht aty ka treguar se di të fitojë. Të njëjtën gjë do të synojmë të bëjmë edhe të shtunën ndaj Elbasanit. Dhe për këtë po përgatitemi seriozisht."

[Dr Rieux]

Uroj qe mos te kete ndonje te vertete te deklaratat e e presidentit te Beses dhe te jete thjesht smire, loje e paramenduar kunder Elbasanit, dhe/ose veprim parandalues i tipit "per te qene brenda". Sidoqofte duke dit gjendjen e kampionatit tone ku pazaret e ketij lloji nuk jane denuar ndonjehere po jane bere diten me diell, asgje nuk perjashtohet. Gjithashtu rrethanat e Kavajes jane te pershtatshme per nje pazar: Besa pak a shume ka siguruar vendin e peste, maksimumi mund te levize me +/- 1 vend ne renditje. Dmth as nuk rrezikohet per renie nga kategoria as nuk mundesi per te dale ne Evrope. Por te pakten mendoj qe pas ketij alarmi eshte shume me e vogel mundesia e realizimit te ndonje pazari te mundshem. Ishalla Elbasani me zotesine e tij do e fshije serine me Kavajen per kete sezon.

[Dr Rieux]

Mgjths gjendja ne kampin e Elbasanit eshte optimiste, mua me duket se asgje nuk ka per tu percaktuar para tre javeve te fundit ku Elbasani, Partizani dhe Tirana do ndeshen me njeri tjetrin (qofsha i gabuar). Sepse ne gjashte javet e para, Elbasani ka kater ndeshje jashte, dy brenda kurse Tirana me Partizanin kane kater ndeshje brenda dhe dy jashte. Dhe Elbasani, sidomos fazen e trete, ka treguar se le shume pike jashte fushes:

1-1 me Dinamon
0-0 me Durresin
0-2 me Partizanin
1-1 me Peqinin

Me kete kalendar nuk eshte aspak e cuditshme qe diferenca nga +6 te ulet ndjeshem, aq sa perfundimi te percaktohet nga tre javet e fundit, bile si objektiv une them se do jete pozitiv nese arrijme ne +3 ne tre javet e fundit. Kete here nga kater ndeshjet qe kemi jashte (Kavaje, Lushnje, Shkoder, Korce) nuk mjafton thjesht barazimi por duhet te pakten dhe dy fitore.

[ClaY_MorE]

ate per blerjen e ndeshjesh se paskeni ven ?

Ja tek e ke me larte. Pse ai miku nuk permendi emra ? apo thjesht perseri sulme Elbasanit sic filluan ti benin njerhere e nje kohe pse Elbasani luante te djelen e te tjerat te premte e te shtune.

Jane thjesht sulme per te percare apo sjell konflikte ne klub.

Deri me sot nuk ka ndodhur nje gje e tille kshu qe skeni pse merakoseni.

[Qerim]

Elbasani kampion !!!

[Qerim]

Go go Elbasani !

[miko]

Ish-kapiteni i verdhebluve, Gentian Stojku, është i bindur në suksesin e këtij sezoni


Elbasani ka marrë vetëm një pikë në derbin me Shkumbinin, por që pas javës së 27-të, ose më saktë pas përfundimit të fazës së tretë, skuadra e drejtuar nga Daja tashmë kryeson sërish me 6 pikë më shumë se vendi i dytë, Partizani. Ndërkohë, skuadra e Elbasanit, në takimin e zhvilluar në Peqin, arriti që të mos pësojë humbje në transfertë, madje me dy mungesa kryesore, si Nora dhe Qorri. Ekipi ka qenë i suksesshëm falë një skeme të re nga trajneri Daja, ku në fushë ka aktivizuar që nga minuta e parë ish-kapitenin Gentian Stojku, i cili e ka bërë më së miri detyrën e tij, duke qenë kështu një nga futbollistët më të mirë të Elbasanit. Në një prononcim për "Sportin shqiptar", Gentian Stojku shprehet se skuadra e tij tashmë ka hedhur një hap të rëndësishëm për titullin kampion, madje ish-kapiteni i njohur i Elbasanit, që gjatë këtij sezoni, ndonëse është aktivizuar shumë pak me fanellën e skuadrës së tij, ka shtuar se Elbasani, me barazimin në Peqin, duhet të mendojë për të mos pësuar asnjë humbje në transfertë.

"Elbasani kryeson që prej 27 javësh këtë kampionat dhe do të ishte fatale për ekipin tonë nëse në fund nuk kurorëzohemi. Unë kam besim te kjo skuadër, e cila gjatë këtij sezoni në çdo fushë e ka treguar veten," - shprehet Stojku. Më poshtë, futbollisti që ka luajtur si titullar në qendër të mbrojtjes në fazën e dytë kundër Besës, pasi mungonte kapiteni Dede, thekson se takimi me kavajasit është tepër i vështirë. Sipas Stojkut, Besa nuk është e pakalueshme.

"Përderisa jemi në vendin e parë, do të thotë se jemi më të fortë se çdo skuadër, pasi kemi marrë shumë pikë të vleshme, sidomos në transfertë. Edhe kundër Besës kemi fituar në fazën e dytë dhe nuk ka asnjë dyshim që Elbasani të mos fitojë në këtë takim. Jemi në rrugë të mbarë dhe kemi kryesuar që nga fillimi i sezonit. Do të ishte fatale për ekipin tonë nëse nuk arrijmë të fitojmë titullin kampion. Na duhet të qëndrojmë "me këmbë në tokë" deri në fund, pasi janë edhe 27 pikë në lojë. Nëse arrijmë të jemi të qëndrueshëm, me siguri Elbasani do të shpallet kampion," - shton Stojku.

Për sa u përket rivalëve për titull, Stojku shprehet se Elbasani në radhë të parë duhet të përqendrohet në ndeshjet e tij. "Nëse bëjmë detyrën në çdo ndeshje, pak rëndësi kanë se çfarë bëjnë ekipet rivale. Për mua, çdo skuadër ka objektivat e veta, prandaj superliga është bërë shumë interesante, pasi lufta për titull dhe mbijetesa është forcuar së tepërmi, - shton Stojku. - Në karrierën time kam luajtur edhe me skuadra të tjera, por karriera ime është e lidhur ngushtë me ekipin e Elbasanit dhe këtë sezon shpresoj që të gjithë të shpallemi kampionë. Sa për minutat e pakta që kam zhvilluar, them se do të vazhdoj të stërvitem çdo ditë me përkushtim dhe do të jem gjithmonë i gatshëm për Elbasanin. Eshtë trajneri ai që duhet të vendosë," - përfundon Gentian Stojku, i cili për Elbasanin e tij luan në çdo sektor të fushës.



Verdheblutë, sot ndeshje kontrolli
Skuadra e Elbasanit është duke vijuar normalisht stërvitjen për takimin e kësaj jave në trasfertë me Besën. Daja i ka të gjithë futbollistët e gatshëm dhe sot ekipi i Elbasanit do të zhvillojë një ndeshje kontrolli përpara takimit të së shtunës. Për momentin të gjithë janë të gatshëm, por pritet që të përfundojë java stërvitore, në mënyrë që të mos ketë të dëmtuar.



Marrë nga www.sportishqiptar.com.al

[miko]

Presidenti i Besës, Nexhat Bizhdili, lëshon bombën: Kryesuesit po u telefonojnë lojtarëve të mi për kompromis

Miki merr cel dhe mbasi kërkon nëpërmjet shoqërisë,gjen "rastësisht" nr e Altin Rakllit. lol



Miki - O Altino mrama plako

Raklli - Mirmbrema

Miki - Qysh tkam byrayer ?

Raklli - Me fal por spo te njoh se cili je ...

Miki - Ha mer si bon ky..po Endri Vrapi jam mer jahu (lol)

Raklli - Oooo po... po nga ma gjete nr ...??!!

Miki - Ehhh aman,nuk e ke ngju qe kush kerkon gjen...

Raklli - Ha ha..

Miki - Qysh ke qene ti njehere,mesa pashe kishe be nje eurogol kunder lushnjareve...komplimente

Raklli - Faliminers (lol) po them tju ngjis dhe juve nje kete jave...

Miki - Ahh meqe me dole ktu..pikerisht per ndeshjen e te shtunes tkam marr dhe une.

Raklli - Dmth...

Miki - Ha mer shi ban...ti e di qe ne jemi kaq afer titullit.Kemi Partizanin qe na ndjek kama kames,dhe ngaqe ndeshja kunder jush eshte nje shume decisive dhe e veshtire,menduam ketu me nje grup shokesh mos na ndihmon pak...

Raklli - Une..??!! Si mund tju ndihmoj?

Miki - Ehhhh...ka shume mundesi si,po ja prsh po bisedoja dje me Lazen..E njeh Lazen eee??

Raklli - E si jo..

Miki - E po thosha qe po bisedoja dje me Benin,dhe ne nje moment me thote qe ka deshire te te beje dhurate nje qyp... (lol)

Raklli - Qyp..??!! (nuk çuditet për dhuratë..lol)

Miki - Po po qyp...sigurisht jo me mjaltë...por me gjera që mund të shkëlqejnë..

Raklli - Edhe llamarina shkëlqen...( lol)

Miki - Do ti shikosh vetë...ne duam që ti e vija ofensive e juaj të mos jepni 100 %

Raklli - .......(heshtje..)

Miki - Hë ktu je ?! Apo të të le të mendohesh ?

Raklii - Jo mer jo ska problem...

Miki - Hë..

Raklli - Dërgoi të falat e mia Benit dhe thuji të mos bëhet merak...qypin do vi ta marr personalisht javës tjetër në Elbasan e ta pijmë një kafe...

Miki - Je njish...flm shumë...

Raklli - Asgjë..

Miki - Hajt se flasim të shtunën...

Raklli - Dhe mbas të shtunës se do vij të pij atë kafen në Elbasan...

Miki - Ahh ok.Hajt shnet

Raklli - Shnet plako


*Emrat e marrë si shembuj janë zgjedhur rastësisht dhe nuk kanë të bëjnë aspak me situatën karagjoze në fjalë.



Ja e shikoni se si mund të blihet një ndeshje!!!

Ja mu ngrit mua (ideja) dhe thashë të ble nja dy ndeshje për hesap të Elbasanit.Dhe ngre tel,prezantohem si tjetëkush dhe flas me një lojtar të shquar të Kombëtares sonë dhe që Besa ka nderin ta ketë përsëri në gjirin e saj.Ju lexuat dhe më lart se si e bleva me një qyp... lol
Kështu sipas këtij robit (z.Nexhat Bizhdili) çdokush mund të marrë tel e të bëjë pislliqe në emër të Sk.Elbasanit,por ngrihet pyetja.A ka ky exemplar prova konkrete që merr guximin e bën akuza të tilla publike e skandaloze..?!
Kjo pyetje sikur nuk shkon pasi individë të tillë të papërgjegjshëm nuk dinë se çdo të thotë ecuri pozitive e bazuar në investime serioze dhe përkrahje pa kushte të tifozerisë më të zjarrtë vitet e fundit në mbarë Shqipërinë.Le ti verë gishtin kokës ky karagjoz,të respektojë në rradhë të parë sportdashësin kavajs dhe të mos bëhet lodër e të tjerëve....

Dhe së fundi : Ne tifozët verdh e blu i kërkojmë Presidentin të së respektuarës Besës së Kavajës që të vërtetojë akuzat e bëra,dhe eventualisht tja paraqesë organeve kompetente për zhvillimin e procedurave juridike përkatëse.Në rast të kundërt kërkojmë të mos bëjë më gam gam si ndonjë curvickë e keqe,e mos hedhi baltë mbi një ekip që ka vërtetuar që është ekipi më i pastër moralisht në gjithë vorbullën e pislliqeve të futbollit shqiptar.

Verdh e Blu

[miko]

Laze: S'kam folur me askënd, jo më me Bizhdilin

"Më vjen sinqerisht keq kur e kam mësuar një deklaratë të tillë. Unë kam pasur shumë miqësi me presidentin e Besës dhe jam habitur nga një gjë e tillë. Sa për dijeni të të gjithëve, unë kam disa ditë që ndodhem në Maqedoni dhe tani në këtë momente po ndjek ndeshjen Shkëndija-Vardar. Le të më thotë, qoftë Bizhdili, qoftë ndonjë tjetër, nëse ka pasur ndonjë telefonatë prej meje, apo të kem çuar ndonjërin në emrin tim në Kavajë. Unë as me ndonjë anëtar të ekipit nuk kam komunikuar, pasi kam pasur punët e mia. Unë e di përse bëhen këto gjëra, për të na thyer moralisht dhe për ta njollosur emrin e Elbasanit. Tashmë jemi mësuar me gjëra të tilla, prandaj i bëj thirrje ekipit që të përkushtohet edhe më shumë, për t'i treguar jo vetëm Kavajës, por gjithë Shqipërisë se do të shpallemi kampionë me meritë." Kështu është shprehur dje për "Sportin shqiptar" presidenti i Elbasanit, Arben Laze, i cili së bashku me ortakun Çërraga po ndiqnin në Maqedoni një ndeshje futbolli. Të dy financuesit e Elbasanit po vëzhgojnë një mesfushor me tipare sulmuese të Vardarit, me të cilin kanë lidhur një parakontratë.


Marrë nga www.sportishqiptar.com.al